Humanu 3:1-31
3 Eiperia Humanu ywania wen maꞌato uito Pauru Iuteu ywania areineꞌen. Waku kahato uiꞌywania are. Iuteu ywania waku kahato katupono saꞌawyꞌi sese Tupana tiꞌairo urueꞌaseꞌi pot Aparãu. Miꞌi hawyi toꞌe tope -Atiꞌatupoityro kahato aru wuatꞌi miitꞌin mesuwat yi totiaria wẽtup esaipepiaria emiariru emiariru wo e. Miꞌi pote Iuteu ywania titek taꞌatuesaꞌyru emusin sokpe ãpy ete -Uruto Tupana miꞌairoria e hamo. Pyno waku apo aiꞌywania sio yt.
2 Pywo ti keĩ waku kahato topyhuꞌat Iuteuria ywania. Uito Pauru ti Iuteu ywania sese are. Waku kahato Iuteu katupono yne ywania eꞌyian mete Tupana tum tehay uruꞌywania pe. Saꞌawyꞌi tuwemoherep sese urueꞌaseꞌiꞌin me. Saꞌawyꞌi Tupana ihay kahato uruꞌywania miwan me katupono tuwemoherep teran wuatꞌi ywania pe urumiwan wo.
3 Tutum tehay urueꞌaseꞌiꞌin saꞌawyꞌi wuaria Tupana mohey kahato haria pe maꞌato iꞌatumepytꞌin iꞌatuemiariruꞌin tiwaure kahato iꞌatumienoi Tupana ehay. Miꞌi hawyi yt taꞌatumohey i kahato Tupana. Miꞌi pykai yt karãpe i Tupana waure wo toineꞌen aru Iuteu ywania kai. Taꞌi Tupana ti uruꞌywania kyꞌe sese hat wuatꞌi eꞌat pe. Taꞌi Tupana miꞌairo ywania pote urutukupteꞌen ne. Uruto wuaria Iuteuria tiꞌatoiat kahato Tupana haꞌawytepyi wen maꞌato yt karãpe i Tupana uruꞌatoiat katupono -Yt karãpe i worohoꞌoꞌatoiat esaipepiaria e Tupana saꞌawyꞌi urueꞌaseꞌi Aparãu me pote.
4 Tupana ti yt heso kuap i rakat paĩ. Saꞌawyꞌi -Atiꞌatupoityro aru emiariru emiariruꞌin e Tupana urueꞌaseꞌiꞌin me. Miꞌi hap ete yt karãpe i Tupana heso. Tutunug yne toꞌe hap ewywuat. Urutoria Iuteu ywania heso kuap maꞌato Tupana yt karamuat i heso kuap e. Aikotã morekuat Tawi pe toꞌe saꞌawyꞌi hap ewy tutunug wuatꞌi eꞌat pe. Mio tã toꞌe -Tawi e atunug aru uiꞌe hap ewywuat wuatꞌi eꞌat pe e. Atunug esaipepiat Morekuat Koro wo wuatꞌi eꞌat pe e. Eꞌywania yt uimohey i pykai aru atunug uiꞌe hap ewy e. Yt uwe i uipyhyp kuap uiꞌe hap nug hamuat ete e Tupana nimo morekuat Tawi pe hawyi toiwan towepy hap miwan me.
5 Pywo ti rat uruꞌywania Iuteuria yt timohey kahato i Tupana e hap -Atunug aru e hap pykai Tupana tunug yne toꞌe hap ewy. Uruiꞌatoiat Tupana pykai yt uruꞌatoiat hin i. Miꞌi hap kaipyi watikuap Tupana yn ni waku sese rakat yt uruꞌewy hin i hap. Miꞌi pote uruminug saꞌag hap topyhuꞌat Tupana motypot ran hap ewywuat kat pote urukyꞌe sese te yt nakuat i uruto pykai. -Eikyꞌe sese pote kat pote eiꞌapiheg apiheg kahato iꞌatuꞌe saꞌag iraniaꞌin uruepe.
6 Eweikuap kat pote uruꞌapiheg urukyꞌe haype aikotã aiꞌywotꞌin aiꞌapiheg aihire te hap ewy Tupana uruꞌapiheg urukyꞌe haype pote. Tupana ti hãpyk sakpo te miꞌi pote toiꞌapiheg kahato aru wuatꞌi yt naku i nug haria -Yt uruꞌapiheg neiꞌo yt uruꞌapiheg neiꞌo iꞌatuꞌe pykai. Tupana uruminug saꞌag ni emotypot hap topyhuꞌat wuatꞌi eꞌat pe iꞌatuꞌe saꞌag. Taꞌi aiminug saꞌag kaipyi miitꞌin tikuap kahato Tupana poꞌog waku aikawiat rakat iꞌatuꞌe saꞌag toꞌope.
