Epereu 9:1-28
9 Pyno nimo Tupana tunug aiꞌywania wywo woꞌowese hap maꞌato mesumuat towese hap yt ewywuat i. Mekewat woꞌowese saꞌawyꞌi wuat hap niatpo kahato aikotã hãpyk tomotypot hap aikotã toikyꞌesat tomotypot yat hãpyk sese hap tohenoi ahepe. Niatpo kahato toꞌe -Ewetunug yne uiꞌe hap ewy pote waku pe eweikupteꞌen yt pote yt e tohenoi nimo.
2 Aikotã toikyꞌesat tomotypot yat typy akipy rakat. Aikotã toikyꞌesat wẽtup kai ariãty hekat rakat nu mehit kawiat iꞌewyte mekewat yparakai man eiam toikyꞌesat wẽtup kai hawyi toikyꞌesat taꞌatusetꞌok wakuat eꞌokipy e hap.
3 Tupana eꞌokipy toineꞌen okenhyp towat i te itote ekuekai. Miꞌi ti toikyꞌesat taꞌatusetꞌok wakuat eꞌokipy e hap Tupana Paꞌãu eiam mote. -Waku ewetunug sokpe iꞌanam nakat mo topyhyp we Tupana Paꞌãu eiam ete e. Tupana Paꞌãu eiam sese poꞌog poꞌog wakuat torannia kai e hap tohenoi. Wẽtup kai Tupana motypot hap sese topyhuꞌat maꞌato wẽtup kai Tupana Paꞌãu eiam topyhuꞌat e.
4 Itote toineꞌen ikamhig se rakat wuk hap eiam Tupana motypot yat mokamhig se hamuat hap. Miꞌi eiam imehit kahato iheg nakat hekat rakat nu uru kawiat e. Mekewat akipy tote toineꞌen amyap ewywuat ariaꞌyp kawiat e. Tupana Paꞌãu toineꞌen mesuwe iꞌatuꞌe hap. Mekewat amyap pe imehit rakat kawiat nu uru kawiat ikahu kahato Tupana Paꞌãu amyap iꞌatuꞌe hap. Miꞌi pe waku Tupana ihay aiwywo iꞌatuꞌe teiam me pyi iꞌatuꞌe saꞌawyꞌi. Miꞌi heiam amyap ikaꞌa rakat toineꞌen hawyi ipuo kamuti hekat rakat iꞌewyte toineꞌen man atipy kaipywiat Tupana saꞌawyꞌi wuat mekewat iꞌaman ewywuat aat hat. Saꞌawyꞌi wuaria pusu puo man a iꞌatuꞌe mekewat pe. Mekewat Tupana amyap kaꞌa pe toineꞌen wy mekewat paꞌi Arãu poꞌyha saꞌawyꞌi wuat hẽtyt rakat haat rakat. Iꞌewyte toineꞌen mekewat puretig ewywuat maꞌato nu kawiat ipuo. Miꞌi tote toineꞌen Tupana wat miwan topo wuat puretig aikotã waku watunug aikotã yt naku i watunug hap. Miꞌi aiwoꞌowese hap aikotã waku watunug Tupana mowepiit hamuat enoi hap. Miꞌi ti puretig nu etiat iheg nakat etiat.
5 Itote toineꞌen ikahu kahato rakat amyap eꞌog atipy piaria mopy kuap haria ewywuaria imehit rakaria nu uru kawiat iꞌatupope topyhuꞌat heꞌog wo Tupana Paꞌãu amyap tote wẽtup kuekai wẽtup kuekai. Taꞌatuꞌãuka taꞌatupope wo Tupana Paꞌãu amyap. Miꞌiria iãꞌãkap koꞌi Kerupĩ Tupana ieineꞌen hap totiat. Niatpo kahato ahenoi yne mesuwat etiat uimiwan me aikotã Tupana motypot hap saꞌawyꞌi toineꞌen hap etiat. Miꞌi tã saꞌawyꞌi heiam mesuwarote iꞌyat sokpe kawiat miat pe kawiat.
