Epereu 7:1-28
7 Pyno ahenoi teran saꞌawyꞌi wuat paꞌi wato Mekeseteki etiat. Miꞌi ti morekuat no topyhuꞌat mekewat Ierusarẽi notiat maꞌato mekewat eꞌat pe tawa Sareĩ iꞌatuꞌe taꞌatupusu puo maꞌato aipusu puo tawa woꞌowese e hap watoꞌe. Saꞌawyꞌi ti Tupana tiꞌairo temiit Mekeseteki paꞌi koro wuat miitꞌin ehay enoi tepiat hamuat. Tupana poꞌog ywaiti wuatꞌi kawiat miꞌairo Mekeseteki. Saꞌawyꞌi Aparãu taꞌaipok woꞌoꞌauka hap wato kaipyi wanikaptiaria atuuka hap kaipyi. Iꞌatuekat yne topo piat wywo tuut. Miꞌi hap tote muap upi paꞌi wato Mekeseteki tipuẽti. Miꞌi hawyi toipoityro ahaꞌaseꞌi Aparãu.
2 Miꞌi hawyi Aparãu hoꞌoium tope wanikaptia pohari hap koꞌi ipatꞌok. 10 rakat kaipyi tutum wẽtup iwat. Iwato tutum paꞌi akag Mekeseteki pe. Mekeseteki set aipusu puo woꞌoewaku nug hat akag e. Miꞌi ti morekuat tawa Sareĩ totiat. Sareĩ aipusu puo woꞌowese hap. Miꞌi pote Mekeseteki topyhuꞌat woꞌowese hap nug hat akag aipusu puo e. Aipotypot Iesui ewywuat topyhuꞌat morekuat Mekeseteki.
3 Maꞌato Mekeseteki uwe iꞌywot kuap hat yt toꞌe i miwan miat pote. Uwe ity kuap hat yt toꞌe i iwan miat pote. Iꞌewyte uwe imepytꞌin kat ywania hap yt uwe i ikuap yt toꞌe i iwan me pote. Sio iꞌywaĩꞌĩ hap toĩ sio yt hap yt watikuap i yt toꞌe i pote. Sio ikuꞌuro sio yt hap yt toꞌe i pote yt watikuap i. Yt uwe i ikuap miꞌi pote wuatꞌi eꞌat piat miit ewy topyhuꞌat morekuat Mekeseteki. Miꞌi pote wuatꞌi eꞌat piat miitꞌin epaꞌi koro ewywuat topyhuꞌat. Miꞌi pote Tupana Saꞌyru ewywuat kahato topyhuꞌat. Miꞌi Ahepaꞌi wuatꞌi eꞌat piat iãꞌãkap kahato.
4 Uiꞌywania waku watuwanetup morekuat Mekeseteki kape katupono Iesui eꞌyian miat iãꞌãkap kahato topyhuꞌat miꞌi. Miitꞌin mimowato kahato miꞌi. Ahaꞌaseꞌi koro Aparãu mimotypot miꞌi. Taꞌi tohoꞌopatꞌok kahato tewanikap pohari hap kaipyi tohoꞌoium wẽtup 10 rakat kaipyi morekuat Mekeseteki pe. Miꞌi ti poꞌog Aparãu kai topyhuꞌat katupono tohoꞌoium tope.
5 Saꞌawyꞌi aseꞌi Aparãu emiariru Irewi e hap het rakat toineꞌen ahepaꞌi koro wo. Miꞌi hawyi yne Irewi saipepiaria tukupteꞌen ahepaꞌi wo. Miꞌiria pe mesup watum aimiium koꞌi Irewi saipepiaria pe paꞌi kororia pote Irewi saipepiaria pote. Aikotã Tupana toꞌe hap ewy -Ehoꞌoium o uhepe eimikoi hat koꞌi wẽtup 10 rakat kaipyi paꞌi koro Irewi saipepiaria pe e hap ewy. Kat e hap kat e hap eimipuẽti kaipyi ehoꞌoium o uhepe wẽtup 10 piat e Tupana. Pyno mesup te aito Aparãu emiariruꞌin koꞌi wahoꞌoium ahekat paꞌi koro Irewi saipepiaria pe. Maꞌato saꞌawyꞌi Irewi tum tekat Paꞌi Koro Mekeseteki pe katupono Irewi eꞌaseꞌi Aparãu tum tekat Paꞌi Koro Mekeseteki pe pote Irewi tum wy tekat Paꞌi Koro Mekeseteki pe teꞌaseꞌi Aparãu po wo tutum hap ewy. Miꞌi pote Paꞌi Mekeseteki Saipepiat Iesui topyhuꞌat poꞌog Ahepaꞌi Koro wo ahepaꞌi koro Irewi saipepiaria kai katupono Irewi iꞌewyte hum haꞌup Paꞌi Koro Iesui Mekeseteki Saipepiat pe.
