Humanu 15:1-33
15 Maꞌato yt watomohey kahato i seko koꞌi pote waku watipowyro iraniaꞌin yt aiwanetup hap ewywuaria i Iesui mohey pakup i haria. Waku watiꞌatupowyro miꞌiria Iesui mohey hap etiat iꞌatumoehãite hamo. Yt naku i watuwepotpap aiwemowepiit hap kape yn. Waku watuwepotpap kahato iraniaꞌin Iesui mohey haria powyro hamuat hap ete. Waku Iesui mohey pakup i haria watiꞌatukyꞌe kahato aiwese kahato hap wywo taꞌatuꞌaparap kahato te pykai.
2 Poꞌog waku iraniaꞌin Iesui mohey haria mowepiit hatno watopyhuꞌat. Waku watikat iraniaꞌin Iesui mohey haria waku piat hap are. Waku watiꞌatumotag neran Iesui mohey hap ete iraniaꞌin.
3 Yt karãpe i Aiꞌakag Iesui tuwemowepiit hap kat hatno toineꞌen. Taꞌi Aikaꞌiwat Tupana mowepiit hap koꞌi yn toikat. Saꞌawyꞌi mio tã e miwan me -Saꞌawyꞌi toꞌokyryꞌi kahato eete Tupana hawyi uipoꞌoro iꞌatuehakyeraꞌat hamo. Mesup iꞌatuehay saꞌag kahato topyhuꞌat uhete e. Yne miitꞌin sehay saꞌag Tupana piat hap topyhuꞌat uhete e Iesui eꞌyian mete miwan me Tawi wepy hawe 69.9 pe. Miꞌi hap ewy waku poꞌog watiꞌatumowepiit iraniaꞌin watuwemowepiit hap kai.
4 Uiwyriaꞌin yne yne Tupana e hap miwan miat saꞌawyꞌi wuat toineꞌen aimuꞌe hamo. Pywo ti rat saꞌawyꞌi wuat miwan aimuꞌe kahato hap topyhuꞌat aiꞌarot hap hep kahato hamuat. Miꞌi e hap koꞌi aimoesaika kahato imohey hap ete. Watuwemuꞌe saꞌawyꞌi wuat miwan ete hawyi watikuap kahato yne Tupana e hap -Atunug aru e hap koꞌi. Watikuap kat som tutunug aru hawyi wahekatup kahato iꞌe hap ewywuat eꞌat putꞌok e hap. Miꞌi hawyi aimowepiit kahato hap topyhuꞌat katupono watikuap waku kahato aru Tupana tunug aru ahepe toꞌe hap ewy watikuap miwan saꞌawyꞌi wuat kaipyi.
5 Uiwyriaꞌin miꞌi tã kahato ahẽtup Tupana pe ehewowi -Uruꞌywot atipy piat En yn ni wuatꞌi uruwat uruꞌarot hap kaipywiat urumowepiit hat. En yn ni urumoesaika kuap hat yt karãpiat i ehay atoiat uruepiat hap ete. Urunug Esaꞌyru mohey haria wo pote wẽtup miit ewy yn uruwanetup hawe urupyꞌa pe hap ahẽtup epe. Tupana urunug no Esaꞌyru uruporekuat saipepiaria kahato wo hap ahẽtup ewowi are. Aikotã Esaꞌyru toineꞌen kahato mesuwe yi tote emotypot kahato hatno miꞌi hap ewy urunug no Esaꞌyru ewywuat mesuwe hap ahẽtup ewowi Tupana.
6 Miꞌi etunug mote wẽtup miit ewy uruimotypot En mesuwe uruꞌywot are. Waku wẽtup sehay yn tuwẽtem uruwẽ pyi Esaꞌyru Emipoꞌoro uruporekuat nuat Iesui ete are. Waku wẽtup miit ewy yn uruehay emotypot hap are. Urumoesaika Epaꞌãu wo urupyꞌa pe hawyi emotypot haria kahato urutukupteꞌen uimiẽtup ewowiat are.
7 Saꞌawyꞌi karãpe watomohey Aipotypot Iesui hawyi meremo Tupana ainug towyriaꞌin wo. Iwese kahato toineꞌen ahowawi. Miꞌi ewywuat waku meremo watunug iraniaꞌin Iesui mohey haria aiwyriaꞌin wo. Waku iwese kahato rakaria wo watoineꞌen iꞌatuwywo yt aiwoꞌoeko i pykai. Miꞌi watunug mote meremo Tupana motypot kahato hap topyhuꞌat mesuwarote.
