Humanu 14:1-23
14 Karãpe putꞌok e wẽtup ok Iesui mohey pakup te hat yt itag i te Iesui mohey hap ete hawyi waku -Ereke ro mehin mana watoꞌe tope. Iesui mohey hat en mote waku ereineꞌen uruwywo Tupana motypot hamuat wuatꞌi eꞌat pe watoꞌe imohey pakup i hat pe are. Waku -Ereke ro watoꞌe imohey pakup i hat pe yt ihãite i imohey hap ete pykai.
2 Yt naku i watimohit neꞌi miꞌi wẽtup ok miit yt ikuap kahato i te aimikuap Iesui etiat pykai. Yt naku i watuꞌuka sehay wo miꞌu ete kat som waku watuꞌu kat som yt e hap ete katupono imohey pakup takaria tuꞌuka teran miꞌu eko ete. Yt naku i watuꞌuka imohey hap yt aiwoꞌoeko ewy hap ete mekewat kat eꞌat waku watimotypot Tupana e hap ete. Miꞌi pote yt naku i watimohit Iesui mohey pakup i hat. Poꞌog waku watikyꞌe kahato miꞌiria.
3 Yt aiwoꞌoꞌewy hin i miꞌu eko ete katupono wẽtup ok Iesui mohey hat iꞌu yne miꞌu koꞌi hat maꞌato wẽtup ok yt ihãite i te Iesui mohey hap ete rakat -Waĩ waĩꞌe neꞌi miꞌu koꞌi ete. Miꞌi hawyi miꞌu u yne hat yt naku i toꞌe yt iꞌu yne i hat pe -Yt naku i kahato en mehin mana e yt etuꞌu yne i miꞌu uruꞌewy yt naku i mio tã watoꞌe imohey pakup hat pe. Katupono -Uhaꞌyru mohey hat en mote waku ereineꞌen uipyꞌa pe e Tupana ahepe.
4 Yt naku i watimohit iraniaꞌin Iesui eropat haria iꞌatueko ete kat pote Iꞌatukaꞌiwat koro Iesui yn ikuap waku teropat hap sio yt hap katupono Taꞌatukaꞌiwat kaipyi yn taꞌatukyꞌesat -En ni waku rakat e hap. Uiwyriaꞌin Aikaꞌiwat tikuap kahato aimoesaika topotpap nug hamuat hap. Aipoityro kuap kahato Aipotypot koro topotpap nug hamo. Yne tomohey pakup i haria poityro kuap hat Iesui toineꞌen. Iꞌewyte yt naku i watoꞌe iꞌu yne hat pe -Yt naku i en katupono etuꞌu yne yt urueko ewy i watoꞌe. Yt naku i mio tã watoꞌe katupono Tupana toꞌe Tosaꞌyru mohey haria pe -En ni waku kahato uiwanetup hawe e yne miitꞌin me sio miꞌu tutuꞌu yne sio yt pykai i.
5 Pyno iraniaꞌin Iesui mohey haria -Waku ti watimotypot Tupana yne eꞌat pe iꞌatuꞌe maꞌato iraniaꞌin Iesui mohey haria -Wẽtup eꞌat yn nat poꞌog waku watimotypot Tupana iꞌatuꞌe. Taꞌi yt aiwoꞌoꞌewy hin i kat eꞌat poꞌog waku hap ete. Pyno waku watomohey aipyꞌa pe yt heremo i kat som watomohey miꞌi hap ete are. Waku watikuap aiwewi kat eꞌat waku kat eꞌat yt hap Tupana motypot hamuat are. Miꞌi hawyi yt naku i watimohit iraniaꞌin mimohey.
6 Waku kahato watimotypot Tupana. Miꞌi pote waku watoꞌe -Mesuwat eꞌat pe atimotypot teran Tupana watoꞌe. Yt aiwoꞌoꞌewy hin i aimiꞌu eko koꞌi wo Iesui mohey haria aito pykai. Wẽtup ok toꞌe -Mesup atuꞌu miꞌu Tupana motypot hamo e. Pyno waku miꞌi ewy ewetuꞌu katupono eiwehum kahato mekewat miꞌu ete Tupana kape pote waku ewetuꞌu. Ewetuꞌu hawyi -Waku kahato En Tupana katupono uipoi kahato hat en eweiꞌe. Maꞌato iraniaꞌin Iesui mohey haria -Yt urutuꞌu kuap i mekewat miꞌu mana mehin iꞌatuꞌe katupono uruwanetup hawe Tupana yt tikyꞌesat i urutuꞌu mekewat miꞌu hap iꞌatuꞌe. Miꞌi haria pe waku watoꞌe -Pyno waku yt ewetuꞌu i mekewat miꞌu mana mehin katupono yt eiwehum kuap i mekewat miꞌu ete Tupana kape watoꞌe. Miꞌi pote yt naku i ewetuꞌu katupono waku watimotypot Tupana ahenuk turan. Iꞌewyte waku watuwemosyꞌat tuereto Tupana motypot hamo watoꞌe aiwoꞌope aheko miꞌu u hap koꞌi ete.
