Humanu 8:1-39
8 Watunug Iesui Aiꞌakag wo hawyi wẽtup miit ewy yn watopyhuꞌat iwywo katupono watoineꞌen Iesui pe iꞌewyte toineꞌen ahepe. Miꞌi hawyi Tupana yt toꞌe hin i ahepe -En yt naku i e hap. Worohoꞌoꞌapiheg yt e i ahepe.
2 Miꞌi hawyi wẽtup sehay yn aipiit pe kat pote Tupana Paꞌãu wo aipytꞌatnug. Miꞌi hawyi aipiit topyhuꞌat Iesui piit ewy. Saꞌawyꞌi te watuwat mekewat wẽtup sehay upi -Etunug no uimikyꞌesat ewy e hawyi ahiag mikyꞌesat saꞌag watunug. Miꞌi hawyi aiminug saꞌag ahekyi kahato aikuꞌuro hap kape hoꞌopot hap kape maꞌato watomohey Iesui hawyi Tupana Paꞌãu putꞌok e raꞌyn. Miꞌi hawyi Tupana Paꞌãu aihep taꞌyn aimikyꞌesat saꞌag po pyi aikuꞌuro hap wuatꞌi eꞌat piat po pyi.
3 Saꞌawyꞌi Tupana ainapin kahato Muisei upi. -Miꞌi tã waku etunug e. Miꞌi tã yt naku i etunug e maꞌato mekewat eꞌat yt watunug kuap i imikyꞌesat koꞌi katupono aimikyꞌesat saꞌag aipyhyp kahato inug hap ete. Miꞌi hawyi Tupana piat ainapin hap yt aimohãpyk kuap i yt watunug i pote. -Pyno atimohãpyk miꞌiria e Tupana tuwepe. Miꞌi toꞌe hawyi toipoꞌoro Tosaꞌyru sese. Putꞌok e hawyi aiꞌewy ipiit Miit kahato Miꞌi. Toiꞌaparap kuap aito ewy wen maꞌato yt toiꞌaparap hin i. Yt karãpe i tutunug saꞌag. Toiꞌakit kahato tomikyꞌesat saꞌag nug hamuat -Yt atunug i e tuwepe. Miitꞌin mikyꞌesat saꞌag toiꞌakit yne. Miit no tuwenug hawyi aiꞌapiheg hap tutuꞌu yne ariaꞌyp posak ete.
4 Koitywy Topiit wakuat wo aimoesaika. Tupana Paꞌãu wywo watuwat hawyi watunug Tupana mikyꞌesat koꞌi ainapin iwan miat hap ewy. Tupana Paꞌãu wo aipytꞌat sese hawyi yt watikyꞌesat hin i aimikyꞌesat aiwekaipywiat sehay.
5 Maꞌato watuwat aimikyꞌesat saꞌag upi pote aimikyꞌesat saꞌag yn watunug. Miꞌi hawyi aiwanetup hap saꞌag ewywuat po pe watopyhuꞌat. Aheko yt naku i ewywuat saꞌag hap topyhuꞌat maꞌato Tupana Paꞌãu eiam mo watopyhuꞌat pote miꞌi hawyi watuwat Tupana Paꞌãu ehay upi. Miꞌi hawyi Tupana wanetup hap ewy topyhuꞌat aiwanetup hap. Miꞌi hawyi watunug Tupana mikyꞌesat ewy.
6 Maꞌato watuwat aiwepywiat mekewat miit saꞌag wanetup hap ewywuat upi miꞌi hawyi aiwanetup hap mesuwarotiat ewy topyhuꞌat. Miꞌi hawyi yt naku i nug haria sese watopyhuꞌat hawyi aikuꞌuro hap yn topyhuꞌat. Maꞌato Tupana Paꞌãu toineꞌen aiwanetup hawuo hawyi wẽtup wanetup hap yn topyhuꞌat ahete Tupana wat ewy. Miꞌi hawyi yt kowoꞌi kowoꞌi hin i aiwanetup hap. Waku kahato aiwanetup hap topyhuꞌat. Ihay se kahato aheineꞌen hap. He kahato rakat topyhuꞌat Tupana Paꞌãu wo watuwenug hawyi.