6 Maꞌato paꞌi koro Mekeseteki yt Irewi ywania hin i. Yt Aparãu kaipywiat i maꞌato yt uwe i ikuap kat ywania morekuat Mekeseteki toineꞌen. Miꞌi kape ahaꞌaseꞌi sese hum wuatꞌi kat koꞌi kat koꞌi. Toipatꞌok hawyi tohoꞌoium paꞌi Mekeseteki pe. Miꞌi hawyi paꞌi Mekeseteki tipoityro raꞌyn ahaꞌaseꞌi Aparãu e -Tupana emowato e Aparãu me. Tupana mipoityro toipoityro te.
Saꞌawyꞌi Wuat Mekeseteki Etiat Tohenoi
7 Pywo ti rat poꞌog Aparãu kawiat iwato Mekeseteki kat pote yt poꞌog i miꞌi pote yt toipoityro kuap i.
8 Miꞌi tupono koitywy aito aiꞌywania miium koꞌi watum Irewi ywania pe maꞌato Irewi ywania ikuꞌuro rakaria wo tukupteꞌen torannia maꞌato Ahepaꞌi Koro pakup Iesui yt miꞌi tã i mesup. Aikotã toꞌe saꞌawyꞌi wuat miwan me hap ewy -Miꞌi Miit toineꞌen wuatꞌi eꞌat piat Paꞌi wuat e. En ni Paꞌi wato Mekeseteki ewywuat e miwan me morekuat Tawi wepy hawe.
9 Pyno saꞌawyꞌi wuat ahaꞌaseꞌi koro Aparãu tum naꞌyn paꞌi koro Mekeseteki pe tomiium koꞌi. Pyno Aparãu topyhuꞌat paꞌi Irewi eꞌaseꞌi. Miꞌi tupono saꞌawyꞌi paꞌi Irewi topyhuꞌat teꞌaseꞌi Aparãu piit pe. Miꞌi hawyi Aparãu tum tomiium Mekeseteki pe turan paꞌi Irewi iꞌewyte hum tomiium koꞌi Mekeseteki pe Irewi eꞌaseꞌi Aparãu po wo yt tuwemoherep i te turan. Katupono paꞌi Irewi eꞌyian mete haꞌaseꞌi Aparãu tum imiium Mekeseteki pe. Miꞌi turan Irewi toineꞌen ne iãꞌỹi wo Aparãu piit pe imiariru Irewi pote. Miꞌi tã ahaꞌaseꞌi iꞌewyte torannia aito Aparãu emiariruꞌin watum yne aimiium Tupana piat Mekeseteki pe Aparãu saipepiaria iãꞌỹi koꞌi Iesui pote.
10 Saꞌawyꞌi toꞌopuẽti muap tote morekuat Mekeseteki wywo ahaꞌaseꞌi Aparãu. Miꞌi turan ahaꞌaseꞌi paꞌi koro Irewiꞌin ahaꞌaseꞌi Aparãu piit te tukupteꞌen hãꞌỹi ewy yt hẽtyt i te rakat ewy. Miꞌi hawyi taꞌatuium itote ahaꞌaseꞌi Aparãu po wo.
11 Pywo ti rat paꞌi kororia koꞌi Irewiꞌin kaipyi yt tuut i aimohãpyk hap Tupana wywuat hap. Yt kat i rat ahehakyeraꞌat hap miꞌiria kaipyi. Aiꞌywania ewaĩ hap yn tuwemoherep ainapin Tupana kaipywiat hap Tupana ehay kat som waku watunug hap watikuap Muisei eꞌaseꞌi Irewi wẽ pyi. Irewi ywania kaipyi Muisei tuwemoherep maꞌato Tupana toꞌe saꞌawyꞌi -Tuut aru wẽtup ok Ehepaꞌi Koro pakup e. Miꞌi Miit ti Paꞌi Koro Mekeseteki ewywuat toineꞌen e Tupana saꞌawyꞌi morekuat Tawi pe. Pyno Ahepaꞌi Koro sese yt tuut i Muisei ywotꞌin Irewi ywania kaipyi iꞌewyte yt Muisei ywania kaipyi i te wy. Miꞌi pote paꞌi Muisei ehay yt aimohãpyk kuap i Tupana wywo. Maꞌato aimohãpyk hamuat Tupana tipoꞌoro wẽtup ok i Aiporekuat no Ahepaꞌi Koro wo mekewat Mekeseteki Ewywuat Ahehakyeraꞌat Hat Iesui.