7 Yt naku i watoineꞌen mesuwat yi tote aiwehay upi aimowepiit hap yn nug hamo kat pote Aikaꞌiwat mowepiit hap kape aiwyriaꞌin mowepiit kape yn waku watuwepotpap are. Yt watoꞌopowyro i pote yt naku hin i watoineꞌen mesuwat yi tote.
8 Uiwyriaꞌin waku watoꞌe -Yt uiwepyi i uiwemowepiit hamo areineꞌen neran mesuwat yi tote maꞌato Tupana mowepiit hamuat iꞌewyte miitꞌin mowepiit hamuat areineꞌen neran mesuwe watoꞌe. Iꞌewyte uikuꞌuro hap eꞌat pe atimotypot teran Tupana uikuꞌuro hamo waku watoꞌe aiwoꞌope uimimuꞌeria are. Mio tã watoꞌe pywo pe pote Tupana watnuaria sese watoineꞌen.
9 Tupana tipoꞌoro Tosaꞌyru Aiporekuat nuat. Miꞌi hawyi ikuꞌuro hawyi tuwẽtem i guꞌuro pyi. Aikaꞌiwat tokuꞌuro rẽ toikuap aikuꞌuro hap miꞌi pote iraniaꞌin Iesui mohey haria ikuꞌuro rakaria Kaꞌiwat no topyhuꞌat. Iꞌewyte Aikaꞌiwat no toineꞌen i tokuꞌuro hawyi miꞌi pote watoineꞌen iwywo katupono toineꞌen i pote tuwẽtem guꞌuro pyi. Mesup Iesui toineꞌen wuatꞌi ieineꞌen haria Kaꞌiwat no. Iꞌewyte toineꞌen mesup wuatꞌi ikuꞌuro rakaria Kaꞌiwat nuat. Miꞌi pote aikuꞌuro hap toikuap kahato mesup.
10 Miꞌi pote yt naku i watoꞌe aiwoꞌope -Uiwanetup hawe mekewat miit yt kat hamuat i yt naku i watoꞌe mesuwe kat pote Tupana yn waku aipatꞌok uwe waku uwe yt hap e hamuat are. Mekewat eꞌat pe wyti aru toihoꞌomoherep uwe tomohey sese haria. Yt naku i watoꞌe wẽtup ok Iesui mohey hat pe -Yt worokyꞌesat i kahato en mana mehin watoꞌe. Yt naku i watimohit aiwanetup hawe iraniaꞌin Iesui mohey haria katupono Tupana yn aikuap sio waku sio yt hap. Miꞌi yn toꞌe kuap. Meiũran wyti aru yne aito watoineꞌen iꞌam me Tupana ehay ahepiat kuap hamuat sio waku rakat no watoineꞌen aipyꞌa pe aiwanetup hawe sio yt naku i hap kuap hamo.
11 Taꞌi miꞌi tã toꞌe Tupana miwan me -Meiũran aru yne tuwepỹꞌãtutuk uhowowi e. Mekewat eꞌat pe yne teꞌeroꞌe aru -En yn ni Tupana iꞌatuꞌe teꞌeruwepỹꞌãtutuk popuo e. Yt uheso hin i e. Pywo ti rat uiꞌe hap ewy aru topyhuꞌat e. Torannia teꞌeruwepỹꞌãtutuk uhowowi uiꞌe hap ewy e. Yne yne miitꞌin aru mekewat eꞌat pe -En ni En yn ni Tupana iꞌatuꞌe aru uhepe e Tupana miwan me Isaia 45.23 pe.
12 Miꞌi pote torannia aito aru wahenoi Tupana pe yne yne ahetiat kat som watunug mesuwarotiat aikotã watoineꞌen mesuwarote watoꞌe aru Tupana pe.
Yt Naku I Watiꞌaparap Aiwyriaꞌin Kape
13 Miꞌi pote waku watoiat mekewat aiwanetup hawiat -Mekewat miit yt naku i aiꞌe hap. Miꞌi hawyi waku wẽtup sehay watoꞌe aiwanetup hawe -Yt ahoꞌoꞌaparap teran i iraniaꞌin Iesui mohey haria ete e hap waku watoꞌe aipyꞌa pe. Waku watoꞌe aipyꞌa pe -Yt atiꞌaparap teran i wẽtup ok Iesui mohey hap pun hamuat waku watoꞌe aat kaꞌap aipyꞌa pe uhekatuwyria.