7 Karãpe watopyhuꞌat mesuwarotiaria ewy aiwanetup hawe hawyi yt watunug hin i Tupana mikyꞌesat koꞌi. Yt watunug hin i ainapin miwan miat. Pyno watikuap Tupana ehay hawyi -Pyno atunug Tupana mikyꞌesat watoꞌe maꞌato yt watunug kuap i wahãꞌãg pykai katupono aimikyꞌesat yn aiwanetup hawe yt Tupana mikyꞌesat hin i. Miꞌi pote mesuwarotiat miit ewy aimikyꞌesat koꞌi watunug hawyi yt naku i nug haria wo watopyhuꞌat. Watunug Tupana ahewanikap mo.
8 Watuwat aimikyꞌesat saꞌag upi hawyi miit saꞌag ewywuat watopyhuꞌat mesuwarote. Miꞌi hawyi yt kat i aiminug koꞌi topyhuꞌat Tupana mowepiit hamo.
9 Maꞌato aito yt miꞌi tã hin i. Yt watuwat hin i aimikyꞌesat saꞌag kyꞌesat hap nug hamo iꞌewyte yt ahewaure kaꞌa hin i mekewat sehay kape. Wẽtup sehay upi raꞌyn watuwat katupono Tupana Paꞌãu toineꞌen ahepe mio. Maꞌato uwe uwe yt Aipotypot Iesui Paꞌãu yt eiam i miꞌi hat ti yt Tupana emiit hin i katupono Tupana emiit no Iesui Paꞌãu eiam yn teꞌeropyhuꞌat.
10 Maꞌato Aipotypot Iesui Paꞌãu wakuat wo aipytꞌat pote aipiit mikyꞌesat saꞌag hap ikuꞌuro rakat ewy topyhuꞌat katupono aipaꞌãu moieineꞌen wuatꞌi eꞌat piat hap toineꞌen ahete. Aipiit ikuꞌuro aru iraniaꞌin ewy katupono saꞌawyꞌi watunug neran saꞌag yn mote Tupana Paꞌãu wakuap aimoesaika kahato ahãꞌãg hap akit hamo Iesui miehakyeraꞌat koꞌi pote.
11 Saꞌawyꞌi Tupana Paꞌãu timoieineꞌen Iesui piit ikuꞌuro hawyi. Taꞌi Tupana Paꞌãu hesaika kahato miitꞌin moieineꞌen hamo. Miꞌi ti toineꞌen ahepuo. Aipiit ikuꞌuro hawyi Tupana Paꞌãu toineꞌen aimoieineꞌen hamuat Iesui wat ewy. Pywo pe ti Iesui piit ewy Tupana Paꞌãu esaika hap toineꞌen aipiit moieineꞌen hamuat.
Watomohey Hawyi Yt Aimikyꞌesat Ewy Watunug Neran I
12 Uiwyriaꞌin Iesui mohey haria yt kat hamo i koitywy watuwat saꞌawyꞌi wuat aimikyꞌesat saꞌag koꞌi kape katupono yt watoineꞌen poꞌog i aimikyꞌesat saꞌag po pe. Areineꞌen Aipotypot Aikaꞌiwat po pe hawyi yn waku are -Tupana arehum ewowi. Uihep taꞌyn uimikyꞌesat saꞌag po pyi.
13 Pyno aipiit mikyꞌesat saꞌag kyꞌesat hap kape yn watuwepotpap pote aiꞌapiheg hap yn topyhuꞌat ahete aikuꞌuro hap. Waku watoꞌe Tupana Paꞌãu me -Etiꞌakit ro uimikyꞌesat saꞌag kyꞌesat hap watoꞌe Tupana Paꞌãu me. Miꞌi hawyi Tupana Paꞌãu aimoieineꞌen kahato.
