Humanu 4:1-25
4 Pyno toꞌiro watuwanetup saꞌawyꞌi wuat ahaꞌaseꞌi Aparãu kape. Aparãu ni uruꞌywania Iuteuria eꞌaseꞌi pot. Urueꞌaseꞌi pot timohey kahato Tupana sese topyꞌa pe hawyi -Uiwy kahato en Aparãu e Tupana tope e miwan me.
2 Yt karãpe i Aparãu toꞌe -Taꞌi waku kahato rakat uito pote Tupana uhehakyeraꞌat yt e hin i miitꞌin me. Taꞌi yt tuwemotypot hin i Aparãu e. Maꞌato mio tã toꞌe saꞌawyꞌi miwan me -Aparãu e uimohey pote waku pe ereineꞌen uiwanetup hawe e Tupana tope.
3 Pyno Aparãu timohey kahato Tupana hawyi Tupana mimohãpyk wo topyhuꞌat ahaꞌaseꞌi.
4 Mesuwarotiaria miitꞌin ipotpap takaria aheropat haria pe watum haꞌup wẽtup eꞌat ipotpap hap watum. Wẽtup eꞌat ipotpap saꞌup watum hawyi totat hawyi -Waku e uipotpap saꞌup taꞌyn toineꞌen e. Totat hawyi yt karãpe i toꞌe -Yt kat i uipotpap pykai tutum neꞌen neꞌi uhepe tomiium yt kat saꞌup i yt e i kat pote ipotpap aat hap upi totat saꞌup pote.
5 Maꞌato yt miꞌi tã hin i Tupana piat ahehakyeraꞌat hap kat pote yt watikyiꞌat kuap i aipotpap wakuap mo Tupana piat ahehakyeraꞌat hap katupono ahewaku hap aipotpap aat kaꞌap hap saꞌup yt putꞌok e i ikyiꞌat hamo e. Watimohey Iesui hawyi yn tutum neꞌen neꞌi ahepe yt naku i rakaria aito pykai e. Tosaꞌyru mohey haria pe Tupana toꞌe -Eiminug saꞌag ahyt kahato maꞌato eweimohey Uhaꞌyru suu eipohag wo pote worohoꞌoehakyeraꞌat eipe Uhaꞌyru piat haꞌup nug hap upi e ahepe. Imohey pote uiwanetup hawe yt saꞌag nug haria ewy hin i eweikupteꞌen e. Mio hãpyk kahato eipe uiwanetup hawe Uhaꞌyru miium upi e Tupana ahepe Iesui mohey haria pe.
6 Morekuat Tawi henoi tomiwan me yian mete Ahehakyeraꞌat hat ete. Mio tã e -Waku kahato ti Tupana e katupono Uhehakyeraꞌat kahato hat atimohey hawyi e yt naku i nug hat uito pykai -Waure wo areineꞌen eminug saꞌag kai e uhepe e Tawi. -Uimohey hat en hawyi waku puo ereineꞌen uiwanetup hawe e uhepe yt kat i uiminug wakuap pykai. -Woroehakyeraꞌat en Tawi uimohey hap upi e Tupana saꞌawyꞌi uhepe e.
7 -Waku kahato En Tupana are. Mesup ti waure wo Tupana toineꞌen aiminug saꞌag koꞌi kai e ahepe. Waku kahato wuat sakpoꞌe En Tupana watoꞌe. Waku sese En watoꞌe. Tupana tiꞌatumoweityk yne wuatꞌi aiꞌe hap saꞌag koꞌi kat aiꞌe kat aiꞌe tetiat hap toiwuare torannia watomohey hawyi e. -Aimowehum kahato hat En Tupana e tomiwan me towepy puo.
8 -Tupana etikuap kahato yne uruminug saꞌag koꞌi iꞌatu hap etiat. Tukupteꞌen kahato yne yt naku i hap uruete e. Maꞌato miꞌi saꞌag koꞌi yne etiꞌatumoto raꞌyn pya urukai uruimohey En hawyi e morekuat Tawi. Tupana waku kahato mesup urupyꞌa pe e katupono koitywy aiwoꞌowese hap toineꞌen i etiwaure yne raꞌyn uruminug saꞌag koꞌi hawyi e. Waku kahato ti rat koitywy. Uruwehum kahato ewowi uruwepiit hap mywo urupyꞌa perup i kahato hawuo e morekuat Tawi tomiwan me towepy hawe nimo te.
