Iesui Aru E Hap 10:1-11
10 Miꞌi hawyi uito Iuwãu arahaꞌat i hawyi araꞌakasa wẽtup ok poꞌog hesaika rakat atipy piat. Miꞌi ti taꞌapyk yi kape. Ipiit ete hesokpe ywyhig ikytsig kahato rakat. Ipainug hap iꞌakag ete weꞌyp ewy ikahu kahato rakat. Howa hẽtyhot kahato aat ewy. Ipy typy wasere yp oktan toineꞌen maꞌato aria kawiat ewy topyhuꞌat.
Miꞌi Ti Miwan Tutum Uhepe
2 Miꞌi hawyi wẽtup iwan okpoꞌi hit totat. Miꞌi hawyi toiꞌokpoꞌi porap taꞌyn. Ipy sese topypag yꞌy wato owa tote maꞌato topy ran kai topypag yi tote.
3 Miꞌi hawyi mekewat atipy piat akag tuwẽpowat tehay pirik wo aikotã awyato koꞌi iꞌatuehay hap ewy. Tuwẽpowat kahu hawyi 7 wo hu huꞌe.
4 Maꞌato hu huꞌe hap miitꞌin pusu ewy topyhuꞌat. Miꞌi pote uito Iuwãu atikuap kat som toꞌe hu huꞌe tohenoi hap -Pyno atiwan mesuwarote kat som teꞌeroꞌe hap uiwepe atiwan turan putꞌok e uhete sehay atipy kaipyi -Yt etiwan neiꞌo kat som toꞌe hu huꞌe puat hap e. Yt atikyꞌesat i miitꞌin ikuap hap koran te e.
5 Miꞌi hawyi mekewat atipy piat ihay raꞌyn -Yt uheso i rat e. Miꞌi hawyi topo sese tohupit ywaipe tehay Tupana kapiat pywo yn e hamo.
6 -En ni atipy nug hat iꞌewyte yne atipy piaria nug hat e. En ni mytyyp nug hat iꞌewyte yne yi totiaria nug hat e. En ni yꞌy wato nug hat iꞌewyte yne yꞌy piaria nug hat e. Eset ri Tupana e. En ni pywo sese rakat e. Miꞌi pote areꞌe pywo rakat eꞌe hap ewy wuatꞌi miitꞌin me areꞌe -Mukiꞌite yt kat i poꞌog miitꞌin watnuat eꞌat koꞌi saꞌawyꞌi wuat ewy e Tupana e. Mekewat 7 hu huꞌe hap ikahuro hawyi iꞌewyte ikahuro raꞌyn eꞌat koꞌi yi totiaria watnuat e Tupana e.
7 Pywo ti rat e mekewat 7 ok hu huꞌe hawyi aikotã Tupana toꞌe saꞌawyꞌi tehay moherep haria wẽ pyi topyhuꞌat aru yne iꞌatuꞌe hap ewy hu huꞌe hap tutunug 7 rakat hawyi e. Topyhuꞌat aru aikotã atunug aru e tehay moherep haria wẽ pyi saꞌawyꞌi hap ewy topyhuꞌat e. Miꞌi tokosap yne raꞌyn hawyi yne mekewat atunug aru e hap saꞌawyꞌi yt heremo i rakat heremo raꞌyn topyhuꞌat kat atunug naꞌyn atunug aru ehehamo uiꞌe hap ewy e Tupana e. Miꞌi hawyi -Atikuap yne atunug aru e hap e Tupana wuatꞌi miitꞌin me e mekewat atipy piat iwatoꞌin nakat.
8 Miꞌi tohenoi kahu hawyi atikuap sehay atikuap saꞌawyꞌi hap ewy -Iuwãu e etat atipy piat po pyi mekewat iwan okpoꞌi hit e uhepe. Etat ro mekewat atipy piat ipy yꞌy pe kokawiat ipy yi totiat rakat po pyi e. Mekewat miwan taꞌapymeha piat e mekewat sehay atipy kaipywiat e uhepe.
9 Miꞌi hawyi areto raꞌyn mekewat atipy piat owa kape hawyi -Mehin etum no mekewat miwan hit uhepe areꞌe tope. Miꞌi hawyi uiwesat -Etat ro miwan hit hawyi etuꞌu yne ro e. Hẽꞌẽ kahato aru etipuẽti ewẽ pe awiꞌa hy ewywuat e maꞌato etohon hawyi yt naku i etipuẽti aru epyꞌa pe yt hẽꞌẽ hin i maꞌato nop hap topyhuꞌat epyꞌa pe e uhepe.
10 Miꞌi hawyi atat mekewat miwan hit atipy piat akag po pyi hawyi atuꞌu raꞌyn hawyi iꞌe hap ewy topyhuꞌat hẽꞌẽ kahato waku kahato awiꞌa hy ewy maꞌato atuꞌu hawyi nop hap ewy topyhuꞌat uimeꞌen me.
11 Miꞌi hawyi mekewat poꞌog atipy piat rakat toꞌe uhepe -Iuwãu e pyno ti pywo ti rat Tupana ehay etimoherep aru iꞌatu kahato miitꞌin kape e. Ehenoi aru aikotã topyhuꞌat iꞌatuete irane hap e. Ehenoi poꞌog aru iꞌatuepe mekewat sehay emihon kaipyi waku yne pusu puo aru ehenoi mekewat miwan miat emiꞌu yne yne ywania kape iꞌewyte yne morekuaria kape iꞌewyte yne tama piaria kape miwan miat e hap ewy waku etiꞌatumoherep aru e. Yt naku i mesup miitꞌin ikuap maꞌato heꞌat putꞌok e aru hawyi waku etimoherep yne kat toꞌe kat toꞌe hu huꞌe hap puo e uhepe mekewat miwan kaipywiat uipoi hat atipy piat.