14 Uwe uwe Tupana Paꞌãu piat topoꞌoro hap upi topyhuꞌat miꞌi hat topyhuꞌat Tupana sakiꞌytꞌin Tupana saꞌyruꞌin e.
15 Katupono Tupana tum naꞌyn Topaꞌãu aikyꞌe haype. Yt aimogyt hamo i yt aimokenꞌẽ hamo i katupono Tupana Paꞌãu iwese kahato. Aiꞌapykok hamo aimowepiit hamo yn toikyꞌesat. Tupana Paꞌãu aimoherep Tupana saꞌyruꞌin wo hakiꞌytꞌin wo hawyi watuwak -Papai Papai watoꞌe Tupana pe. Uiꞌywot kahato En watoꞌe Tupana pe.
16 Miꞌi hawyi Tupana Paꞌãu aipaꞌãu wywo wẽtup Paꞌãu ewy yn topyhuꞌat -Tupana mepytꞌin eipe e. Tupana Paꞌãu ahepe miꞌi pote aiꞌãu -Pywo e.
17 Pyno mesup Tupana mepytꞌin koꞌi aito pote Tupana mimopyhuꞌat wuatꞌi eꞌat pe katupono Aiꞌywot Tupana pote Iesui Aheykeꞌet pote aito iꞌywytꞌin inytꞌin wẽtup sok yn aitoria pote. Tupana ekat yne aiwatnuat koꞌi imepytꞌin aito pote. Aheykeꞌet motypot hap eꞌat pe aito iꞌewyte aimotypot hap toineꞌen imohey haria aito pote. Aheykeꞌet Aikywyt hoꞌopot kahato ahehakyeraꞌat hamo miꞌi pote waku kahato wahoꞌopot Aheykeꞌet Aikywyt ehay moherep hamo katupono wẽtup sok yn Tupana mipoityro koꞌi aito. Aheykeꞌet Aikywyt motypot hap eꞌat pe aimotypot iwywo hap topyhuꞌat.
18 Ahoꞌopot kahato mesuwe uito Pauru. Koitywy ahoꞌopot hap eꞌat kahato. Koran ni miitꞌin mimosoꞌopot koꞌi kahato watoineꞌen maꞌato Iesui motypot hap eꞌat pe Tupana mimotypot no kahato watopyhuꞌat. Mekewat eꞌat pe aito iꞌewyte Tupana mimotypot kahato wo watopyhuꞌat. Aimotypot Iesui wywo hap eꞌat pe aru poꞌog iwato mesup eꞌat piat wahoꞌopot mesuwarotiat. Taꞌi waku watoꞌe ahoꞌopot kahato hawe -Koitywy ahoꞌopot kahato Iesui wanikap po upi maꞌato typy sakpo are poꞌog Tupana mimotypot no areineꞌen wuatꞌi eꞌat piat ahoꞌopot hap saꞌup waku watoꞌe.
19 Yne Tupana minug koꞌi hekatup haria wo teꞌeropyhuꞌat katupono taꞌatukuap teran kahato uwe uwe Tupana saꞌyruꞌin Tupana sakiꞌytꞌin Tupana mimoherep hap kuap hamo taꞌatuhekatup kahato.
20 Tupana minug koꞌi mesuwarotiat ikahu kahato maꞌato mesuwe toineꞌen hawyi ikuꞌuro yne katupono aiꞌaparap hawyi Tupana tiꞌatuꞌuhu yne tominug iꞌatumosoꞌopot hamuat ipap hamuat aiminug saꞌag upi. Miꞌi pote ikuꞌuro rakaria wo tukupteꞌen yne yt taꞌatumikyꞌesat ewy i. Watomohey Iesui hawyi -Wuatꞌi eꞌat piaria eweipyhuꞌat aru e Tupana ahepe. Miꞌi pote aheineꞌen hap ipakup i hap kape mesup wahekatup kahato imohey hap wywo.