14 Uito ti eiwy Pauru are. Uito eiperia wywo wẽtup piit ewy yn Iesui piit wo watoineꞌen mesuwat yi tote. Uiwyriaꞌin pywo pe ti uiwanetup hawe miꞌu mesuwarote Tupana minug wakuat yne toineꞌen miꞌu wo are uipyꞌa pe uiwepe. Saꞌawyꞌi yt atimohey i maꞌato koitywy atimohey kahato. Iesui e hap kaipyi atikuap hawyi. Maꞌato uiwyriaꞌin -Yt naku i mekewat miꞌu watuꞌu eweiꞌe eipyꞌa pe pote yt ewetuꞌu teiꞌo are kat pote ewetuꞌu hawyi eiwemoti hap topyhuꞌat. Katupono -Atunug yt naku i miꞌu atuꞌu pote eweiꞌe aru eipyꞌa pe. Miꞌi pote yt ewetuꞌu teiꞌo eiwemoti popuo.
15 -Pyno waku watuꞌu yne watoꞌe pote waku aiweꞌeg wo uwe pe mio tã watoꞌe katupono tukupteꞌen iraniaꞌin Iesui mohey haria yt aiwanetup hap ewywuaria i kahato iꞌatueko miꞌu etiat miꞌi pote -Paĩ an waku watuꞌu yne watoꞌe iꞌatuehamo hawyi iꞌatumohey hap mohit haria watopyhuꞌat iꞌatuwanetup hawe. Poꞌog waku watoꞌe -Mehin mana yt naku i watuꞌuka aheko miꞌu ete miꞌi pote atuꞌu teran eimikyꞌesat ewy mesuwe areineꞌen eiwywo turan waku watoꞌe. Miꞌi hawyi waku watuwemoesyꞌat iꞌatueko ewy itote. Tukupteꞌen wy yt imohey i te haria. Miꞌiria pyꞌasetpe watoineꞌen turan waku watiꞌatukyꞌe miꞌiria iꞌatueko miꞌu etiat ewywuat nug hap ete watoineꞌen iꞌatuwywo turan are. Yt naku i wahoꞌomopyꞌahak aimiꞌu u hap wywo iraniaꞌin are. Yt naku i aimiꞌu wo watimopyꞌahak iraniaꞌin seko waĩꞌe hap ete katupono miꞌiria ehakyeraꞌat hamo Iesui ikuꞌuro wy. Maꞌato watenuk kahato iꞌatuehamo -Yt ewetuꞌu teiꞌo miꞌi miꞌu iꞌatuꞌe hap ete pote yt karãpe i taꞌatumohey Iesui hawyi miꞌiria maꞌat haria watopyhuꞌat katupono aimiꞌu wo watiꞌatumopyꞌahak neꞌi pote yt wahoꞌoekyi kuap i miꞌiria Iesui kape.
16 Maꞌato iraniaꞌin waku watuꞌu yne iꞌatuꞌe. Waku watimotypot kahato Tupana aimiꞌu wywo iꞌatuꞌe. Waku watuwehum kahato Tupana kape ahenuk turan iꞌatuꞌe. Miꞌi hap waku wen maꞌato eiweꞌeg wo o uwe pe mio tã eweiꞌe. Katupono kat som waku pe toineꞌen aiwanetup hawe iraniaꞌin me yt naku i topyhuꞌat tuereto. Miꞌi hawyi aiminug wakuap topyhuꞌat yt nakuat i iꞌatuepe. Miꞌi hawyi iꞌatuwanetup hawe yt naku i nug haria watopyhuꞌat yt kat i watunug yt naku i aiwanetup hawe pykai. Miꞌi pote waku aiweꞌeg wo kahato ahehay wywo aiminug wywo katupono miꞌi hawyi yt iꞌatuewaure kaꞌa i ahowawi yt naku i aito iꞌatuwanetup hawe hawyi.
17 Maꞌato pywo pe ti Tupana topyhuꞌat Ahehakyeraꞌat hat yt aimiꞌu u hap kaipyi i yt ahesapo hy u hap kaipyi i. Tupana topyhuꞌat Aiporekuat no Topaꞌãu tutum ahepe hawyi. Ipaꞌãu yn ainug kuap toꞌywania koꞌi wo. Yt aheko miꞌu etiat ahehakyeraꞌat hap. Yt aheko i aimohãpyk kuap. Tupana Paꞌãu yn aimowepiit kuap. Aheko miꞌu u hap ete yt aimowepiit kuap i. Karãpe aiwanetup hap hewyry kahato kowoꞌi kowoꞌi hawyi Tupana Paꞌãu yn aimowepiit kuap. Aheko miꞌu ete eꞌat ete watiꞌatunug yne hawyi yt kat i te ahehakyeraꞌat hap are. Tupana yn ahehakyeraꞌat kuap.
