Iesui Aru E Hap 15:1-8
15 Miꞌi hawyi uito Iuwãu arahaꞌat i raꞌyn atipy kape. Miꞌi hawyi uimowanetup kahato uimiaꞌakasa hap koꞌi. Uimogyt hap ewy katupono araꞌakasa 7 ok atipy piaria kape. Miꞌiria 7 ok takaria Tupana tiꞌatupoꞌoro yi kape tosaiwot miitꞌin minug saꞌag etiat hap apiheg hamuat. Toiꞌatupoꞌoro miꞌiria 7 ok takaria wuatꞌi miitꞌin apiheg 7 wuat hamo -Miꞌi taꞌatunug hawyi yt kat i raꞌyn uipyꞌahak iꞌatuetiat hap e. Kat pote uimipoꞌororia atiꞌatumohakyꞌeꞌi kahato hamuat e. Miꞌi atunug hawyi toran naꞌyn uipyꞌahak hap e.
Tupana Tum Naꞌyn Yꞌy Piaria Pe Wepy Hap Haity Rakat
2 Miꞌi hawyi araꞌakasa ihyemyiꞌa iwato rakat maꞌato iheg kahato rakat imehit kahato rakat. Aikotã aria ewy hẽtyhot itote ihup hap. Miꞌi hawyi Tupana tum iꞌatuepe wepy nug hamuat moryꞌawat ewywuat maꞌato haity iꞌatu kahato rakat. Miꞌiria saꞌawyꞌi wuat ahiag akit haria raꞌyn. Iꞌewyte yt karãpe i mekewat het 666 mimoherep ahiag wat taꞌatunug taꞌatuewatuꞌa ete haria miꞌiria. Yt karãpe i taꞌatumotypot Tupana wo mekewat yt naku i nug hat -Uito Tupana e hat neꞌi. Iꞌewyte toiãꞌãkap iminug yt taꞌatumotypot i Tupana wo.
3 Are paĩ teꞌeruwepy kahato saꞌawyꞌi wuat Tupana eropat sese hat aseꞌi Muisei minug wepy hap kaipyi iꞌewyte mekewat Tupana Hũ hit Kuteiru minug wepy hap kaipyi teꞌeruwepy. -Tupana En ni urupotypot koro iꞌatuꞌe En ni poꞌog hesaika torannia kai iꞌatuꞌe. Eminug koꞌi urumowanetup kahato katupono iwato kahato etunug kuap yt uwe minug ewy i. Wuatꞌi ywania akag ereineꞌen iꞌatuꞌe. Yne eminug koꞌi pywo rakat yn iꞌewyte yne hãpyk kahato rakat eminug koꞌi iꞌatuꞌe. Yt uwe maꞌat hat i En iꞌatuꞌe. Wuatꞌi mimotypot En iꞌatuꞌe. Eset ri Tupana ikahu kahato eset iꞌatuꞌe. Urukaꞌiwat ti eset iꞌatuꞌe.
4 Urutokenꞌẽ popuo katupono uruewaku hap yt putꞌok e i uruehay ewywuat hamo iꞌatuꞌe. En yn ni wakuat sese iꞌatuꞌe. Tupana urumimotypot En urutoꞌe wuatꞌi eꞌat pe iꞌatuꞌe. Meiũran aru wuatꞌi ywania kaipyi wuatꞌi tama kaipyi teꞌeruwepỹꞌãtutuk ewowi En ni Tupana taꞌatuꞌe hamo iꞌatuꞌe. Eminug wakuat heremo wuatꞌi miitꞌin ehamo. Wakuat iꞌatuꞌe Tupana pe teꞌeruwepy puo ihyemyiꞌa wato upiaria.
7 Ok Takaria Haiwot Rakaria Ipainug Hap Toineꞌen
5 Miꞌi hawyi uito Iuwãu arahaꞌat Tupana motypot yat atipy piat kape. Miꞌi hawyi tuweꞌokenhyp arahaꞌat turan hawyi ipuo heremo kahato. Itote Araꞌakasa saꞌawyꞌi wuat sokpe kawiat Tupana motypot yat aikope topyhuꞌat Tupana Paꞌãu saꞌawyꞌi te teiam sokpe kawiat pe hap.
6 Miꞌi hawyi mekewat Tupana motypot yat pyi tuwenoꞌẽ mekewat 7 ok takaria atipy piaria uimiaꞌakasa saꞌawyꞌi te wuat hap koꞌi Tupana mipoꞌoro miitꞌin apiheg hamuat tosaiwot hap wywuat hanuaria. Iꞌatupainug hap sokpe ikytsig kahato rakat. Ikahu kahato rakat. Ipotiꞌa tote toineꞌen morekuat esokpe ewywuat nu uru kawiat imehit kahato rakat moryꞌa sopo hamuat.
7 Miꞌi hawyi mekewat 4 ok takaria wuatꞌi eꞌat piat ieineꞌen haria tum 7 ok takaria atipy piaria pe 7 kamuti imehit rakat kawiat. Miꞌi 7 eiam me howapy kahato Tupana saiwot hap wywo miitꞌin yi totiaria apiheg hamuat.
8 Miꞌi tutum iꞌatuepe hawyi Tupana motypot yat topyhuꞌat howapy kahato raꞌyn imotypot hap ywyhig imehit rakat ewy. Miꞌi hawyi yt uwe i teke kuap itote. Uipotpoꞌororia tiꞌatuꞌapiheg yne hawyi waku eiwehytꞌok i raꞌyn uimotypot hap yat pe e. Iꞌatumoehakyꞌeꞌi hap tokosap hawyi waku eiwehytꞌok i raꞌyn e. Uito Iuwãu miꞌi hap kape araꞌakasa kahato.
