Ewesu 4:1-32
4 -Uimimuꞌeria tawa Ewesu piaria mesup uito Pauru areineꞌen meiũpe woꞌopyhik hawe. Wanikaptia uipyhyp taꞌyn Aikaꞌiwat potpap nug hap pyhyp hamo uipyhik wen maꞌato miꞌi pykai worohoꞌomuꞌe te uimiwan myi uiwyriaꞌin. Saꞌawyꞌi Tupana aiꞌairo temiitꞌin no tomotypot hamo. Miꞌi pote areꞌe ehepe -Toꞌiro watimotypot Aiꞌairo hat haty wo are. Aikotã aimepytꞌin hãpyk takaria ewy aimowepiit taꞌatupotpap wakuat nug hap ete aimikyꞌesat nug hap ete miꞌi hap ewy waku watimowepiit Aiꞌywot atipy piat wakuat nug hap kaipyi.
2 Yt naku i watoꞌe aiwanetup hawe -Uito poꞌog iraniaꞌin imohey haria kai yt naku i watoꞌe. Pyno toꞌiro watoineꞌen hãpyk kahato rakaria wo. Waku watuwepotpap Aikaꞌiwat kape aiperupꞌi wywo yt kat i aipyꞌahak hap mywo waku are. Waku watimoherep iraniaꞌin miitꞌin kyꞌe hap yne aiminug koꞌi ete are. Waku watiꞌatukyꞌe iraniaꞌin yt iꞌatuwese i pykai.
3 Waku watoineꞌen yt kat i aiwuꞌuka hap mywo katupono Tupana Paꞌãu tikyꞌesat aiwoꞌowese kahato hap are. Miꞌi pote waku watuwat Ipaꞌãu upi. Waku wẽtup mepytꞌin koꞌi wẽtup piit ewy watopyhuꞌat Iesui wywo.
4 Katupono aito Aikaꞌiwat piit aga koꞌi ewywuat are. Iꞌewyte aipaꞌãu Tupana miium Aikaꞌiwat Iesui watnuat e. Miꞌi pote aito imohey haria wẽtup paꞌãu wẽtup piit ewywuat watopyhuꞌat mesuwe aito imohey haria. Aito ti wẽtup piit imohey haria aito pote aiwoꞌoꞌewy ewy katupono Iesui wywo watukupteꞌen. -Mukiꞌite ti aru watoineꞌen wuatꞌi eꞌat pe e haria sok aito watoꞌe.
5 Wẽtup yn Aikaꞌiwat. Aito aitypyꞌi kahato wen maꞌato wẽtup yn Aikaꞌiwat pote wẽtup yn aimimohey wẽtup set upi yn ahetꞌok hap. Miꞌi pote wẽtup piit ewy yn watoineꞌen.
6 Wẽtup yn ni Aiꞌywot Atipy piat. Miꞌi ti Tupana wuatꞌi miitꞌin nug hat. Miꞌi ti Aiꞌakag Koro wo toineꞌen e. Wẽtup yn aheTupana. Tupana ti toineꞌen ahepuo ipotpap nug hamo. Miꞌi pote aito watopyhuꞌat ipiit ewy miitꞌin sem kahato aito pykai.
Tupana Timoꞌẽ Sepap Hap Koꞌi Miitꞌin Me
7 Miꞌi hawyi wẽtup ok pe wẽtup ok pe tomohey haria pe toimoꞌẽ tomisepap koꞌi nug hap tomikyꞌesat ewy. Toiꞌatumoꞌẽ ahepuo tomisepap nug hap ipotpap koꞌi nug hamuat. Aipotypot Iesui mikyꞌesat ewy Tupana tiꞌatumoꞌẽ tomisepap koꞌi ahepe.
8 Miꞌi tutunug aikotã toꞌe saꞌawyꞌi morekuat Tawi miwan me e hap ewy -Meiũran ti aru Tupana Mipoꞌoro topyhuꞌat wuatꞌi Porekuat Koro wo e. Miꞌi Miit tiꞌakit yne tewanikaptia hawyi taꞌam aru atipy kape e. Miꞌi tote pyi toimoꞌẽ aru tesaika hap tomisepap koꞌi nug hamuat temiitꞌin me mesuwe e morekuat Tawi saꞌawyꞌi tomiwan me tuwepy hawe 68.18 hawe.
9 Pyno ti taꞌam e miwan me maꞌato taꞌam hap tohenoi pote iꞌewyte tohenoi tuut hamuat yi ywytꞌokpype topotꞌapyk hap iꞌewyte ti tohenoi yt toꞌe i pykai.