6 Saꞌawyꞌi paꞌiria tuwehytꞌok wehytꞌok Tupana motypot yat pe aat kaꞌap maꞌato heiam sese pe yt tuwehytꞌok i. Miꞌi tote paꞌiria iꞌatupotpap kahato Tupana eropat hap ete. Paꞌiria wẽtup kai akipy kawiat pe yn iꞌatupotpap Tupana motypot hap ete paꞌi eꞌokipy tote maꞌato yt tuwehytꞌok kuap i Tupana eꞌokipy sese pe. Miꞌi tã paꞌiria saꞌawyꞌi wuaria aiꞌywania tunug mekewat sokpe kawiat miat pe kawiat Tupana motypot yat pe.
7 Maꞌato mekewat aiꞌywania paꞌi akag sese yn teke kuap aikope Tupana eiam toineꞌen hap tote. Mekewat sokpe iꞌanam nakat kawiat okenꞌypy pyhyp hap sakpo. -Paꞌi koro yn waku tuut mesuwe uhowowi e Tupana. Maꞌato yt yne eꞌat i waku e teke. Wẽtup anu wẽtup anu hap ewy yn Tupana Paꞌãu eiam sese kape toto saꞌawyꞌi paꞌi akag. Maꞌato yt teke kuap i yt aihũ suu yt kat i topo piat wywo. Topo piat aihũ suu wywo pote yn waku teke aimiꞌauka aihũ suu wywo miꞌi aiminug saꞌag weityk hamo. Miꞌi pote totioto mohag wo aihũria suu -Heno urumiꞌaparap saꞌup e. Heno emiitꞌin piaria aparap saꞌup e Tupana pe.
8 Aikotã Tupana toꞌe miwan me saꞌawyꞌi hap ewy -Yt uwe i teke kuap uhowowi e. Katupono uhowawiat eꞌakasa hap uhẽtyhot hap eiꞌauka hap topyhuꞌat katupono areineꞌen wakuat kahato pote e. Uimotypot eiam iꞌewyte waku kahato e Tupana Paꞌãu saꞌawyꞌi ahepe. Saꞌawyꞌi yt kat i muap Tupana kapiat wakuat sese pote. Mekewat Muisei minug sokpe kawiat miat pe kawiat Tupana motypot yat yt muap hin i Tupana kapiat. Miꞌi sokpe kawiat okenꞌypy hyp hap sokpe iꞌanam sakpo yt uwe i teke kuap Tupana kape.
9 Iesui auka hap moherep hamo taꞌatuꞌauka taꞌatuhũria saꞌawyꞌi. Taꞌi watikuap kahato iꞌatuhũria iꞌatumiium kaipywiat ahehakyeraꞌat Tupana piat hap ete Tupana hũ miium Tosaꞌyru ete aimowaku hap ete. Hãꞌãkap wo saꞌawyꞌi wuaria tunug aimuꞌe hamo. Saꞌawyꞌi wuaria iꞌatuwuk kahato taꞌatuhũria maꞌato yt putꞌok e hin i iꞌatuminug saꞌag hep hamo. Watunug kahato saꞌawyꞌi maꞌato haty kahato te aiwanetup hawe topyhuꞌat. Yt kat i -Mesup waku pe raꞌyn ereineꞌen Tupana e hap ahepiat hap aipyꞌa piat hap. Yt kat i -Mesup ti waure wo raꞌyn Tupana toineꞌen uiminug saꞌag ete e hap aiwanetup hawe. Saꞌawyꞌi Mesup te iꞌatuminug saꞌag iꞌatuwanetup hawe topyhuꞌat kahato te haty te iꞌatuwanetup hawe.
