Iesui Aru E Hap 11:1-19
11 Miꞌi hawyi Aipotypot Iesui tum uhepe ariaꞌyp hit kat kupitu kat kupitu Tupana yat toineꞌen hap hãꞌãg hamuat ãpy hãpyk kahato rakat. Tutum uhepe hawyi toꞌe -Uiwy Iuwãu ereto ro meikowat ariaꞌyp hit ãpy hãꞌãg hamuat wywo Tupana motypot yat sese kape e. Miꞌi hawyi ehãꞌãg no koran iwato hap koran iꞌywop hap koran itypore hap e iꞌewyte yne Tupana motypot yat ipytꞌat koꞌi ehãꞌãg iwato hap e uhepe. Iꞌewyte etiꞌatumorania yne miitꞌin Tupana motypot haria itotiaria e uhepe. Iꞌewyte yparakai aikope Tupana kapiat taꞌatumiium pytyp hap waku ehãꞌãg yne mekewat ariaꞌyp hit ãpy wo koran iwato koran iꞌywop hap itypore hap e uhepe.
2 -Maꞌato Tupana motypot yat eꞌoken yt ehãꞌãg neiꞌo katupono Tupana motypot yat eꞌoken mesup koitywy yt aiꞌywania wat i maꞌato iraniaꞌin yt Iuteu i ywania watnuat topyhuꞌat. Iꞌewyte Tupana etawa Ierusarẽi iraniaꞌin ywania tipohari raꞌyn aiꞌywania Iuteu ywania po pyi. Suraraꞌin hewyry aru itote 42 ewaty suraraꞌin tipohari Ierusarẽi iꞌatuꞌywania watnuat e uhepe e Akag Iesui uhepe.
3 Mekewat eꞌat pe aru atipoꞌoro typy ok uimiꞌairo koꞌi uhehay moherep hamuat tawa Ierusarẽi miaria kape e. Atum miꞌiria pe uhesaika hap uhehay moherep hamuat 1260 eꞌat taꞌatumoherep uhehay uhesaika hap wywo e. Iꞌatuesokpe iꞌanam nakat waku paa watoꞌe aiminug saꞌag ete e hap moherep hamo e.
4 -Mekewaria typy ok takaria teꞌeropyhuꞌat Uriweiru yp ewy Tupana eꞌariãty rakat ewywuaria e. Taꞌatupytꞌat ikap ihy rakat wo hap ewy miꞌiria Tupana eꞌariãty hapyke rakaria ewy teꞌeropyhuꞌat e. Katupono Tupana ehay moherep haria miꞌiria typy ok takaria e. Toꞌoꞌewy kahato aikotã typy rakat ariãty Tupana yatypiaria ieineꞌen haria ariãty eiam hẽtyhot kahato rakaria ewy mekewat typy ok Tupana mipoꞌororia e. Teꞌeropyhuꞌat hamuat Wuatꞌi Miitꞌin Yi Totiaria Kaꞌiwat eꞌariãty moherep hamo e uhepe.
5 Miꞌi hawyi yi tote taꞌatumoherep kahato uhehay e. Iꞌatuwanikaptia iꞌatu kahato maꞌato uimipoꞌororia typy ok poꞌog hesaika iꞌatuꞌuka teran haria kai e. Karãpe miitꞌin tuwat aru uimipoꞌororia typy ok auka hamo miꞌi hawyi iꞌatuwanikaptia koꞌi yne topap aria iꞌatuwẽ pywiat wo e. Yt uwe i uimipoꞌororia typy ok auka kuap hat e uhepe.
6 Miꞌi hawyi miꞌiria typy ok takaria uimipoꞌororia hesaika kahato rakaria wo tukupteꞌen e. Taꞌatupyhyp kuap aru iꞌaman e. Miitꞌin sem me taꞌatumoherep aikotã aru e hap koꞌi e. Waĩꞌiꞌatuꞌe iꞌaman me taꞌatuhenoi miitꞌin miat turan yt kat i iꞌaman iꞌatuko ete e. Yt kat i iꞌaman mesuwat yi tote iꞌatuꞌe hap ewy taꞌatumikyꞌesat ewy e. Iꞌewyte taꞌatunug kuap yꞌy koꞌi huu rakatno. Iꞌewyte taꞌatumikyꞌesat ewy taꞌatupoꞌoro kuap ahuu. Saꞌag nug haria taꞌatuewanikaptia moma hanuaria tukupteꞌen e. Iꞌewyte taꞌatupoꞌoro kuap hamuat ihywyꞌokmoĩ koꞌi taꞌatuwanikaptia ãpymin hamo e uhepe Iesui.
