Iesui Aru E Hap 16:1-21
16 Miꞌi hawyi uito Iuwãu atikuap ihay wato kahato Tupana motypot atipy piat kaipyi -Uheropat haria atipy piaria eweiwat ro meiũpepyi yi kape uiꞌe hap ewy e. Ewetioto ro kamuti iraniaꞌin meimuẽwat howapy uhaiwot hap wywuat rakat e. Putꞌok eweiꞌe uhepiat eipoꞌoro hap tote hawyi ewehytpok kamuti pytꞌat aiũpe worohoꞌopoꞌoro hap tote e 4 ok atipy piaria pe.
2 Miꞌi hawyi toto saꞌawyꞌi wuat atipy pyi taꞌatuꞌãtiꞌypykiat wywo. Putꞌok e mytyyp tote hawyi tohytpok mekewat -Uito Tupana e hat heso rakat mohey haria ete. Meimuẽwat hãꞌãkap mohey haria ete. Mekewat -Uito Tupana e hap set howatuꞌa etiat rakaria ete. Miꞌi hawyi miꞌiria ete hepihi pihi saꞌag satꞌe kahato iꞌatupiit ete yt tokãꞌã rakat nuat i hap kape araꞌakasa.
Typy Ok Takat Tekamuti Toipun Naꞌyn Yꞌy Wato Tote
3 Miꞌi hawyi typy ok toto atipy kaipyi yꞌy wato kape. Toipugha yꞌy wato pe hawyi iꞌok puk hap ewy huu nem nakat ewy yꞌy wato pe. Miꞌi hawyi yne yne yꞌy piaria topap.
Myẽꞌym Ok Takat Tekamuti Toipun Yne Yꞌy Hitꞌi Ete
4 Miꞌi hawyi wẽtup ok i raꞌyn toipoꞌoro atipy kaipyi torannia ihy koro kape iꞌewyte wuatꞌi yꞌy hitꞌi koꞌi kape.
5 Miꞌi hawyi myẽꞌym nakat raꞌyn toipoꞌoro hawyi miꞌi tiꞌokpun itote Tupana saiwot hap. Teke yꞌy pe hawyi suu wo yꞌy topyhuꞌat. Miꞌi hawyi atikuap sehay -Yꞌy topyhuꞌat suu ewy e. Miꞌi hawyi mekewat kamuti erut hat tuwẽpowat -Waku raꞌyn e emikyꞌesat ewy Tupana e katupono saꞌawyꞌi mesuwat yi totiaria taꞌatuꞌuka emipoꞌororia ehay moherep hanuaria. Taꞌatupugha emiit suu mesuwat yi tote e. Miꞌi pote koran etum naꞌyn iꞌatumiꞌu wo suu katupono yne yꞌy topyhuꞌat suu wo raꞌyn e. Waku etipoepyk miꞌiria katupono yt naku i kahato emipoꞌororia suu ok pun haria e.
6 Iꞌatuꞌapiheg hap iꞌatuminug saꞌag oktan etum e. Miꞌi pote hãpyk kahato etunug no e. Wakuat yn nug hat en Tupana e. Nimo pyi mesup te iꞌewyte wuatꞌi eꞌat pe waku kahato En e. Koitywy iꞌatuweꞌyꞌutui turan suu yn topyhuꞌat taꞌatumiꞌu wo e atipy kaipywiat yꞌy nug suu wuat erut hat.
7 Miꞌi hawyi atikuap sehay aikope taꞌatuium Tupana kape hap kaipyi yparakai kaipyi -Pywo ti rat eꞌe hap ewy etunug no Tupana e etiꞌatupoepyk emipoꞌoro auka haria Tupana e. Waku etiꞌatuꞌapiheg miꞌiria e.
4 Rakat Tekamuti Toipun Aat Ete
8 Miꞌi hawyi araꞌakasa 4 ok takat kamuti wywo hewyry rakat kape. Miꞌi hawyi toiꞌokpun kamuti pytꞌat aat ete hawyi aat yt saꞌawyꞌi wuat ewy hin i. Poꞌog hakup saꞌawyꞌi wuat kai hawyi miitꞌin ete hakup kahato raꞌyn.