10 Yt putꞌok e hin i Muisei e hap watunug yne pykai. Watunug yne aipe aipiit aimiꞌu aheko Muisei ainapin hap ewy wen maꞌato miꞌi kaipyi yt kat i muap watipuẽti Tupana kape. Haty te aipyꞌa pe. Aiminug saꞌag moweityk hap yt kat i watipuẽti pote haty te aiwanetup hawe. Miꞌi turan putꞌok e muap aimohãpyk sese Tupana wywuat hamuat. Haꞌyru suu mohag kahato aimowepiit hamo aiminug saꞌag moweityk hamo. Miꞌi hawyi muap toineꞌen Tupana kape Tosaꞌyru minug kaipyi. Mesup -Waku kahato eipe e raꞌyn Tupana ahepe watomohey hawyi. Mekewat haty monik hap topyhuꞌat raꞌyn ahete watomohey Iesui pote.
11 Miꞌi ti Ahepaꞌi Wato Pakup toineꞌen Ahehay Moherep Tupana kapiat hat. Wakuap yn tuut Aikaꞌiwat Iesui po pyi. Wakuap yn tutum ahepe wuatꞌi eꞌat piat nuat aheineꞌen pakup poꞌog saꞌawyꞌi wuat kawiat hap erut hamo tuut. Iꞌewyte muap pakup Tupana kapiat hap. Koitywy yt pya hin i Tupana aikai. Watoineꞌen heiam wakuat sese pe. Imotypot hap we watoineꞌen iwywo mesup mukiꞌite wuatꞌi eꞌat pe. Aheiam Tupana motypot yat pakup poꞌog wakuat mekewat yahig notiat kawiat aiꞌywania saꞌawyꞌi wuat sokpe kawiat kai poꞌog waku rakat. Koitywy Tupana motypot yat yt mesuwiat Tupana motypot yat ewy hin i katupono koitywy Tupana motypot yat yt miitꞌin po wuat minug i -Atunug Tupana motypot yat pakup e.
12 Ahepaꞌi Koro Iesui teke raꞌyn Tupana yat wato pe. Mekewat imotypot eiam atipy piat pe teke raꞌyn okenꞌypy pyhyp hap sakpo. Towat tosuu wywo teke. Tutum naꞌyn tosuu Tupana pe. Yt tutum i Wewato ahup suu. Yt tutum i aihũria Kaneiru suu maꞌato towat tosuu tutum hekat rakat Tupana pe. Ahehakyeraꞌat hap sese saꞌup tutum hawyi -Waku raꞌyn e Tupana tope. Putꞌok e raꞌyn esuu saꞌup mo wuatꞌi miitꞌin kyiꞌat hap sakpo e Tupana Tosaꞌyru pe.
13 Saꞌawyꞌi wuaria ahepaꞌi koꞌi aiꞌatusapei sapei kahato aihũria suu wo. Aipiit ete Wewato ahup suu wo aipehom pehom. Taꞌatuwuk kahato Wewato ahup mepyt iwary koꞌi. Aihũ taꞌatuwuk hawyi aria kuꞌi tup mo aipen aipiit ete Tupana motypot yat pe wateke hap mohag wo saꞌawyꞌi. Maꞌato aipe ete yn aipen mote aiminug topyhuꞌat rẽ aiwanetup hawe aipyꞌa pe.
14 Maꞌato Aikaꞌiwat Iesui suu poꞌog hesaika yn suu kai mohag wo. Saꞌawyꞌi Aikaꞌiwat tum yne topiit Tupana pe ahaꞌup mo. Saꞌawyꞌi ikahu rakat aihũ yn waku aimiium mo yt kat i hatek takat yt kat i iꞌahuu hap rakat. Ipe kyt hap ihãite sese rakat yn ni waku e. Miꞌi hap ewy Iesui poꞌog waku mohag wo katupono yt kat i saꞌag tuete Tupana tipuẽti. Ihãite putꞌok e kahato turan tutum topiit. Pyno koitywy watomohey Iesui hawyi Aihũ Aimiium Tupana piat hap ewy topyhuꞌat. Miꞌi watum Tupana pe hawyi yt kat i hin i aheha yi kape hap. Yt kat i aiwemoti hap aiminug saꞌag kapiat hap ete. Aihũ Aimiium Ikahu Rakat Iesui pote.