8 Saꞌawyꞌi Tupana toꞌe urueꞌaseꞌi pot Aparãu me -Meiũran aru yne ywania mesuwat yi totiaria atiꞌatupoityro e. Taꞌi Wẽtup emiariru emiariru topyhuꞌat aru Wuatꞌi Ywania Porekuat no e. Miꞌi hawyi Iesui tuwemoherep mesuwe Aparãu saipepiat sese Iuteuria pyꞌasetpe. Miꞌi hawyi toꞌywania eropat kahato hat ewy topyhuꞌat.
9 Taꞌi Tupana yt heso hin i Aparãu me. Tutunug toꞌe hap ewy maꞌato yt Iuteuria kape yn i Iesui tuwemoherep katupono iraniaꞌin ywania kape iꞌewyte tuwemoherep wy. Toikyꞌesat yne ywania Tupana motypot hanuaria hap toikyꞌesat. Toikyꞌesat yne yne ywania tikuap Toꞌywot egyiꞌat hap. Aiwy Iesui tikyꞌesat aikotã toꞌe miwan me saꞌawyꞌi hap ewy -Uiꞌywot e arehum aru uhẽku wo ewowi iraniaꞌin ywania pyꞌasetpyi e. Arepy aru ewowi Uiꞌywot e. Miꞌi hawyi iraniaꞌin ywania wẽ pyi eset kahu aru wemotypot haria wo teꞌeropyhuꞌat e Tupana Saꞌyru saꞌawyꞌi sese temiit morekuat Tawi wepy hawe miwan me 18.49 pe.
10 Iꞌewyte mio tã e miwan me -Wuatꞌi ywania eweimotypot ro Tupana imowepiit kahato hap ehehay wywo e. Eweimotypot ro Tupana mekewat Iuteuria ywania wywo iwat iꞌywania sese wywo e. Eiwemowepiit ro Tupana kape ehehay wepiit kahato hap wywo e morekuat Tawi towepy hawe miwan me ahepe Saumu 72 pe.
11 Iꞌewyte poꞌog toꞌe morekuat Tawi -Wuatꞌi ywania eweimotypot ro Ainug hat eipyꞌa pyi e. Mio tã eweiꞌe ro tope -Waku kahato sakpoꞌe En urupotypot urukaꞌiwat eweiꞌe ro Einug hat Tupana ewowi areꞌe yne miitꞌin sem mesuwat yi totiaria pe e morekuat Tawi towepy hawe tomiwan me Saumu 11.1 pe.
12 Iꞌewyte Tupana ehay moherep hat Isaia mio tã e wy -Meiũran aru wẽtup ok miit Tupana Mipoꞌoro topyhuꞌat mesuwarote Wuatꞌi Ywania Porekuat no e. Miꞌi Miit wyti aru morekuat Tawi ywot Iese saipepiat sese toineꞌen aru e. Morekuat Tawi ywot Iese toineꞌen aikotã ariaꞌyp ypy potꞌi ewy maꞌato Tupana Mipoꞌoro aru toineꞌen aikotã mekewat ariaꞌyp koro sese gaꞌapy piat ewy e. Mekewat iꞌypy kyt tuweityk taꞌyn hawyi iꞌypy kyt hẽtyt heremo hawyi tuwemowato sese iꞌyp e. Miꞌi hap ewy aru Tupana Mipoꞌoro sese toineꞌen aru Wuatꞌi Ywania Porekuat nuat Miit toineꞌen e. Yt Iuteuria ywania Porekuat no yn toineꞌen maꞌato yne miitꞌin mesuwarotiaria Porekuat no toineꞌen aru e ti saꞌawyꞌi Tupana ehay moherep hat Isaia tomiwan me 11.9 pe.
13 -Tupana uito ti emipoꞌoro Pauru atikyꞌesat kahato etiꞌatupowyro iraniaꞌin ywania kape ekuap hamuat hap ete. Koitywy iꞌatuꞌarot potꞌi wywo tukupteꞌen. En yn waku iꞌatumowepiit kuap hanuat. Esaꞌyru kape yn teꞌeruwanetup taꞌatuhekatup haype are. Uiꞌywot mekewat ewat wuatꞌi eꞌat piat woꞌomowepiit hap yn waku etum iꞌatuepe. Esaꞌyru mohey hap kaipyi etum no iꞌatuepe iꞌatuwanetup saꞌag hap monik hap Esaꞌyru mohey hap kaipyi are. Papai etum o Epaꞌãu Wakuat iꞌatuepe poꞌog poꞌog yne eꞌat pe. Etimoesaika miꞌiria Epaꞌãu Wakuat kaipyi are. Epaꞌãu Wakuat kaipyi atikyꞌesat taꞌatuhekatup Esaꞌyru uut hap aat kaꞌap. Uruꞌywot Tupana etimowepiit kahato uheꞌywytꞌin uheinytꞌin tawa wato Huma piaria.