12 Pyno Ahepaꞌi Koro ipakup takat yt Irewi ywania ewywuat i maꞌato wẽtup kaipyi raꞌyn ipakup takat toineꞌen. Ahepaꞌi Pakup Iesui kaipyi ainapin Irewi piat yt hap ewy i. Iꞌewyte Irewi emiariru Muisei yt ewywuat i. Iꞌewyte Muisei ywyt Arãu yt kaipyi i Iesui maꞌato Ahepaꞌi Pakup Iesui kaipyi raꞌyn ainapin hap tuut aimohãpyk kuap Tupana wywuat hap sese. Muisei piat ainapin hap yt ewywuat i.
13 Ahaꞌaseꞌi Muisei yt kaipyi hin i Ahepaꞌi Koro Iesui. Yt Muisei suu yt ewywuat i katupono Ahaꞌaseꞌi Iuta emiariru Emiariru ti Iesui. Yt karãpe i ahaꞌaseꞌi Iuta emiariruꞌin tukupteꞌen ahepaꞌi koro wo. Yt karãpe i Iuta ywania tum aihũria Tupana pe aria pe mekewat yparakai aihũ wuk hap nu kawiat tote. Maꞌato miꞌi pykai mesup topyhuꞌat Ahepaꞌi Akag wo Iesui mekewat Mekeseteki ewywuat.
14 Iꞌewyte watikuap kahato ahaꞌaseꞌi Iuta emiariru emiariru kaipywiat tuut Ahehakyeraꞌat hat Tupana Mipoꞌoro Aiporekuat nuat hap. Maꞌato Tupana yt toꞌe i -Iuta ywania kaipyi tuwẽtem ahepaꞌi koro yt e i. Maꞌato watikuap Iesui topyhuꞌat Ahepaꞌi Koro wo hap maꞌato wẽtup kaipyi Mekeseteki paꞌi koro ewywuat. Yt Irewi ywania i maꞌato Mekeseteki ewywuat e hap kaipyi watikuap.
15 Iesui topyhuꞌat Paꞌi Koro wuat miitꞌin yt eko ewy hin i. Heremo kahato miꞌi mesup watikuap taꞌyn Iesui tuwemoherep mekewat Mekeseteki ewywuat sese. Aikotã aikotã Tupana toꞌe hap ewy. Miꞌi ewywuat topyhuꞌat Ahepaꞌi Koro wo.
16 Tupana miꞌairo Iesui Ahepaꞌi Koro wuat maꞌato yt aheko upi hin i toiꞌairo. Aikotã iraniaꞌin aimiꞌairo ahepaꞌi yt ewywuat hin i. Yt ahaꞌaseꞌi Irewi saꞌyruꞌin hin i Miꞌi maꞌato miꞌi pykai Tupana tiꞌairo katupono wuatꞌi eꞌat piat ieineꞌen hat Iesui pote mekewat Mekeseteki ewywuat toiꞌairo Ahepaꞌi Koro wuat sese Miꞌi.
17 Pyno ti mekewat miwan me mio tã e saꞌawyꞌi te Tupana toꞌe -Uhaꞌyru mesup woroꞌairo En miitꞌin Epaꞌi Koro wo maꞌato yt karãpe i raꞌyn ekahuro En Paꞌi Porekuat no hap e. Paꞌi Mekeseteki ewy En e saꞌawyꞌi Tupana Tawi wepy 110.4 hap we.
18 Mekewat saꞌawyꞌi wuat paꞌiria aimuꞌe hap koꞌi ainapin hap koꞌi aiꞌywania wat yt putꞌok e i ahehay moherep Tupana kapiat hamo. Yt hesaika i miitꞌin mohãpyk Tupana wywuat hamo. Miꞌi pote Tupana toꞌe -Yt kan hamo i iꞌatueko e katupono yt putꞌok e i miitꞌin ekyi uhowawiat hamo miitꞌin mohãpyk hamo e Tupana.