21 Guꞌuro po pe watoineꞌen yne aitoria map haria -Uipiit aru tuwemopyyp e hap yn aiwanetup hawe. Yne mesuwat yi totiaria wemopyp hanuaria topap hawyi watoꞌe aiwanetup hawe. Iꞌewyte yne aihũria yne miat koꞌi yne mikoi yne aiminug koꞌi ikahuro rakatno tukupteꞌen watoꞌe. Watiꞌaparap saꞌawyꞌi hawyi ikuꞌuro rakaria wo watukupteꞌen watoꞌe. Maꞌato miꞌi pykai watomohey kahato -Meiũran aru tuut waku hap ahete i watoꞌe aipyꞌa pe. Tupana aru aihep mesuwat guꞌuro po pyi watoꞌe. Waku pe aru watoineꞌen watoꞌe iraniaꞌin Iesui mohey haria pe kat pote Tupana saꞌyruꞌin Tupana sakiꞌytꞌin aito pote ti aru waku sese puo watoineꞌen wẽtup miit ewy yn watoineꞌen Iesui piit ewywuat watoꞌe. Watuwẽtem guꞌuro po pyi hap eꞌat pe aru yne mesuwarote aiꞌewy topyhuꞌat i raꞌyn gaꞌapy yi yꞌy waku pe i raꞌyn tukupteꞌen wuatꞌi eꞌat pe aiꞌewy watoꞌe aipyꞌa pe Tupana mohey hap wywo.
22 Nimo te mesup te yne Tupana minug koꞌi -Waku pe watukupteꞌen aru iꞌatuꞌe iꞌewyte watoꞌe. Maꞌato koitywy wahoꞌopot kahato aheineꞌen hap ete mesuwarote iꞌatuꞌe miat koꞌi pira koꞌi weita koꞌi iꞌewyte watoꞌe. Taꞌi yne Tupana minug koꞌi haty potiat kak iꞌatuꞌe kak iꞌatuꞌe hap ewy tukupteꞌen mesuwe. Aikotã hirokat haty potiat ewy ahatek ahatek hap kahato topyhuꞌat mesuwe.
23 Hoꞌopot haria sok Tupana minug koꞌi mesuwarotiaria. Saꞌawyꞌi ainug hap eꞌat pe waku pe watoineꞌen maꞌato mesup yne raꞌyn hoꞌopot haria wo tukupteꞌen e. Aito Iesui mohey haria hoꞌopot haria wo kahato watoineꞌen Tupana tum naꞌyn ahepe Topaꞌãu pykai. Haty kahato hap ahete pote kyn kyn watoꞌe aipyꞌa pe -Uruikyꞌesat kahato urupiit yt ikahuro rakat i watoꞌe Tupana pe. Urunug no esakiꞌytꞌin esaꞌyruꞌin sese wo watoꞌe. Waku pe urutukupteꞌen teran yt kat i uruꞌarot hap wywo. Uruwemowepiit hap yn mywo sese watoineꞌen neran watoꞌe Tupana pe kyn kyn aiꞌe hap wywo.
24 Mio tã watoꞌe Tupana pe -Uruimohey kahato eꞌe hap ewywuat watoꞌe. Yne yne nug hat ereineꞌen hap uruimohey watoꞌe. Wuatꞌi -Atunug aru eꞌe hap koꞌi ewywuat hap uruimohey kahato watoꞌe. -Uimohey pote worohoꞌoehakyeraꞌat wuatꞌi eꞌat pe eꞌe hap ewywuat ti uruimohey watoꞌe. Maꞌato koitywy yt putꞌok e i te eꞌe hap ewywuat pykai uruimohey te watoꞌe. Yt karãpe i urutaꞌakasa Esaꞌyru urueha wywo te maꞌato uruimohey miꞌi yn uruehakyeraꞌat kuap hat urupyꞌa pe watoꞌe Tupana pe. Yt urutaꞌakasa i te Esaꞌyru wen urueha pe maꞌato miꞌi pykai uruimohey kahato tuut aru eꞌe hap ewywuat Tupana watoꞌe. Mesup sehay toineꞌen urumimohey mekewat eꞌat pe aru urutaꞌakasa eꞌe hap ewywuat heremo raꞌyn eꞌe hap watoꞌe. Maꞌato yt naku i watoꞌe Tupana pe -Urutaꞌakasa En urueha wo miꞌi pote uruimohey En yt naku i watoꞌe. Urutaꞌakasa Tupana kape aheha wo hawyi heremo raꞌyn toineꞌen aheha pe. Heremo raꞌyn toineꞌen aimimohey. Miꞌi tupono wẽtup aimimohey ewywuat toineꞌen yt saꞌawyꞌi wuat aimimohey ewy hin i. Heremo raꞌyn ahehamo Tupana pote yt wahekatup kuap i poꞌog tuut irane hap.