10 Mekewat taꞌapyk hap tohenoi iꞌewyte mekewat yi ywytꞌokpypiat toto hap tohenoi morekuat Tawi miwan me. -Pyno mekewat toto poꞌog yi ywytꞌokpype iꞌewyte mesup taꞌam naꞌyn poꞌog atipy kape poꞌog taꞌam naꞌyn torannia kai. Ywaiti hap tote taꞌapyk taꞌyn Morekuat no. Iesui toto raꞌyn waikiru apy tote iꞌewyte toineꞌen Morekuat no aipyꞌasetpe.
11 Koitywy toimoꞌẽ kahato ahepuo tomisepap koꞌi topotpap nug hamuat aikotã toꞌe miwan me hap ewy -Wẽtup ok pe wẽtup ok pe tomiꞌairoria pe tutum tesaika hap tehay moherep hamo wẽtup ywania pe wẽtup tama totiaria pe e. Wẽtup ok pe wẽtup ok pe tutum tesaika hap Tupana ehay sese moherep miitꞌin miat hamo e. Wẽtup ok pe wẽtup ok pe tutum tesaika hap tehay sytpok kahato hamo miitꞌin sem miat hamo hap tutum e. Wẽtup ok pe wẽtup ok pe ti tutum tesaika hap temiit tohũria apykok hamuat hap tutum e. Wẽtup ok pe wẽtup ok pe ti tutum tesaika hap temiitꞌin atupowyro hamuat hap tutum e. Wẽtup ok pe wẽtup ok pe tutum tesaika hap yne miitꞌin atumuꞌe hap kuap kahato hamuat hap tutum.
12 Wẽtup ok pe wẽtup ok pe tutum tesaika hap tomisepap koꞌi yt uwe minug kuap i nug hamuat hap tutum e. Pyno yt toꞌoꞌewyꞌewy hin i toimoꞌẽ tesaika hap tomisepap nug hamuat koꞌi tominug kuap hap ewywuat nug hamuat hap koꞌi are. Taꞌi toimoꞌẽ kahato ahepe tomiium koꞌi are. Yt toꞌoꞌewyꞌewy hin i tutum. Ewat emikuap uiat uimikuap Tupana miium koꞌi aimisepap koꞌi yt toꞌoꞌewy hin i are. Tomohey haria moweꞌeg hamo tutum tesaika hap ahepe topotpap nug kuap hamo tutum e. Tupana tikyꞌesat kahato aito tomipoꞌoro koꞌi Tosaꞌyru Iesui ewywuat e. Miꞌi pote aimoesaika Tosaꞌyru Paꞌãu wo topotpap nug hamuat.
13 Iꞌewyte Tupana tikyꞌesat aito Aikaꞌiwat Iesui ewywuat aito torannia iwywo wẽtup piit ewy hap toikyꞌesat e.
14 Yt toikyꞌesat i wẽtup ok wẽtup ok mienoi saꞌag upi watopyhuꞌat hap kat pote toikyꞌesat Tosaꞌyru mienoi upi yn watopyhuꞌat hap. Imohey haty wuat hap toikyꞌesat. Iꞌatu kahato aimuꞌe iweꞌeg kahato rakaria aimuꞌe kuap kahato haria maꞌato yt pywo pe i yt Iesui mienoi upi i haria aimuꞌe maꞌato ahekat kyewi yn aimuꞌe haria e. Miꞌiria ehay upi watopyhuꞌat hawyi iꞌatuewamiri pe watopyhuꞌat hap ewy aikotã wasere owa kape wato teran ihyemyiꞌa wato sakpo teran maꞌato yt wato kuap i ipoityꞌi pote hap ewy katupono miꞌiria teꞌeruwanetup aat kaꞌap aimaꞌatꞌi maꞌatꞌi hap ete iꞌatuehay wẽtup upi. Yt eweimohey teiꞌo miꞌiria yne miitꞌin miat aimuꞌe hap are. Yt naku i watopyhuꞌat hirokaria ewy aimikuap ete are. Hirokaria imohey yne yne miitꞌin ehay sio pywo sio yt hap taꞌatumohey. Waku watomohey aimuꞌe hat Iesui e hap ewy aimuꞌe pote. Waku watimoheg aimimohey Iesui aipyꞌa pe aiwanetup hawe e. Tupana wywo wẽtup piit ewy watukupteꞌen. Miꞌi hawyi aiꞌywania uruꞌywania wẽtup ywania ewy yn naꞌyn ainug e. Koitywy Tupana ywania raꞌyn aito. Saꞌawyꞌi Iuteu ywania eiꞌywania tukupteꞌen toꞌope toꞌope toꞌoewanikap mo teꞌeropyhuꞌat. Mekewat eꞌat pe toineꞌen eipyhyp hap ewywuat Iuteu etawa kapiat eweiwat hamo. Maꞌato mekewat eipyhyp hap Tupana kapiat hap Iesui tiꞌaporok yne raꞌyn topy wo.
