Humanu 7:1-25
7 Uiwyriaꞌin Iesui mohey haria pywo ti eweikuap urueꞌaseꞌi Muisei piat Tupana miium miwan yityꞌok totiat kaipyi kat som waku watunug kat som yt naku i watunug hap puretig nu kawiat rotiat pyi. Miꞌi miwan ni ainapin kahato aheineꞌen turan aiminug kahato aikotã waku watunug aikotã yt naku i watunug hap ete. Miꞌi hawyi waku watunug iꞌe hap ewy watoꞌe aiwoꞌope. Watoineꞌen turan Muisei piat Tupana miwan ainapin hap aimuꞌe hat akag ewy topyhuꞌat. Maꞌato aikuꞌuro raꞌyn hawyi yt kat i ainapin puretig nu kawiat hap yt aimuꞌe hat i katupono aikuꞌuro raꞌyn mote.
2 Pyno ahenoi iãꞌãkap ewywuat ehepe mehinꞌin manaꞌin Humanu ywania. Eheꞌaito hawyi eiwary hawyi yt naku i etoiat eꞌaito ewary e Tupana tomiwan me. Ereineꞌen o iwywo ekuꞌuro hap sio ikuꞌuro hap kape e miwan me. Etoiat eharyꞌi sio etoiat eꞌaito pote yt naku i etunug e Tupana mekewat puretig nu kawiat rote. Maꞌato ikuꞌuro hawyi waku wẽtup etat etikyꞌesat rẽ pote e miwan me.
3 Maꞌato eꞌaito toineꞌen ne turan eharyꞌi toineꞌen ne turan ewaire wẽtup ok wywo pote yt naku i rakatno ereineꞌen e Tupana mekewat miwan me. Maꞌato eꞌaito ikuꞌuro eharyꞌi ikuꞌuro hawyi waku etat pakup i eꞌaito wo sio eharyꞌi wo yt heꞌaito i yt heharyꞌi i rakat e. Miꞌi wywo waku ereineꞌen yt kat i yt naku i ewetunug Tupana wanetup hawiat e miwan me.
4 Pyno miꞌi hap kaipyi ti ahenoi ehepe iãꞌãkap wuo eipe Iesui mohey haria pe. Aito Iesui mohey haria mesup. Saꞌawyꞌi watikuap kahato mekewat Muisei woꞌonapin hap Iuteuria waĩꞌe hap koꞌi. Waku kahato miꞌi e hap ainapin hamuat. -Miꞌi e hap watunug yne hawyi ahehakyeraꞌat hap saꞌup toineꞌen watoꞌe saꞌawyꞌi aiwoꞌope. Miꞌi hawyi watunug neran kahato maꞌato wahãꞌãg kahato yne ahesaika hawe pykai watiꞌaparap aparap mekewat Tupana piat ainapin hap ete. Miꞌi pote Iesui ikuꞌuro aikawiatno aheiam muat. Iwywo iꞌewyte aikuꞌuro hap ewy toineꞌen. Tupana waĩꞌe hap waku wen maꞌato aito yt nakuaria i pote yt watunug kuap i. Saꞌawyꞌi wahãꞌãg kahato yne waĩꞌe hap nug hamuat. Mekewat waĩꞌe hap topyhuꞌat aikotã aheꞌaito aiwary ewy. Maꞌato aikuꞌuro Aikaꞌiwat Iesui upi hawyi yt watoineꞌen poꞌog i saꞌawyꞌi wuat po piat mekewat aheꞌaito aheharyꞌi ewywuat hap. Iesui upi aikuꞌuro maꞌato mesup Iesui wywo watuwẽtem guꞌuro pyi iwywo ipakup takaria Tupana mowepiit hamuat hap nug hamo watuwẽtem. Saꞌawyꞌi aheꞌaito aheharyꞌi waĩꞌe waĩꞌe yn ahepe maꞌato koitywy aikuꞌuro