19 Saꞌawyꞌi wuat ahepaꞌi aimotag teran tehay wo saꞌawyꞌi wuat ainapin hap koꞌi ete. Toimopakup teran yne maꞌato mekewat saꞌawyꞌi wuat waku wen maꞌato yt hesaika i aimowaku hamo. Yt aimoperupꞌi kuap i mekewat Muisei piat ainapin hap. Yt aimohãpyk kuap i yt watunug i pote. Watiꞌaparap yne miꞌi hap koꞌi ete pote. Paꞌi Muisei waĩꞌe hap upi yt kat i muap Tupana kapiat hap katupono yt watunug kuap i yne Muisei piat ainapin hap koꞌi pote. Maꞌato watomohey Paꞌi Koro wo Iesui hawyi meremo watikuap Tupana.
20 Pyno saꞌawyꞌi Tupana kapiat ihay rakat tukupteꞌen paꞌi koro wo miitꞌin miꞌairo koꞌi. Maꞌato Iesui Ahepaꞌi Sese wuat Tupana Miꞌairo toineꞌen. Tupana ehay kaipyi topyhuꞌat Ahepaꞌi Wato wo. -Pywo ti rat woronug En Wuatꞌi Miitꞌin Epaꞌi Wato wo e Tupana. Ewẽ pyi yn atikyꞌesat miitꞌin ehay enoi hap e. Karãpe ehay turan meremo emiẽtup atum epe e Tupana Iesui pe. Emiit miẽtup ewẽ pywiat atum yne e. Karãpe uhehay teran miitꞌin kape miꞌi hawyi ewẽ pyi yn uhehay e. Miitꞌin Epaꞌi Wato wo woronug En e Tupana Iesui pe Wuatꞌi Eꞌat Piat Ieineꞌen Hanuat En mote e.
21 Miꞌi pote woroꞌairo En Paꞌi Wato wuat mekewat paꞌi wato Mekeseteki Saipepiat En e Tupana miwan me Iesui piat pe. Yt karãpe i Tupana toꞌe iraniaꞌin paꞌiria pe mio wat toꞌe hap ewy. Iꞌewyte Muisei pe iꞌewyte hãipe piaria pe Tupana yt toꞌe i mekewat toꞌe hap ewy maꞌato Tosaꞌyru pe yn toꞌe -En ni Uimiꞌairo Miitꞌin Epaꞌi wuat wuatꞌi eꞌat piat ieineꞌen hanuat e. Yt uheso i rat e Tupana saꞌawyꞌi Iesui piat morekuat Tawi wepy 110.4 piat pe.
22 Taꞌi waku sakpo Iesui Ahepaꞌi Akag wo watipuẽti poꞌog poꞌog iraniaꞌin paꞌi koꞌi kai. Katupono Tupana toꞌe hap ewy -En ni Uimiꞌairo Paꞌi wato wo e maꞌato yt karãpe i toꞌe Tupana iraniaꞌin paꞌiria pe miꞌi tã e hap.
23 Saꞌawyꞌi wuaria iꞌatu kahato paꞌiria tukupteꞌen map haria neꞌi pote yt ieineꞌen motꞌi paꞌi wo itote. Wẽtup ikuꞌuro hawyi toineꞌen wẽtup i raꞌyn haipepiatno. Maꞌato Wẽtup Ok yn waku Iꞌatuꞌakag Sese Miꞌi ti Iesui wẽtup ok takat.
24 Maꞌato koran paꞌi wato sese mesuwarotiat yt ewy hin i katupono Miꞌi ieineꞌen wuatꞌi eꞌat piat hamuat Paꞌi Pakup mo. Mesuwarotiat paꞌi koꞌi ikuꞌuro yne pykai toineꞌen ne wẽtup teiam me atipy pe.
25 Ahepaꞌi Wato Pakup Iesui ahehakyeraꞌat kuap yne mesuwarotiaria torannia ywania e. Pywo ti rat torannia Tupana kapiaria toiꞌatuehakyeraꞌat kuap taꞌatukyꞌesat imohey hawyi katupono Miꞌi Miit ti muap Tupana kapiat. Koitywy uwe uwe miꞌi muap upi toto Tupana kape Miꞌi Miit tuwat hupi haria putꞌok iꞌatuꞌe Tupana kuap hap kape e. Kat emiit kat emiit putꞌok e kuap Tupana kape Miꞌi Paꞌi sehay upi. Ahehay enoi oktan tohenoi Tupana pe. Yt toimaꞌat hin i Toꞌywot ahehay wo iꞌewyte tohẽtup kahato aikawiatno Tupana pe Ahepaꞌi Wato Iesui.