15 Koran Tupana Wywuat Woꞌowese Nug Hat raꞌyn toineꞌen Iesui. Koitywy Muap toineꞌen Tupana kapiat. Katupono mesup ahepe Tosaꞌyru mohey haria pe -Eweĩꞌẽ ro uhowowi e. Koitywy wuatꞌi eꞌat piat ieineꞌen hap atum neran ehepe yt ikahuro rakat i e Tupana. Katupono Uhaꞌyru suu topyhuꞌat ehaꞌup mo e. Uhaꞌyru ikuꞌuro eiꞌapiheg hap saꞌup mo e. Miꞌi pote mesup waku pe raꞌyn eweikupteꞌen e. Waku ahehay aiwoꞌope aiwoꞌope aiwoꞌowese hap e Tupana ahepe watimohey Haꞌyru hawyi. Ipakup we raꞌyn watukupteꞌen mesup Tupana wywo -Koitywy Uhaꞌyru mikyiꞌat koꞌi eipe pote eweĩꞌẽ ro uhowowi uhaꞌyruꞌin uhakiꞌytꞌin e Tupana ahepe.
16 Miꞌi hawyi mesup Tupana toꞌe ahepe -Uhaꞌyru Sese Miit Kawiat ikuꞌuro ehetiatno pote waku eweĩꞌẽ ro uhowowi e. Atum yne teran ehepe Uhaꞌyru miꞌatoiat tokuꞌuro turanuat ipowatꞌyp koꞌi e. Saꞌawyꞌi yt atum kuap i te ehepe Uhaꞌyru yt ikuꞌuro i te pote e. Maꞌato koitywy atum kuap yne ipowatꞌyp koꞌi eiwatno raꞌyn e. Toieineꞌen hap tutum naꞌyn ehepe e ahepe.
17 Uiwyriaꞌin karãpe watoineꞌen ne turan aipowatꞌyp koꞌi yt watum kuap i te ahaipe piaria pe. Maꞌato aikuꞌuro hawyi taꞌatumoꞌẽ aipowatꞌyp koꞌi ahaipepiaria pe aimikyꞌesat miwan etiat hap ewy. Aikotã iwan watoiat ahekareꞌen kyewi hap ete. Aikotã aimikyꞌesat miwan miat e hap ewy yn taꞌatumoꞌẽ waku hap ewywuat. Yt taꞌatumoꞌẽ hin i aheineꞌen ne turan maꞌato aikuꞌuro hawyi taꞌatumoꞌẽ aipowatꞌyp aiꞌe hap toineꞌen iwan hap ewy.
18 Saꞌawyꞌi mio tã e Tupana nagnia pe -Eihũria suu sat yne hap kaipyi putꞌok e aiwoꞌowese hap nug hamo e. Eihũria suu taꞌat yne yne yi toꞌe hawyi waku raꞌyn aiwoꞌoehay pywuat hamuat e Tupana saꞌawyꞌi nagnia pe. Miꞌi hawyi koitywy Tosaꞌyru suu taꞌat yne yi tote hawyi aiwoꞌoehay sat hap topyhuꞌat wuatꞌi eꞌat piat Tupana wywo.
19 Saꞌawyꞌi aimuꞌe kahu yne hawyi ahepaꞌi Muisei tat raꞌyn tekuiꞌa hawyi toiꞌauka mekewat Wewato ahup mepyt hit koꞌi aihũria hit koꞌi hawyi huu toipag kuiꞌa pe. Miꞌi hawyi totat aihũ Kaneiru sap amukiusu ap ewywuat ihup takat hawyi toipoꞌi mekewat ariaꞌyp ãpo ete hawyi toipuka suu yꞌy puat pe. Miꞌi suu wo sapei sapeiꞌe miitꞌin ete. Iꞌewyte suu wo sapei sapeiꞌe mekewat Tupana miwan ete. Miꞌi hawyi yne tomimuꞌeria toiꞌatusapei sapei raꞌyn.
