Iesui Aru E Hap 17:1-18
17 Miꞌi hawyi wẽtup atipy piat toꞌe uhepe -Toꞌiro uhupi Iuwãu e. Atimoherep teran epe aikotã aru Tupana tiꞌatuꞌapiheg tawa wato Papironia piaria hamuat hap kape e uhepe mekewat wẽtup kamuti pytꞌat okpun hat. Toꞌiro uhupi e. Atimoherep epe yt iꞌatuweꞌeg i hap e. Aikotã wẽtup ok haryporia wuatꞌi ihainia wywo hat ewy tukupteꞌen miꞌiria e. Miꞌi pote Tupana tiꞌatuꞌapiheg miꞌiria tawa Papironia piaria e. Toꞌiro pyno mekewat tawa wato kape. Wanikap koꞌi yt tuwehytꞌok kuap i tawa Papironia pe katupono mekewat tawa topyhyp hawe toineꞌen ihy esaika kahato howawi pote suraraꞌin yt tuwehytꞌok kuap i e.
2 Yt naku i kahato miꞌiria e uhepe. Tupanaria weneru haria miꞌiria e. Aikotã yt iweꞌeg i sese rakaria ewy tukupteꞌen e uhepe. Taꞌatukay kay tuwewawi topiit kyiꞌat haria e. Miꞌi ewywuat tawa Papironia piaria tukupteꞌen e. -Toꞌiro ahewaire waire iꞌatuꞌe wuatꞌi ywania pe. Aikotã mahy weneru haria tikay kay mahy kyiꞌat haria hap ewy tawa wato Papironia piaria tukupteꞌen e uhepe. Miꞌi hap ewy tawa Papironia tiꞌatukay kay morekuaria taꞌatuemiitꞌin wywo wuatꞌi tupanaria motypot hap etiat iꞌatumuꞌe hamo e uhepe mekewat kamuti pytꞌat okpun hat atipy kaipywiat.
3 Miꞌi hawyi uhereto mekewat atipy piat hap araꞌakasa uimuꞌetu Tupana timoherep yne. Miꞌi hawyi putꞌok are yahig wato tote. Itote araꞌakasa haryporia waire waire nug hat yt naku i sese rakat apyk pe tohũ awyato tig koro saꞌag note. Ihũ awyato ihup kahato aikotã weweneru haria esokpe hup hap ewy. Ihũ awyato saꞌag nakat toineꞌen 7 iꞌakag nakat ipiit ete. 10 iꞌaut rakat 7 akag totiat koꞌi. Ipiit etiat miwan saꞌag kahato Tupana sese mohit kahato hap toineꞌen -En ni yt naku i kahato Tupana e tope ete miwan saꞌag hap koꞌi hap kape araꞌakasa.
4 Itote mekewat ipiit weneru hat esokpe ihup kyre hap ewy. Tuwepainug kahato wahi hekat rakat koꞌi wo. Nu ikahu kahato rakatno tuwepainug hap ihup ikaꞌay ikytsig ihyrypꞌi. Ipo pe hekuiꞌa mahy eiam imehit kahato rakat hekat rakat. Hekuiꞌa topyhuꞌat Iesui mohey haria suu. Miitꞌin toimoesaika yt naku i nug iwywuat hamuat hap.
5 Mekewat haryporia yt naku i nug hat akag ete toineꞌen mekewat haryporia set itote miwan me -Uito ti wuatꞌi weweneru haria ty e. Uito tawa Papironia piaria morekuat haryporia kawiat e. Yt naku i nug hap etiat miitꞌin muꞌe hat uito e. Yt uwe i te mikuap yt naku i nug hap moherep hat uito e miwan howatuꞌa ete.
6 Arahaꞌat hawyi mekewat yt iweꞌeg i rakaria akag haryporia kawiat temahy u aat kaꞌap takat ewy topyhuꞌat hemahy Iesui mohey haria suu. Yt taꞌatuꞌatoiat hin i Iesui mohey haria suu u hap. Tupana eropat haria sese suu hemahy wo. Iꞌok sese miꞌi mahy wo. Miꞌi hawyi arewanetup hawyi yt naku i sese saꞌag kahato hap ewy areꞌe uiwanetup hawe. Miꞌi rakirẽ yt heremo hin i uimuꞌetu.
