Ewesu 2:1-22
2 Haꞌawyte kahato yt uwe i eimuꞌe hat Iesui etiat turan yt Iesui mohey haria i eipe turan miꞌi hap eꞌat pe yt eweikuap hin i Tupana etiat aikotã ikuꞌuro rakaria yt tikuap hin i ahehay hap ewy mekewat eꞌat pe. Saꞌawyꞌi yt eweikuap hin i Tupana ehay are.
2 Miꞌi hawyi mekewat eꞌat pe yt ewetunug hin i yne yne Tupana waĩꞌe hap koꞌi e hap. Saꞌawyꞌi imohey hap eꞌyian mete ti ewetunug miitꞌin minug saꞌag koꞌi yne yne mekewat eꞌat pe. Mekewat eꞌat pe wẽtup eikaꞌiwat toineꞌen miꞌi ti ahiag. Miꞌi heso rakat kape -Uruetupana en eweiꞌe ahiag me. Emikyꞌesat ewy atunug neran eweiꞌe mekewat maꞌãu saꞌag me. Uruetupana uruetupana eweiꞌe aat kaꞌap mekewat yt nakuaria i nug haria porekuat kape mekewat ahiag me.
3 Pyno saꞌawyꞌi yne aito watopyhuꞌat ahiag emiit no yt nakuaria i ewy. Saꞌawyꞌi aimikyꞌesat saꞌag he watipuẽti. Mekewat eꞌat pe aiminug aipiit mikyꞌesat saꞌag koꞌi kape yn poꞌog poꞌog ahepap waĩꞌe Tupana pykai watunug saꞌag neꞌi. -Miꞌi tã ewetunug mote worohoꞌoꞌapiheg neꞌi eipe e Tupana ahepe pykai watunug yne yne yt imikyꞌesat i koꞌi.
4 Maꞌato saꞌag watunug tuete pykai aikyꞌe kahato te Tupana. Yt tuwepyk hin i katupono haty aikyꞌe hap tuete.
5 Towese hap kaipyi ahehakyeraꞌat Tupana. Aikotã ikuꞌuro rakat yt ihay i hap ewy yt ahehay hin i Tupana kape mekewat eꞌat pe. Taꞌi yt ahehay kuap i. Karãpe Tupana ihay ahowawi turan mekewat eꞌat pe yt watiwesat kuap i kat pote ikuꞌuro rakaria ewy watoineꞌen Tupana ewowi pote. Maꞌato miꞌi pykai aiwyꞌinug tuwewawi Aipotypot Iesui ehay upi.
6 Miꞌi hawyi aimoieineꞌen Tosaꞌyru suu wo. Miꞌi hawyi Tupana ainug Aipotypot Iesui emiit no wẽtup piit ewy watoineꞌen iwywo. Miꞌi hawyi karãpe Iesui tuwẽtem guꞌuro pyi miꞌi hap iꞌewyte watuwẽtem guꞌuro pyi hap ewy wẽtup puꞌi yn aito watomohey hawyi.
7 Miꞌi hawyi Tupana toꞌe Tosaꞌyru pe -Eraꞌapyk to mesuwe uikai atipy pe wuatꞌi Porekuat no e Tosaꞌyru pe. Miꞌi tote hap ewy aito iꞌewyte watoineꞌen iwywo morekuaria wo are. Miꞌi hap ewy watoineꞌen iwywo katupono aito wẽtup ok miit ewy iwywo. Pyno mesup toimoherep taꞌyn towese hap ahepe wuatꞌi eꞌat pe. Miꞌi pote -Egyiꞌat kahato watoꞌe Tupana pe. Yt uwe i poꞌog ekai iwese rakat watoꞌe.
8 Maꞌato yt aiminug wakuap kaipyi hin i Tupana ahehakyeraꞌat. Taꞌi yt hin i uiwyriaꞌin. Ahewaku hap yt putꞌok e hin i Tupana wat hewaku hap ewy are. Aikyꞌe hap kaipyi towese hap kaipyi tutum ahehakyeraꞌat hap ahepe. Watimohey Iesui hawyi tutum ahepe wuatꞌi eꞌat piat aheineꞌen hap yt kat i watunug pykai tutum. Pywo pe ti tuwekaipyi tutum watomohey Iesui hawyi are.
9 Pyno yt naku i watoꞌe -Uito ti wakuat pote Tupana uhehakyeraꞌat yt naku i watoꞌe katupono iꞌaparap haria watoineꞌen Tupana wanetup hawe miꞌi tupono yt watuwehakyeraꞌat kuap i.
10 Saꞌawyꞌi Tupana topo wo ainug. Koitywy Haꞌyru mohey haria watopyhuꞌat wẽtup ywania ewy yn naꞌyn watopyhuꞌat. Ainug hap eꞌyian mete Tupana toꞌe -Meiũran aru atipowyro kahato uimikyꞌesat nug neran haria e. Wakuaria sok ewy aru atunug miꞌiria e saꞌawyꞌi tuwepe.
Iuteu Koꞌi Iꞌewyte Kereku Koꞌi Toꞌowywuaria Tukupteꞌen Tupana Wywo
11 Maꞌato haꞌawyte eipe tawa Ewesu piaria yt kurin i eweikuap Tupana etiat katupono wẽtup ywania eipe. Saꞌawyꞌi sese ahaꞌaseꞌi pot Aparãu emiariruꞌin yn Tupana ywania tukupteꞌen mekewat eꞌat pe. Mekewat weꞌahit sokpe tek haria miꞌiria yn saꞌawyꞌi Tupana ehay kuap haria tukupteꞌen. Maꞌato eipe wẽtup ywania eweikupteꞌen saꞌawyꞌi yt Aparãu emiariru koꞌi hin i eipe. Nimo urupusu puo uruhetꞌok eipe ti yt weꞌahit sokpe tek haria i urutoꞌe.