25 Maꞌato yt toineꞌen i ahehamo pote imohey hap wywo yn wahekatup -Ariot i aru e hap ewy. Yt watiwaure hin i ahepiat imohey hap. Wahekatup imohey hap wywo yt heremo i pykai.
Tupana Paꞌãu Aipowyro Hamuat Hap Toineꞌen
26 Karãpe ahehay Tupana kape turan yt watikuap hin i kat som waku wahẽtup kat som yt naku i wahẽtup katupono aiweꞌeg hap yt putꞌok e kat som waku watoꞌe Tupana pe ahehay wo hap ete. Maꞌato miꞌi turan Tupana Paꞌãu Wakuat putꞌok e ahete aipowyro hamo ahehay Tupana kape aiꞌe hap moherep hamo aiwẽ pyi hawyi aiwywo kahato toineꞌen Ipaꞌãu ahehay tewowiat ete aipowyro kahato ahehay Tupana kapiat hamuat. Miꞌi hawyi aipiit pyi aipyꞌa pyi aiwanetup hap pyi Ipaꞌãu ihay kahato Tupana wywo aiwẽ pyi. Yt watikuap kuap i kat som waku watoꞌe hawyi Tupana Paꞌãu ihay aipyꞌa pyi aikotã kyn kyn watoꞌe hap ewy hawyi kat som waku Tupana mikyꞌesat ewy toimoherep Tupana pe aiwẽ pyi.
27 Tupana yt ahehay se kape hin i ihaꞌat maꞌato aipyꞌa kape aiwanetup hap kape ihaꞌat kat watoꞌe som aipyꞌa pyi hap kape ihaꞌat. Toikuap kahato Topaꞌãu pusu aipiit pywiat hap. Topaꞌãu wanetup hap kat som watoꞌe teran hap toikuap hawyi Ipaꞌãu timoherep aimiẽtup koꞌi Aiꞌywot pe. Tupana Paꞌãu ni ihay kuap Tupana wywo aimiẽtup moherep hamo. Toikuap kahato Tupana mikyꞌesat koꞌi hawyi ahẽtup turan toimoherep ahepe tomikyꞌesat ewywuat koꞌi pyi ihay tomikyꞌesat koꞌi aimikyꞌesat ewy.
28 Watikyꞌe sese Tupana pote iꞌewyte imikyꞌesat nug haria wo watoineꞌen. Miꞌi pote Tupana ipotpap kahato aikawiatno. Pywo ti rat aikotã aikotã topyhuꞌat ahete sio waku sio yt hap puo ipotpap kahato aikawiatno. Putꞌok e ahete aimowepiit hap sio ahatek hap toineꞌen aikawiatno kahato Tupana. Aito Tupana tokyꞌe haria iꞌewyte imikyꞌesat nug kahato haria wo pote ipotpap kahato aipowyro hamuat aipoityro hamuat waku nug hamuat.
