Humanu 10:1-21
10 Uheꞌywytꞌin uheinytꞌin Iesui mohey haria Yi Humanu totiaria ahẽtup haty wo aat kaꞌap Tupana kape -Tupana are etiꞌatuehakyeraꞌat ro uiꞌywania uiꞌewywuaria Iuteu ywania ahẽtup kahato uipyꞌa pyi. Etimoherep to Esaꞌyru Iesui uiꞌywania pe. Etiꞌatunug no Iuteuria Emipoꞌoro uruporekuat nuat mohey kahato hanuaria wo uiꞌewywuat haria wo areꞌe yn Tupana pe haty uipyꞌa piat wywo.
2 Yt uheso hin i uiꞌywania Iuteuria tikuap teran kahato Tupana wen maꞌato yt taꞌatukuap i te. -Tupana sese poꞌog uruimotypot iraniaꞌin kai iꞌatuꞌe maꞌato yt taꞌatukuap i te Tupana taꞌatupyꞌa pe taꞌatuwy ewywuat.
3 Haꞌawyte yt taꞌatumohey i Tupana kapiat muap Iesui. Taꞌatuwaure muap Tupana kuap sese hamuat hawyi mesup taꞌatukat rẽ wẽtup muap Tupana kapiat kuap hamo e. Tupana kapiat muap pun haria uiꞌywania. -Yt watikyꞌesat i En uruporekuat nuat hap iꞌatuꞌe Tupana Mipoꞌoro Iesui pe. Taꞌatunug taꞌatupuꞌap taꞌatuwanetup hawe yt Tupana kapiat muap ewywuat i. Miꞌi hawyi waku kahato urupuꞌap Tupana kapiat iꞌatuꞌe iraniaꞌin me maꞌato yt pywo pe i.
4 Katupono haꞌawyte Tupana toꞌe -Atipoꞌoro aru Uhaꞌyru Eiporekuat no e. Uwe uwe imohey haria miꞌi haria ti aru waku pe tukupteꞌen uipyꞌa pe e nimo uiꞌywania pe wen maꞌato uruꞌywania Iuteuria yt imohey i hawyi -Ewetunug no yne yne urueꞌaseꞌi Muisei waĩꞌe hap hawyi waku pe eweikupteꞌen Tupana wanetup hawe iꞌatuꞌe mesup wuatꞌi ywania pe. -Atimoma raꞌyn mekewat muap e Tupana yt uwe i inug kuap mote e. Mesup Uimipoꞌoro Eiporekuat nuat Iesui upi yn toineꞌen muap uhowawiat e. Yt karãpe i ehewaku hap putꞌok e uimowepiit hamo e Tupana mesup wuatꞌi miitꞌin me.
5 Pyno eweikuap teran mekewat muap Muisei mienoi Tupana kapiat hap pote waku eweikuap sese kat som Muisei toꞌe. Mio tã e tomiwan me -Ereineꞌen neran hãpyk takat sese Tupana wanetup hawe pote ewetunug aat kaꞌap yne yne Tupana waĩꞌe hap Tupana etunug no e hap koꞌi e. Yt eweiꞌaparap hin i yne yne Tupana e hap koꞌi ete hawyi eweikupteꞌen wakuaria wo maꞌato wẽtup ete eweiꞌaparap pote Tupana miꞌapiheg wo eweikupteꞌen aru e Muisei tomiwan me.
6 Maꞌato Tupana tikuap kahato yt uwe i mesuwat yi totiat toran tomikyꞌesat ewywuat nug kuap haria tukupteꞌen. Miꞌi pote Tupana tunug muap wẽtup takat tuwewawiat Tosaꞌyru apiheg hap upi. Taꞌi mekewat Wakuat Miit Iesui mohey hap kaipyi aimohãpyk kuap. Tomipoꞌoro Aipotypot nuat mohey haria pe yn Tupana toꞌe -Eipe waku kahato atipuẽti mesup uipyꞌa pe e. Aikotã Tupana toꞌe saꞌawyꞌi tehay moherep haria wẽ pyi hap ewy. Mio tã e wuatꞌi miitꞌin me -Yt pya hin i areineꞌen eikai e. Uimipoꞌoro Eiporekuat nuat iꞌewyte yt pya hin i eikai e.