raꞌyn pote aheꞌaito aheharyꞌi saꞌawyꞌi wuat Iuteuria eko koꞌi yt waĩꞌe kuap i ahepe aikuꞌuro raꞌyn hap ewy pote. Mio yt aimuꞌe kuap i aheꞌaito aheharyꞌi ewywuat. Miꞌi iãꞌãkap ewy wẽtup miit ewy yn naꞌyn watopyhuꞌat Iesui piit wywo. Ikuꞌuro turan aikuꞌuro hap wy topyhuꞌat maꞌato Tupana tihep Iesui guꞌuro pyi iꞌewyte aito watuwẽtem iwywo hap ewy. Koitywy aheꞌaito aheharyꞌi Tupana Paꞌãu topyhuꞌat hap ewy. Miꞌi pote aheꞌaito pakup ehay upi watopyhuꞌat. Koitywy watunug Tupana mowepiit hap koꞌi. Tupana Paꞌãu ni aimoesaika imikyꞌesat wakuap nug hamuat. Saꞌawyꞌi wahãꞌãg kahato puretig nu kawiat miwan nug hamuat wen aipiit yt hesaika kahato i inug hamuat. Maꞌato mesup aheꞌaito aheharyꞌi pakup ewywuat Tupana Paꞌãu wywo raꞌyn watopyhuꞌat wẽtup piit ewy. Miꞌi pote ahesaika puretig pakup sehay nug hamuat are sehay iãꞌãkap puo.
5 Saꞌawyꞌi yt naku i nug haria wo kahato watopyhuꞌat aat kaꞌap yne minug ete. Aiwekaipyi miit ewy watunug saꞌag. Aiwemikyꞌesat saꞌag nakat ewy yn watunug. Saꞌag yt nakuat i aito hap ewy watunug. Saꞌawyꞌi wuat miwan waĩꞌe ahepe aimuꞌe pykai yt watunug i -Yt etunug neiꞌo miꞌi hap e waku miꞌi hap etunug e. Miꞌi hawyi aiwepywiat aiwanetup hawe -Atunug aru watoꞌe wen maꞌato miꞌi hawyi aipiit mikyꞌesat e hap upi watuwat mekewat -Hẽto e waku etunug epiit mikyꞌesat saꞌag hap oktan e saꞌawyꞌi ahiag ahepe. Miꞌi hawyi aiwepyi watunug saꞌag Tupana ete. Watikuap pykai aiꞌapiheg hap topyhuꞌat aru hap pykai watunug aiminug saꞌag etiat hap kaipywiat. Aikuꞌuro hap kape yn aipotpap saꞌag saꞌup watum yne hap ewy.
6 Maꞌato koitywy wẽtup ok miit ewy yn watopyhuꞌat Iesui Paꞌãu wywo. Ikuꞌuro pote aikuꞌuro hap ewy topyhuꞌat iwywo hap ewy. Miꞌi pote aheꞌaito saꞌawyꞌi wuat aheharyꞌi saꞌawyꞌi wuat mekewat Iuteuria eko koꞌi sem yt ainapin kuap i poꞌog ikuꞌuro rakaria watopyhuꞌat pote hap ewy.
Muisei Miwan Yt Aimoehakyeraꞌat Kuap I
7 Maꞌato Tupana piat ainapin hap Muisei mimoherep wakuap kahato topyhuꞌat. Yt naku i watimohit Tupana piat ainapin hap ete. Pywo pe ti Tupana waĩꞌe hap kaipyi watikuap yt naku i watunug sio saꞌag hap watunug iꞌe hap ewy pote. Miꞌi hawyi watikuap aiminug saꞌag watipik neꞌi ainapin hap hawyi. Uimotag hap turan uito Pauru atikyꞌesat kahato uipyꞌa pe iraniaꞌin ekat uiatno hawyi atipuẽti ainapin hap miwan me -Yt etikyꞌesat reiꞌo iraniaꞌin ekat eha pe e. Miꞌi e hap ete atikuap yt naku i nug hat areineꞌen hap.
