Ewesu 6:1-24
6 Hirokaria kurumꞌin koꞌi piꞌãꞌin koꞌi Iesui mohey haria eipe pote ewetunug no eꞌywot ety e hap ewy. Etunug eꞌywot ety piat epoꞌoro hap pote waku rakaria wo hãpyk takaria wo ereineꞌen wuatꞌi wanetup hawe.
2 Katupono mio tã e Tupana saꞌawyꞌi saꞌyruꞌin me sakiꞌytꞌin me -Etimotypot ro eꞌywot ety pote woropoityro aru eipe e. Pywo etimotypot eꞌywot ety pote ti aru ereineꞌen motꞌi mesuwat yi tote e iꞌewyte eweikupteꞌen waku pe kahato mesuwe aat kaꞌap e Tupana saꞌawyꞌi ahepe.
3 Pyno waku watimotypot aity aiꞌywot iꞌe hap ewy katupono Tupana piat ainapin hap wẽtup yn watunug hawyi Tupana toꞌe -Koitywy ereineꞌen waku pe motꞌi aru e.
Eweimotypot Ro Eꞌywot Ety
4 Aiꞌywotꞌin koꞌi eiweꞌeg wo o emepytꞌin napin hap ete. Waku etiꞌatuꞌapiheg wen maꞌato iꞌatukyꞌe hap wywo yn o waku etiꞌatuꞌapiheg. Yt eweiꞌatumopyꞌahak teiꞌo maꞌato etiꞌatunapin Aipotypot Iesui piat ainapin hap ewy are.
Waku Eiꞌyat Piaria Tupana Motypot Haria Wo Tukupteꞌen
5 Uiwyriaꞌin miit emiit eweiwat ro eikaꞌiwat mesuwarotiat ehay upi eiperupꞌi popuo imotypot popuo yt kat i eheso hap popuo. Waku watuwehum howawi aipyꞌa pyi. Waku wateropat kahato aikaꞌiwat mesuwarotiat aikotã Aikaꞌiwat Iesui eropat hap ewy.
6 Waku wateropat kahato hãipe kai aikotã heineꞌen turanuat ewy. Waku imowepiit hap wywo wateropat. Karãpe wateropat aikaꞌiwat mesuwarotiat waku watoꞌe aipyꞌa pyi -Tupana woromotypot teran mesuwat uipotpap ete katupono areineꞌen Esaꞌyru eropat hat waku watoꞌe Tupana pe ahekaraiwa mesuwarotiat potpap nug hap turan.
7 Waku aikaꞌiwat mesuwarotiat wateropat aiwepiit hap popuo. Waku haty wo watunug imikyꞌesat ewy. Waku aikaꞌiwat mesuwarotiat potpap ete watimowepiit Aikaꞌiwat atipy piat. Yt naku i aikaꞌiwat mesuwarotiat mowepiit hap kape yn watuwanetup hap. Waku Aikaꞌiwat atipy piat mowepiit hap wy aiwanetup hawe wateropat aikaꞌiwat mesuwarotiat turan.
8 Waku aiwatetup hap aipotpap saꞌup ium hap sese toineꞌen atipy pe hap kape. Yt naku i mesuwarotiat kape yn aheha katupono meiũran ti aru Tupana tum aipotpap wakuat saꞌup ahepe. Tutum aru wuatꞌi miitꞌin me sio miitꞌin akag sio miit emiit Tupana tum wakuat saꞌup watunug yne imotypot hap wywo pote.
9 Mehinꞌin manaꞌin eweikupteꞌen miit akag wuat mesuwarote pote waku etiꞌatupowyro kahato o emiitꞌin emipoꞌororia koꞌi. Yt eweiꞌe teiꞌo ehemiitꞌin me -Yt ewetunug i uimikyꞌesat ewy pote worohoꞌoꞌapiheg yt eweiꞌe i katupono emiitꞌin Kaꞌiwat sese toineꞌen atipy pe. Yt etiꞌatumohit emiitꞌin mesuwe katupono meiũran ti aru Aiꞌakag sese timoherep wuatꞌi pe aiminug wakuat koꞌi sio aiminug saꞌag koꞌi. Mekewat eꞌat pe heremo yne aiminug koꞌi sio miit eropat hat watoineꞌen sio miit akag wo watoineꞌen are.
10 Pyno Uito Pauru. Waku raꞌyn uimiwan. Ahenoi hit hawyi toran naꞌyn are. Pywo uiwyriaꞌin Aikaꞌiwat Iesui aimoesaika kahato hat toineꞌen. Miꞌi pote -Urumoesaika ro emohey hap ete waku watoꞌe Iesui pe. Waku watopyhuꞌat wẽtup miit ewy aiwanetup hawe Mehin waku watoꞌe Iesui pe. Uinug o hesaika kahato rakat waku nug hap ete waku watoꞌe Aipotypot pe.