7 Uhehay iꞌewyte yt pya i eikai e. Taꞌi uhehay toineꞌen naꞌyn eiwẽ pe ehehẽku tote e. Taꞌi uhehay toineꞌen naꞌyn eiwanetup hawe e ahepe. Yt naku i watoꞌe -Tupana Mipoꞌoro toineꞌen pya kahato aikai iuẽpe atipy pe watoꞌe. Katupono yt pya hin i aikai Ahehakyeraꞌat hat. Yt naku i watoꞌe aipyꞌa pe -Waku watuwat atipy kape Iesui kape hawyi waku waterut meikowo Aiporekuat no yt naku i watoꞌe katupono toineꞌen kahato aipyꞌasetpe. Yt naku i watoꞌe -Toꞌiro waꞌasyp hap kape Tupana Mipoꞌoro Aiporekuat nuat kat hamo sio toineꞌen itote sio yi ywytꞌokpype toineꞌen sio waku watehymut sio yt naku i miꞌi tã watoꞌe katupono Tupana Ehay toineꞌen mesup yt pya hin i aikai katupono aiwẽ pe toineꞌen kahato e. Imohey haria piit puo toineꞌen.
8 Maꞌato miꞌi tã Tupana toꞌe ahepe mesup -Uhehay iꞌewyte yt pya hin i eikai e. Taꞌi uhehay toineꞌen naꞌyn eiwẽ pe ehẽku tote. Taꞌi uhehay toineꞌen naꞌyn eipyꞌa pe eiwanetup hawe e ahepe. Miꞌi tã ti ahenoi ehepiat hap. Taꞌi Tupana ehay toineꞌen eipiit pe imohey haria eipe pote.
9 Katupono uwe uwe tuwemoherep towẽ pyi iraniaꞌin me -Iesui ti Uikaꞌiwat sese e iꞌewyte topyꞌa pe hawyi mio tã e -Iesui woromohey kahato ereineꞌen guꞌuro pyi hap miꞌi e hat Tupana miehakyeraꞌat no topyhuꞌat e.
10 Katupono karãpe aipyꞌa pe watoꞌe -Woromohey En Iesui e miꞌi hat pe -Waku pe eweikupteꞌen wuatꞌi eꞌat pe e Tupana ahepe. Iꞌewyte uwe uwe tuwemoherep iraniaꞌin me towẽ pyi Iesui mohey hat sese uito iꞌewyte Uikaꞌiwat kahato Iesui e hat pe Tupana toꞌe -Woroehakyeraꞌat en wuatꞌi eꞌat pe e.
11 Aikotã miwan miat Tupana toꞌe saꞌawyꞌi wuat hap ewy -Uwe uwe toꞌe uhepe -Tupana woromohey En e hat ti aru yt karãpe i tuwemoti te uimohey hap ete e Tupana miwan me.
12 Tupana toꞌe wuatꞌi miitꞌin me sio aito Iuteuria ywania sio wẽtup ywania -Uwe uwe uimohey hat uimowepiit hat sese toineꞌen sio Iuteu ywania sio wẽtup ywania e. Taꞌi Kereku ywania sio gaꞌapy piat ywania uimohey haria uikay kay Uhaꞌyru set upi pote uimiehakyeraꞌat nuaria tukupteꞌen e Tupana yne ywania pe.
13 Aikotã miwan me Tupana toꞌe saꞌawyꞌi hap ewy topyhuꞌat mesup. -Uwe uwe e uhepe -Tupana uhehakyeraꞌat ro e miꞌi e hat pe mio tã areꞌe -Mesup taꞌyn woroehakyeraꞌat en uhyt mana e.
14 Maꞌato yt karãpe i yt imohey i te hat hẽtup Iesui kape hehakyeraꞌat hamo. Iꞌewyte yt ikuap i te Iesui etiat yt uwe i henoi tope pote yt karãpe i hẽtup Tupana kape hehakyeraꞌat hamo katupono yt toikuap i te pote. Iꞌewyte yt kat i Tupana ehay moherep hat itote pote yt taꞌatuẽtup kuap i Tupana kape iꞌatuehakyeraꞌat hamo yt kat i iꞌatuwoꞌomuꞌe haria i pote.