14 Uiwanetup hawe waku kahato ti eiperia tawa Huma piaria. Uiwyriaꞌin uheinytꞌin kahato eiperia Iesui mohey haria eweikupteꞌen mote Aiꞌywot Tupana Wakuat eiam kahato eiperia. Taꞌi Tupana kuap hamo eipytꞌat ehehowapy kahato miꞌi pote worohoꞌomohey kahato eipe. Waku eweikupteꞌen eiwoꞌomuꞌe muꞌe hanuaria wo eimikuap Tupana etiat wo. Taꞌi waku kahato worohoꞌopuẽti eiperia wuatꞌi miitꞌin muꞌe hamuat.
15 Pyno uito Pauru mesuwat uimiwan ehowawiat. Uimiwan mesuwe yt iperup takat i einapin hamuat sese. Atiwan haty wo aikotã watiꞌatunapin aimepytꞌin haty wo hap ewy worohoꞌonapin eipe mesuwe. Miꞌi hap uimiwan atunug mesuwe. Waku pe atiwan katupono Tupana uipoꞌoro iraniaꞌin ywania napin hamo. Tupana uiꞌairo miꞌi hap inug hamuat. Yt uhewaku hap upi i uiꞌairo wen maꞌato uikyꞌe tepiat hap kaipyi yn mote.
16 Waku kahato atipuẽti Aipotypot Iesui eropat hatno. Waku atipuẽti mesuwat uipotpap iraniaꞌin muꞌe hamuat Iesui ehay wakuat etiat. Saꞌawyꞌi wuat paꞌiria koꞌi iwuk miitꞌin hũria Tupana mowepiit hamo. Miꞌi hap ewy areineꞌen Iesui miꞌairo paꞌi saꞌawyꞌi wuaria ewywuat. Paꞌi ewy areineꞌen katupono atomoherep kahato sehay wakuat Iesui etiat Tupana kaipywiat. Paꞌi ewy atimoherep kahato iraniaꞌin me Tupana e uhepiat hap ewy. Aikotã paꞌi saꞌawyꞌi wuaria ewy atum Tupana pe iraniaꞌin ywania mohãpyk hamo Iesui suu hap ewy. Mesup eiperia atum Tupana kape paꞌi ewy. Eiperia Tupana mowepiit kahato haria ewy eweikupteꞌen katupono Iesui suu mikoho koꞌi eiperia. Wuatꞌi ywania atum Tupana kape hawyi tuwehum kahato uimiium ete katupono Ipaꞌãu Wakuat mimohãpyk koꞌi iraniaꞌin tukupteꞌen mesup. Iesui suu mimowaku koꞌi tukupteꞌen iraniaꞌin ywania mesup. Miꞌi pote paꞌi ewy atum miꞌiria Tupana pe hap ewy.
17 Uikaꞌiwat Iesui yn uhehakyeraꞌat hat. Miꞌi yn ni Uiꞌakag sese. Wẽtup ok miit ewy yn iwywo urupotpap miitꞌin yne ywania ekyi Tupana kape hap. Miꞌi pote atiꞌatuekyi kuap kahato iraniaꞌin ywania Tupana kape. Yt aremoti hin i mesuwat uipotpap ete Tupana eropat hap ete.
18 Uipotypot no hap upi Iesui toineꞌen kahato uikai. Ipaꞌãu ipotpap kahato uipo pyi iraniaꞌin ywania ekyi hamo Tupana kapiat hamo. Iesui Paꞌãu ihay kahato uiwẽ pyi tomikuap koꞌi wo. Iꞌewyte Iesui misepap nug hap toimoherep kahato uipiit pyi iraniaꞌin ywania porerokosap Tupana mikyꞌesat nug hamuat hamo.