15 Iuteu eko iꞌewyte waĩꞌiꞌatuꞌe hap koꞌi yt Tupana miwan ewy i toimoweityk miꞌi hawyi towatno tutunug mote Iuteu ywania iꞌatupyꞌahak kahato ehete kat pote yt iꞌatueko yt ewy i raꞌyn aheko pote iꞌatuwoꞌonapin hap koꞌi iꞌatuwoꞌoewaĩ hap koꞌi. Miꞌi pote iꞌatupyꞌahak -Waĩ waĩꞌiꞌatuꞌe maꞌato yt eweiwat i waĩꞌiꞌatuꞌe hap upi hawyi woꞌoꞌewanikaptia wo eweikupteꞌen.
Typy ywania eweikupteꞌen saꞌawyꞌi. Miꞌi hawyi putꞌok e Aikaꞌiwat Iesui hawyi toiꞌatukay kay yne miitꞌin tuwewawi yne ywania. Miꞌi hawyi tutunug yne miitꞌin Tupana ywania wo. Koitywy ipatꞌok yne ywania Iuteu ywania eiꞌywania iraniaꞌin ywania tukupteꞌen Iesui mohey haria. Miꞌi hawyi watukupteꞌen mesup yne yne raꞌyn wẽtup piit ewy Iesui wywo woꞌowese rakaria raꞌyn watopyhuꞌat.
16 Saꞌawyꞌi aito wuꞌuka yne ywania wywuat haria aito wuatꞌi ewanikaptia wo watukupteꞌen. Pya kahato watukupteꞌen Tupana kai aito torannia.
Aipiit ete ipoityꞌi ahaga koꞌi maꞌato wẽtup piit yn watoineꞌen aito wẽtup piit yn aito. Yt tuweran hin i maꞌato ahaga koꞌi. Toꞌosat kahato ahaga koꞌi. Miꞌi hawyi aipiit iheg aipiit wẽtup yn. Aipuꞌi aikag koꞌi ahaga toꞌosat toꞌoete kahato. Karãpe watunug Aiꞌakag Iesui mikyꞌesat ewy hawyi watopyhuꞌat aikotã haga koꞌi ewy ipiit ewy. Miꞌi hawyi wahewyry aikotã ihãite rakat ewy. Karãpe aito Iesui mohey haria watoꞌokyꞌe yne yne aiwoꞌope miꞌi hawyi watoꞌopowyro miꞌi hawyi watopyhuꞌat aito Iesui piit ihãite rakat ewy.
17 Pyno worohoꞌomuꞌe teran Aikaꞌiwat Iesui ehay ete. Eweꞌeg wo o eiminug saꞌag koꞌi eimikyꞌesat saꞌawyꞌi eheko saꞌawyꞌi wuat pupi are. Yt imohey i te turan wuat saꞌag nug hap ete yt aiweꞌeg hin i saꞌawyꞌi wuat aiminug saꞌag koꞌi kai -Eweiꞌatoiat ro miꞌi koꞌi e Tupana pykai. Uiwyriaꞌin yt naku i watuwanetup poꞌog aikotã yt imohey i haria wanetup hap ewy neꞌi katupono miꞌiria yt naku i nug hap yn iꞌatuwanetup hawe. -Uito poꞌog poꞌog torannia kai iꞌatuꞌe taꞌatuwanetup hawe. Yt paa iꞌatuꞌe hin i taꞌatuminug yt naku i hawyi. Miꞌi tã iꞌewyte aito saꞌawyꞌi maꞌato mesup waku watuwenapin miꞌi e hap pun hamuat e.
18 Yt karãpe i teꞌeruwanetup Iesui ewowi miꞌiria. Iꞌatuwanetup hap hoꞌowasat kahato hap ewy aikotã miitꞌin iꞌypyryp we hoꞌowasat hap ewy tukupteꞌen. Katupono iraniaꞌin yt imohey i haria yt karãpe i Tupana mohey haria. -Miꞌi pote yt karãpe i areineꞌen Iꞌatuꞌywot no e Tupana iꞌatuepe. Yt teꞌeruwanetup hin i uhehay kape e. Iꞌatuewaure kaꞌa yt uikuap i hap e. Taꞌatukyꞌesat kahato wẽtup muap e. Yt kat i uikuap hap taꞌatukyꞌesat e. -Yt urumuꞌe teiꞌo yt uimuꞌe teiꞌo iꞌatuꞌe yn aat kaꞌap uhepe e. Taꞌatunug saꞌag sese sakpo yt uimikyꞌesat ewy i are e Tupana saꞌawyꞌi miꞌiria piat pe.
