Humanu 5:1-21
5 Watimohey Iesui hawyi -Waku kahato eipe e Tupana ahepe. Mio tã e ahepe hawyi aiwepiit kahato katupono aiwoꞌowese hap kahato topyhuꞌat Tupana wywo. Watimohey Haꞌyru hawyi Aiporekuat no topyhuꞌat hawyi watikuap kahato Tupana aiwywo hap e. Miꞌi hawyi meremo watoꞌe tope -Egyiꞌat kahato Tupana katupono yt uruewaku i kahato ewowi saꞌawyꞌi pykai ewaku kahato uruepe urutoꞌe mesup epe. Yt nakuaria i uruto pykai urukyꞌe urutoꞌe. Yt kat i wakuap uruminug pykai urukyꞌe kahato En katupono haꞌawytepyi urukyꞌe urutoꞌe. Ewanikaptia uruto te turan urukyꞌe kahato watoꞌe.
2 Miꞌi pote -Worohoꞌomoieineꞌen kahato eipe mesuwat yi tote e Tupana mesup ahepe. Miꞌi pote -Uruimotypot kahato En Tupana urutoꞌe iꞌewyte urumimotypot En urutoꞌe. Meiũran aru urutukupteꞌen ewywo emotypot hap eꞌat pe hap uruimohey kahato miꞌi tã hamuat kape. Miꞌi pote waku kahato En urutoꞌe emowepiit hap mywo.
3 Miꞌi pote putꞌok e ahatek hap hawyi watuwehum yn ne Tupana kape. -Ereineꞌen waku kahato Tupana putꞌok e uruete niatpo hap pykai. Mio tã aiꞌe pote watoineꞌen motꞌi i imohey sese haria wo. Karãpe watuwehum motꞌi Tupana ete ahatek hap eꞌat pe miꞌi hawyi waku pe imohey hap katupono wahatyꞌu kuap haria wo watopyhuꞌat. Miꞌi hawyi wahepap imohey motꞌi hap ete. Ahatek turan yt watiwaure hin i raꞌyn Tupana mohey hap yt naku i ahete pykai.
4 Karapeĩ watuwehum motꞌi Tupana kape hoꞌopot hap putꞌok e pykai miꞌi pote Tupana iꞌewyte tuwehum ahowawi are. Karãpe Tupana toꞌe ahepe -Atunug aru uiꞌe hap ewywuat miꞌi hawyi -Pywo ti rat watoꞌe hawyi poꞌog poꞌog watomohey.
5 Karãpe watoꞌe -Pywo ti aru taꞌi tutunug ni aru toꞌe hap ewy watoꞌe miꞌi hawyi Ipaꞌãu Wakuat topyhuꞌat kahato ahepe tutum ahepe Topaꞌãu. Miꞌi hawyi aipyꞌa wepiit kahato topyhuꞌat katupono Ipaꞌãu -Worokyꞌe en worokyꞌe en e hap yn topyhuꞌat. Miꞌi hawyi ahatek hap neꞌi yt aimoꞌarot kuap i raꞌyn katupono watomohey te ahatek pykai.
6 Saꞌawyꞌi sese mekewat eꞌat wuat Tupana toꞌe -Atipoꞌoro aru En Uhaꞌyru miitꞌin Porekuat nuat e. Uhaꞌyru e koitywy mesuwat eꞌat atiꞌairo eto hamuat yi kape katupono hoꞌowasat kahato miitꞌin tukupteꞌen itote pote iꞌatuminug saꞌag eꞌat yn mote e Tupana tosaꞌyru pe. Mio tã e pote Aipotypot Iesui toto. Miꞌi hawyi aiminug saꞌag kaipywiat aiꞌapiheg hap tutuꞌu yne aheiam mo.
7 Uiwyriaꞌin niatpo kahato wẽtup ok ehakyeraꞌat hamo aikuꞌuro hamuat hap. -Waku rakat sese upi pote pyno ahãꞌãg uiwy sese ehakyeraꞌat yꞌy wato pyi watoꞌe maꞌato yt watipun teran hin i aheineꞌen hap wẽtup ok aiwanikap ehakyeraꞌat hamo. Aiwy sese waku rakat pote sio wahãꞌãg neran.
8 Maꞌato yt naku i nug haria ehakyeraꞌat hamo neꞌi Iesui ikuꞌuro. Tewanikaptia etiatno ikuꞌuro hawyi watikuap taꞌyn Tupana aikyꞌe kahato hap. Tupana tomoherep taꞌyn aikyꞌe hap Tosaꞌyru kuꞌuro hap kaipyi.
9 Iesui suu aikoho hawyi toihep yne aiminug saꞌag. -Eipe wakuaria e Tupana Tosaꞌyru suu wuat tomikoho koꞌi pe. Miꞌi pote koitywy yt watokenꞌẽ hin i aiꞌapiheg hamuat Tupana hap ete. Miꞌi hawyi Tupana yt ipyꞌahak i ahete Tosaꞌyru suu tomikoho koꞌi aito pote.
