Ewesu 5:1-33
5 Pyno aito Tupana saꞌyruꞌin hakiꞌytꞌin watopyhuꞌat miꞌi pote waku wahãꞌãg kahato Aiꞌywot Tupana waku nug hap ewywuat nug hamo Aiꞌywot motypot hamuat Aiꞌywot pote.
2 Aikotã Aipotypot Iesui aikyꞌe kahato saꞌawyꞌi aikyꞌe kahato te. Aikyꞌe kahato hawyi aikyꞌe hap upi ikuꞌuro. Tutum naꞌyn heineꞌen hap aikawiatno hap aikotã saꞌawyꞌi wuaria tum taꞌatuhũria aria pe Tupana mowepiit hamo. Miꞌi hap ewy ikuꞌuro ariaꞌyp posak ete aikyꞌe kahato haype. Aikyꞌe sese hat Iesui pote ikuꞌuro aiꞌapiheg hap u hamo. Miꞌi pote aikotã aikyꞌe hap ewy waku watikyꞌe iraniaꞌin aikuꞌuro hap kape.
Waku Hãpyk Takaria Wo Watoineꞌen Uheineꞌen Hap Ete
3 Pyno koitywy aito Tupana ywania sese koꞌi aito miꞌi pote waku iweꞌeg kahato rakaria wo waku watoineꞌen are. Waku iharyꞌi rakaria wo watoineꞌen iꞌewyte heꞌaito kahato rakaria wo waku watoineꞌen. Yt naku i aheineꞌen hap totiaria iꞌatuehay saꞌag ahete sio iweꞌeg sio yt iꞌatuꞌe hap ete sio tuwanetup saꞌag sio yt iꞌatuꞌe hap ete. Miꞌi pote waku hãpyk kahato watoineꞌen haryporia wywo ihainia wywo iweꞌeg nakat ewywuat powyro hap are. Miꞌi pote miitꞌin yt uwe i ahete iꞌatuehay saꞌag sio aiweꞌeg sio yt iꞌatuꞌe hap ete. Waku yt naku i yt iꞌatuꞌe hin i ahepe. Yt naku i aito Iesui mohey haria yt hegyiꞌat i rakatno watopyhuꞌat are. Yt naku i watikyꞌesat saꞌag iraniaꞌin ekat aipyꞌa pe aheha wo. Yt naku i watuwanetup aat kaꞌap uruwat e hap kape. Waku poꞌog watikat ahegyiꞌat hap iraniaꞌin hatek takaria powyro hap are.
4 Koitywy aito Iesui mohey haria miꞌi pote waku watoiat yne saꞌawyꞌi wuat ahehay saꞌag hap koꞌi yt iweꞌeg i rakat ewywuat. Waku watoiat yne ahehay saꞌag miitꞌin muat ahehay saꞌag hap koꞌi miitꞌin wemoti hap koꞌi. Waku watoiat yne sehay saꞌag. Koitywy poꞌog waku sehay aiwẽ pyi Tupana kapiat aiwehum hap.
5 Pyno uiwyriaꞌin waku aiweꞌeg wo katupono pywo ti yt uwe hin i ti aru yt nakuat i wanetup saꞌag haria tukupteꞌen aru atipy pe aikope Aipotypot Iesui toineꞌen Morekuat no hap tote are. Yt uwe i itote atipy pe uiatno yn mo e haria yt hegyiꞌat i rakaria. Eweꞌeg wo o miꞌi pupi katupono yt ahegyiꞌat i hap yt naku i sese Tupana wanetup hawe aikotã iraniaꞌin tupanaria motypot haria yt naku i nug hap ewywuat minug motypot hap ewy yt ahegyiꞌat i hap are. Yt uwe i aru atipy pe wuatꞌi haryporia wywuat ieineꞌen haria wuatꞌi ihainia wywuat ieineꞌen haria yt uwe i itote katupono aito Aipotypot Iesui emiit.
