Ewesu 3:1-21
3 Mesup ti uito Pauru woꞌopyhik hawe areineꞌen katupono morekuaria yt tikyꞌesat i poꞌog miitꞌin muꞌe uhepiat hap Iesui etiat hamo. Miꞌi pote uipyhyp mesuwe woꞌopyhik hawe. Yt taꞌatukyꞌesat i iraniaꞌin ywania ikuap Iesui hap. Miꞌi pote uipyhik mesuwe wen maꞌato yt uipyhik kuap i meiũwat woꞌopyhik hawe katupono mesuwe ahẽtup Tupana kape eipowyro hap aat kaꞌap. Iꞌewyte arepotpap kahato miwan nug hap ete mesuwe uimipoꞌoro einapin hamuat hap ete.
2 Uiwanetup hawe Iesui mipyhyp areineꞌen toikyꞌesat pote are. Waku kahato Tupana hegyiꞌat kahato. Uipowyro kahato mesuwe woꞌopyhik saꞌag hawe topotpap nug hap ete.
3 Katupono mesuwe koitywy Tupana timoherep kahato uhepe saꞌawyꞌi wuat yt uwe mikuap i sehay toimoherep uhepe aikotã wẽtup ywania ipakup imohey haria tutunug hap. Taꞌi ipakup takaria tutunug mesup wuatꞌi ywania kawiat. Aikotã toꞌywania pakup tutunug mesup hap toimoherep mesuwe uipyhyp hawe uhepe. Waku kahato Tupana yt uwe i ipyhyp kuap are.
4 Miꞌi koꞌi atiwan mesup ehewowi yt iwato i wen uimiwan mesuwe maꞌato mesup uimiwan hit ete waku eiwemuꞌe kahato are aat kaꞌap. Miꞌi hawyi eweikuap uiꞌewy Tupana mienoi migꞌi wuat sehay miꞌi Aipotypot ywania pakup etiat.
5 Saꞌawyꞌi wuaria yt uwe i ikuap mesuwat sehay migꞌi wuat Tupana -Atunug aru e hap. Tupana yn ikuap. Iꞌewyte ihay moherep haria saꞌawyꞌi wuaria yt ikuap i maꞌato mesup Tupana Paꞌãu timoherep taꞌyn uruepe tehay moherep haria pe uruto Iesui potpoꞌororia 12 ok takaria pe toimoherep tehay migꞌi wuat Topaꞌãu wo.
6 Koran Tupana Paꞌãu toꞌe ahepe -Saꞌawyꞌi iraniaꞌin ywania yt uikuap hin i maꞌato mesup atipoꞌoro uhehay wakuat wuatꞌi ywania ewowi aikotã areꞌe saꞌawyꞌi miwan me. Atunug aru e hap ewy mesup atunug naꞌyn e. Koran atunug naꞌyn Iraniaꞌin ywania Porekuat no raꞌyn Uhaꞌyru e. Miꞌi imohey haria sok wẽtup piit ewywuat yn naꞌyn teꞌeropyhuꞌat aru e. Aikotã saꞌawyꞌi atipoityro Iuteu ywania atiꞌatupoityro mesup yne yne ywania aikotã areꞌe saꞌawyꞌi uiꞌe hap ewy atunug mesup e Tupana uhepe. Saꞌawyꞌi migꞌi wo sese yt uwe mikuap mo i mesuwat uiꞌe hap are maꞌato koitywy atimoherep miꞌi uiꞌe hap yne miitꞌin me uimiwan kaipyi uhehay kaipyi e Tupana ahepe.
7 Uito Pauru saꞌawyꞌi Aipotypot Iesui uinug topotpoꞌoro wo tehay sytpok hamo tehay moherep hamo miitꞌin me wuatꞌi ywania piat hamo uinug. Miꞌi hap atunug kahato uito maꞌato yt uhesaika hap upi i katupono Ipaꞌãu tum uhepe tesaika hap sehay wakuat moherep miitꞌin miat hamo.
8 Uhewaku hap yt putꞌok e hin i Aipotypot eropat hamo are. Taꞌi uito ti poꞌog kurin katno areineꞌen poꞌog yi kape torannia Iesui mohey haria kai areineꞌen uito maꞌato miꞌi pykai Tupana uiꞌairo iraniaꞌin ywania muꞌe hamo tehay ikahu rakat ete uhewaku hap yt putꞌok e hin i heropat hamo pykai are. Yt naku i uito pykai towese kahato hap mywo uiꞌairo katupono yt poꞌog hin i uito. Koitywy atimoꞌẽ kahato iraniaꞌin ywania pe. Tupana ekareꞌen moꞌẽ hat ewywuat areineꞌen uito aikotã wuatꞌi eꞌat piat hekat rakat tomoꞌẽ hap ewy areineꞌen. Aikaꞌiwat Iesui ekat iwato kahato aikotã poꞌog poꞌog wuatꞌi kai toineꞌen poꞌog poꞌog Miꞌi ekat moꞌẽ hat ewy areineꞌen uito Pauru.
9 Saꞌawyꞌi te wuat migꞌi wuat Tupana mimoherep aikotã toikyꞌesat yne ywania towatnuat hap toimoherep mesup uiwẽ pyi. Tupana ti wuatꞌi wuatꞌi nug hat maꞌato kat hamo ainug saꞌawyꞌi yt tohenoi i. Miꞌi kape miitꞌin saꞌawyꞌi wuat teꞌeruwanetup kahato maꞌato yt taꞌatukuap kuap i. Maꞌato koitywy toimoherep taꞌyn miꞌi e hap ahepe.