9 Miꞌi hawyi -Yt naku i kahato En Tupana iꞌatuꞌe yi totiaria. Urumosoꞌopot kahato aat wo iꞌatuꞌe. Etunug yt naku i kahato aat wo uruete iꞌatuꞌe. Yt kan hamo i En uruipuẽti. Waĩꞌiꞌatuꞌe. Etunug hãpyk i ro aat iꞌatuꞌe. Maꞌato yt teꞌeraꞌaipok hin i Tupana kape taꞌatuminug saꞌag kaipyi pykai mio tã iꞌatuꞌe. Yt teꞌeruwepỹꞌãtutuk teran hin i Tupana kape -Waku kahato En Tupana taꞌatuꞌe hamuat. Yt karãpe i teꞌeruwehum Tupana Kape.
5 Rakat Tekamuti Toipun Yt Nakuaria I Morekuaria Wo Gupteꞌen Haria
10 Miꞌi hawyi uito Iuwãu arahaꞌat wẽtup ok atipy piat toto tekamuti wywo hap kape. Toto aikope yt naku i rakat taꞌapyk morekuat no hap kape Tupana saiwot hap kamuti howapy rakat wywo toto. Miꞌi ti putꞌok toꞌe hawyi toiꞌokpun morekuat saꞌag ete hawyi yne hetama iꞌypyryp sese topyhuꞌat. Yt karãpiat ewy i iꞌatumosoꞌopot kahato miꞌi hap oktan. Miꞌi hap upi kak iꞌatuꞌe kak iꞌatuꞌe -Iꞌypyryp sese iꞌypyryp sese urumosoꞌopot sese iꞌatuꞌe kak taꞌatuꞌe popuo.
11 -Haty ti rat iꞌatuꞌe haty ti rat ahepihi iꞌatuꞌe teꞌeruwak popuo -Yt naku i kahato En atipy piat Tupana iꞌatuꞌe. Yt karãpe i urutaꞌaipok uruminug saꞌag myi iꞌatuꞌe iꞌatuehay popuo.
6 Rakat YꞌY Waku Euwarate E Hap Ete Toiꞌokpun
12 Miꞌi hawyi araꞌakasa 6 ok hap taꞌyn atipy piat kamuti wywuat hat hawyi toto yꞌy wato Euwarate hy kape. Miꞌi iꞌokpun tekamuti piat Tupana saiwot hap yꞌy wato pe hawyi yꞌy wato Euwarate hy ihysik raꞌyn hawyi -Pyno waku watuwat raꞌyn mesup Iuteu ywania moma hamo katupono koitywy watipoꞌoro kuap ahesuraraꞌin yꞌy wato sakpo iꞌatuꞌe morekuaria toꞌope aat minꞌe hap totiaria. Koitywy toĩ naꞌyn yꞌy wato sakpo muap ihy sik hawyi iꞌatuꞌe.
13 Miꞌi hawyi uito Iuwãu arahaꞌat moiꞌok kape mekewat yt naku i nug hat -Uito Tupana heso hat kape. Iꞌewyte mekewat yt naku i nug hat iãꞌãkap kape araꞌakasa. Arahaꞌat turan araꞌakasa ahiag paꞌãu myẽꞌym ok tuwenoꞌẽ iwẽ pyi. Yt ikahu hin i rakat aikotã waꞌasa saꞌag ewy.
14 Miꞌi hawyi miꞌiria maꞌãu saꞌag myẽꞌym ok takaria inug kuap kahato yt miitꞌin minug kuap ewy i taꞌatunug wuatꞌi miitꞌin mowanetup hamo. Miꞌi hawyi myẽꞌym ok takaria ahiag paꞌãu saꞌag koꞌi kawiat tuwat aikope morekuaria tukupteꞌen hap kape. Miꞌi hawyi teꞌeruwaꞌatunug yne morekuaria Tupana etiat wuꞌuka nug hamo teꞌeruwaꞌatunug taꞌatuesuraraꞌin wywo. Miꞌi hawyi teꞌeruwaꞌatunug yne torannia hawyi Tupana toꞌe -Koitywy yt pya hin i hamuat uheꞌat -Uito poꞌog hap atimoherep wuatꞌi miitꞌin me hap eꞌat e Tupana. Wuatꞌi suraraꞌin teꞌeruwaꞌatunug mekewat yꞌy wato ihypap takat sakpo.