8 Maꞌato yt watikuap i Tupana piat ainapin hap Muisei mimoherep pote yt watikuap i aito iꞌaparap hat sio wakuap nug hat yt watikuap i. Aikotã saꞌawyꞌi uito yt atikuap i mekewat -Yt etikyꞌesat reiꞌo iraniaꞌin ekat eha wo e hap maꞌato atikuap hawyi -Pyno yt atunug i aru poꞌog are uipyꞌa pe maꞌato yt pykai i katupono atunug poꞌog poꞌog neꞌi. Iraniaꞌin ekat kape yn uheha tehaꞌat. Uiwekaipywiat atunug saꞌag poꞌog saꞌawyꞌi wuat kai.
9 Saꞌawyꞌi uito sio waku kahato areineꞌen areꞌe miꞌi turan putꞌok e Tupana e hap Muisei mimoherep uhete -Yt naku i etunug e. Miꞌi hawyi atikuap Tupana waĩꞌe hap hawyi atunug ne saꞌag katupono uipiit mikyꞌesat saꞌag hap -Etunug no e. Miꞌi hawyi yt naku i pe areineꞌen are uiwepe. Yt naku i nug hat uito are.
10 Uiꞌapiheg aru uiminug saꞌag upi are. Uikuꞌuro aru yn areꞌe uiwepe. Yt atikuap i aheineꞌen hap Tupana piat hap ewy. Yt atikuap i Tupana aiminug saꞌag pyhyp hamo saꞌawyꞌi Tupana tunug naꞌyn waĩꞌe hap aimoieineꞌen hamuat. Saꞌawyꞌi Tupana tum kahato ainapin hap aimoieineꞌen mesuwarotiat hamuat. Waku piat aheineꞌen hap tokuap hamuat tutum towaĩꞌe hap.
11 Maꞌato uhowowi yt miꞌi tã hin i katupono yt atunug i. Miꞌi pote areineꞌen Tupana miꞌapiheg wuatnuat kat pote Tupana toꞌe -Yt etunug i uiꞌe hap hawyi ti aru ekuꞌuro e. Miꞌi pote ikuꞌuro rakanuat areineꞌen. Saꞌawyꞌi areꞌe uiwepe -Are paĩ pyno atunug aru yne Tupana piat uinapin hap hawyi areineꞌen wuatꞌi eꞌat pe are. Miꞌi hawyi uiwepe ahãꞌãg kahato inug hap ete maꞌato atiꞌaparap aparap yne inug hap ete. Miꞌi hawyi -Paĩ are uiꞌapiheg aru Tupana uiꞌe hawyi.
12 Tupana ainapin hap miwan miat Muisei mimoherep ikahu kahato hãpyk kahato wakuat kaipyi ainapin hap pote hãpyk kahato ikahu kahato ainapin hap. Hãpyk yn ainapin hap atipuẽti. Waku kahato toineꞌen iꞌe hat ewy ti raꞌyn hãpyk topyhuꞌat.
13 Tupana piat uinapin hap yt uimaꞌat hin i. Yt karamuo i aimaꞌat kuap. Tupana ehay yt aiꞌauka hap i maꞌato Tupana ehay aparap hap nug hap aiꞌauka hap aiꞌapiheg aru hap topyhuꞌat. Tupana piat uinapin hap waku kahato pykai yt atunug hin i -Waku atunug aru areꞌe pykai atunug saꞌag hawyi atikuap yt nakuat i uito hap. Miꞌi hawyi Tupana piat uinapin hap Muisei mimoherep tomoherep kahato uimiꞌaparap koꞌi. Are paĩ uito rasig yt naku i rat paĩ are. Tupana uiꞌapiheg aru uikuꞌuro hamo are yn saꞌawyꞌi mekewat eꞌat pe.
14 Tupana Paꞌãu miat ainapin Muisei wẽ pywiat wakuat sese Tupana wanetup hap ewy. Miꞌi ti waku maꞌato uito yt atunug i pote yt naku i rakat areineꞌen. Miꞌi tã hawyi yt Tupana ewy hin i areineꞌen wakuap nug hap ete.
