Epereu 8:1-13
8 Pyno ahenoi i ehepe toꞌe Ahehay Enoi Toꞌywot piat hat ete. Miꞌi taꞌapyk Toꞌywot po sese kai aikope Tupana taꞌapyk Morekuat Akag wo hap tote Tupana po sese kai taꞌapyk wuatꞌi mimotypot rote Tupana motypot eiam sese tote.
2 Miꞌi tote tohẽtup hẽtup ahupi ahepaꞌi koro wo toineꞌen pote ipotpap mekewat atipy piat Tupana eiam sese pe. Saꞌawyꞌi paꞌi akag Muisei tunug yahig note Tupana motypot yat piat pe kawiat ipe hup ipe herypꞌi kawiat tutunug iꞌewyte sokpe kawiat. Ikahu rakat tutunug. Miꞌi hap tote Muisei topyhuꞌat paꞌi wo. Maꞌato Ahepaꞌi sese Iesui topyhuꞌat atipy pe Tupana motypot eiam sese tote ikahu rakat rote yt miitꞌin minug hin i hap tote toineꞌen. Ipotpap Paꞌi wo poꞌog poꞌog Muisei minug kawiat rote katupono Tupana minug note ipotpap.
3 Karapeĩ ahepaꞌi koꞌi mesuwarotiaria aimiꞌairo koꞌi iꞌatupotpap aimiium Tupana piat hap ete taꞌatuium aimiium tope hawyi taꞌatuꞌauka aihũria Tupana piat taꞌatumiium mo. Maꞌato Iesui Tupana miꞌairo Ahepaꞌi Wato Iesui wo hawyi tutum Toꞌywot Tupana pe Toꞌywot mowehum hap kahato koꞌi. Aikawiatno hamuat ipotpap hap. Iwat imiium Toꞌywot piat koꞌi poꞌog waku aihũria kai katupono tosuu aikawiatno hamo.
4 Ahepaꞌi Sese Iesui ti yt paꞌi Irewi ywania saipepiat hin i. Miꞌi pote poꞌog Paꞌi wo paꞌi Irewi kai poꞌog mekewat Muisei minug sokpe kawiat Tupana motypot yat epaꞌi wato kai katupono toineꞌen kuap Ahepaꞌi atipy piat iꞌewyte mesuwe Ahepaꞌi wo toineꞌen wuatꞌi eꞌat piat.
5 Pyno mesuwarotiat Tupana eiam Muisei minug yahig notiat aikotã Tupana eiam sese atipy piat iãꞌãkap ewy kahato. Ahepaꞌiria mekewat sokpe kawiat piat motpap nug haria tukupteꞌen atipy pe Tupana eiam notiat motpap ewywuat Ahepaꞌi Wato Iesui iãꞌãkap ewywuat. Aikotã Tupana toꞌe Muisei pe haꞌawyte mio tã e -Eweꞌeg o Muisei e. Waku etunug o uimotypot yat uiꞌe hap ewy e. Atikyꞌesat hãpyk kahato uiꞌe hap ewywuat hap e. Aikotã atomoherep epe saꞌawyꞌi yityꞌok tote hap ewy etunug o atipy pe e. Kat kupitu kat kupitu areꞌe yityꞌok tote hap ewy etunug o e Tupana Muisei pe tutunug inug hap eꞌyian mete.
6 Pyno Tupana tunug naꞌyn wẽtup ok Ahepaꞌi Ipakup takat raꞌyn Tosaꞌyru kawiat. Miꞌi poꞌog heropat kuap torannia paꞌiria mesuwarotiaria kai. Miꞌi ti ahehay Tupana kapiat enoi kuap kahato Toꞌywot Tupana piat hat. Iꞌewyte ti Tupana Ehay Moherep Ahepiat Hat sese Miꞌi. Aiwoꞌowese hap toꞌywot wywuat nug hat sese Miꞌi Miit Akag. Koitywy poꞌog aiwesat kuap Tupana katupono ahehay enoi kuap hat toineꞌen naꞌyn miꞌi pote poꞌog waku iraniaꞌin saꞌawyꞌi wuaria paꞌiria kai. Miꞌi pote mio tã toꞌe Tupana tope -Atunug aru uiꞌe hap ewy Uhaꞌyru e. Woronug En wuatꞌi epaꞌi koro wo wuatꞌi eꞌat piatno e Tupana. Yt karãpe i Tupana toꞌe miꞌi tã iraniaꞌin paꞌi pe. Yt Muisei pe te wy maꞌato mio tã Muisei pe -Eipe mesuwarotiaria paꞌi koꞌi wo worohoꞌonug e yn.
7 Saꞌawyꞌi Tupana toꞌe Muisei pe -Atikyꞌesat en miitꞌin woꞌowese nug uiwywuat hap e. Miꞌi hap ete Muisei ipotpap kahato waku kahato maꞌato meiũran Tupana toꞌe tope -Atunug aru wẽtup ok Paꞌi wo Esaipepiat e. Wẽtup ok atiꞌairo En ewywuat woꞌowese hap nug miitꞌin wywuat hat e. Miꞌi uhemiit sese e katupono Muisei yt putꞌok e i woꞌowese hap nug sese hamo. Miꞌi pote Tupana tunug wẽtup ok i Muisei ewywuat Paꞌi Sese wo.