9 Pyno morekuat Tawi ihay aiwepiit hap ete. Morekuat Tawi yt toꞌe hin i -Wemusin sokpe ãpy tek haria yn ni Tupana mimowepiit rakaria tukupteꞌen yt e i are. Pywo ti koitywy iꞌatu kahato Tupana mowepiit haria tomohey haria yt teꞌeremusin ãpy tek hin pykai i. Pywo ti koitywy iꞌatu kahato Tupana mowepiit haria imohey haria yt teꞌeremusin sokpe ãpy tek hin i pykai. Aikotã ahaꞌaseꞌi pot Aparãu toꞌe hap ewy mesup -Woromohey En Tupana e. Atiꞌatumohey kahato raꞌyn yne eꞌe hap uhowawiat e. Atiꞌatumohey etunug aru eꞌe hap ewy hap e hawyi Tupana toꞌe Aparãu me -Uimohey en mote waku pe ereineꞌen uiwanetup hawe uipyꞌa pe mehin e ti Tupana ahaꞌaseꞌi koro Aparãu me.
10 Saꞌawyꞌi sese yt kat i ahaꞌaseꞌi pot emusin ãpy sokpe tek hap i te turan Tupana toꞌe Aparãu me -Uimohey hat en mote uiwy kahato en e. Uimohey kahato en mote waku pe aru ereineꞌen e tope. Uiwanetup hawe hãpyk takatno ereineꞌen uimohey en mote e mekewat uruꞌywaniaꞌin miat hemusin ãpy sokpe tek hap eꞌyian mete.
11 Ahaꞌaseꞌi Aparãu toineꞌen Tupana mohey potꞌi wo raꞌyn hawyi tuwemusin ãpy sokpe tek taꞌyn iꞌewyte tosaꞌyruꞌin wat toitek kyse hit wo toꞌywania kuap hap uruꞌywania eko ewywuat uruto Tupana mohey haria e hamo toitek. Koitywy ahaꞌaseꞌi Aparãu toineꞌen yne Tupana mohey haria ypy ewywuat. Toimohey saꞌawyꞌi aheꞌyian me pote Aparãu topyhuꞌat mesup Tupana sese mohey haria eꞌaseꞌi pot no raꞌyn. Koitywy ahepe imohey haria pe aikotã saꞌawyꞌi Aparãu me toꞌe hap ewy raꞌyn -Uiwanetup hawe hãpyk takaria eipe e Tupana ahepe sio aito aimusin sokpe ãpy tek sio yt pykai e ahepe Tupana mesup.
12 Uruꞌywania eꞌaseꞌi pot ti Aparãu topyhuꞌat. Uruto ti meimuẽwat wemusin sokpe ãpy tek haria urueko ewywuat. Uruto ti Aparãu piit kawiaria. Maꞌato tukupteꞌen urupyꞌasetpe yt Tupana mohey hin i haria. Miꞌiria wemusin sokpe tek hap toineꞌen wen maꞌato miꞌiria pe yt karãpe i Tupana toꞌe -Eipe waku kahato uimohey hat Aparãu ewywuat yt e i katupono miꞌiria yt imohey i Aparãu ewywuat pote are. Ahaꞌaseꞌi Aparãu mimohey ewywuaria yn ni Aparãu saipepiaria sese.
13 Saꞌawyꞌi Tupana toꞌe Aparãu me -Meiũran aru atum yne mesuwarotiat epe iꞌewyte esaꞌyruꞌin me iꞌewyte wuatꞌi ywania emiit no iꞌatu kahato waikiru sem iꞌatu hap oktan atum epe Aparãu uimohey hat kahato en mote e. Miꞌi hawyi Aparãu toꞌe -Tupana woromohey En e. Atimohey eꞌe hap ewy iꞌewyte atimohey raꞌyn etunug aru eꞌe hap koꞌi e. Miꞌi pote Tupana toꞌe tope -Aikotã yt karãpiat i iꞌaparap hat ewy ereineꞌen uiwanetup hawe mehin uiꞌe hap etimohey yn mote e Tupana nimo yt kat i te Muisei piat ahewaĩ hap Tupana tum te turan Aparãu me yt kat i te Muisei woꞌonapin hap te turan. Katupono Muisei ti Aparãu emiariru emiariru kahato.