7 Aheso pote Tupana e hap poꞌog pywo topyhuꞌat kat pote Tupana yt heso i rakat toineꞌen pykai aito heso rakaria wo watoineꞌen iꞌatuꞌe saꞌag toꞌope. Miꞌi pote aheso hap kaipyi Tupana waku hap poꞌog heremo topyhuꞌat. Taꞌi waku watunug yt naku i Tupana motypot hamuat iꞌatuꞌe saꞌag. Miꞌi pote ti yt karãpe i aiꞌapiheg aru aiminug saꞌag koꞌi ete katupono imotypot hap topyhuꞌat aiminug saꞌag koꞌi kaipyi iꞌatuꞌe maꞌato Tupana tiꞌatuꞌapiheg aru wuatꞌi eꞌat pe toꞌe hap ewy.
8 -Toꞌiro wuatꞌi ywania waku ti watimotypot Tupana aiminug saꞌag wo iꞌatuꞌe saꞌag toꞌope. Taꞌi miꞌi tã hap ti aimuꞌe hat Pauru tikyꞌesat iꞌatuꞌe uimohit reran haype neꞌi. Saꞌawyꞌi ti mio tã e aimuꞌe hat sese Pauru ahepe iꞌatuꞌe toꞌope yt pywo pe i. Miꞌiria yne yne Tupana miꞌatuꞌapiheg wuatnuaria tukupteꞌen wuatꞌi eꞌat pe. Tupana tiꞌatuꞌapiheg neran miꞌi tã haria ewywuaria.
Tohenoi Aikotã Tupana Henoi Hap Ewy
9 Iuteu ywania iꞌewyte yne ywania teꞌeropyhuꞌat yt naku i nug haria toꞌoꞌewyꞌewy katupono yne yne yt naku i nug haria Tupana wanetup hawe. Tupana piat urunapin hap Muisei miwan miat yt urutunug hin i te uruꞌywania. Iꞌewyte iraniaꞌin ywania tiꞌaparap kahato taꞌatuꞌywania waĩꞌe hap koꞌi ete. Miꞌi pote aito torannia iꞌaparap haria Tupana wanetup hawe e. Miꞌi pote ti yt naku i urutoꞌe iraniaꞌin ywania pe -Uruto ti poꞌog nakat eikai katupono uruto waku maꞌato eipe yt nakuaria i yt urutoꞌe kuap i.
10 Katupono saꞌawyꞌi Tupana toꞌe miwan me -Yt wẽtup ok i mesuwat yi tote wakuat yn nug hat atipuẽti e.
11 Yt wẽtup miit i uikuap teran sese hat atipuẽti nimo pyi mesup te e. Yt wẽtup ok i mesuwat yi tote atipuẽti uikat reran hat e Tupana.
12 Yt naku i kat pote yne miitꞌin uiꞌatoiat haria wo tukupteꞌen e tuwepe. Yt kan hamo i tukupteꞌen miꞌi tã e. Yt uwe i mesuwat yi totiat atipuẽti waku sese nug hat e Tupana miwan me.
13 Iꞌatuehay koꞌi yt hãpyk hin i atipuẽti e. Iꞌatueso hap yn iꞌatuwẽ pe miitꞌin maꞌat hap yn atipuẽti e. Iꞌatuẽku tote sehay nem hap ewywuat yn aikotã miit yt misyp i yi kaꞌa piat ewy nem kahato iꞌatuwẽ pe e. Sehay saꞌag yn tuwẽtem iꞌatuwẽ pyi miitꞌin kuasa hamuat e.
14 Aikotã moĩ iãi hy miitꞌin auka hap ewy iꞌatuehay miitꞌin auka hap ewy topyhuꞌat e. Iꞌatuehay aikotã mohag nop takat ewy e. Iꞌatuehay saꞌag uhete iꞌewyte iraniaꞌin ete e Tupana miwan me.
15 Miitꞌin auka sese haria wo teꞌeropyhuꞌat miitꞌin e. Aikotã miitꞌin ihyha kahato rakaria ewy teꞌeruweput meremo iraniaꞌin atuuka hamo hap ewy. Aikotã awyato tikat yty tomiꞌu wo taꞌatukat miitꞌin iꞌauka hamo e.
16 Aikopuo aikopuo hap saipe upi iꞌatumoehakyꞌeꞌi koꞌi iꞌatumisatek nug koꞌi tukupteꞌen e.
17 Yt karãpe i iraniaꞌin mowepiit hap taꞌatunug mote yt taꞌatukuap hin i iꞌatumowepiit hap e.
18 Yt karãpe i uimotypot hap iꞌatuwanetup hawe e Tupana. Uhepiat taꞌatuꞌapiheg hap pupi yt teꞌerokenꞌẽ hin i e Tupana saꞌawyꞌi miwan me ahepiat. Mio tã e aito yt naku i nug haria moherep hamuat.