12 Katupono saꞌawyꞌi te eipe yt Tupana mohey haria ywania hin i eipe maꞌato wẽtup ywania eweikupteꞌen. Miꞌi hap eꞌat pe yt kat hin i eweikuap Tupana Mipoꞌoro Aiporekuat etiat katupono saꞌawyꞌi Tupana tiꞌairo Aparãu emiariruꞌin koꞌi yn temiitꞌin no saꞌawyꞌi. Yt eiꞌairo hin i saꞌawyꞌi. -Aparãu emiariru emiariru atiꞌatupoityro e Tupana. Atunug esaꞌyruꞌin esakiꞌytꞌin uiꞌywania wo e. Maꞌato ehepe yt mio tã e hin i saꞌawyꞌi. Yt kat i Tupana eipyꞌa pe saꞌawyꞌi miꞌi pote yt uwe i eipe -Areineꞌen aru wuatꞌi eꞌat pe e haria are.
13 Maꞌato mesup ti yt pya hin i raꞌyn eweikupteꞌen Tupana kai Tupana Saꞌyru wuaria eipe pote. Saꞌawyꞌi te ti pya kahato eweikupteꞌen Tupana kai maꞌato mesup Iesui suu eimowoꞌosat kahato raꞌyn Tupana ete.
14 Koran eipe yt pya hin i Tupana kai katupono Iesui tunug naꞌyn ni Tupana wywuat aiwoꞌowese wese hap.
15 Aikaꞌiwat ikuꞌuro ariaꞌyp posak ete hawyi woꞌowese hap tutunug eiꞌywania wywuat hamo iꞌewyte uruꞌywania wywuat hamo.
16 Miꞌi hawyi Haꞌyru mohey haria wẽtup ywania ewy raꞌyn watopyhuꞌat. Wẽtup piit ewy yn. Iesui mohey haria aito pote yt kat i poꞌog aiwoꞌopyꞌahak hap yt kat i aiwuꞌuka hap aiwoꞌope. Iꞌewyte yt kat i poꞌog Tupana wywuat hap aiwuꞌuka hap are.
17 Tupana tipoꞌoro Tosaꞌyru Aikaꞌiwat no. Putꞌok toꞌe hawyi aiꞌatumuꞌe kahato hamuat. Iraniaꞌin ywania pya kahato tukupteꞌen Tupana kuap hap kai. Uruꞌywania Iuteu ywania poꞌog yt pya i maꞌato torannia aito wẽtup sok yn saꞌawyꞌi watukupteꞌen pya kahato Tupana kai. Miꞌi hap eꞌat pe Iesui timoherep ahepe muap Toꞌywot kapiat hap.
18 Mekewat muap ti aheraꞌaipok Tupana kapiat hap Aipotypot Iesui kawiat katupono tutum naꞌyn Topaꞌãu ahepe. Miꞌi hawyi uruto Iuteuria iꞌewyte eipe yt Iuteuria i Tupana Paꞌãu wẽtup takat eiam aito. Miꞌi pote mesup waku watuwat Tupana kape uruto Iuteuria iꞌewyte eipe wẽtup ywania waku wateke Aiꞌywot Tupana ehamo mesup Iesui aimowoꞌosat Tupana wywuat pote.
19 Saꞌawyꞌi areto eimuꞌe hamuat hap eꞌat pe eipe yt Tupana mepytꞌin hin i. Yt eweikuap hin i mekewat eꞌat pe Tupana sese yt kuap i haria eipe maꞌato mesup Tupana etawa piaria ewy raꞌyn eweikupteꞌen. Mio Tupana saꞌyruꞌin no sakiꞌytꞌin no raꞌyn eweikupteꞌen. Koran Tupana yat piaria wo raꞌyn eweikupteꞌen imepytꞌin no eipe mesup.
20 Mio Tupana yat nug hat ewy watukupteꞌen. Aikotã aiꞌyat watunug nu kawiat hawyi toineꞌen motꞌi hap ewy. Miꞌi hap ewy Tupana tunug toꞌyat mesup maꞌato miitꞌin kawiat. Tohaꞌawynug toꞌyat nug hap hamuat ewy toineꞌen mesup. Waku yne hawyi totopag Tosaꞌyru mohey haria nu ewywuat toꞌyat iheg nakat pe hamuat are.
21 Maꞌato mekewat nu wato yne aiꞌywytꞌokpype aimoesaika hap miꞌi nu ewywuat ti Aikaꞌiwat Iesui. Miꞌi hawyi watomohey Iesui hawyi ainug toꞌyat motag hamo. Miꞌi hawyi meiũran Tupana yat ikahu rakatno watopyhuꞌat hap ewy are.
22 Koitywy Tupana toineꞌen toꞌyat pe katupono Ipaꞌãu toineꞌen aipyꞌa pe pote. Miꞌi hawyi aito imohey haria yne yne aito watopyhuꞌat aiwoꞌopype wẽtup yat ikahu rakat ewywuat Tupana eiam sese aitoria yne are.