20 Tupana motypot ekareꞌen koꞌi ete iꞌewyte toiꞌatusapei sapei yne raꞌyn suu wo hawyi toꞌe topotmuꞌeria pe -Eweikuap apo meikotã worohoꞌosapei sapei suu wo hap e. Taꞌi eipehik Tupana etiat hap ti miꞌi e katupono suu yn waku ahehay Tupana kapiat hap saꞌup mo e. -Miꞌi tã e hap ewetunug no e Tupana ahepe. Suu yn ahehay wesat kuap uiwywo hap e ahepe Muisei saꞌawyꞌi. Yt taꞌat i yne suu yi tote pote yt kat i eiminug saꞌag moweityk hap e Tupana ahepe saꞌawyꞌi.
21 Miꞌi hawyi Muisei tat mekewat kuiꞌa piat suu hawyi topopag hawyi toiꞌatusapei sapei yne miitꞌin Tupana motypot yat piaria hawyi toꞌe. Mio tã e Tupana ahepe -Suu aat hat yne waku ehehakyeraꞌat mo e.
22 Miꞌi yn imoweityk kuap eiminug saꞌag e Tupana ahepe e. Eiweꞌeg wo o katupono yt ehei i suu aat hat wo pote eipit pit rakat ewy eweikupteꞌen ne uiwanetup hawe e Tupana ahepe miwan me e.
23 Hãꞌãkap wuo Tosaꞌyru suu aat hat ete mekewat atipy kaipywiat suut hat ete ihay. Aihũ aimiꞌauka koꞌi saꞌawyꞌi wuat Iesui auka hap ete ihay yian mete. Iesui suu yn waku yne koho hamo yi tote iꞌewyte atipy pe e. Poꞌog waku Iesui suu aihũria suu aat hap kai katupono -Eihũ Sese Uhaꞌyru moherep hap eihũria toineꞌen e. Miꞌi ti ikuꞌuro eikawiatno e Tupana ahepe.
24 Miꞌi suu aat hawyi toineꞌen muap uimotypot yat atipy piat teke hamo. Miꞌi hawyi uiwywo topyhuꞌat eipaꞌi wato wo. Mesuwarotiat miitꞌin minug taꞌatupo wuat uimotypot yat pe i teke kuap maꞌato mesuwe atipy pe teke tosuu topo etiat wywo e Tupana ahepe.
25 Saꞌawyꞌi wuat paꞌi akag koꞌi yne 12 waty pe teke tuereto uimotypot yat pe miitꞌin hũria suu wywo aikope Uito yn waku areineꞌen hap tote e.
26 Maꞌato Uhaꞌyru Ehepaꞌi Wato toineꞌen wuatꞌi eꞌat pe uiwywo wẽtup muat tosuu aat hawyi. Koitywy yt kat i raꞌyn typuat i epiat hoꞌopot hamuat areꞌe Uhaꞌyru pe e.
27 Miꞌi hawyi mio tã e Tupana yne miitꞌin me -Miꞌi hap ewy eipe wẽtup mo yn eikuꞌuro hap e. Miꞌi hap ewy Uimipoꞌoro Eiporekuat nuat Iesui wẽtup mo yn ikuꞌuro eikawiatno yne eiminug saꞌag moweityk hamo e. Miꞌi hawyi worohoꞌomoherep wuatꞌi miitꞌin ehamo sio Uhaꞌyru mohey haria eipe sio yt hap kuap hamo e.
28 Miꞌi hawyi yt karamuo i ikuꞌuro i raꞌyn Uhaꞌyru katupono wẽtup mo yn miitꞌin ikuꞌuro e. Miꞌi pote Miꞌi Miit Uhaꞌyru wẽtup mo yn ikuꞌuro hawyi mesup huut hap yn naꞌyn toineꞌen aru emiekatup e. Saꞌawyꞌi tokuꞌuro hamo tuut miitꞌin kape e. Maꞌato meiũran aru yt tokuꞌuro hamo i tuut tohekatup haria kape. Katupono Uhaꞌyru yt typuat ikuꞌuro rakat i e. Uhaꞌyru tuut wyti aru tomiehakyeraꞌat koꞌi moherep hamo e Tupana ahepe Tosaꞌyru Iesui ete.
