Humanu 13:1-14
13 Karãpe morekuaria toꞌe ahepe -Etunug no wakuap e pote waku watunug iꞌe hap ewy Iesui mohey haria aito pote. Waku watuwat iꞌatuehay wakuap upi are katupono yne aikaꞌiwaria Tupana mipag koꞌi. Yne tuꞌisaria iꞌewyte Tupana miꞌairo koꞌi tukupteꞌen. Taꞌi ahekapitãu koꞌi yne aiꞌakag koꞌi morekuaria koꞌi ahetuꞌisaria aikaꞌiwaria Tupana miꞌairo koꞌi tukupteꞌen aiꞌatuꞌapykok hamo. -Taꞌi uhehay kaipyi ti yne morekuaria tukupteꞌen atipy pe iꞌewyte yi tote e Tupana ahepe.
2 Yt naku i watuꞌuka morekuaria ainapin waku nug hap ete. Waku aiweꞌeg wo o katupono yt naku i watuꞌuka morekuaria airo hat Tupana ete are. Watuꞌuka miꞌiria ainapin waku hap ete pote Tupana miꞌapiheg wuatnuaria wo watopyhuꞌat.
3 Maꞌato wakuap watunug aiꞌakag koꞌi aipoꞌoro hap ewy pote yt watokenꞌẽ hin i morekuaria suraraꞌin mupi are katupono waku pe watoineꞌen kahato morekuaria wanetup hawe. Miꞌi hawyi karãpe putꞌok e surara ahowawi hawyi yt watokenꞌẽ hin i ipupi maꞌato aiwy ok wo toineꞌen are. Maꞌato karãpe watunug saꞌag miꞌi hawyi yt naku i nug haria wo watoineꞌen morekuaria wanetup hawe. Miꞌi pote watokenꞌẽ kahato morekuaria pupi iꞌewyte iꞌatuesuraraꞌin miat aiꞌapiheg hap pupi watokenꞌẽ. Pyno aito Iesui mohey haria pote yt karãpe i watokenꞌẽ morekuaria pupi.
4 Tupana miꞌairoria koꞌi ti aiporekuat tuꞌisaria aiꞌakag koꞌi pywo ti rat Tupana tiꞌatuꞌairo yne miꞌiria aipowyro hamuat yt naku i nug hap pupiat aiꞌapykok hanuaria toiꞌatuꞌairo aikaꞌiwaria maꞌato watunug yt naku i hap koꞌi pote waku watokenꞌẽ kahato iꞌatupupi katupono aiꞌapiheg kuap taꞌatuesuraraꞌin po wo are. Pyno tuꞌisaria morekuaria Tupana eropat haria ewywuaria tukupteꞌen kahato aipyꞌasetpe are. Miꞌiria ti toiꞌatupag aiꞌapiheg hamuat aiminug saꞌag etiat hamo.
5 Pyno yt nakuap i ahete yt watunug i morekuaria tuꞌisaria ehay pote. Watunug waku pote waku pe watoineꞌen suraraꞌin nywo. Miꞌi pote poꞌog waku iꞌatuwese kahato hap toineꞌen are katupono waku watunug hawyi yt kat i aiwemoti hap topyhuꞌat aipyꞌa pe aiwanetup hawe.
6 Iꞌewyte karãpe morekuaria tiꞌatukyꞌesat saꞌup taꞌatupotpap hap upi miꞌi pote waku watum iꞌatuepe iꞌatumiẽtup katupono iꞌatupotpap kahato aiꞌapykok hawe. Miꞌiria iꞌatupotpap kahato Tupana mikyꞌesat nug hamuat ahetama aheꞌyi wanikaptia pyhyp hamo. Miꞌiria tikyꞌesat kahato aheineꞌen hap ikahu kahato hap. Yne minug hap ete aipowyro kahato aiꞌakag koꞌi mesuwarotiaria.
7 -Eweiꞌatumotypot ro pyno miꞌiria tuꞌisaria e Tupana ahepe. Morekuaria torannia pe ehegyiꞌat ro ehekat wo e mesup ahepe Tupana. Ewehaꞌupnug o eiweteweru hap iꞌatuepiat e. Taꞌatukyꞌesat taꞌatupowyro hap taꞌatukonug hamuat ete pote waku watuwepotpap iꞌatuko nug hamuat e Tupana ahepe. Waku miꞌi tã watunug miꞌiria motypot hamo are. Waku morekuaria pe tuꞌisaria pe watum saꞌup katupono miꞌiria iꞌatupotpap kahato Tupana mikyꞌesat ewy nug hamuat aipowyro hap ete. Waku ipotpap takaria wo watukupteꞌen yne aito Iesui mohey haria aito pote.
8 Eiweteweru hap meremo ewehaꞌupnug e. Yt naku i ti rat aito Iesui mohey haria watuweteweru neꞌi. Waku wẽtup yn aiweteweru hap mesuwarote are miꞌi ti miitꞌin kyꞌe hap kawiat. Waku wahãꞌãg kahato miꞌi nug hamo yne miitꞌin ete. Miꞌi hawyi waku yt kat i aiweteweru hap. Waku wuatꞌi miitꞌin kyꞌe haria watopyhuꞌat. Miꞌi yn waku aiweteweru hap sese. Miitꞌin kyꞌe kahato haria wo watoineꞌen pote wakuap yn naꞌyn watunug iꞌatuepe. Miꞌi hawyi Tupana mikyꞌesat nug haria wo watopyhuꞌat miitꞌin kyꞌe haria aito pote. Yt karãpe i watiꞌaparap miwan miat waĩꞌe hap koꞌi ete Muisei mienoi koꞌi ete kat pote watiꞌatukyꞌe kahato iraniaꞌin miitꞌin mote yt karãpe i watimaꞌat miꞌiria.