14 Maꞌato iraniaꞌin mesuwarotiaria -Watunug yne Tupana waĩꞌe hap hawyi waku pe raꞌyn watoineꞌen Tupana wanetup hawe e haria heso rakaria tukupteꞌen Tupana wanetup hawe. Pywo ti rat yt kat i Tupana mohey hap aikai pykai watunug ahaꞌaseꞌi Muisei mimoherep Tupana e hap hawyi yt naku i te rat watoineꞌen Tupana wanetup hawe. Kat pote yt uwe i aito Muisei miwan miat nug yne haria. Yt karãpe i Tupana toꞌe -Ewetunug yne waĩꞌuiꞌe Muisei piat pote waku pe eweipyhuꞌat uiwanetup hawe yt e i. Maꞌato mio tã e Tupana pote yt uwe i aito waku pe watopyhuꞌat Tupana wanetup hawe yt uwe i aito toran Tupana e hap nug haria pote. -Waku pe ereineꞌen uimohey hat en mote e Tupana. Yt karãpe i maꞌato Tupana toꞌe i Aparãu me -Etunug yne uiꞌe hap koꞌi miꞌi pote ti aru waku pe ereineꞌen uiwanetup hawe yt e hin i. Iꞌewyte mio tã yt e hin i ahepe. Maꞌato Tupana toꞌe iraniaꞌin e hap ewy pote -Etunug yne Muisei waĩꞌe hap pote neꞌi ti aru uiwanetup hawe waku pe ereineꞌen e pote yt uwe i aitoria waku pe watoineꞌen Tupana wanetup hawe katupono aitoria iꞌaparap yne haria katupono yne aito watiꞌaparap iꞌe hap ete. Maꞌato miꞌi pykai yne aito Tupana mipoityro koꞌi watoineꞌen katupono watomohey Tupana Aparãu ewywuat aito pote.
15 Maꞌato watoꞌe iraniaꞌin ewywuat -Watunug yne Tupana piat ainapin hap hawyi waku pe watukupteꞌen Tupana wanetup hawe Muisei woꞌonapin hap nug yne pote. Eiweꞌeg wo o Katupono miꞌi e hap koꞌi ete eweiꞌaparap yn wẽtup e hap ete hawyi Tupana ipyꞌahak eiminug saꞌag ete. Nimo te Muisei eꞌat eꞌyian me ti yt kat i hin i Tupana piat -Yt etunug neiꞌo e hap sio -Etunug no e hap koꞌi hap eꞌat pe yt uwe i iꞌaparap kuap Tupana piat ainapin hap ete. Yt kat i Tupana piat aiꞌapiheg hap mekewat eꞌat pe. Mekewat eꞌat yt watiꞌaparap kuap i waĩꞌe hap ete yt kat i pote. Maꞌato toimoherep hawyi ti iꞌaparap haria wo watopyhuꞌat yt watunug i hawyi.
16 Maꞌato Tupana toꞌe Aparãu me -Uiwy e uimohey pote waku pe kahato ereineꞌen uiwanetup hawe e. Miꞌi hap ewy te koitywy toꞌe ahepe -Eweimohey Uhaꞌyru hawyi atum eheineꞌen wuatꞌi eꞌat piat hamuat e. Yt kat saꞌup i ete atum neꞌen neꞌi Uhaꞌyru mohey haria pe e. Uhaꞌyru tum naꞌyn tosuu haꞌup mo e Tupana ahepe mesup. Watat Haꞌyru aipyꞌa pe hawyi watopyhuꞌat ahaꞌaseꞌi pot piat imohey hap ewywuaria. Miꞌi pote yt toꞌe hin i ahepe Tupana -Ewetunug yne waĩꞌuiꞌe hap hawyi waku pe eweikupteꞌen uiwanetup hawe yt toꞌe i ahepe maꞌato aikotã toꞌe Aparãu me miꞌi hap ewy te toꞌe ahepe mesup -Uimohey haria pote worohoꞌoehakyeraꞌat e ahepe mesup.
17 Mio tã e Tupana Aparãu me miwan me nimo te -Woronug aru wuatꞌi ywania ywot pot no e. Wuatꞌi ywania eꞌaseꞌi koro wo ereineꞌen aru uiꞌe hap ewy e. Atunug waku yne esaipepiaria uimohey haria eꞌewy e Tupana Aparãu me nimo te. Miꞌi hawyi toiwesat -Woromohey En paĩ e. Atimohey yne eꞌe hap -Atunug aru eꞌe hap atimohey e Aparãu Tupana pe. Atimohey kahato uikuꞌuro rakirẽ uimoieineꞌen kuap hat En hap e Aparãu. Atimohey kahato etunug kuap yne yne yt kat kawiat i hap atimohey e.