10 Koitywy koran mesuwat eꞌat pe Aiꞌakag Iesui timoherep kahato toweꞌeg kahato hap mo ahepe iꞌewyte yne atipy piaria pe. Koitywy atipy piaria Surara Akag wo toineꞌen Iesui iꞌewyte Tupana etawa piaria atipy piaria tikuap taꞌyn Tupana weꞌeg kahato hap koꞌi katupono ahowawi Iesui mohey haria kape teꞌerahaꞌat kahato hawyi teꞌeroꞌe toꞌope -Pywo ti Tupana iweꞌeg poꞌog torannia kai katupono yne ywania toiꞌatuehakyeraꞌat kuap iꞌatuꞌe.
11 Wuatꞌi eꞌyian mete Tupana tunug toweꞌeg hap upi yne tomikyꞌesat upi. Mio tã e -Atiꞌatuehakyeraꞌat yne ywania yne miitꞌin e. Uimipoꞌoro Iꞌatuporekuat nuat po wo Uhaꞌyru minug upi atiꞌatuehakyeraꞌat wuatꞌi ywania e Tupana saꞌawyꞌi yt kat i te mesuwat yi turan yian mete mio tã e tuwepe migꞌi wo. Miꞌi hap toimoherep taꞌyn uhepe mesuwe uipyhik hawe.
12 Miꞌi pote mesup yt watokenꞌẽ hin i Tupana kapiat ahehay hamo. Yt kat i aiwemoti hap ahehay iwywuat hamo katupono koitywy Haꞌyru upi imohey hap upi watuwat kahato Tupana kape aikotã wẽtup piit ewy yn watoineꞌen Haꞌyru wywo Aheykeꞌet Aikywyt wywo.
13 Uiwyriaꞌin tawa Ewesu piaria morekuaria uipyhik mesuwe iheg me mesup yt taꞌatukyꞌesat i worohoꞌomuꞌe poꞌog hap wote. Uhatyꞌi hatyꞌi kahato mesuwe. Ahoꞌopot kahato wen maꞌato waku ahoꞌopot eimuꞌe hap ete are. Pywo ti rat yt paa eweiꞌe teiꞌo are uipyhik neꞌi hap upi kat pote meiũpe areineꞌen Aiꞌywot atipy piat Tupana ehamo are.
Pauru Ihay Tupana Pe Miitꞌin Hakyeraꞌat Hamo
14 Miꞌi tã ahẽtup mesuwe aat kaꞌap -Uruꞌywot atipy piat arepỹꞌãtutuk ewowi mesuwe katupono wuatꞌi ywania ehakyeraꞌat kuap hat En are.
15 Wuatꞌi ywania mesuwat yi totiat nug hat En are iꞌewyte yne ywania atipy piaria nug hat En are.
16 Wuatꞌi wuatꞌi mimotypot En are. Yt uwe i poꞌog ekai are. Miꞌi pote ahẽtup ekawiatno etum no emohey haria pe tawa Ewesu piaria pe Epaꞌãu wakuat iꞌatumoesaika hamuat hap ahẽtup epe. Atikyꞌesat kahato iꞌatuwanetup hap hesaika rakat ewy emohey hap ete.
17 -Etunug no Emipoꞌoro Iesui kawiat eꞌyat sese itote. Ereineꞌen itote emohey haria pyꞌasetpe. Atikyꞌesat iꞌatusapo yi pe iheg me ariaꞌyp wato gaꞌapy piat hap ewy. Atikyꞌesat miꞌiria iheg me woꞌokyꞌe hawe iꞌewyte ekyꞌe hawe hap atikyꞌesat are.
18 Ahẽtup kahato ti ewowi Tupana. Atikyꞌesat kahato ti itotiaria tikuap Esaꞌyru piat taꞌatukyꞌe hap are. Atikyꞌesat yne urutoria Esaꞌyru moheg haria ikuap haria. Etum no esaika hap iꞌatuepe kat kupitu kat kupitu Esaꞌyru piat iꞌatukyꞌe hap kuap hamo are katupono iwato kahato Esaꞌyru piat urukyꞌe hap iꞌywop kahato hap ewy iꞌanam kahato hap ewy. Miꞌi hap kuap hamo atikyꞌesat taꞌatukuap taꞌatukyꞌe hap Esaꞌyru piat hap atikyꞌesat Tupana are.
19 Yt karãpe i uruikuap yne kat kupitu kat kupitu urukyꞌe hap Iesui piat hap maꞌato ahẽtup kahato ewowi Tupana etimoherep emohey haria pe tawa Ewesu piaria pe aikotã aikotã Esaꞌyru taꞌatukyꞌe hap ahẽtup epe are. Miꞌi hap taꞌatukuap hawyi teꞌeropyhuꞌat eiam sese wo raꞌyn Tupana are iꞌewyte ereineꞌen no iꞌatuwywo kahato are ahẽtup Tupana pe mỹꞌãtutuk pe pyi mesuwe woꞌopyhik hawe.
20 Taꞌi uiwyriaꞌin aheTupana hepap kahato aimiẽtup ium hamo poꞌog poꞌog iwato tutum kuap aimiẽtup koꞌi kai are. Yt karãpe i teke aiwanetup hawe kat kupitu kat kupitu hegyiꞌat hap are. Tutum poꞌog poꞌog kuap ahepiat hẽtup kuap hamo kai katupono Ipaꞌãu hesaika aikai ahepiat hẽtup hamo Tupana pe are.
21 -Uruetupana uruimotypot kahato En urutoꞌe. Emipoꞌoro uruporekuat nuat mohey haria sese uruto. Taꞌi urutuwehum kahato ewowi wuatꞌi eꞌat pe aru urutoꞌe ewowi Tupana waku raꞌyn urutoꞌe.
