Humanu 6:1-23
6 Yt naku i iraniaꞌin aimuꞌe -Pyno waku watunug saꞌag katupono Tupana aikyꞌe hap poꞌog iwato aiminug saꞌag hap kai iꞌatuꞌe saꞌag. Waku wahãꞌãg saꞌag nug hap ete pote Tupana aikyꞌe poꞌog poꞌog iꞌatuꞌe.
2 Maꞌato sakpoꞌe yt pywo i paĩ katupono aito Iesui mohey haria raꞌyn. Miꞌi pote ahãꞌãg hap putꞌok e ahete saꞌawyꞌi te wuat ewy pote waku yt watuwat i ahiag upi yt naku i nug hamo. Waku aikotã ikuꞌuro rakat sehay yt kuap i hap ewy waku yt watikuap i ahãꞌãg hap ete yt ahewaure kaꞌa i ikuꞌuro rakat ewy. Miꞌi pote yt watuwat kuap i aiminug saꞌag ahãꞌãg hap nug hamuat upi.
3 Ahetꞌok turan Iesui set topyhuꞌat ahete. Miꞌi hawyi Iesui set wywo watopyhuꞌat pote -Iesui mohey haria meimuẽ iꞌatuꞌe ahepe. Miꞌi hawyi wẽtup miit ewy yn watopyhuꞌat Aipotypot Iesui wywo. Mekewat min watoꞌe yꞌy pe ahetꞌok turan hap tote watimoherep Iesui syp hap ikuꞌuro rakat ewy watopyhuꞌat iwywo.
4 Ahetꞌok turan watimoherep aisyp hap ewywuat Iesui wywo aikotã Iesui ikuꞌuro hap ewy iꞌewyte -Areineꞌen i ne e hap ewy watimoherep aihep yꞌy pyi hawyi ahetꞌok turan iraniaꞌin me. Aikotã Iesui tuwẽtem guꞌuro pyi aikotã tesaika wywo Tupana tihep Aikaꞌiwat guꞌuro pyi miꞌi hap ewy Aiꞌywot atipy piat tunug ahepe watoꞌe. Miꞌi hawyi aheineꞌen pakupꞌi hap toineꞌen mesuwarote watimoherep aihep yꞌy pyi hawyi ahetꞌok turan watoꞌe iraniaꞌin me. Aikotã Iesui ipakup takat ewy watopyhuꞌat hap ewy.
5 Pyno aito Iesui mohey haria pote watopyhuꞌat Iesui wywo wẽtup miit ewy yn. Ipiit aiwat aipiit ewy aipiit iãꞌãkap ewy. Ikuꞌuro turan aikuꞌuro hap topyhuꞌat hap ewy. Towẽtem guꞌuro pyi hap aiwẽtem guꞌuro pyi hap topyhuꞌat.
6 Yt naku i kyꞌesat hap iwato kahato ahete. Miꞌi hap ete yn ahehapap saꞌawyꞌi te. Maꞌato miꞌi hap upi Aikaꞌiwat Iesui ikuꞌuro ariaꞌyp posak ete hawyi aiwepywiat yt naku i nug kyꞌesat hap topyhuꞌat Iesui piit kuꞌuro hap wywo. Miꞌi hawyi Iesui ikuꞌuro hawyi aimikyꞌesat saꞌag ikuꞌuro iwywo. Koitywy watikuap aiwetiat yt naku i nug hap kyꞌesat hap tuweityk taꞌyn.
7 Aikuꞌuro hawyi mekewat aiminug saꞌawyꞌi wuat yt aimoꞌakagꞌaia kuap i raꞌyn saꞌag nug hap ete. Yt hotꞌokꞌe i raꞌyn yt hesaika i raꞌyn.
8 Miꞌi hap ewy kahato topyhuꞌat ahete watomohey Iesui Aiporekuat nuat hawyi. Wẽtup miit yn watopyhuꞌat Aikaꞌiwat wywo. Ikuꞌuro pote aimikyꞌesat saꞌag ikuꞌuro iwywo. Karãpe tuwẽtem guꞌuro pyi iꞌewyte watuwẽtem iwywo hap ewy wakuap nug hamo. Koitywy watoineꞌen ipakup takaria wo.
9 Pywo ti koitywy watikuap taꞌyn Aikaꞌiwat tuwẽtem guꞌuro pyi hap. Ikuꞌuro hap tokosap taꞌyn. Koitywy yt ikuꞌuro kuap i raꞌyn. Guꞌuro yt tiꞌauka kuap i raꞌyn. Yt hesaika i raꞌyn guꞌuro tuete.