18 Miꞌi pote Tupana toꞌe Aparãu me -Taꞌi emepytꞌin sem ni aru atum kahato epe e. Esaꞌyruꞌin sem esakiꞌytꞌin sem ni aru atum epe e. Iꞌatu kahato atum epe aikotã waikiru sem iꞌatu hap ewy aikotã yi kyt iꞌatu hap ewywuaria atum epe e. -Pyno woromohey poꞌog En e Aparãu Tupana pe. Taꞌi atimohey -Atunug aru emepytꞌin iꞌatu eꞌe hap ewywuat atimohey e Aparãu Tupana pe. Ipotꞌi raꞌyn yt wẽtup imepyt i raꞌyn turan miꞌi tã e hap toimohey. Toimohey pote mesup taꞌyn imepytꞌin koꞌi typyꞌi rakaria tukupteꞌen kahato. Koitywy iꞌatu ywania Tupana mohey haria ywot pot topyhuꞌat Tupana e hap ewy.
19 Saꞌawyꞌi Aparãu iporo kahato hap wywo yt tosaꞌyru i te pykai toimohey te Tupana piat -Atunug aru e hap. Miꞌi hawyi toꞌe -Uiporo sakpo pykai tutunug aru toꞌe hap ewy e. Taꞌi uipiit porap ikuꞌuro pykai tutunug aru toꞌe hap ewy e. Taꞌi uheharyꞌi iꞌewyte yt myhuꞌat hat i raꞌyn pykai aru tutum kuap tope hupiꞌa hap atimohey e. Tutum aru uhaꞌyru sese uipiit poro kawiat pykai e Aparãu tepiat imohey hap pote.
20 Imohey hap yt karamuo i tuwanetup hawe -Heso som Tupana yt e i maꞌato -Tupana toꞌe atunug aru pote tutum aru toꞌe hap ewy yn e topyꞌa pe. Miꞌi hawyi poꞌog imohey hap ihãite tuete saꞌawyꞌi kai hawyi meiũran tomohey hap kaipyi Tupana timoesaika kahato. Miꞌi hawyi Aparãu toꞌe -Tupana arehum kahato ewowi e. Woromotypot kahato katupono etum naꞌyn uhepe eꞌe hap ewy e.
21 Atikuap epiat hum hamuat uipyꞌa pe e. Atikuap etunug kuap yne niatpo rakat koꞌi e. Atikuap epiat -Atunug yne aru eꞌe hap etunug yne hap e.
22 Miꞌi pote Tupana iwepiit kahato tomohey Aparãu piat hap ete. Miꞌi hawyi Tupana toꞌe tope -Uiwy sese waku pe kahato ereineꞌen uipyꞌa pe uimohey kahato hat en mote e.
23 Ihãpyk kahato rakat ereineꞌen uhepe e Aparãu me. Maꞌato yt Aparãu me yn i mio tã e maꞌato yne tomohey haria pe ahepe -Yt kat i saꞌag atipuẽti ekai e tope iꞌewyte ahepe tomohey haria pe.
24 Pyno waku nug hat ereineꞌen uipyꞌa pe e Tupana tope uimohey pote e miwan me. -Uimikyꞌe en e Aparãu me aimuꞌe hamo tomohey haria aito pote Tupana mikyꞌe koꞌi aito e hamo. Taꞌi Tupana mimohãpyk koꞌi aito e hamo miꞌi e hamuat toineꞌen iwan me. Koitywy watomohey kahato Iesui Tupana timohymut i guꞌuro pyi hap watomohey kahato. Watimohey kahato Tupana tum naꞌyn Tosaꞌyru Aipotypot Koro wuatnuat e hap watomohey. Taꞌi toꞌe hap ewywuat watomohey.
25 Taꞌi watomohey kahato Tupana tiꞌapiheg Tosaꞌyru Iesui aiminug saꞌag upiatno e hap watomohey. Watimohey Tupana timoieineꞌen naꞌyn Tosaꞌyru hap toꞌe hap ewy. Miꞌi pote watomohey kahato wy Tupana aimoieineꞌen i hamuat waku hap ete toꞌe hap ewy watomohey. Koitywy watomohey kahato Tupana ainug tomohey hap kaipywiat wakuaria wo aikotã Tupana -Atunug aru e hap ewy watomohey. Aparãu ewywuaria watoineꞌen imohey hap saipepiaria aito. Aparãu mepytꞌin koꞌi aito. Miꞌi hap eꞌat pe Tupana toꞌe Aparãu me iꞌewyte ahepe -Waku pe ereineꞌen uhepe uimohey hat en mote e ahepe.