7 Miꞌi hawyi 42 ewaty hap ete tokosap taꞌyn iꞌatuehay hap e. Toran naꞌyn hawyi tuwẽtem irane yi kaꞌa wato saꞌag myi mekewat haiwot rakat saꞌag kahato rakat ipoityꞌi rakat ahiag e. Miꞌi hawyi tuꞌuka kahato Tupana ehay enoi haria typy ok takaria ete e. Miꞌi hawyi poꞌog hesaika topyhuꞌat e. Miꞌi hawyi hamuat ewy toiꞌatuꞌakit uimipoꞌororia tesuraraꞌin sem py wo hawyi toiꞌatuꞌuka uimipoꞌororia typy ok takaria e uhepe.
8 Iꞌatupiit toipun tawa wato pyꞌasetpyi aikope saꞌawyꞌi taꞌatupehik Tupana Mipoꞌoro Uito ariaꞌyp posak ete hap tote taꞌatupugha tawa puꞌap tote tawa pyꞌasetpe wuatꞌi ehamo e. Tawa Esitu saꞌawyꞌi yt naku pe i kahato tukupteꞌen uimohey haria. Miꞌi hap ewy kahato yt naku i kahato tukupteꞌen aru uimohey haria mekewat tawa Ierusarẽi miaria e Tupana. Miꞌi pote wẽtup set atum tawa Ierusarẽi miaria pe -Tawa Sutuma piaria eipe areꞌe e. Mio tã areꞌe katupono uimiwuk tawa Sutuma saꞌawyꞌi e. Yi Esitu piaria uhewanikaptia ewy kahato tawa Ierusarẽi miaria mesup e. Saꞌag kahato taꞌatunug saꞌawyꞌi wuaria uimohey haria ete e. Sutuma miaria iꞌewyte yt naku i yn teꞌeropyhuꞌat uimohey haria ete e. Ierusarẽi miaria poꞌog uimohey haria auka haria wuatꞌi tawa kai e uhepe.
9 -Yt eweisyp teiꞌo miꞌiria ete neꞌi iꞌatuꞌe iraniaꞌin Ierusarẽi miaria uimipoꞌororia typyꞌok takaria piit etiat e. Miꞌi pote iꞌatupiit ikuꞌuro rakaria tukupteꞌen muap tote tawa Ierusarẽi me myẽꞌym eꞌat hawyi wẽtup eꞌat patꞌok. Miꞌi hawyi miitꞌin tõꞌẽ tõꞌẽ kahato teꞌerahaꞌat hamo. Teꞌeruwaꞌatunug wuatꞌi pusu kuap hap kaipyi wuatꞌi ywania kaipyi wuatꞌi tama kaipyi ipe hup takaria ipe hun nakaria ipe kytsig nakaria tõꞌẽ tõꞌẽ hepiok hamo myẽꞌym eꞌat kape e.
10 Miꞌi hawyi õꞌẽ haria iꞌatuwepiit kahato -Waku pe raꞌyn iꞌatuꞌe e. Ikuꞌuro raꞌyn Tupana ehay moherep haria iꞌatuꞌe e. Waku kahato iꞌatuꞌe toꞌoepe e. Ikuꞌuro raꞌyn Tupana ehay moherep haria typy ok takaria iꞌatuꞌe e. Saꞌawyꞌi miꞌiria aimosoꞌopot haria tukupteꞌen mesuwat mytyyp tote iꞌatuꞌe toꞌope. Koitywy waku raꞌyn watunug aimikyꞌesat ewy yt naku i nug hap iꞌatuꞌe. Miꞌi hawyi ienuk hap taꞌatunug hawyi toꞌope taꞌatuium kat koꞌi kat koꞌi toꞌomowepiit hamo -Waku pe mesup topap taꞌyn aimosoꞌopot haria iꞌatuꞌe toꞌope e.
11 Myẽꞌym eꞌat hawyi wẽtup eꞌat patꞌok hawyi iꞌatupiit toineꞌen i wuatꞌi ehamo muap tote hawyi Tupana timoieineꞌen i raꞌyn Topaꞌãu wo toimopyhuꞌi raꞌyn e. Iꞌatuieineꞌen i hap teke iꞌatupiit pe hawyi iꞌatupoĩꞌam naꞌyn wuatꞌi miitꞌin wekyryꞌi haria ehamo e. Miꞌi hawyi itotiaria sehaꞌat haria teꞌerokenꞌẽ kahato raꞌyn iꞌatupupi e.
12 Miꞌi hawyi ti typy ok takaria tikuap sehay pirik atipy kaipyi -Eweiꞌõꞌẽ ro meikowo e. Mio tã e hawyi taꞌatuewanikaptia ehamo teꞌeraꞌam naꞌyn ywyhig muo wuatꞌi ehamo e Iesui uhepe.