6 Miꞌi tupono waku aiweꞌeg wo miꞌi koꞌi saꞌag nug hap pupi katupono iꞌatu kahato ahãꞌãg haria iꞌatuehay se ahãꞌãg neran yt naku i nug hamo. Yt teꞌerokenꞌẽ hin i miꞌi saꞌag nug hamo. Miꞌiria aimaꞌat kuap kahato. Waku aiweꞌeg wo are. Iꞌatu iraniaꞌin -Atunug yne Tupana waĩꞌe hap e haria. Aiweꞌeg wo o miꞌi ewywuat aheineꞌen pote katupono Tupana ipyꞌahak kahato yt tomikyꞌesat i nug haria ete. Toiꞌatuꞌapiheg miꞌiria.
7 Pyno yt naku i watuwat iꞌatuehay upi are. Yt naku i watunug saꞌag miꞌiria ewy are. Yt naku i miꞌiria watunug aiwy sese wo.
8 Pyno miꞌi koꞌi saꞌag nug haria ewy yne saꞌawyꞌi aito nimo. Yt watikuap hin i Tupana mekewat eꞌat pe. Nimo hoꞌowasat iꞌypyryp we rakaria ewywuaria watoineꞌen maꞌato mio Aikaꞌiwat eropat haria watopyhuꞌat. Miꞌi pote koitywy watoineꞌen muap upi hẽtyhot puo ikohyewyry rakat ewy yt wataꞌat kuap i raꞌyn. Waku watunug wakuat yn wuatꞌi ehamo Tupana ehamo. Waku watunug waku hap yn aikotã Tupana kuap haria ewy.
9 Aat ipotpap kahato aimikoi ete miꞌi pote aimikoi ihãite kahato. Miꞌi hawyi hewo kahato kat kat ywa. Aheꞌuꞌi raꞌyn aimiꞌu raꞌyn aat motpap hap kaipyi. Miꞌi hap ewywuat kahato karãpe Tupana Paꞌãu putꞌok e ahete turan ahehãite hap toineꞌen aipaꞌãu me. Miꞌi hawyi pywo e haria wo wotopyhuꞌat waku nug haria wo watopyhuꞌat hãpyk nug haria wo watopyhuꞌat aimikoi ihãite kahato hap ewy are.
10 Pyno waku watikat kat som Aikaꞌiwat tikyꞌesat hap. Miꞌi hawyi waku watunug imikyꞌesat ewy imowepiit hamuat aikotã aimikoi hewo kahato aimowepiit hap ewy.
11 Yt naku i nug haria hepap kahato saꞌag nug hap ete wãtym nuran aikotã aikotã hap yt naku i nug hap ete yt kat i Tupana motypot hap iꞌatuminug ete pote. Aikotã yt naku i nug haria iꞌypyryp we taꞌatunug saꞌag miꞌi hap ewy yt naku i nug haria. Waku waĩ watoꞌe iꞌatuepe -Yt Tupana mikyꞌesat ewy hin i ewetunug watoꞌe iꞌatuepe. Yt naku i watuwat iꞌatuminug hap upi. Yt naku i watopyhuꞌat miꞌiria ewy are.
12 Miꞌiria inug saꞌag kahato migꞌi wo watuwemoti hap ewy. Yt areꞌe kuap i aiwoꞌope iꞌatuminug saꞌag koꞌi ete katupono aiwemoti hap sese topyhuꞌat. Yt miit ewy i taꞌatunug saꞌag iꞌypyryp we are.
13 Maꞌato meiũran yne iꞌatuminug saꞌag migꞌi wuat tuwemoherep wuatꞌi ehamo. Tupana timoherep iꞌatuminug saꞌag koꞌi wuatꞌi ehamo. Miꞌi toimoherep hawyi watikuap taꞌyn iꞌatuminug saꞌag koꞌi. Heremo kahato toineꞌen hẽtyhot rakat hap ewy toineꞌen heremo are.