11 Iesui mohey haria aito pote watoineꞌen suraraꞌin ewywuat ahiag akit hanuaria. Waku watopag aipiit pe surara esokpe ewywuat Tupana miium. Waku watat yne Tupana miium wuꞌuka hamuat. Miꞌi hawyi putꞌok e ahewanikap ahiag hawyi aimaꞌat hamo hawyi waku watuꞌuka mekewat ahiag mupiat Tupana miium ahiag akit hamuat hap wywo. Yt naku i ahesaika hap wywo aipiit esaika hap wywo watuꞌuka ahiag wywo katupono poꞌog poꞌog hesaika aikai. Katupono aito yt watuꞌuka i miitꞌin wywo maꞌato ahiag wywo watuꞌuka.
12 Katupono ahiag ahewanikap sese topyhuꞌat. Ahiag esuraraꞌin wywo watuꞌuka maꞌãu saꞌag kawiat. Ahiag emiit koꞌi atipy piaria ewywuat ahiagnia tukupteꞌen mesuwat yi tote miitꞌin yt naku i nug haria akag wo. Yt heremo i maꞌãu saꞌag wen maꞌato hesaika kahato miitꞌin powyro yt naku i nug hamo. Yt naku i nug haria akag wo tukupteꞌen miꞌiria.
13 Mekewat atipy kaipywiaria ahewanikaptia kahato miꞌiria iꞌewyte yne imohey haria ewanikaptia ahiagnia. Miꞌi pote waku watuwat Tupana miium koꞌi wywo aipiit piat ahiag sopo hamuat maꞌãu saꞌag koꞌi sopo hamo. Waku watopag koran Tupana miium koꞌi wuꞌuka hap ekareꞌen hawyi waku watopag yian mete yne aipiit pe Tupana miium mekewat suraraꞌin wat ewywuat. Miꞌi wywo yn watuꞌuka kuap ahiag wywo aimoma teran hap eꞌat turan. Mekewat eꞌat pe tuꞌuka tuꞌuka kahato ahete aat kaꞌap. Maꞌato miꞌi pykai yt aiꞌakit kuap i katupono Tupana miium ahiag sopo hap poꞌog hesaika. Miꞌi pote watopyhuꞌat ahiag okpe tote.
14 Pyno waku watoineꞌen suraraꞌin ewywuat ahewanikap ekatup hamo. Waku aipiit ete aiꞌauka hap pupiat sokpe suraraꞌin wat ewywuat. Waku wahẽtup Tupana kape ahesokpe ahiag akit hamuat. Waku saꞌawyꞌi watopag aiwanetup hawe pywuat sehay yn Tupana ehay aikotã suraraꞌin topag iweꞌok kytyt hap iheg nakat ewywuat. Miꞌi hamo ahiag poryꞌa ewywuat yt teke kuap i aipyꞌa pe. Miꞌi wo watisopo kuap ahiag miat aiꞌauka hap koꞌi pupi. Waku wahẽtup Tupana pe -Uinug no hãpyk kahato rakatno waku watoꞌe aikotã suraraꞌin topag sokpe iheg nakat sumu wato pupiat ewy. Miꞌi hap ewy waku watopag Tupana miium aimohãpyk hamuat.
15 Topy ete suraraꞌin topag iheg nakat suraraꞌin py sokpe. Miꞌi wywo teꞌeruweput kuap kahato tuꞌuka hamo. Miꞌi hap ewy waku watopag aipy sokpe ewywuat Tupana miium tehay ereto wuatꞌi miitꞌin kapiat hamuat hap mekewat sehay wakuat woꞌowese hap Tupana wywuat hap ete.
16 Suraraꞌin topag taꞌatupo ete iheg nakat moryꞌa aria kawiat pupiat. Moryꞌa pupiat suraraꞌin topag toꞌoꞌog me hap ewy. Miꞌi ewy Tupana miium ahepiat tomohey hamuat waku aipo pe yne eꞌat pe ahiag poryꞌa sem sopo hamo. Waku watomohey aat kaꞌap aikuꞌuro hap kape. Mekewat saꞌag nug hat ahiag ahewanikap kahato. Miꞌi aiꞌawaꞌawa surara ewy ihay saꞌag moryꞌa ewy aiꞌawaꞌawa surara poryꞌa wuat hap ewy maꞌato yt putꞌok e i ahete katupono suraraꞌin ewy aheꞌog iheg nakat aipo pe Iesui mohey pote yt putꞌok iꞌatuꞌe i ahete.