26 Miꞌi miit ti waku kahato Ahepaꞌi Wato wo katupono aikawiatno hat aiwy kahato topyhuꞌat. Aimikyꞌesat toikuap kahato. Poꞌog poꞌog waku iraniaꞌin paꞌi koꞌi kai. Yt uwe i poꞌog Miꞌi Miit kai. Tupana ewywuat wanetup hat Miꞌi Miit. Tupana ewywuat wakuat nug hat Miꞌi Miit Iesui. Miꞌi pote Ahepaꞌi wo waku kahato. Yt aimaꞌat kuap i. Yt aiꞌaparap kuap i. Iꞌewyte yt uwe i iꞌaparap kuap teko saꞌag wo. Waku kahato Ahepaꞌi Wato wo. Yt karãpe i toiꞌaparap iraniaꞌin miitꞌin ewy aiꞌewy. Pywo ti rat poꞌog poꞌog waku wuatꞌi paꞌi koꞌi kai Ahepaꞌi wo Iesui iraniaꞌin iꞌaparap aparap haria neꞌi pote. Tupana Mimotypot sese Ahepaꞌi pakup. Yt uwe i atipy pe poꞌog miꞌi rẽ Tupana Mimotypot kai -En poꞌog poꞌog atipy piaria kai e Tosaꞌyru pe yn. En poꞌog poꞌog rakat torannia kawiat e Iesui pe.
27 Ahepaꞌiria mesuwarotiat iꞌaparap aparap kahato Tupana piat taꞌatupotpap nug hap ete. Aiꞌywania paꞌi koꞌi tiꞌauka taꞌatuhũria taꞌatuꞌatuwuk wuk mohag wo taꞌatuminug saꞌag moweityk hamo -Uruiꞌaparap taꞌyn ewowi Tupana iꞌatuꞌe hamuat. Ereineꞌen waure wo uruminug saꞌag kai iꞌatuꞌe. Iꞌewyte saꞌawyꞌi taꞌatuꞌauka aihũria aiminug saꞌag pohag wo. Aihũria suu wywo taꞌatumoweityk teran ahepiat iꞌaparap hap. Taꞌatuhãꞌãg kahato miꞌi hap ete. Maꞌato mio Iesui ikuꞌuro aihũria ewy aikawiatno aipohag wo aiminug saꞌag moweityk hamo Ahepaꞌi Wato pote. Yt kat i tominug saꞌag pykai ikuꞌuro aiminug saꞌag upi tohoꞌopot aiꞌapiheg hap tutuꞌu hamo. Wẽtup mo yn ikuꞌuro hawyi tuweium Tupana pe aiꞌapiheg hap saꞌup mo yt kat i tominug saꞌag pykai. Ikuꞌuro aikuꞌuro hap u hamo. Wẽtup mo yn ikuꞌuro miꞌi hap yn imoma raꞌyn aiminug saꞌag. Maꞌato iraniaꞌin paꞌi akag koꞌi aihũria atuuka kahato iꞌewyte taꞌatuhũria aat kaꞌap. Maꞌato Iesui ti wẽtup mo yn ikuꞌuro hawyi waku raꞌyn koitywy e Tupana. -Waku raꞌyn e.
28 Iraniaꞌin paꞌi koꞌi aimiꞌairo koꞌi Irewi eko ewywuaria miꞌiria miit aipuꞌi ewywuat taꞌatuꞌaparap aparap kahato aiꞌaparap hap ewy yne yt naku i nug hawiat. Ikuꞌuro rakaria aiꞌewy ahepaꞌi akag koꞌi mesuwarotiaria. Miꞌiria yt naku i nug haria aiꞌewy mesuwiaria paꞌi koꞌi. Maꞌato Ahepaꞌi Akag Sese Iesui pakup we Tupana toꞌe haty wo -Woronug En Wuatꞌi Miitꞌin Epaꞌi Koro wo aru saꞌawyꞌi wuat mekewat paꞌi Mekeseteki ewywuat woroꞌairo En e haty wo saꞌawyꞌi Iesui pe. Iꞌatu kahato paꞌi mesuwe tukupteꞌen e maꞌato miꞌi turan woroꞌairo En wuatꞌi miitꞌin Epaꞌi Wato wo e Tupana miwan me. Miꞌi hawyi ti aru ereineꞌen naꞌyn wuatꞌi eꞌat piat miitꞌin Epaꞌi wo e Tosaꞌyru pe. Waku En Paꞌi wo Uhaꞌyru e katupono En yn uiꞌewy Uhaꞌyru e Tupana Tosaꞌyru pe.