14 Iꞌypyryp sese pote yt kat i heremo maꞌato hẽtyhot putꞌok e hawyi heremo kahato raꞌyn miꞌi hap ewy miitꞌin minug saꞌag. Karãpe watunug saꞌag waku Tupana pe watoꞌe -Atiꞌaparap kahato ti Tupana watoꞌe. Miꞌi pote atoiat raꞌyn saꞌag waku watoꞌe aipyꞌa pe. Miꞌi watunug pote Iesui aimomehit raꞌyn hawyi toimoherep ahepe muap hãpyk takat aiporeraꞌaipok Tupana kapiat hap. Miꞌi pote toꞌe wepy hawe -Erehymut ro eket hawyi erehymut ro ekuꞌuro hap kaipyi miꞌi hawyi Eipotypot Iesui eimomehit raꞌyn e ahepe aiminug saꞌag koꞌi aiket hap ewywuat aikuꞌuro hap ewy pote.
15 Waku aiweꞌeg wo yt naku i nug hap pupi. Waku watikatꞌi katꞌi kahato waku hãpyk nug hamo. Pyno waku aiweꞌeg wo kahato watoineꞌen mesuwarote. Yt naku i yt aiweꞌeg wo i watoineꞌen mesuwe miitꞌin ehamo.
16 Koitywy saꞌag nug haria sok tukupteꞌen mesuwe miꞌi pote waku watuwepotpap poꞌog waku nug hap ete saꞌawyꞌi wuat kai. Karãpe watikuap hatek takaria ete pote waku watipowyro meremo. Waku watiꞌatumuꞌe yt Iesui kuap i te haria.
17 Waku watikuap Tupana mikyꞌesat. Watikuap hawyi waku watunug haty wo. Yt naku i watopyhuꞌat yt Tupana mikyꞌesat yt kuap i te haria ewywuat yt iweꞌeg i rakaria ewywuat.
18 Miꞌi tupono yt naku i aimopẽꞌã mahy wo maꞌato mahy u hat meiũran topyhuꞌat toieineꞌen hap pun hat. Mahy kape yn tuwanetup hap pote yt miit ewy i aru topyhuꞌat. Miitꞌin mikyryꞌi wo yne yt naku i nug hatno are. Waku watoꞌe Tupana Paꞌãu me -Uimowepiit ro En aikotã mahy iraniaꞌin mowepiit hap ewywuat waku uimowepiit waku watoꞌe Tupana Paꞌãu me. Waku poꞌog aito Tupana Paꞌãu eiam mo mahy eiam kai. Tupana Paꞌãu aimowepiit kuap kahato maꞌato mahy yt kahato i.
19 Eiwoꞌomuꞌe ro morekuat Tawi wepy hap koꞌi ete saꞌawyꞌi wuat koꞌi ete. Waku watimotypot Tupana wepy hap wywo. Waku watuwepy Tupana Paꞌãu kaipyi aiwehum hap wywo. Waku wepy nug haria wo watukupteꞌen Aikaꞌiwat motypot hap koꞌi wywo watoineꞌen.
20 Karãpe putꞌok e ahete sio waku sio yt hap waku watoꞌe Tupana pe -Waku kahato En Tupana. Arehum kahato ewowi Emipoꞌoro ete emiium ete katupono Esaꞌyru Iesui mohey hat uito waku watoꞌe.
21 Pyno Aipotypot motypot haria aito pote iꞌewyte waku watoꞌomotypot katupono hemiitꞌin aito pote are. Pyno manaꞌin etimotypot ro eꞌaito. Etunug no imikyꞌesat ewy are.
Waku Aito Iꞌewyte Haryꞌi Waku Tukupteꞌen Woꞌope
22 Miꞌi tã etunug hawyi Tupana motypot hat ereineꞌen.
23 Katupono eꞌaito topyhuꞌat eꞌakag wo Tupana wanetup hawe aikotã aikotã aipotypot Iesui Aiꞌakag wo topyhuꞌat hap ewy.
24 Miꞌi hap ewy waku manaꞌin waku eweipyhuꞌat eꞌaito eropat hatno wo imikyꞌesat nug hamuat aikotã watopyhuꞌat Iesui eropat haria ewy. Aiꞌakag sese Iesui. Imohey haria torannia Akag wo topyhuꞌat wuatꞌi eꞌat pe. Imohey haria torannia ipiit no topyhuꞌat miꞌi hawyi Aiꞌakag wanetup hap watunug ipiit aito pote.