10 Ikuꞌuro wẽtup muat hawyi toran naꞌyn ikuꞌuro. Wẽtup muat yn ikuꞌuro miitꞌin minug saꞌag upi. Ikuꞌuro hawyi saꞌag nug hap yt hãꞌãg kuap i raꞌyn. Tuwẽtem guꞌuro pyi hawyi toineꞌen kahato Tupana motypot hap yn tuete.
11 Koitywy Aipotypot Iesui emiit no watoineꞌen mote watopyhuꞌat Iesui ewy. Waku watuwanetup -Iesui kuꞌuro turan uikuꞌuro iwywo waku watoꞌe. Miꞌi pote uiminug saꞌag yne yt uhãꞌãg kuap i katupono uikuꞌuro iwywo wy uipiit mikyꞌesat saꞌag yt kat i koitywy waku watoꞌe. Iesui toineꞌen i guꞌuro pyi hawyi uito areineꞌen i guꞌuro pyi wy waku watoꞌe. Koitywy areineꞌen kahato iwywo waku watoꞌe. Tupana motypot hap wywo yn areineꞌen mesup watoꞌe katupono Iesui wywo wẽtup miit yn arepyhuꞌat waku watoꞌe.
12 Saꞌawyꞌi aipiit mikyꞌesat saꞌag nakat po pe watopyhuꞌat kahato. Miꞌi hawyi aimikyꞌesat saꞌag nug hap yn aikaꞌiwat no topyhuꞌat. Aiwẽ pyi watunug saꞌag maꞌato mesup waku waĩ watoꞌe saꞌawyꞌi wuat aimikyꞌesat ete. Koitywy wẽtup miit ewywuat areineꞌen Tupana wywo waku watoꞌe.
13 Koitywy karãpe aipiit tikyꞌesat saꞌag nug hap aikotã watikyꞌesat saꞌawyꞌi hap ewy waku watuwewãi. Waku waĩ watoꞌe aipiit mikyꞌesat saꞌag kape. Waku waĩ watoꞌe aiwemikyꞌesat saꞌag ete -Yt erenug neiꞌo saꞌag nug hatno waku watoꞌe aipiit kape. Miꞌi turan waku watoꞌe Tupana pe -Atum epe uhaga koꞌi waku watoꞌe. Atikyꞌesat yne uipiit ewatnuat wo emikyꞌesat koꞌi nug hamo. Atikyꞌesat uipiit koꞌi ewaku hap nug hamo Tupana waku watoꞌe. Atikyꞌesat uheko koꞌi ipakup taꞌyn Tupana aikotã miit ikuꞌuro rakat tuwẽtem i guꞌuro pyi hap ewy uipiit pakup atikyꞌesat epotpap nug hamo Tupana watoꞌe waku.
14 Saꞌawyꞌi watikuap Tupana piat ainapin hap Muisei mienoi kaipyi. Miꞌi hawyi -Pyno atunug aru watoꞌe maꞌato yt watunug kuap i kat pote yt Iesui miehakyeraꞌat koꞌi i te aito pote. Mekewat eꞌat pe yt watikuap hin i Tupana aikyꞌe hap. Koitywy Tupana Paꞌãu esaika hap mywo watunug kuap taꞌyn ainapin Tupana piat hap. Pyno koitywy yt naku i wataꞌaipok aipiit mikyꞌesat saꞌag eropat hamuat ipakup i rakaria wo i raꞌyn watukupteꞌen hawyi.
Yt Watipuẽti Ahehakyeraꞌat Hap Saꞌawyꞌi Wuat Ainapin Hap Upi
15 Koitywy yt naku i kahato rat paĩ watoꞌe -Pyno koitywy Tupana uikyꞌe kahato sio waku atunug sio yt naku i watoꞌe. Waku watuwewãi raꞌyn. Tupana piat ainapin hap iwan miat aiwatnuat waku watunug Tupana esaika hap mywo. Waku watoiat aiminug saꞌag hap koꞌi.
16 Waku koitywy watikuap taꞌyn uwe po pe watoineꞌen. Aimikyꞌesat saꞌag aikaꞌiwat no watunug mote yt naku i nug hap aikaꞌiwat no topyhuꞌat. Maꞌato yt aipohep kuap i aiminug saꞌag ete pote saꞌag aikaꞌiwat no topyhuꞌat. Aiminug saꞌag yt watoiat kuap i hawyi meiũran aiꞌauka hatno topyhuꞌat. Maꞌato Tupana esaika hap mywo ainapin topiat hap watunug pote meiũran aru -Waku kahato eipe e Tupana ahepe wuatꞌi ehamo.