19 Ipaꞌãu uimoesaika kahato iraniaꞌin ywania porerokosap tuwewawiat hamuat. Pywo ti rat yt uhesaika hap kaipyi maꞌato Ipaꞌãu uimoesaika kahato sepap nug hamo wuatꞌi ywania ehamo. Yt uwe i mikuap mesuwat yi totiat nug hamuat koꞌi tutunug uipiit pyi Tupana Paꞌãu. Uimoesaika kahato uhewyry tehay sytpok hamuat wuatꞌi tawa puat. Uipiit yt hesaika hin i pykai uhewyry wuatꞌi yi totiat wuatꞌi tawa koꞌi puat hamo wuatꞌi yꞌy upi hamuat atimoherep kahato sehay wakuat Ahehakyeraꞌat hat Iesui etiat wuatꞌi miitꞌin me. Taꞌi mekewat tawa wato Ierusarẽi kaipyi saꞌawyꞌi areto yne yne tawa puo uhewyry ihay moherep hamo. Yne yne tawa kape areto te ihay wywo Ierusarẽi myi tawa Ieriko kape. Yne muap upi atiꞌatumuꞌe torannia miitꞌin Iesui ete Tupana Paꞌãu uimoesaika hawuo.
20 Arepotpap kahato yne uhesaika hap oktan mesuwat sehay wakuat Iesui etiat moherep hamo iraniaꞌin ywania puo torannia puo aikope aikope Tupana Saꞌyru Aiporekuat set Iesui yt taꞌatukuap i te hap upi. Taꞌi yt atiꞌatupohari i Iesui mohey haria wẽtup ok aiꞌapykok hat po pyi are. Atiꞌatumuꞌe teran yt ikuap i te haria hawyi yt atiꞌatupohari teran hin i iraniaꞌin iꞌatupotmuꞌeria ete.
21 Aikotã toꞌe miwan me saꞌawyꞌi hap ewy -Yt karãpiat i ikuap i te haria aru meiũran ikuap yne. Yt karãpe i te tuwat iraniaꞌin iꞌatumuꞌe hamo pykai meiũran teꞌeraꞌakasa e. Yt karãpe i Tupana etiat kuap haria aru meiũran ikuap haria wo tukupteꞌen e Isaia miwan me 52.15 pe saꞌawyꞌi.
Aikotã Pauru Toto Hamuat Hap Etiat
22 Uiwyriaꞌin Humanu ywania nimo kahato raꞌyn areto teran ehewowi. Ahãꞌãg hawyi ahãꞌãg i hap ewy maꞌato eweikuap taꞌyn Iesui etiat pote yt areto kuap i katupono yt ikuap i te haria iraniaꞌin kape yn areto teran.
23 Maꞌato mesup areto raꞌyn katupono atomoherep yne raꞌyn yne ywania pe yne tawa tote miitꞌin me yne sehay wakuat Iesui etiat yne hy upiat raꞌyn miꞌi rakirẽ koitywy waku areto raꞌyn ehewowi eipe Humanuꞌin araꞌakasa hamo. Uimikyꞌesat saꞌawyꞌi hap ewy mesup atunug naꞌyn.
24 Pyno ehetawa sakpo toineꞌen mekewat yi wato Epania. Areto teran itotiaria muꞌe Iesui etiat hamo. Miꞌi haype areto ehewowi ehetawa puo. Miꞌi hap yn ahekatup. Pyno uikosap mo maꞌato areineꞌen teran eiwywo. Worohoꞌokuap teran eipe pote areineꞌen porap i hamuat eipyꞌasetpe uimikyꞌesat ewy. Waku kahato aru atipuẽti itote eiwywo. Atikyꞌesat kahato eipe uipowyro mekewat yi wato Epania kapiat muap saꞌup nug hap ete.
25 Maꞌato mio koran areto tawa wato Ierusarẽi kape. Miꞌi kahu rẽ ehewowi areto. Maꞌato saꞌawyꞌi atiꞌatupowyro teran Tupana saꞌyruꞌin Tupana sakiꞌytꞌin Ierusarẽi miaria katupono iꞌatu kahato itote Tupana mepytꞌin hoꞌopot haria ihakyꞌeꞌi kahato rakaria.
26 Miꞌi pote Iesui mohey haria iraniaꞌin ywania aikope aikope teꞌeruwaꞌatunug hap tote tawa koꞌi yi Masetunia piaria tawa yi Akaia piaria tiꞌatumoꞌẽ teran taꞌatuekat ihakyꞌeꞌi rakaria tawa wato Ierusarẽi miaria puo Iesui mohey haria tawa Ierusarẽi miaria powyro hamo.