8 Saꞌawyꞌi Tupana toꞌe ahaꞌaseꞌiꞌin me -Yt putꞌok e i Muisei uiwywuat woꞌowese nug hamuat e. Miꞌi pote aru meiũran woꞌowese hap nug hat ipakup takat atunug e aiꞌywania saꞌawyꞌi wuaria pe mekewat Isareu ywania pe. Yt ewetunug hin i uiꞌe hap ewy pote e aseꞌi Iuta ywania pe. Miꞌi pote wẽtup woꞌowese hap atunug aru wẽtup ok kawiat e.
9 Saꞌawyꞌi atiꞌatuehakyeraꞌat eiꞌywania wanikaptia po pyi iꞌewyte atiꞌatuꞌykesat yi Esitu kaipyi e. Miꞌiria yahig note atiꞌatunapin uhehay wo -Ewetunug o uhepiat einapin hap pote ti aru eiꞌykesat hatno areineꞌen e. Miꞌi hawyi -Pyno urutunug eꞌe hap ewy iꞌatuꞌe uhepe maꞌato taꞌatunapin uhepiat hap taꞌatupun neꞌi. Yt teꞌeruwanetup i poꞌog uhehay kape pote yt atiꞌatuwesat kuap poꞌog miꞌiria e Tupana miwan me.
10 -Pyno woꞌowese hap ipakup aru atunug i uhehay moheg hamuat e Tupana aiꞌywania pe. Ikahu rakat aru atunug mesup e. Saꞌawyꞌi atiwan nu ete uhehay maꞌato mesup eipyꞌa pe eiwanetup hawe atiwan uimikyꞌesat ewetunug hamuat uhehay einapin hap. Aikotã saꞌawyꞌi nu ete atiwan iheg me miꞌi hap ewy mesup iheg me eipyꞌa pe uhehay atiwan e. Ehetupana wo sese areineꞌen mote uimowepiit haria aru eweikupteꞌen uhaꞌyruꞌin uhakiꞌytꞌin areꞌe aru ehepe. Mekewat eꞌat pe areineꞌen Ehetupana wo sese e. Waku watukupteꞌen mekewat eꞌat pe woꞌowese haria wo e.
11 Mekewat eꞌat pe uheiam mo eweikupteꞌen e. Uhehay kuap haria wo yne eweikupteꞌen eipe. Ahowapy raꞌyn yne eiperia Uipaꞌãu wo e. Mekewat eꞌat pe uimepytꞌin haryporiaꞌin ihainiaꞌin torannia eipe eweikupteꞌen e. Uikuap haria eweikupteꞌen yne eiperia tuꞌisaria wo morekuaria wo miit eropat haria wo uheiam mo eweikupteꞌen e. Mekewat eꞌat pe yt uwe i eiperia -Urumuꞌe ro urumuꞌe ro eweiꞌe iraniaꞌin me Tupana kuap hamo katupono mekewat eꞌat pe uikuap haria yne eipe eweikupteꞌen e. Uikuap sese haria sok eweikupteꞌen eipe e Tupana. Iꞌewyte uhemiitꞌin uikuap haria wo eweikupteꞌen e. Iꞌewyte iwatoꞌin nakaria uikuap takaria yne eipe uikuap sese haria wo eweikupteꞌen mekewat eꞌat pe e.
12 Waku kahato mekewat eꞌat pe katupono mekewat eꞌat uimaꞌat ehepiat hap atiwaure yne e. Atoiat aru eiꞌapiheg hap mekewat eꞌat pe e. Yt atunug i maꞌato ihakyꞌeꞌi rakatno areineꞌen e. Worohoꞌokyꞌe pote uipohep eiꞌapiheg hap ete yt hãpyk hin i eipe saꞌawyꞌi pykai yt naku i nug haria eipe saꞌawyꞌi pykai e. Uimaꞌat ehepiat hap iꞌatu kahato pykai waure wo areineꞌen eimiꞌaparap uhepiat saꞌawyꞌi wuat koꞌi ete. Miꞌi hawyi ipakup we watopyhuꞌat e. Wẽtup miit ewywuat yn ahehay topyhuꞌat mekewat eꞌat pe aru e. Mekewat eꞌat einapin uhepiat hap nug haria wo eweikupteꞌen iꞌewyte atunug uiꞌe hap ewy e. Waku pe kahato watoineꞌen e. Miꞌi hawyi saꞌawyꞌi wuat yt naku i hap yt ewy hin i eweikupteꞌen e. Taꞌi mekewat eꞌat ipakup we eweikupteꞌen e. Pyno mekewat saꞌawyꞌi wuat Muisei kaipywiat aiwoꞌowese hap nug hap yt putꞌok e hin i woꞌowese hap nug hamuat e. Mekewat eꞌat pe aru yt uwe i tuwanetup kape ipakup poꞌog poꞌog waku pote e.
13 Aikotã nem nakat ewy aiwoꞌowese saꞌawyꞌi wuat hap topyhuꞌat aikotã ikuꞌuro rakat ewy ipotꞌi rakat tuweityk hap ewy raꞌyn. Miꞌi hawyi ipakup aiwoꞌowese hap topyhuꞌat mekewat eꞌat pe waku kahato rakatno e Tupana saꞌawyꞌi miwan me aipytꞌatnug Topaꞌãu wuat hap ete Iesui Paꞌãu aipiit piat hap ete.