7 Miꞌi hawyi mekewat atipy piat toꞌe uhepe -Yt heremo hin i emuꞌetu ewaꞌakasa hap e. Pyno atimoherep epe mekewat haryporia yt iweꞌeg i rakat koro hap ete uwe uwe mekewat awyato tig koro ihũ saꞌag topyhuꞌat mekewat 7 iꞌakag nakat 10 iꞌaut rakat mekewat haryporia ereto hat ete hap ahenoi epe e.
8 Mekewat awyato tig saꞌag saꞌawyꞌi toineꞌen yi tote maꞌato miꞌi hawyi ikuꞌuro hawyi meiũran tuwẽtem guꞌuro pyi mekewat yi kaꞌa saꞌag iwato rakat kaipyi yt ikaꞌa sasat rakat i kaipyi e. Miꞌi hawyi yi totiaria yt Iesui mohey i haria teꞌeruwanetup kahato toineꞌen i hawyi e. Mekewat eꞌat pe -Are paĩ are an ikuꞌuro saꞌawyꞌi mesuwat awyato wato tig ewywuat maꞌato mesup tuwemoherep i raꞌyn iꞌatuꞌe aru mekewat meimuẽwaria yt Tupana miwan miaria iꞌatuset pehik i haria -Miꞌiria ti waku tukupteꞌen wuatꞌi eꞌat pe uiwywo atipy pe yt toꞌe i Tupana miwan me haria. Saꞌawyꞌi Tupana tiwan naꞌyn tomohey haria saꞌawyꞌi sese aat yi waikiru yt kat i te turan toiwan tomimoieineꞌen wuaria set koꞌi maꞌato mekewat awyato ahiag mohey haria set koꞌi yt wẽtup i Tupana miwan ete e uhepe mekewat atipy kaipywiat Tupana ehay moherep hat uhepe uito Iuwãu me.
9 Eiweꞌeg wo o eweikuap kat som Tupana toꞌe ahepe mesuwe katupono iweꞌeg kahato rakaria yn tikuap uiꞌe hap mesuwe uito Iuwãu. Pyno mekewat haryporia hũ awyato saꞌag 7 iꞌakag koꞌi 7 morekuaria ewy tukupteꞌen. Miꞌiria ti haryporia yt iweꞌeg i rakat eꞌaito koꞌi miꞌiria. Mekewaria 7 ok takaria teꞌeraꞌapyk miitꞌin akag koꞌi wo tawa wato yt naku i rakat eꞌyityꞌok koꞌi tote 7 yityꞌok koꞌi tote teꞌeraꞌapyk.
10 Miꞌi hawyi morekuat koꞌi hoꞌopap kahato raꞌyn 5 ikuꞌuro raꞌyn mekewat 7 yityꞌok totiat etawa pe. Miꞌi hawyi typy morekuaria yn naꞌyn toineꞌen. Wẽtup toineꞌen mesup te morekuat no maꞌato miꞌi ti ikuꞌuro irane hawyi mekewat wẽtup ok tuwemoherep morekuat no. Maꞌato miꞌi ti yt toineꞌen motꞌi morekuat no.
11 Miꞌi hawyi mekewat haryporia saꞌag hũ awyato saꞌag 7 ok takaria morekuaria saipepiat tuwenug naꞌyn morekuat no. Miꞌi ti morekuat koro wo topyhuꞌat raꞌyn 8 rakat. Miꞌi ti ipotpap kahato morekuat no maꞌato taꞌat aria wato pe wuatꞌi eꞌat piat hoꞌopot piat pe.
12 Miꞌi hawyi atipy piat toꞌe i uhepe -Iuwãu e mekewat ihũ 10 iꞌaut rakat mekewat haryporia hũ awyato tig ewywuat ipiit etiat tukupteꞌen aikotã 10 morekuaria hap ewy. Mesup yt morekuat no i maꞌato meiũran aru topyhuꞌat morekuaria wo e. Meiũran aru mekewat haryporia hũ yt naku i rakat tiꞌatunug morekuaria wo toꞌewywuat no maꞌato aru yt tukupteꞌen motꞌi i iwywo morekuaria wo e.