27 Teꞌeruwepyꞌa pyi miꞌi tã taꞌatunug -Waku watimoꞌẽ ahekat Ierusarẽi miaria pe iꞌatuꞌe teꞌeruwehay pyi yt uhehay pyi i. Miꞌi taꞌatunug neran mote -Waku eweimoꞌẽ ihakyꞌeꞌi rakaria Ierusarẽi miaria pe are. Taꞌi ewetunug o are iꞌatuepe. Katupono ti saꞌawyꞌi taꞌatumoꞌẽ kahato Tupana ehay ahepe. Tupana ehay wywo eipoityro hanuaria teꞌeropyhuꞌat iꞌewyte yne Tupana miium taꞌatupoityro hap kaipywiat taꞌatumoꞌẽ ehepuo wẽtup ywania eipe pykai taꞌatunug. Miꞌi pote koitywy waku eweimoꞌẽ ehekat Iesui mohey haria ihakyꞌeꞌi rakaria pe are. Miꞌi pote hẽto areꞌe iꞌatuepe tama Masetunia piaria pe tama Akaia piaria pe Iesui mohey haria.
28 Miꞌi hawyi aikope aikope iꞌatuwaꞌatunug hap tote tuereto taꞌatuꞌatunug taꞌatumiium koꞌi miꞌi hawyi taꞌatuium uruepe -Etioto ro Ierusarẽi kape iꞌatuꞌe miꞌi pote areto iꞌatumiium koꞌi wywo. Putꞌok are itote hawyi atimoꞌẽ yne ihakyꞌeꞌi rakaria pe. Miꞌi hawyi iꞌatumiium oktan atum yne Iuteuria Iesui mohey haria itotiaria pe. Miꞌi atimoꞌẽ yne hawyi atoiat yne itotiaria pe hawyi areto Ierusarẽi myi tawa Epania kape eitok puo eikuap hamo.
29 Putꞌok are eipyꞌasetpiat hawyi atikyꞌesat kahato Aikaꞌiwat Iesui aipoityro kahato hap. Atikuap taꞌyn uipyꞌa pe meiũran wuatꞌi aiꞌatupoityro itotiat hamuat tegyiꞌat hap wato hap oktan hawyi waku kahato raꞌyn.
Pauru Hẽtup Iraniaꞌin Me Taꞌatuẽtup Ipowyro Hamuat Hap
30 Uiwyriaꞌin tama Humanu piaria ahẽtup kahato ehupi uheinytꞌin uheꞌywytꞌin ewehẽtup yne eipyꞌa pyi haty wo uipowyro hamuat Tupana pe -Etipowyro Pauru hewyry hap upi eweiꞌe o. Etimotypot Esaꞌyru Emipoꞌoro uruporekuat nuat Pauru ehay kaipyi Pauru minug kaipyi eweiꞌe o Tupana kape. Taꞌi atikuap uikyꞌe Tupana Paꞌãu kaipywiat ehepiat hap miꞌi pote ahẽtup ehepe ewehẽtup o Tupana kape uipowyro hap.
31 Uikyꞌe eipe pote ehẽtup o Tupana pe -Etipowyro kahato o Pauru katupono yt Iesui mohey haria i Iuteuria tiꞌauka teran haype. Miꞌi tupono etikawiatno kahato iꞌatupyꞌasetpiat turan toineꞌen eweiꞌe o Tupana pe. Iꞌewyte mekewat aimiium ereto hap ete etipowyro o Pauru Tupana. Etiꞌatupowyro o Iesui mohey haria mekewat Pauru miium taꞌatuepiat sat taꞌatuwehum wywuat hamuat eweiꞌe o Tupana pe yt taꞌatusat i iraniaꞌin ywania teꞌeruwemoti taꞌatumiium yt kyꞌesat i hap ete.
32 Miꞌi eimiẽtup oktan Tupana tunug yne raꞌyn hawyi uimowepiit hap topyhuꞌat uhowapy mekewat Tupana wepy hap ewywuat. Miꞌi hawyi areto ehewowi uimowepiit Tupana piat hap wywo. Miꞌi hawyi areineꞌen eiwywo hawyi poꞌog uiwepiit aiwoꞌokyꞌe aiwoꞌowese hap itote pote.
33 Tupana ereineꞌen kahato o Humanuꞌin wywo Esaꞌyru mohey haria itotiaria powyro hamo ereineꞌen. Iwese rakaria wo yne o etunug miꞌiria katupono En woꞌowese hap hanuaria nug hat kahato. Etunug o mesuwat uimiẽtup ewy Tupana areꞌe mesuwe eikawiatno.