19 Karãpe taꞌatunug saꞌag wemoti hap ewy miꞌi hawyi yt teꞌeruwemoti hin i. -Yt naku i miꞌi tã eweikupteꞌen e Tupana pykai yt paa iꞌatuꞌe hin i. Teꞌeruwepyi taꞌatupiit mikyꞌesat saꞌag hap oktan yn taꞌatunug neran yt naku i. Taꞌatuewaire hap kape yn teꞌeruwewanetup taꞌatupyꞌa pe. Yt teꞌeruwewaĩ teran hin i yne saꞌag nug hap ete. Taꞌatueko saꞌag nug hap kape yn teꞌeruwepotpap miitꞌin ehamo taꞌatunug. Aikotã aikotã miitꞌin moti hap ewy yn taꞌatunug wuatꞌi ehamo maꞌato yt teꞌeruwemoti hin i pykai.
20 Maꞌato Aipotypot Iesui -Yt eweikupteꞌen neiꞌo miꞌiria ewywuat e. Waku eweikupteꞌen uiꞌewywuat e Aimuꞌe Hat Koro ahepe.
21 Uiwyriaꞌin pywo ti waku watoineꞌen Aikaꞌiwat Iesui ewy are. Waku watikuap kahato ieineꞌen hap etiat iꞌewyte sehay etiat aimuꞌe hap etiat hãpyk kahato rakat ewywuat. Waku watiꞌatunug yne Aiꞌakag minug ewywuat aikotã aimuꞌe Iesui hap ewy. Maꞌato yt naku i watunug mote watikuap taꞌyn yt imimuꞌeria i aito hap watikuap.
22 Pyno waku watoiat aiwẽ piat saꞌag nug hap ete aheko yt naku i nug hap saꞌag saꞌawyꞌi wuat. Waku yne watipugha aiminug saꞌag koꞌi saꞌawyꞌi wuat aiminug koꞌi are kat pote saꞌawyꞌi aiwanetup saꞌag hap yn watunug neran. Yne aimikyꞌesat saꞌag koi aimaꞌat hap ewywuat topyhuꞌat. Maꞌato yt watoiat i aiminug saꞌag saꞌawyꞌi wuat miꞌi pote aheko ewy topyhuꞌat ahete. Miꞌi hawyi aiwemaꞌat hap yn topyhuꞌat iheg me aiwanetup hap hawyi heso heso rakaria wo watopyhuꞌat wemaꞌat haria ewywuat wo watoineꞌen.
23 Waku watoꞌe Tupana pe -Uinug o ipakup takat wo waku watoꞌe. Uinug o waku wanetup hatno iꞌewyte uinug o waku kapiat wanetup hat wo waku watoꞌe. Areineꞌen neran ipakup takatno areineꞌen neran uiwanetup hawe uipyꞌa pe waku watoꞌe Tupana pe. Miꞌi yn waku katupono Tupana yn aihep kuap i aheko saꞌag nug aat kaꞌap hap po pyi e.
24 Aikotã watopag ahesokpe aipiit pe ipakup takat hawyi aikahu hap ewy raꞌyn topyhuꞌat. Miꞌi hap ewy waku watopag ahete Tupana aimokahu hap ewywuat aipainug hap ewywuat. Tupana wanetup hap ewy waku watopag aiwanetup hawe. Tupana wanetup hap watopag aiwanetup hawe hawyi ipakup takaria ewywuat sokpe pakup we ahewyry hap ewy Tupana wanetup hawe. Waku watuwepainug Tupana ehay wo. Waku watunug yne Tupana tunug hãpyk hap ewy. Waku yt kat hin i miitꞌin maꞌat hap aikai. Waku hãpyk Tupana ewy wahewyry mesuwarotiaria pyꞌasetpe. Miꞌi watunug mote watopag ahesokpe pakup ewywuaria aipainug hap ewy watopyhuꞌat hap yt aipuꞌi ete i maꞌato aipyꞌa pe aipainug kahato hap toineꞌen hap ewy.
25 Aito ti Aimimohey Iesui piit ewywuat watopyhuꞌat yne aito haga ewy. Pyno yt naku i aheso aiwoꞌope aikotã saꞌawyꞌi watunug hap ewy. Waku watipugha aiwoꞌope aheso heso hap aikotã watipun ahesokpe hiotꞌe rakat ewy. Koitywy waku pywuat sehay yn aiwoꞌope ahehay are. Miꞌi watunug mote aipainug hap aipyꞌa piat aiwanetup hawiat ikahu kahato Tupana ehamo.