10 Saꞌawyꞌi watunug Tupana ahewanikap mo maꞌato miꞌi pykai ainug towyriaꞌin wo kahato katupono Haꞌyru tokuꞌuro hamo aiꞌatupehik Toꞌywot kape -Koitywy yt ahewanikap mo i topyhuꞌat maꞌato aiwy ok wo raꞌyn. Koitywy Tupana wy kahato uito watoꞌe. Koitywy Tupana toineꞌen uipiit pe. Miꞌi kaipyi watikuap taꞌyn pywo ti aru areineꞌen wuatꞌi eꞌat pe aiꞌe hap katupono Iesui tuwẽtem guꞌuro pyi hawyi uimimoieineꞌen hap topyhuꞌat watoꞌe.
11 Miꞌi pote -Watuwehum kahato ewowi Tupana watoꞌe. Urukaꞌiwat Iesui urunug naꞌyn ewy ok wo. Waku kahato uruipuẽti En watoꞌe katupono uruwy ok nug naꞌyn En watoꞌe.
Atãu Iesui Ewywuat Toineꞌen
12 Nimo te Atãu yt tunug i Tupana mikyꞌesat ewy miꞌi hawyi watopyhuꞌat ahaꞌaseꞌi Atãu ewywuat katupono Atãu ewywuat watunug yt Tupana mikyꞌesat ewywuat i. Nimo te Tupana toꞌe Atãu me -Meke tã etunug saꞌag hawyi ti aru ekuꞌuro hap topyhuꞌat e Tupana Atãu me iꞌewyte yne Atãu mepytꞌin me. Miꞌi hawyi yne aito Atãu ewywuat saꞌag nug haria watopyhuꞌat. Yne ywania raꞌyn miꞌi tã inug. Miꞌi tupono yne miitꞌin ikuꞌuro rakaria wo tukupteꞌen. Watopap yne Tupana e hap ewy.
13 Atãu mepytꞌin tukupteꞌen mesuwat yi tote motꞌi. Taꞌatunug saꞌag kahato maꞌato yt taꞌatukuap i taꞌatuminug saꞌag yt kat i te waĩꞌe hap Tupana kaipywiat pote maꞌato Muisei tuut raꞌyn hawyi tohenoi raꞌyn kat som Tupana tikyꞌesat watunug kat som yt hap tohenoi raꞌyn.
14 Wẽtup waĩꞌe hap yn Tupana tum Atãu me -Yt etuꞌu teiꞌo meiẽwat yp ywa e maꞌato miꞌi pykai tutuꞌu. Miꞌi hawyi meiũran ikuꞌuro Tupana e hap ewy maꞌato Atãu mepytꞌin koꞌi kai yt kat i Tupana waĩꞌe hap Atãu eꞌat kaipyi Muisei eꞌat kape. Yt kat i Tupana waĩꞌe hap maꞌato miꞌi pykai Atãuꞌin saꞌag nug haria kahato tukupteꞌen. Miꞌi tã hap taꞌyn watikuap katupono saꞌawyꞌi wuaria Atãuꞌin ikuꞌuro yne raꞌyn saꞌag nug haria pote Tupana e hap ewy. Miꞌi hawyi Tupana toꞌe -Pyno atipoꞌoro Wẽtup Ok Atãu ewywuat maꞌato Miꞌi Miit yt iꞌaparap hat i e.
15 Pyno Atãu wywo Iesui toꞌoꞌewy maꞌato yt toꞌoꞌewy hin i katupono yt iꞌaparap hat i. Miꞌi hawyi mekewat saꞌawyꞌi wuat Atãu kaipyi watipuẽti aikuꞌuro hap katupono iꞌewy watopyhuꞌat yt naku i nug haria wo. Aikotã Atãu ikuꞌuro tominug saꞌag kaipyi hap ewy te aito. Maꞌato mekewat Wẽtup Ok Miit Tupana Saꞌyru yt iꞌaparap hat hin i. Miꞌi pote Atãu miium aikuꞌuro hap maꞌato Mekewat Miit Tupana Mipoꞌoro Aiporekuat nuat miium aheineꞌen wuatꞌi eꞌat piat ieineꞌen hap. Ikuꞌuro hawyi Tupana wese hap topyhuꞌat ahete ihakyꞌeꞌi kahato aikyꞌe haype. Miꞌi pote Tupana piat aikyꞌe hap poꞌog naꞌyn hewanikaptia aito pykai. Miꞌi pote toipoꞌoro Atãu Ewywuat Wẽtup Ok Takat ahehakyeraꞌat hamo. Miꞌi pote wẽtup ok miit Atãu kaipyi aikuꞌuro hap iꞌewyte Wẽtup Ok Miit Iesui kaipyi aheineꞌen hap.