15 Iꞌewyte yt watipoꞌoro i wẽtup ok iꞌatuepe Iesui ehay etiat iꞌatumuꞌe hamo pote yt karãpe i taꞌatukuap katupono yt uwe i henoi iꞌatupyꞌasetpe iꞌatumuꞌe hamo Tupana etiat pote yt taꞌatumohey kuap i. Miꞌi pote ti -Waku kahato uhehay wakuat moherep haria tukupteꞌen e Tupana. Ikahu kahato iꞌatupy koꞌi uiwanetup hawe katupono uhehay ereto hamuat iꞌatupy koꞌi e Tupana. Aikotã Tupana toꞌe hap ewy -Karãpe wẽtup ok toto uhehay moherep hamo iraniaꞌin kape uiwanetup hawe miꞌi miit wakuat kahato wo toineꞌen e. Ipy koꞌi iꞌewyte ikahuria ewy teꞌeropyhuꞌat uiwanetup hawe katupono iꞌatukohyewyry kahato uhehay moherep hamo pote e.
16 Saꞌawyꞌi Tupana ehay moherep hat Isaia toꞌe tomiwan me -Tupana e atiꞌatumuꞌe kahato mesuwarotiaria ehay wo maꞌato yt taꞌatumohey i te e. Taꞌatukuap kahato aiwẽ pywiat pykai yt taꞌatupywo i ahehay etiat e Isaia saꞌawyꞌi. Miꞌi e hap kaipyi watikuap taꞌyn iꞌatu kahato Tupana ehay wakuat kuap haria mesuwarotiaria tukupteꞌen maꞌato yt taꞌatumohey teran i haria hap watikuap.
17 Iꞌewyte Tupana Mipoꞌoro Ahehakyeraꞌat hamuat moherep hap kaipyi yn ni miitꞌin teꞌeropyhuꞌat Iesui mohey haria wo.
18 Uiꞌywania Iuteuria tikuap kahato mesuwat sehay wakuat aikotã morekuat Tawi toꞌe tuwepy hawe tomiwan me hap ewy -Taꞌi uiꞌywania ti Tupana ehay kuap kahato haria e. Aikope aikope taꞌatuewyry mesuwat yi wato hap oktan note aru taꞌatumoherep kahato Tupana ehay itotiaria pe e. Uiꞌywania Iuteuria tukupteꞌen wuatꞌi etama pe Tupana ehay moherep hamo e tomiwan me.
19 Pyno uruꞌywania Iuteuria tikuap taꞌyn saꞌawyꞌi te mesuwat sehay wakuat e. Mekewat urueꞌaseꞌi pot Isareu emiariru koꞌi ikuap kahato aikotã Muisei toꞌe wuatꞌi eꞌyian mete hap taꞌatukuap. Mio tã toꞌe Tupana uruepe Isareu emiariru koꞌi pe -Meiũran aru wẽtup ywania tukupteꞌen uimohey haria wo e. Mekewat eꞌat pe miꞌiria yt nakuaria i ywania eiwanetup hawiat tukupteꞌen pykai uheropat kahato haria e. Uimiehakyeraꞌat koꞌi wo tukupteꞌen kahato miꞌiria e. Miꞌiria ete aru ehaꞌywyi kahato e Tupana saꞌawyꞌi uruꞌywania pe iraniaꞌin ywania yt iweꞌeg nakaria i ewy te Iro pote e. Taꞌi miꞌiria uimiehakyeraꞌat koꞌi tukupteꞌen irane uiꞌywania sese ewywuaria e. Miꞌi atunug hawyi eweipyhuꞌat ipyꞌahak miꞌi haria etiat rakaria wo uhehay iꞌatuehay wo pote e.
20 Muisei ikuꞌuro hawyi Tupana ehay moherep hat Isaia putꞌok e mekewat Muisei ewy te ihay -Mio tã e Tupana uhepe e meiũran ti aru iraniaꞌin ywania yt uikat i haria uipuẽti raꞌyn aikope aikope tukupteꞌen yi wato hap oktan e Tupana uhepe e. Iꞌewyte -Aremoherep iraniaꞌin ywania pe -Yt karãpe i eremoherep uruepe e haria pe e Tupana Isaia miwan me.
21 Maꞌato uiꞌywania Iuteuria kape mekewat Isareu emiariru koꞌi pe mio tã e Tupana aat kaꞌap -Eweĩꞌẽ o uhowowi worohoꞌoꞌokhytsat reran are aat kaꞌap Aparãu emiariru emiariru koꞌi pe maꞌato -Yt yt iꞌatuꞌe uhowowi e. Yt uruikyꞌesat i yt kat i emikyꞌesat urutunug neran eweiꞌe uhepe Isareu ywania e Tupana saꞌawyꞌi Isaia miwan me. Taꞌi aikay kay kahato tuwewawi Tupana yt nakuaria aito pykai.