26 Karãpe aipyꞌahak putꞌok e wẽtup ok etiat hap yt naku i watipowyro mekewat aipyꞌahak hap are. Waku aipohep mekewat aipyꞌahak hap toineꞌen ahete turan. Waku meremo aipohep mekewat aipyꞌahak motꞌi hap ete. Waku meremo watuwemoperupꞌi aipyꞌahak hap ete. Yt naku i watopyhuꞌat typy eꞌat aipyꞌahak hap wywo. Waku waure wo watopyhuꞌat aat minꞌe hap eꞌyian mete.
27 Karãpe ahãꞌãg ahiag yt naku i nug hap ete miꞌi pote waku yt ahehay upi i are.
28 Saꞌawyꞌi wateroꞌok iraniaꞌin ekat maꞌato koitywy waku watoiat mekewat ahesokpe nem hap ewy are. Yt naku i Iesui mohey hat seroꞌok e hatno topyhuꞌat. Waku mesup ipakup we watoineꞌen motpap nug haria wo waku watoineꞌen. Waku aheꞌat hakup wywo aipotpap aat. Miꞌi hawyi aipotpap hap saꞌup wywo waku ahekat. Yt naku i miitꞌin maꞌatꞌi maꞌatꞌi hatno aipotpap are. Waku watikat ahekat iwato hawyi ahegyiꞌat hap wywo hatek takaria powyro hanuaria watukupteꞌen. Miꞌi hawyi satek haria poi haria wo watopyhuꞌat aiko wato kaipyi. Miꞌi hap watunug mote ahegyiꞌat hap topyhuꞌat ahete aipainug hap ikahu rakat ewy topyhuꞌat mesuwe Tupana wanetup hawe.
29 Waku ahehay hẽꞌẽ rakat ewy are. Waku iwese kahato rakat ewy watoineꞌen. Waku iraniaꞌin mowepiit ahehay kuap hanuaria watikuap are. Miꞌi tã watunug mote pywo iꞌatuꞌe hamo ahehay kuap haria. Miꞌi hawyi ahehay kuap haria poityro hat ewy watopyhuꞌat. Yt naku i watopotkuasa ahehay wo. Yt naku i watipoepyk ahehay wo are.
30 Karapeĩ saꞌawyꞌi watopyhuꞌat Tupana Paꞌãu eiam mo miꞌi hap eꞌat pe Tupana toꞌe ahepe -Wuatꞌi eꞌat pe aru ereineꞌen uiatnuat uhemiit no e ahepe. Uimiehakyeraꞌat wuaria eipe e ahepe. Pywo yt uheso hin i uiꞌe hap e ahepe Tupana. Pyno uhehay moheg hamuat atum Uipaꞌãu ehewowi e ahepe saꞌawyꞌi. Mesup Uipaꞌãu toꞌe ehepe -Worohoꞌonug eipe uhemiit sese nuaria e. Worokuap kahato eipe mesup e ahepe Tupana. Uheiam mo Uipaꞌãu eiam mo eweikupteꞌen e mesup ahepe. Miꞌi pote yt naku i watimoꞌarot neꞌi Tupana Paꞌãu aiminug saꞌag wo are.
31 Watimoꞌarot kahato Tupana Paꞌãu karãpe aipyꞌahak iraniaꞌin ete pote. Miꞌi pote waku watoiat mekewat yt naku i haiug nakaria are. Yt naku i watuwehum haryporia kape ihainia kape ipiit kyꞌesat hap wywo ahewaire teran hap wywo. Miꞌi watunug mote Tupana Paꞌãu aipiit pe iꞌarot kahato hap ewy are. Yt naku i watopotwesat ahehay pirik hap wywo ahehay saꞌag wywo. Yt naku i marakꞌa wo watoineꞌen. Miꞌi tã watoineꞌen mote miꞌi tã watunug mote Tupana Paꞌãu moꞌarot hat watoineꞌen.
32 Maꞌato waku watoineꞌen iwese kahato rakaria wo. Waku aiwoꞌowese hap ahehay perupꞌi popuo. Waku meremo watiwaure aimaꞌat hat aikotã Aikaꞌiwat waure wo tomaꞌat hap aiminug saꞌag kai toineꞌen hap ewy. Waku watukupteꞌen waure wo yne yne aimaꞌat hap koꞌi kai are. Uito ti Pauru. Worohoꞌonapin kahato waku iwese kahato rakaria wo Iesui ewywuat eweikupteꞌen are.