16 Pyno ti Atãu minug Iesui minug wywo yt toꞌoꞌewy hin i katupono Atãu kaipyi yt nakuap i ypy. Maꞌato Iesui kaipyi Tupana miium aheineꞌen wuatꞌi eꞌat piat hap ypy. Atãu minug wẽtup muat kaipyi -Yt naku i en e Tupana maꞌato Iesui ahehakyeraꞌat hawyi aiminug saꞌag toimoweityk yne hawyi -Waku kahato eiperia e Tupana ahepe Iesui mohey haria pe aiminug saꞌag iꞌatu kahato saꞌawyꞌi pykai. -Eheineꞌen waku hap yt eiwat ehewaku hap upi i worohoꞌonug maꞌato Uhaꞌyru ewaku hap upi waku pe eweikupteꞌen e Tupana ahepe.
17 Atãu kaipyi aikuꞌuro hap maꞌato Haꞌyru kaipyi aheineꞌen hap. Yianmiat Atãu yt naku i nug hat hawyi miꞌi kaipyi ikuꞌuro. Miꞌi hawyi aito watopyhuꞌat Atãu mepytꞌin koꞌi aiꞌywot Atãu ewywuaria watopyhuꞌat yt naku i nug haria. Miꞌi hawyi hoꞌowasat kahato rakaria wo watopyhuꞌat yt nakuaria i saipepiaria aito pote. Kat pote wẽtup ok miit kaipyi aikuꞌuro hap ypy topyhuꞌat aiminug saꞌag iwato hap kaipyi Tupana toꞌe -Worohoꞌoꞌapiheg e maꞌato miꞌi hawyi Wẽtup Ok Miit putꞌok e mesuwe poꞌog Atãu kawiat Miꞌi Miit wakuap nug hap ypy. Miꞌi Miit poꞌog hesaika iminug wakuap Atãu minug yt nakuap i hap koꞌi kai. Miꞌi Miit ti Aipotypot Iesui are. -Ereke ro watoꞌe Iesui pe hawyi Tupana tum aheineꞌen wuatꞌi eꞌat piat hap ahepe. Hegyiꞌat kahato ahepe topyhuꞌat -Waku kahato eipe e tosaꞌyru mohey haria pe. Worohoꞌonug eipe morekuaria ewywuat Uhaꞌyru ewywuat Uimipoꞌoro Eiporekuat nuat mohey haria eipe pote e.
18 Pyno Atãu iꞌaparap hap kaipyi watopyhuꞌat aitoria yne iꞌaparap haria wo raꞌyn katupono watunug Atãu ewywuat maꞌato Iesui minug wakuap kaipyi Tupana toꞌe ahepe -Yt kat i saꞌag eikai e. Yt worohoꞌoꞌapiheg hin i e maꞌato atum neꞌen neꞌi ti wuatꞌi eꞌat piat eheineꞌen hap e.
19 Saꞌawyꞌi sese ti ahaꞌaseꞌi pot Atãu yt topyhuꞌat hin i Tupana ehay upi. Tuwepyi toiꞌaparap. Miꞌi hawyi imepytꞌin hemiariruꞌin typyꞌi kahato iꞌewywuat haria tukupteꞌen iꞌatusaipepiaria pote taꞌatuꞌywot ewy. Miꞌi turan putꞌok e Wẽtup Ok Miit inug yne Tupana mikyꞌesat oktan nakat. Miꞌi Miit Atãu ewywuat maꞌato Tupana mikyꞌesat ewywuat nug hat. Miꞌi pote koitywy Tupana toꞌe kuap Tosaꞌyru mohey haria pe -Eipe waku kahato uipyꞌa pe e.
20 Miꞌi hawyi nimuaria Tupana ehay moherep haria timoherep kahato kat som Tupana tikyꞌesat kat som yt hap. Miꞌi hawyi poꞌog saꞌag nug haria wo te teꞌeropyhuꞌat saꞌawyꞌi te wuat kai katupono iꞌatu kahato Tupana waĩꞌe hap putꞌok e hawyi iꞌaparap kahato hap topyhuꞌat. Katupono yt watunug i pote miꞌi kaipyi hotꞌokꞌe raꞌyn ahete yt nakuap i kahato aito hap. Miꞌi pykai aikyꞌe teran katupono Tupana aikyꞌe hap poꞌog hesaika aiminug saꞌag kai.
21 Miꞌi hawyi yt naku i nug hap upi yn watopyhuꞌat. Yt watoiat kuap i aiminug saꞌag iꞌewyte yt watoiat teran i. -Miꞌi tã etunug mote ekuꞌuro hap topyhuꞌat e Tupana pykai watunug teꞌen teꞌen neꞌi pote. Miꞌi hawyi aiminug saꞌag kaipyi aiꞌauka hap topyhuꞌat. Maꞌato aiꞌapiheg hap eꞌyian mete putꞌok e Aipotypot Iesui mesuwe aiꞌapiheg hap tutuꞌu yne tokuꞌuro hamo. Miꞌi pote aimoieineꞌen wuatꞌi eꞌat pe. Yt nakuaria i kahato aito pykai Tupana aikyꞌe. Koitywy aikyꞌe pote watopyhuꞌat hemiitꞌin no imikyꞌesat ewy watunug neran mesuwe. Imipoꞌoro Iesui aimohãpyk hawyi yt Atãu wat i aito maꞌato Iesui wat watoineꞌen wuatꞌi eꞌat pe. Pywo ti rat atiwan ewowi.