29 Yt aheineꞌen i te hap eꞌat turan Tupana aikuap taꞌyn. Taꞌi ainug hap eꞌat eꞌyian mete Tupana aikuap. -Taꞌi miꞌiria wyti aru Uhaꞌyru mohey hanuaria tukupteꞌen e tuwepe nimo te yt uwe i aito hap eꞌat pe. Uhaꞌyru mohey haria wo aru atiꞌatunug Uhaꞌyru ewywuaria Taꞌatueykeꞌet ewywuaria Taꞌatukywyt ewy atunug miꞌiria Uhaꞌyru watꞌypꞌi wo hap atiꞌatunug miꞌiria e tuwepe nimo te yt uwe i aito hap eꞌat pe. Uhaꞌyru mohey haria wyti aru atiꞌatuꞌairo uhemiitꞌin sese wo e Tupana topyꞌa pe nimo te yt uwe i te toineꞌen mesuwarote turan.
30 Pyno saꞌawyꞌi sese Tupana aiꞌairo atipy pe. Miꞌi hawyi putꞌok watoꞌe aiꞌywãꞌĩ hap hawyi watoineꞌen mesuwat yi tote hawyi watomohey Haꞌyru hawyi Tupana aikay kay tuwewawi towatnuaria sese wo. Miꞌi hawyi -Waku kahato uipyꞌa pe uiwanetup hawe eweikupteꞌen e ahepe. Pywo ti rat worohoꞌonug eiperia uhaꞌyruꞌin uhakiꞌytꞌin sese wo e. Karãpe putꞌok e uimotypot hap eꞌat sese mesuwarote hap eꞌat pe uimimotypot haria wo aru eweikupteꞌen e. Mekewat eꞌat pe aikotã miitꞌin uimotypot hap ewywuat miitꞌin mimotypot wo eweikupteꞌen are e Tupana ahetiat yt kat i te aheineꞌen turan.
31 Waku kahato Tupana katupono aikyꞌe hap wywo tutunug yne aikawiatno hap. Nimo pyi mesup te iꞌewyte mukiꞌite te aikai yn Tupana toineꞌen. Tupana toineꞌen aiwy kahato hawyi yt uwe i ahewanikaptia aiꞌakit kuap.
32 Tutum naꞌyn ahepe Tosaꞌyru sese Tomikyꞌe poꞌog ahehakyeraꞌat hamo ikuꞌuro aikyꞌe hap upi. Tupana hegyiꞌat kahato. Tosaꞌyru po pyi mesup tutum neran ahepe yt kat saꞌup i yne yne yt kat i te aipo piat rakat ahehakyeraꞌat tuwy.
33 Koitywy Tupana toꞌe ahetiat -Yt kat i saꞌag atipuẽti Uhaꞌyru mohey haria kai uiwanetup hawe e katupono uimiꞌairoria kahato miꞌiria e Tupana. Yt kan hamo i iraniaꞌin teꞌeroꞌe uhepe -Yt naku i kahato Esaꞌyru mohey haria katupono miꞌiria ti uimimoewaku koꞌi sese e Tupana ahepiat.
34 Tupana mimoewaku koꞌi kahato aito pote yt uwe i toꞌe kuap ahepe -Tupana miꞌapiheg koꞌi wo aru eweikupteꞌen yt iꞌatuꞌe kuap i. Yt miꞌi tã hin i aru e Tupana ahepiat. Tupana Mipoꞌoro Wuatꞌi Miitꞌin Porekuat nuat ikuꞌuro wuatꞌi miitꞌin apiheg hap koꞌi u hamo. Ikuꞌuro hawyi tuwẽtem guꞌuro pyi miitꞌin moieineꞌen wuatꞌi eꞌat piat hamo. Mio raꞌyn toineꞌen atipy pe apyk pe Tupana po ran kai imohey haria imimohãpyk haria moherep hamuat. Taꞌi watomohey hawyi imimohãpyk haria wo watukupteꞌen Tupana wanetup hawe. -Waku kahato uimohey haria koꞌi e yn ahepe Tupana ahetiatno iraniaꞌin me ahewanikaptia pe.