17 Uiwyriaꞌin tawa Humanu ywania saꞌawyꞌi te raꞌyn tig ewetunug eimikyꞌesat saꞌag koꞌi yn yt eweimonik kuap i. Miꞌi turan putꞌok e itote Tupana ehay hawyi eweiꞌoksatꞌi kahato Tupana ehay -Pywuat kahato miꞌi ehay eweiꞌe. Koitywy watipuẽti raꞌyn Tupana piat ainapin hap eweiꞌe. Miꞌi hawyi ewetunug kahato Tupana ehay eipyꞌa pe. Miꞌi pote arehum kahato Tupana kape.
18 Saꞌawyꞌi eimikyꞌesat saꞌag koꞌi eiꞌahiꞌypy kytyt kahato aikotã miit mikytyt hap ewy eweipyhuꞌat maꞌato miꞌi hap ewywuat Tupana tiꞌasaity tek taꞌyn eiminug saꞌag haity ewywuat. Koitywy miꞌi hap kaipyi eweipopy raꞌyn wakuap nug hat emiit no raꞌyn eweikupteꞌen. Koitywy eisaity wakuap nug hamuat raꞌyn topyhuꞌat. Miꞌi pote arehum kahato Tupana ete.
19 Eikytyt hap ete ahenoi hãꞌãkap wuo katupono poꞌog yt niatpo i hãꞌãkap wuo henoi hap kaipyi. Miꞌi iãꞌãkap ewy kahato saꞌawyꞌi eweipyhuꞌat eimikyꞌesat saꞌag koꞌi saity wo eikytyt hap ewy eiwanetup hap ipit pit rakat saity ewy topyhuꞌat. Aikotã aihũ saity ete hap ewy saity ete watukupteꞌen saꞌawyꞌi miitꞌin maꞌat hatno kahato. Wakuap watunug typy wanetup hap mywo. Saꞌawyꞌi miitꞌin maꞌat hamo watunug wakuap. Miꞌi saity ewy aikytyt hap ewy koitywy Tupana titek yne raꞌyn mekewat saity koꞌi ewywuat. Miꞌi hawyi watopopy raꞌyn wakuap nug hamo. Koitywy Tupana ahãꞌãg wakuap nug hamo raꞌyn. Pyno waku watuwat miꞌi upi. Waku watuwat ihay upi. Waku Tupana emiit no kahato watopyhuꞌat mesuwarote wakuap nug hamo. Hewaku hap ewy waku watunug Tupana mikyꞌesat oktan miitꞌin powyro hamuat koꞌi. -Koitywy uipiit topyhuꞌat epotpap wakuap nug hamo raꞌyn waku watoꞌe Tupana pe.
20 Saꞌawyꞌi watopyhuꞌat aimikyꞌesat saꞌag nug haria wo yne. Miꞌi ete yn watuwemoehapap. Wakuap nug hap yt ahewaĩ kuap saꞌag nug hap ete. Yt teke i aiwanetup hawe hãpyk nug hap.
21 Saꞌawyꞌi te wuat aiminug saꞌag watunug i raꞌyn hawyi aiwemoti hap topyhuꞌat. Miꞌi koꞌi he kahato watipuẽti saꞌawyꞌi maꞌato koitywy watikuap taꞌyn aiꞌauka hamo topyhuꞌat. Aiꞌapiheg wuatꞌi eꞌat piat hap. Miꞌi pote waku watoiat sese miꞌi koꞌi saꞌawyꞌi wuat.
22 Saꞌawyꞌi aiminug saꞌag emiit no watopyhuꞌat. Miꞌi hawyi koitywy watopyhuꞌat Tupana emiit no raꞌyn. Koitywy Tupana po pe raꞌyn watopyhuꞌat. Waku kahato poꞌog Tupana po pe watopyhuꞌat katupono aheineꞌen mesuwarotiat hap Tupana motypot hap yn topyhuꞌat. Miꞌi hawyi aru toineꞌen aheineꞌen wuatꞌi eꞌat piat Tupana motypot hap.
23 Aiminug saꞌag kaipyi tuut haꞌup aikuꞌuro hap aiꞌapiheg hap wuatꞌi eꞌat piat. Tupana wat yt haꞌup takat i tutum teꞌen neꞌi wuatꞌi eꞌat piat aheineꞌen hamuat ahepe Aipotypot Iesui mohey haria aito pote.