13 Miꞌiria wẽtup wanetup hap ewy tukupteꞌen mekewat haryporia hũ wywo. Mekewaria 10 iꞌaut ewywuaria hesaika kahato rakaria tukupteꞌen e. Miꞌi hawyi iꞌatuesaika hap wo taꞌatumotypot mekewat awyato saꞌag me. Miꞌi ti topyhuꞌat morekuaria 10 ok takaria mipoꞌoro hanuat iꞌatumikyꞌesat nug hamuat topyhuꞌat mekewat haryporia hũ awyato saꞌag nakat.
14 Miꞌi hawyi 10 iꞌaut rakaria tuꞌuka Tupana hũ hit Kuteiru wywo maꞌato poꞌog Tupana hũ hit Kuteiru iꞌatuꞌakit hatno topyhuꞌat. Katupono poꞌog poꞌog Morekuat no Iesui toineꞌen. Iꞌewyte hemiit poꞌog tuwat Taꞌatukaꞌiwat upi. Yt waureꞌiꞌatuꞌe hin i taꞌatukaꞌiwat ete pyi. Taꞌatuꞌauka hap kape yt taꞌatuꞌatoiat hin i. Miꞌi pote tukupteꞌen Taꞌatukaꞌiwat wywo mekewat haryporia hũ 10 iꞌaut rakat okpe tote. Miꞌi hawyi Tupana hũ topyhuꞌat wuatꞌi Kaꞌiwat no Wuatꞌi Morekuat Porekuat no topyhuꞌat.
15 Miꞌi hawyi mekewat atipy piat toꞌe i uhepe -Mekewat yt iweꞌeg i rakat taꞌapyk itote yne yꞌy ete katupono yꞌy wato topyhuꞌat wuatꞌi miitꞌin ewywuat. Yꞌy wato topyhuꞌat wuatꞌi pusu kuap haria aikope aikope tukupteꞌen wuatꞌi yꞌy ete hap ewy e. Miꞌi tote toineꞌen mekewat haryporia iꞌatumuꞌe hamo tupanaria motypot hap ete waku ahewaire waire e hap ete e uhepe.
16 Iꞌewyte toꞌe uhepe -Mekewat yt iweꞌeg i rakat hũ ete eraꞌakasa 10 iꞌaut koꞌi iꞌatupyꞌahak kahato irane mekewat haryporia ete e. Tuꞌuka kahato iwywo. Meiũran ihũ aut koꞌi tihiot yne hesokpe haryporia wat e. Miꞌi hawyi yt hesokpe i rakatno topyhuꞌat e. Miꞌi hawyi topyhuꞌat hiwu e. Miꞌi hawyi taꞌatusuk suk taꞌatuꞌaut no e. Miꞌi haryporia taꞌatuwuk yt iweꞌeg i rakat aria wo e. Mio tã hap ewy irane topyhuꞌat e atipy piat uhepe.
17 Miꞌi hawyi Tupana tiꞌatumowanetup 10 iꞌaut rakat morekuaria ewywuat haryporia hũ waku topyhuꞌat eiporekuat no e hap ete. Miꞌi hawyi taꞌatunug Tupana mikyꞌesat ewy yt taꞌatukuap pykai i e. Miꞌi pote teꞌeroꞌe -Waku ereineꞌen uruporekuat no iꞌatuꞌe haryporia hũ me neꞌi. Miꞌi hawyi -Waku e katupono Tupana timoma teran. Miꞌi e hap ewy e atipy piat uhepe.
18 Etikuap mekewat ewaꞌakasa hap haryporia e. Miꞌi ti mekewat tawa wato yt naku i nug hat aikope wuatꞌi mesuwarotiat morekuaria saꞌag nug haria akag wo taꞌapyk morekuat no e uhepe mekewat atipy piat.