15 Atunug neran kahato wakuap nug hap koꞌi maꞌato yt uimikyꞌesat ewy i hawyi saꞌag nug hap tuwẽtem yn uipiit pyi. Miꞌi hawyi uiminug saꞌag uimoti te hap topyhuꞌat.
16 Miꞌi hawyi atunug yt naku i turan uiwanetup hap -Waĩꞌe uhepe -Yt etunug Tupana mikyꞌesat ewy hin i e uiwanetup hap. Muisei piat ainapin hap yt ewy hin i uiwanetup hawyi -Yt etunug neiꞌo e hap ete yn Atiꞌaparap.
17 Miꞌi hawyi atunug saꞌag uiwanetup hap mikyꞌesat ewy kat pote uimikyꞌesat saꞌag uipyꞌa piat poꞌog hesaika uiwewaĩ hap kai. Miꞌi pote yt atoiat kuap i uheko saꞌag.
18 Miit saꞌag nug hat ewy areineꞌen uhaꞌum me. Yt kat i wakuap itote. Atunug neran wakuap wen -Hẽto e uiwanetup hap maꞌato uipiit yt ikyꞌesat i hawyi uimikyꞌesat saꞌag uipyꞌa piat uipyhyp wakuap nug hamo.
19 Pyno ahãꞌãg kahato wakuap nug hap ete maꞌato yt atunug kuap i. Miꞌi hawyi yt naku i yn atunug waĩꞌe uiwanetup hap pykai.
20 Miꞌi hawyi typy miit ewy areineꞌen wẽtup ok yt naku i nug hat ewy wẽtup ok waku nug hat ewy. Mekewat yt naku i nug hat uipyꞌa piat poꞌog hesaika uikai.
21 Pyno typy sehay tuꞌuka uipiit pe. Wẽtup sehay -Etunug o wakuap e. Wẽtup sehay -Etunug no yt naku i e. Miꞌi hawyi mekewat sehay saꞌag upi uipap tuereto hawyi mekewat Tupana mikyꞌesat koꞌi yt atunug i. Yt naku i uito are.
22 Mekewat uito sese atikyꞌesat kahato Tupana ehay e hat uipap kahato Tupana piat ainapin hap upi.
23 Maꞌato toineꞌen wẽtup sehay uipiit pe -Waĩ yt etunug neiꞌo Tupana mikyꞌesat e. Miꞌi hawyi typy sehay tuꞌuka uipiit pe -Ereto ro Tupana ehay upi e uiwanetup hap. -Etunug no epiit mikyꞌesat e wẽtup sehay. Miꞌi hawyi atiꞌairo uipiit mikyꞌesat ewy. Yt arẽtem kuap i uimikyꞌesat saꞌag po pyi.
24 Yt naku i kahato yt uimowepiit hin i. Are paĩ uwe uwe aru uihep kuap mesuwat uheko saꞌag po pyi katupono uipiit mikyꞌesat saꞌag koꞌi uiꞌauka hat ewy topyhuꞌat. Uhekyi kahato uiꞌapiheg hap kape.
25 Pyno wẽtup yn uhehakyeraꞌat kuap hat. Tupana Saꞌyru yn uihep kuap uiminug saꞌag hap po pyi. Miꞌi pote arehum kahato Tupana pe katupono yt Tupana esaika hap wywo i pote yt atunug kuap i Tupana mikyꞌesat ewy. Uiwanetup hap wywo -Waku etunug e maꞌato uipiit mikyꞌesat saꞌag esaika hap poꞌog uiwanetup waku hap nug neran hap kai. -Tupana saꞌawyꞌi areineꞌen uimikyꞌesat saꞌag nug hap po pe maꞌato miꞌi hawyi Esaꞌyru uinug pakup hawyi mesup Epo pe areineꞌen. Waku kahato En Tupana katupono Esaꞌyru Paꞌãu wo uipytꞌatnug hawyi wẽtup sehay wakuat yn uipiit pe toineꞌen.