Taꞌatuhenoi Tupana Iꞌatuwatꞌi Hap Etiat
19 Urutoria Iuteuria ywania tikuap kahato Tupana woꞌonapin saꞌawyꞌi wuat hap Muisei mimoherep kat som waku watunug kat som yt naku i watunug hap. Miꞌi watikuap yne pykai yt watunug i torannia pote watiꞌaparap waĩꞌe hap ete -Ewetunug no e hap ete are. Miꞌi pote yt uwe i mesuwat yi tote uruto -Yt karãpe i atiꞌaparap Tupana waĩꞌe hap ete yt urutoꞌe kuap i. Iꞌewyte yne aito wuatꞌi puo mesuwat yi totiaria watopyhuꞌat Tupana miꞌapiheg wuatnuaria wo. Pywo ti rat mekewat eꞌat pe aru -Eiperia yt naku i nug haria e aru Tupana ahepe torannia pe. Miꞌi toꞌe pote aru yt uwe i aitoria -U paĩ u an yt karãpe i atiꞌaparap emikyꞌesat nug hap ete e haria itote kat pote toiꞌatumoherep wuatꞌi ehamo aiminug saꞌag koꞌi e. Miꞌi pote yt watiwesat kuap i aiwemoti hap toineꞌen mote e.
20 Yt uwe i tuwemohãpyk kuap Tupana wanetup hawe topiat ainapin hap Muisei mimoherep miwan nug hap kaipywiat upi e. Taꞌi yne aito wahãꞌãg kahato Tupana piat ainapin hap nug hamuat ete wen maꞌato aito yt uwe i inug yne ainapin hap. Watiꞌatuꞌaparap aparap Tupana piat ainapin hap ete. Watiꞌatumuꞌe kahato aimuꞌe hap Tupana piat kat som waku watunug kat som saꞌag hap ete wen maꞌato watiꞌaparap yn. Miꞌi pote paa watoꞌe aipyꞌa pe ahepiat yt watunug i pote -Yt naku i kahato uito watoꞌe aiwanetup hawe aiwepe. Miꞌi pote ti -Uito yt naku i nug hat e hap yn watikuap Tupana piat ainapin hap kaipyi.
21 Aikotã aru pyno watipuẽti Tupana wywuat aiwoꞌowese hap are. Pyno ahenoi ehepe. Mio tã e Tupana ahepe -Yt eiminug wakuap kaipyi i worohoꞌonug eipe waku rakaria e Tupana miwan me. Taꞌi uimohey hap kaipyi worohoꞌoehakyeraꞌat e. Uimohey hap eipyꞌa piat kuap hap kaipyi waku pe eweikupteꞌen uipyꞌa pe uiwanetup hawe e Tupana miwan me. Atikyꞌesat kahato ewetunug yne uhepiat einapin hap koꞌi maꞌato yt uwe i eiperia inug yne haria miꞌi pote yt uwe i eiperia wakuat e. Eiminug waku hap koꞌi upi yt eweipuẽti i muap uhowowi e Tupana ahepe saꞌawyꞌi tehay moherep haria miwan me.
22 -Taꞌi Uhaꞌyru Iesui mohey haria pe yn areꞌe -Eiperia ti waku kahato uiwanetup hawe uipyꞌa pe e Tupana. Uimipoꞌoro Miitꞌin Porekuat nuat mohey haria yn uimiehakyeraꞌaria e. Miꞌiria yn waku pe uiwanetup hawe sio Iuteu ywania eipe sio wẽtup ywania e aru Tosaꞌyru mohey haria sese pe.
23 Katupono yne ywania yne miitꞌin yt naku i nug haria tukupteꞌen. Katupono yne miitꞌin yt Uito ewy hin i iꞌatuewaku hap ete are e Tupana ahepiat.
24 Pywo kahato uiwyriaꞌin Tupana ti poꞌog poꞌog waku ahewaku hap kai. Taꞌi ahewaku hap yt Tupana ewaku hap ewy hin i. Miꞌi pote ahewaku hap yt putꞌok e hin i Tupana ewaku hap ete e. Miꞌi pote yne aitoria yt naku i nug haria watoineꞌen Tupana wanetup hawe e. Miꞌi pote mesup Tupana toꞌe ahepe -Uhaꞌyru mohey haria pe yn atum iꞌatuehakyeraꞌat hap wuatꞌi eꞌat piat e Tupana mesup wuatꞌi pe. Uhaꞌyru suu mikyiꞌat upi atum neꞌen neꞌi wuatꞌi eꞌat piat ieineꞌen hap e mesup ahepe. Uhegyiꞌat hap upi Uhaꞌyru suu mikyiꞌat upi atum neꞌen neꞌi eimowaku hap e mesup yne miitꞌin me e.