35 -Worohoꞌokyꞌe kahato eipe e Aikaꞌiwat Iesui ahepe. Yt kat i hin i aihep kuap Aikaꞌiwat po pyi. Ahatek hap apo aihep kuap Aikyꞌe hat po pyi. Yt hin i watoꞌe are. Ahoꞌopot hap apo aihep kuap Aipotypot Iesui po pyi. Yt hin i watoꞌe. Miitꞌin mikyryꞌi ahetiat hap pupi apo aihep kuap Aiꞌakag po pyi. Yt hin i watoꞌe. Ahesyꞌat hap apo pupi aihep kuap Tupana Mipoꞌoro Aiporekuat nuat po pyi. Yt hin i watoꞌe are. Yt ahekat hin i hap apo aihep kuap Aikyꞌe hat po pyi. Yt hin i watoꞌe. Iraniaꞌin aiꞌauka teran haria pupi apo aihep kuap Aikaꞌiwat po pyi. Yt hin i watoꞌe. Aikuꞌuro hap apo aihep kuap Aikyꞌe sese hat po pyi. Yt hin i watoꞌe.
36 Taꞌi yt kat i aihep kuap Aikaꞌiwat Aikyꞌe hat po pyi watoꞌe katupono mio tã e morekuat Tawi tuwepy hawuo tomiwan me -Tupana uruhoꞌopot kahato mesuwe emohey haria uruto pote e. Emohey haria pote uruꞌauka teran haria typyꞌi kahato rakaria tukupteꞌen mesuwe e. Yne eꞌat pe uruꞌauka teran aat e. Tupana ienuk koro hap eꞌat pe uruiꞌatuꞌuka kahato uruhũria urumiꞌu wo. Miꞌi hap ewywuat rẽ uruwanikaptia urukat uruꞌatuꞌuka hamo mesup mesuwe Mehin are e morekuat Tawi tuwepy hawe tomiwan me.
37 Pyno morekuat Tawi ewy kahato watopyhuꞌat mesuwarote hoꞌopot haria maꞌato miꞌi pykai yt watoiat hin i Aikyꞌe hat Iesui are katupono Aikaꞌiwat ti aimoesaika kahato aiꞌakit hap pupi. Miꞌi hawyi Aikyꞌe hat Koro toineꞌen aiwywo aat kaꞌap wuatꞌi aiꞌakit hap akit hamuat. Miꞌi pote ti watoineꞌen ahesurara akag ewy. Aikotã surara poꞌog hesaika rakat torannia kawiat ewywuat watoineꞌen mesuwarote yne yt naku i akit hamuat.
38 Pywo ti rat mesup taꞌyn atikuap kahato raꞌyn yt kat i hin i aihep kuap Aikyꞌe hat po pywiat. Aikuꞌuro hawyi watoineꞌen kahato te Ahekatuwy po pe. Aheineꞌen saꞌag kahato mesuwarotiat hap iꞌewyte yt aihep kuap i Aiwy po pyi hap atikuap taꞌyn. Iꞌewyte atipy piaria yt aipohari kuap i Aiꞌapykok hat aikyꞌe hap ete. Miꞌi hawyi morekuaria mesuwarotiaria iꞌewyte yt aipohari kuap i Aipotypot Iesui po pyi. Pywo ti rat ahiag iꞌewyte ahiagnia wy yt aihep kuap i Tupana po pyi katupono aikyꞌe wuatꞌi eꞌat pe. Taꞌi gaꞌatpo te mesup te iꞌewyte mukiꞌite watoineꞌen ipo pe wuatꞌi eꞌat pe. Yt kat i hin i aipohari kuap aito Iesui mohey haria Aikyꞌe hat Koro po pyi.
39 Taꞌi yt uwe hin i mesuwarotiaria tipohari kuap aito Tupana po pyi. Iꞌewyte yt uwe hin i wy mesuwat yi ywytꞌokpypiaria aihep kuap aito Aikyꞌe hat po pyi. Yt uwe hin i gaꞌapy puaria wy aipyhyp kuap Aikyꞌe kahato hat Tupana kape Tosaꞌyru Aipotypot Akag mohey haria aito pote e.