13 Iꞌatuꞌam turan hurukꞌe iwato kahato topyhuꞌat tawa Ierusarẽi ete e. Miꞌi hawyi yat koꞌi nu kawiat koꞌi hewo hewo kahato e. Ikaipyi iꞌatu 10 hap taꞌat wẽtup tuereto hap ewy yi hurukꞌe kahato pote miitꞌin hoꞌopot kahato hawyi 7 miu miit ikuꞌuro itote. Miꞌi pote iraniaꞌin yt map haria i teꞌerokenꞌẽ kahato hawyi -Tupana atipy piat poꞌog torannia kai En iꞌatuꞌe aru tawa Ierusarẽi miaria e Aipotypot Iesui uhepe.
14 Pyno typy hoꞌopot hap miitꞌin piat hap tokosap taꞌyn maꞌato wẽtup te yt tokosap i te hoꞌopot hap sese miitꞌin miat hap katupono yt torannia i te hu huꞌe.
Hu Hu E Hap 7 Rakat
15 Miꞌi hawyi atipy piat wẽtup te myhuꞌat hat akuara wato hu huꞌe raꞌyn mekewat 7 ok takat hawyi uito Iuwãu araꞌakasa miꞌi hap kape uimuꞌetu. Miꞌi hawyi atikuap miitꞌin sem ihay pirik kahato atipy pe -Tupana Mipoꞌoro topyhuꞌat raꞌyn Wuatꞌi Porekuat nuat iꞌatuꞌe haty wo. Wuatꞌi Ywania Potypot no Aiporekuat topyhuꞌat mesuwepyi wuatꞌi eꞌat pe iꞌatuꞌe. Miꞌi Miit yn toineꞌen Aiꞌakag koro iꞌatuꞌe. Aikaꞌiwat mesup topyhuꞌat poꞌog wuatꞌi kai iꞌatuꞌe teꞌeruwẽpowat atipy piaria hap atikuap.
16 Miꞌi hawyi mekewat 24 ok takaria morekuat eꞌamyap totiaria teꞌeruwepỹꞌãtutuk Tupana kape iꞌatueowa yi kape Tupana motypot hamo.
17 -Urutuwehum ewowi Tupana iꞌatuꞌe. Urukaꞌiwat sese En iꞌatuꞌe. Wuatꞌi Eꞌat piat En iꞌatuꞌe. Yne eminug koꞌi eꞌyian mete ereineꞌen ni iꞌatuꞌe. Mesup te ereineꞌen iꞌewyte wuatꞌi eminug hap sakpo ereineꞌen ne iꞌatuꞌe. Iꞌewyte wuatꞌi eꞌat tokosap pykai ereineꞌen ne iꞌatuꞌe. Yt uwe i putꞌok e esaika hap ete iꞌatuꞌe. Miꞌi esaika hap iwato rakat wywo ereineꞌen no atipy piat iꞌatuꞌe. Yi totiat Potypot no ereineꞌen iꞌatuꞌe.
18 -Uruꞌakag wo saꞌawyꞌi te pyi wuatꞌi ywania. Yt emohey i haria haiwot kahato eete iꞌatuꞌe. Koitywy maꞌato waku ereineꞌen Surara Akag ewy iꞌatuꞌapiheg hamo iꞌatuꞌe. Etiꞌatupoepyk taꞌyn ewanikaptia iꞌatuꞌe. Waku etiꞌairo uwe waku uwe yt hap iꞌatuꞌe. Waku mesup etum no eropat sese haria pe iꞌatusaꞌup wakuat iꞌatuꞌe. Waku iꞌewyte ehay moherep saꞌawyꞌi wuat rakaria pe emiehakyeraꞌat koꞌi pe iꞌatusaꞌup wakuat waku etum iꞌatuepe iꞌatuꞌe. Waku iꞌewyte emotypot haria pe iwatoꞌin nakaria koꞌi pe iꞌewyte yt uwe i mikuap koꞌi pe iꞌatusaꞌup wakuat etum iꞌatuepe iꞌatuꞌe. Waku iꞌewyte etiꞌatuꞌapiheg eꞌyi kahu hap moma haria iꞌatuꞌe 24 ok takaria poꞌog imohey haria Tupana pe.
19 Miꞌi hawyi uito Iuwãu arahaꞌat i hawyi araꞌakasa atipy pe Tupana motypot yat tuweꞌokenhypꞌok taꞌyn hawyi arahaꞌat Tupana yat kape. Miꞌi tote araꞌakasa raꞌyn mekewat saꞌawyꞌi wuat Tupana Paꞌãu apyk hap aikope saꞌawyꞌi Tupana ihay raꞌyn -Atunug aru uiꞌe hap ewy e hap totepyi ihay i raꞌyn. Miꞌi hawyi tuwẽtem kahato itote pyi merep merepꞌe hap koꞌi hap ewy araꞌakasa. Miꞌi hawyi hurukꞌe kahato hap atikuap. Miꞌi hawyi yi tyryꞌe kahato hawyi miitꞌin teꞌeruwẽpowat kahato itote pyi. Miꞌi hawyi nukara iwatoꞌin nakat hewo yi kape.