17 Suraraꞌin topag iꞌatuꞌakag ete suraraꞌin akag wepainug hap iheg nakat. Miꞌi ewywuat Tupana tum neran ahepe. Miꞌi ti aheineꞌen wuatꞌi eꞌat piatnuat tutum. Suraraꞌin po sese kai toineꞌen kyse wuꞌuka hap iwatoꞌin nakat typy kai hãi hyk kahato rakat. Miꞌi hap ewy Tupana Paꞌãu tum ahepe Tupana ehay ahiag wywuat wuꞌuka hamo ahiag atek tek hamo.
18 Karãpe watuꞌuka ahiag wywo waku watoꞌe meremo -Tupana uipowyro ahiag akit hamo yne eꞌat pe wakuat nug hamo waku watoꞌe. Aikope aikope areineꞌen waku uhewyry Tupana Paꞌãu upi waku watoꞌe Tupana pe. Etipowyro o emiitꞌin eweꞌeg wo o ahiag mupi waku watoꞌe. Yt urutuwat reran i ahiag ehay upi. Iꞌewyte iraniaꞌin Iesui mohey haria upi waku uruhẽtup wy. Yt uruikyꞌesat i ahiag ehay upi urutuwat hap. Yt karãpe i uruꞌatoiat emohey hap waku watoꞌe Tupana pe.
19 Uito ti Pauru atikyꞌesat ewehẽtup o Tupana pe uipowyro hamuat. Karãpe ewehẽtup iraniaꞌin powyro hamo yt uiwaure teiꞌo eipe. -Etunug o Pauru ewẽ wo ehay moherep hamo wuatꞌi miitꞌin me eweiꞌe ro uikawiatno. Karãpe toimoherep ehay wakuat turan etum o tope iweꞌeg kahato hap iꞌewyte ikuap kahato hamuat hap ewat ewywuat hap eweiꞌe o. -Ehay pywuat yt uwe i mikuap saꞌawyꞌi miwan miat hamo etimoesaika Pauru Iesui etiat moherep hamo eweiꞌe yt kat i miitꞌin kenꞌẽ hap wywo waku eweiꞌe Tupana pe uipowyro hamo.
20 Mesuwarote morekuaria koro koꞌi tipoꞌoro kahato taꞌatuemiitꞌin iraniaꞌin etawa kape taꞌatuehay moherep hamuat. Taꞌatuehay ereto hamo taꞌatupoꞌoro wẽtup ok taꞌatuemiit poꞌog taꞌatumimohey. Miꞌi hap ewy kahato uito Pauru. Miꞌi hap ewy kahato areineꞌen. Uiporekuat Tupana mipoꞌoro areineꞌen tehay moherep hamuat iraniaꞌin ywania kape. Miꞌi ehay moherep hamo uiꞌairo. Maꞌato miꞌi pykai koitywy areineꞌen woꞌopyhik hawe. Mesup yt uhewyry kuap i Tupana ehay sytpok hamo. Pyno waku ewehẽtup o Tupana pe mesuwat woꞌopyhik hawiat uipowyro hamo are. Ewehẽtup o yt kat i uiwemoti hap Tupana ehay moherep hamuat mesuwe katupono atikyꞌesat suraraꞌin sem muꞌe hatno areineꞌen mesup are.
21 Pyno Aikaꞌiwat emiit sese Tikiku e hap het rakat atipoꞌoro ehewowi. Uhehay wywo atipoꞌoro aikotã aikotã areineꞌen mesuwe hap enoi hamo. Tikiku waku kahato atipuẽti. Miꞌi ti Tupana ehay yt iꞌatoiat hin i aheywyt sese aikywyt miit sese miꞌi.
22 Miꞌi pote atipoꞌoro Tikiku ehewowi katupono atikyꞌesat tohenoi ehepe aikotã urutukupteꞌen hap enoi hamo. Miꞌi hap eweikuap hawyi eiwepiit kahato. Taꞌi eimoesaika aru eipyꞌa pe aimimohey Iesui mohey hap ete aiwoꞌokyꞌe hap ete are.
23 -Uruꞌywot Tupana urukaꞌiwat koro Iesui ahẽtup ewowi. Etunug o emohey haria tawa Ewesu piaria woꞌokyꞌe haria wo. Etunug o miꞌiria woꞌowese haria wo emohey sese haria wo are.
24 Tupana ereineꞌen hegyiꞌat kahato rakatno emohey haria pe katupono Esaꞌyru urukaꞌiwat Koro Iesui kyꞌe kahato haria miꞌiria are. Etiꞌatukyꞌe teꞌen neꞌi miꞌiria katupono Emipoꞌoro uruporekuat kyꞌe wuatꞌi eꞌat piat haria miꞌiria areꞌe aat kaꞌap Tupana pe mesuwe woꞌopyhik hawe. Worohoꞌokyꞌe eipe are.