25 Mehinꞌin etikyꞌe kahato eharyꞌi aikotã saꞌawyꞌi Aiꞌakag Iesui tiꞌatukyꞌe kahato aito temiitꞌin tomohey haria hap ewy. Etikyꞌe kahato eharyꞌi aikotã Iesui tum ahepe toieineꞌen hap ahehakyeraꞌat hamuat miꞌi tã aikyꞌe. Miꞌi tã waku etikyꞌe eharyꞌi ekuꞌuro hap kape Iesui ewy.
26 Miꞌi hawyi tomohey haria yne tutum Toꞌywot po pe -Ewatno mesup e tope. Atiꞌatumuꞌe raꞌyn miꞌiria ehay nug hamo e. Miꞌi pote wei haria ewy tukupteꞌen yt iꞌatupiit pit hin i e.
27 Miꞌi pote aito imohey haria yne watopyhuꞌat iharyꞌi ewywuat maꞌato aikyiꞌat eꞌyian mete ainug ikahu kahato rakat ewy iweꞌeg kahato rakat ewy. Yt karãpe i iꞌaparap hat ewy ainug tehay wo. Ihay yꞌy ewywuat aikoho hap maꞌato ihay ainug ihãite kahato rakat ewywuat ipe ikahu rakat ewy ipiit kahu rakat ewywuat teharyꞌi ewy ainug. Aipiit yt ipit pit hin i hap ewy ainug imohey haria yt kat i saꞌag ahete aiwei tehay wo hawyi.
28 Uhytꞌiꞌin mehinꞌin etikyꞌe ro eharyꞌi ewekyꞌe hap ewy katupono uwe uwe tikyꞌe teharyꞌi tuwekyꞌe iꞌewyte uwe uwe tipowyro teharyꞌi tuwepowyro are.
29 Aito ahesyꞌat hawyi watuwepoi iꞌewyte haty aipiit ete hawyi meremo watikat mohag haty monik hamo. Miꞌi hap ewy waku etikyꞌe eharyꞌi erekyꞌe hap ewy. Yt naku i aipiit ete aipyꞌahak. Yt naku i miꞌi tã watunug aiwete. Watipowyro kahato aipiit. Pywo ti miꞌi hap ewy Aiꞌakag Iesui tiꞌatukyꞌe tomohey haria. Waku etikyꞌe eharyꞌi Iesui kyꞌe hap oktan.
30 Pyno aito imohey haria torannia. Aikaꞌiwat Iesui piit aga koꞌi ewy watopyhuꞌat.
31 Saꞌawyꞌi Tupana toꞌe miwan me -Waku etikyꞌe eharyꞌi poꞌog torannia miitꞌin kai miꞌi pote waku etoiat eꞌywot ety hawyi waku eharyꞌi wywo kahato ereineꞌen wẽtup piit ewy yn naꞌyn e Tupana saꞌawyꞌi miwan me.
32 Pyno mio tã toꞌe Tupana miwan me -Karãpe ihainia iharyꞌi toꞌokyiꞌat hap hawyi topyhuꞌat wẽtup piit kawiat yn naꞌyn topyhuꞌat typy ok miit pykai e. Niatpo hap tohenoi mesuwe maꞌato watomohey Iesui hawyi aito yne watopyhuꞌat Iesui eharyꞌi ewywuat. Miꞌi iãꞌãkap tohenoi ihay saꞌawyꞌi wuat pe.
33 Ihainiaꞌin etikyꞌe kahato o eharyꞌi aikotã ewekyꞌe hap ewy e. Manaꞌin etimotypot kahato o eꞌaito e Tupana ahepe are.