25 Eikyꞌe haype yt kat i eiminug wakuap pykai worohoꞌokyꞌe hawyi eheineꞌen hap wuatꞌi eꞌat piat hap atum neꞌen neꞌi ehepe Uhaꞌyru Iesui suu mikyiꞌat upi e. Eipotypot Iesui tikyiꞌat raꞌyn eheineꞌen hap yt ikahuro rakat i pote waku eweitat uimiium e Tupana wuatꞌi miitꞌin me. Yt kat saꞌup i rakat atum miitꞌin me Uhaꞌyru Paꞌãu e Tupana mesup.
26 Miꞌi uiminug kaipyi miitꞌin tikuap taꞌyn Uito wakuat e Tupana. Saꞌawyꞌi yt eweikuap i mesuwat muap uhowawiat e ahepe. Mekewat eꞌat pe yt naku i yn ewetunug aat kaꞌap e. Maꞌato eiminug saꞌag saꞌawyꞌi wuat atiwaure torannia ewetat raꞌyn Uhaꞌyru suu eipohag wo hawyi e Tupana mesup ahepe. Tupana ti hãpyk kahato rakat yt toikyꞌesat hin i aiminug saꞌag. Maꞌato koran toꞌe wuatꞌi miitꞌin me -Eiweꞌeg wo o eiminug saꞌag ete e. Uhaꞌyru suu ti eikoho kuap e. Uhaꞌyru suu ti eimohãpyk kuap e. Eweimohey ro miꞌi Uhaꞌyru e. Miꞌi Miit ti eimohãpyk kuap e. Uhaꞌyru mohey haria wo eweikupteꞌen hawyi uikuap haria wo eweikupteꞌen e. Miꞌi hawyi eweikuap uhewaku hap e koran yne miitꞌin me e Tupana.
27 Pyno koran aito yt uwe i watoꞌe kuap -Tupana uito waku kahato kat pote atunug yne emikyꞌesat koꞌi ewy pote waku uhehakyeraꞌat uhewaku hap upi hat yt pywo pe i ahehay mio tã watoꞌe pote. Pyno kat e hap som waku pyno watoꞌe Tupana pe. Pyno mio tã e yn watoꞌe waku -Tupana atimohey kahato Esaꞌyru Iesui ikuꞌuro uikawiatno uiminug saꞌag moma hamo uhehakyeraꞌat hamo watoꞌe waku. Miꞌi e hap ewy Tupana yn mikyꞌesat ewywuat.
28 Kat pote Tupana tikyꞌesat kahato ainug kahu Tosaꞌyru mohey hap kaipywiat hap wuatꞌi aimohãpyk hap maꞌato -Uito ti atunug yne torannia Tupana piat uinapin hap pote waku pe Tupana wywo areineꞌen watoꞌe aiwanetup hawe pote aiwemaꞌat hap topyhuꞌat kat pote aiminug wakuap koꞌi yt putꞌok e hin i ahehakyeraꞌat hamo e. Miꞌi muap yt muap i Tupana kape sio aito Iuteu ywania sio wẽtup ywania.
29 Pywo ti rat Tupana sese toineꞌen Iuteu ywania eTupana wo iꞌewyte Tupana sese toineꞌen wy yne ywania eTupana wo. Tupana yt iꞌatu i are. Wẽtup Tupana yn ni toineꞌen are. Tupana sese yn toineꞌen wuatꞌi ywania nug hat. Karãpe Iuteu ywania timohey Tupana Saꞌyru hawyi -Waku pe eweikupteꞌen mesup uiwanetup hawe e Tupana ahepe.
30 Iꞌewyte karãpe iraniaꞌin ywania timohey Haꞌyru hawyi pyno -Waku pe eweikupteꞌen e Tupana. Pyno wẽtup Tupana yn toineꞌen Aiꞌywot no sio aito Iuteu ywania kawiat sio aito iraniaꞌin ywania kawiat. Tupana Wato wẽtup yn toineꞌen. Miꞌi ti Iuteu ywania nug hat iꞌewyte iraniaꞌin ywania nug hat wẽtup Tupana wuatꞌi nug hat yn toineꞌen.
31 Karãpe watomohey Iesui hawyi yt naku i watoꞌe -Mesup ti uito Iesui mohey hat miꞌi pote yt atikyꞌesat i poꞌog Tupana piat uinapin hap koꞌi yt naku i watoꞌe. Poꞌog waku watoꞌe aiwoꞌope -Iesui mohey haria aito pote waku watunug yne yne Tupana mikyꞌesat koꞌi aiꞌe hap waku watoꞌe aiwoꞌope are.