15 Miꞌi hawyi Arahaꞌat turan wẽtup ok toꞌe -Eiweꞌeg wo o miitꞌin yne yi totiaria e. Eiwatetup o katupono seroꞌok e hat ewy ariot e. Yt uwe i ti ikuap karamuo uhuut hap e. Miꞌi pote eweikupteꞌen sokpe piaria ewy waku uipuẽti hamo e. Yt pote aru eiwemoti kahato yt ehesokpe rakaria ewywuaria eweipyhuꞌat uhuut turan ariot pote e.
16 Miꞌi hawyi ahiag paꞌãu waꞌasa ewywuaria teꞌeruwaꞌatunug yne mesuwat yi totiaria taꞌatuesuraraꞌin wywo. Morekuaria iꞌewyte taꞌatuesuraraꞌin wywo yi Iuteuria etama kape teꞌeruwaꞌatunug tuꞌuka hamo. Iuteuria pusu puo yi wato Amaketũ tote teꞌeruwaꞌatunug.
7 Ok Takat Tekamuti Toiꞌokpun Ywytu Ete Ywyhig Ete
17 Miꞌi hawyi uito Iuwãu arahaꞌat atipy kape turan araꞌakasa wẽtup ok 7 ok hap toto kamuti wywo. Miꞌi hawyi 7 ok hap toran hap taꞌyn toto. Miꞌi hawyi toto yi kape maꞌato putꞌok toꞌe hap eꞌyian mete toiꞌokpun kamuti pytꞌat Tupana saiwot hap ywytu ete ywyhig ete. Miꞌi tutunug hawyi atikuap ihay pirik Tupana motypot yat atipy piat kaipyi aikope Tupana taꞌapyk Morekuat no hap kaipyi. -Torannia raꞌyn uhaiwot hap atunug e. Yne raꞌyn yt kat i raꞌyn poꞌog e.
18 Miꞌi hawyi ywytu uato kahato pigꞌe pigꞌe kahato. Miꞌi hawyi atikuap iꞌatu kahato miitꞌin kak iꞌatuꞌe kak iꞌatuꞌe. Miꞌi hawyi iꞌatu kahato moryꞌa ewy hewo yi kape. Miꞌi hawyi huru huruꞌe kahato yt ipoꞌinik takat i. Miꞌi hawyi tyryꞌe haty wo kahato yi. Yt karãpiat ewy i hurukꞌe hap. Nimuat miitꞌin nug hap turan yt uwe i taꞌakasa miꞌi ewywuat yi hurukꞌe hap. Yt kat i hurukꞌe hap poꞌog mote.
19 Miꞌi hawyi mekewat tawa iwatoꞌin nakat Papironia mekewat tawa poꞌog iwato rakat pok pokꞌe yi tyryꞌe kahato itote pote. Iꞌewyte yne tawa koꞌi taꞌat yne yi totiat koꞌi yi tyryꞌe poityꞌi pote hewo yne. -Yt naku i kahato tawa Papironia piaria e Tupana. -Atiꞌatupoepyk iꞌatuminug koꞌi uhaiwot iꞌatuminug saꞌag hap kaipyi e. Yt karãpe i atiꞌatuwaure kuap iꞌatuminug saꞌag koꞌi. Pyno eiꞌapiheg uhepiat hap topyhuꞌat mekewat kuiꞌa pytꞌat howapy aikotã mani hypyre wywo hap ewy. Ewetuꞌu ro miꞌi areꞌe ehepe. Uhaiwot hap wywo ewetuꞌu ro e iraniaꞌin me yi Papironia pe Tupana.
20 Hewo yne yityꞌok koꞌi hawyi taꞌatukat turan yt uwe i ipuẽti aiũpe aiũpe yityꞌok koꞌi hap yt uwe i ikuap. Tuweityk taꞌyn yi tyryꞌe hawyi yꞌy wato pyꞌasetpiat koꞌi iꞌaporokꞌe yne raꞌyn.
21 Miꞌi hawyi hewo nukara koꞌi iwatoꞌin nakat iꞌaman wato ewy. Aikotã ipotyi sese hap porap yt uwe i hupit hap ewy. Miꞌi hawyi hewo hewo miitꞌin ete. Miꞌi hawyi yi totiaria -Yt naku i kahato En Tupana iꞌatuꞌe. Kat pote yt naku i etunug uruete iꞌatuꞌe. Yt naku i kahato nukara koꞌi iꞌatuꞌe. Waĩ iꞌatuꞌe. Yt naku i kahato Tupana iꞌatuꞌe taꞌatupyꞌahak hap wywo.