9 Kat pote saꞌawyꞌi yityꞌok tote Tupana tiwan nu tote puretig. Miꞌi hawyi tutum ahaꞌaseꞌi Muisei pe -Yt ereket reiꞌo wẽtup ok eꞌaito wywo wẽtup ok eharyꞌi wywo e. Yt etiꞌauka teiꞌo miit e. Yt eteroꞌok teiꞌo iraniaꞌin ekat e. Yt eheso teiꞌo iraniaꞌin minug hap ete iꞌatumaꞌat hamuat. Yt etiꞌatukyꞌesat reiꞌo eha wo iraniaꞌin ekat iraniaꞌin emiit e. Yt ereineꞌen neiꞌo ehaꞌywyi iraniaꞌin ekat ete e Tupana ainapin tomiwan me nu tote. Miꞌi e hap koꞌi waku watunug yne yne are. Iꞌewyte wẽtup ainapin hap poꞌog miꞌiria kai toineꞌen are. -Eweiꞌatukyꞌe ro iraniaꞌin eiwekyꞌe hap oktan e Tupana. Miꞌi e hap watunug mote yne Tupana kaipywiat ainapin hap tomiwan miat watunug naꞌyn.
10 Kat pote watiꞌatukyꞌe iraniaꞌin aiwekyꞌe hap oktan mote yt karãpe i watiꞌatumaꞌat reran aimikyꞌe kahato haria. Yt karãpe i woꞌomaꞌat haria wo watopyhuꞌat Tupana piat ainapin hap koro -Eweiꞌatukyꞌe iraniaꞌin eiwekyꞌe hap oktan e hap nug hawyi. Woꞌopotkyꞌe hat wo watoineꞌen hawyi yne ainapin hap Tupana mikyꞌesat koꞌi nug haria wo watukupteꞌen.
11 Uimimuꞌeria tawa wato Huma piaria toꞌiro watiꞌatukyꞌe miitꞌin. Yt naku i woꞌomaꞌat haria wo watopyhuꞌat. Ahehakyeraꞌat hat Iesui tuut hamuat. Yt watikuap i kat eꞌat putꞌok e maꞌato miꞌi hap watikuap poꞌog yt pya i gaꞌatpo hap kai. Poꞌog poꞌog yt pya i Aikaꞌiwat uut hap saꞌawyꞌi wuat ahepiat yt imohey i te hap kai. Yt naku i get haria ewywuaria wo watukupteꞌen huut turan. Pyno koran waku wahekatup kahato huut hap.
12 Yt naku i nug haria tikyꞌesat kahato wãtym muo yt naku i nug hamuat hap. Taꞌatukyꞌesat kahato ti iꞌypyryp wiat saꞌag nug hap maꞌato aito yt miꞌiria ewywuat i aito katupono aitoria watopyhuꞌat ihatꞌok puo ieineꞌen haria ewy are. Waku nug haria tikyꞌesat kahato waku nug hap yne ehamo hamuat Tupana motypot hamuat. Waku nug haria tikyꞌesat kahato ihatꞌok wuo wuatꞌi ehamo waku nug hamuat. Mesup taꞌyn wãtym porap tokosap taꞌyn uiwyriaꞌin are. Mesup taꞌyn ihatꞌok porap putꞌok e. Uimimuꞌeria Aikaꞌiwat uut hap yt pya i aat wẽtem hap ewy ihatꞌok hap.
13 Wuatꞌi ehamo eꞌat pe turan yt uwe i inug saꞌag. Aiminug wakuap wen yne heremo. Waku yt watuwemoti hin i aiminug waku hap upi. Waku watiꞌatoiat yne yt naku i nug hap kat koꞌi mekewat wãtym muat hairu saꞌag nug haria woꞌopytyk pytyk hap ewywuat. Waku watiꞌatuꞌatoiat yne kat som mekewat mahy wemopẽꞌã hap aikotã wãtym muaria tunug hap ewywuat. Waku watiꞌatoiat yne kat som mekewat aiwary wary aheꞌaito heꞌaito hap. Waku miitꞌin hãpyk takaria ewywuaria watopyhuꞌat mesuwat yi tote are aikotã wakuap nug haria ewy. Waku watiꞌatoiat yne kat som aiwuꞌuka hap woꞌoꞌahyk hap koꞌi. Waku watiꞌatoiat yne kat som mekewat woꞌoꞌehayꞌywyi hap.
14 Miꞌi pote waku watiꞌauka aipiit mikyꞌesat saꞌag nug hap koꞌi. Waku wẽtup ehay kape watum aiwanetup hap mekewat Aikaꞌiwat Iesui wanetup hap ewywuat. Yt naku i watipowyro aipiit imikyꞌesat saꞌag nug hamuat ete. Karãpe putꞌok e ahete aimikyꞌesat saꞌag yt naku i nug neran hap hawyi waku meremo yt ahewaure i howawi. Aikotã watopag ahesokpe pakup aipiit pe aipainug hamuat hap ewywuat waku watopag Aipotypot Aikaꞌiwat Iesui aipyꞌa pe aiwanetup hawe aipiit puo aimokahu sese hap aipainug sese hap are.