18 Pywo ti rat areꞌe ehepe -Karãpe watiꞌatukyꞌe iraniaꞌin aipyꞌa pyi Tupana Paꞌãu mimowepiit koꞌi aito pote miꞌi hawyi Tupana mowepiit haria wo iꞌewyte miitꞌin mowepiit haria wo watukupteꞌen mesuwarote.
19 Miꞌi pote waku watikat kahato muap aiwoꞌowese hap nug hamo. Waku watopyhuꞌat woꞌowese haria wo. Waku watikat kahato muap aiwoꞌomopoĩꞌam hamuat are. Waku watikat muap aiwoꞌope aiwoꞌomoesaika Iesui ehay wo imohey poꞌog hamuat hap ete.
20 Pyno Tupana wanetup hawe waku watuꞌu yne miꞌu maꞌato yt naku i Tupana wanetup hawe watopyhuꞌat wuꞌuka haria aheko miꞌu u hap ete. Miꞌi tã watunug mote watimoma aiwoꞌowese hap aiwoꞌope. Yt naku i watuꞌuka ahehay wo aimiꞌu u hap aheko ete. Miꞌi tã watunug mote Tupana hũria atuuka haria wo watoineꞌen hawyi Tupana potpap moma haria wo watopyhuꞌat. Poꞌog waku watikat kahato aiwoꞌokyꞌe hap. Waku watoꞌe Tupana pe -Uipowyro o miitꞌin ekyi ewowiat hamo mehin uipowyro kahato o katupono yt atiꞌatusytpok teran i emohey haria uheko miꞌu u hamo waku watoꞌe Tupana pe.
21 Pyno kat som kat som waku iꞌatuwywuat aheineꞌen turan waku watunug. Waku watikuap iraniaꞌin eko koꞌi hawyi waku iweꞌeg nakaria wo watoineꞌen. Iꞌatumiꞌu hap ewy waku watuꞌu iꞌatuehamo. Waku watuꞌu iꞌatumiꞌu ipuꞌi u hap ewy iꞌatuwywo watoineꞌen nuran. Yt naku i watiꞌatuꞌaparap neꞌi iraniaꞌin Iesui mohey haria yt iꞌatueko ewywuat i watunug hap kaipyi. -Waĩ iꞌatuꞌe mahy u hap ete pote waku yt watuꞌu i. Miꞌi pote waku -Yt naku i watuꞌu mekewat miꞌu puꞌi iꞌatuꞌe pote -Pyno waku watoꞌe. Yt naku i watiꞌatuꞌaparap neꞌi iraniaꞌin aiminug koꞌi wo.
22 Waku watikuap kahato aipyꞌa pe kat som waku watunug kat som yt naku i watunug Tupana e hap miꞌi hawyi waku watunug aimimohey ewy. Waku watikuap kat som watomohey miꞌu ete sapo hy u ete eꞌat hap ete miꞌi hawyi waku yt wahenoi i iraniaꞌin me miꞌi hap koꞌi kaipywiat imohey hap ete. Waku wahenoi Tupana kape yn kat som watomohey miꞌi ete hap maꞌato aiwanetup hap toꞌe -Yt naku i miꞌi tã etunug e pote yt etunug neiꞌo mekewat epyꞌa piat. Maꞌato watunug mekewat waĩꞌe aipyꞌa piat hap pote aiwemoti kahato hap topyhuꞌat. Aipyꞌa piat haty hap toineꞌen -Yt naku i nug hat uito watoꞌe aiwepe.
23 Maꞌato iraniaꞌin aito Iesui mohey haria haty kahato topyhuꞌat aipyꞌa pe watuꞌu kat koꞌi kat koꞌi hawyi. Watuwemoti neꞌi aipyꞌa pe katupono aheko yt ewy i watunug mote. Miꞌi pote yt watuwehum kuap i Tupana kape watuꞌu turan yt imohey hap upi i watuꞌu pote. Miꞌi pote waku watoiat mekewat aiminug saꞌag koꞌi yne yt watuwehum kuap i Tupana kape hap watunug nuran mote are. Yt Iesui mohey hap wywo i watunug aiminug koꞌi hawyi watiꞌaparap Tupana pe yt watimotypot i Tupana aiminug wywo pote are.
