Iesui Aru E Hap 18:1-24
18 Miꞌi hawyi uito Iuwãu arahaꞌat hawyi araꞌakasa wẽtup ok tuut atipy kaipyi yi kape. Tupana emiit Morekuat ewy. Miꞌi ti suut hat ipoꞌoro kuap kahato Morekuat ewy. Imehit kahato rakat. Imehit hap kaipyi yi mesuwarotiat poꞌog hẽtyhot saꞌawyꞌi wuat kai.
2 Miꞌi hawyi atipy kaipywiat toꞌe tehay pirik wo -Hewo hewo irane tawa wato Papironia e. Tuweityk taꞌyn wuatꞌi miꞌatoiat no raꞌyn topyhuꞌat tawa saꞌag Papironia e. Koitywy yt uwe i toineꞌen itote e. Ahiagnia tukupteꞌen itote iehog koꞌi yn naꞌyn e. Tawa Papironia pe topyhuꞌat uruwu eiam mo hywi eiam wo e. Yne kat kat saꞌag eiam mo topyhuꞌat itote e.
3 Nimo te pyi tawa Papironia piaria tiꞌatumuꞌe kahato wuatꞌi ywania waku ahewaire hewaire e hap ete e. Aikotã mahy weneru haria wo -Etuꞌu ro yt pote uruiꞌahyk en e haria ewy tukupteꞌen wuatꞌi haryporia weweneru hat ete e. Miꞌi nug hap ete yne morekuaria waku iꞌatuꞌe. Yt waĩꞌiꞌatuꞌe hin i katupono iꞌatuekat tuut mekewat kaipyi e. Iꞌewyte karaiwa koꞌi iꞌatupotpap mekewat ete e. Miꞌi kaipyi yn tukupteꞌen hekat rakaria wo e. Taꞌatuweneru kahato tupana iãꞌãkap koꞌi tawa Papironia pyi e. Tawa Papironia ekat kaipyi teꞌeruwemoekat e. Koitywy tawa Papironia iꞌanam irane tehay pirik wo wuatꞌi pe e.
4 Miꞌi hawyi atikuap wẽtup ok tuwẽpowat atipy kaipyi hap -Uhemiitꞌin e eiwenoꞌẽ ro pya kahato miꞌiria kai e. Yt ewetunug neiꞌo miꞌiria tawa Papironia piaria minug ewywuat e. Ewetoiat ro tupanaria e. Iꞌewyte iꞌatuewaire atuewaire hap eweitoiat e. Yt naku i aru eweikupteꞌen iꞌatupyꞌasetpe uhepiat iꞌatuꞌapiheg hap eꞌat pe raꞌyn e. Katupono atiꞌatuꞌuhu iꞌatuꞌahuu hap hamo miꞌiria e. Yt atikyꞌesat i satꞌe ehete e sehay atipy kaipyi.
5 Iꞌatu kahato iꞌatuminug saꞌag iꞌatuwat e. Miꞌi pote koitywy yne tawa Papironia piaria yt naku i nug haria sese teꞌeropyhuꞌat iꞌatuꞌe toꞌope atipy piaria. Miꞌi hap araꞌakasa pyno -Yt eweikuap i uhepiat ehewaĩ hap pote worohoꞌoꞌapiheg eipe wy e. Worohoꞌokuap taꞌyn eipe e. Yt naku i nug hap ete e Tupana tawa Papironia piaria pe.
6 Eweikupteꞌen eipe wepiit weneru hat ewy e. Miꞌi pote eiꞌapiheg uhepiat hawe eweikupteꞌen e Tupana katupono eweiꞌatumosoꞌopot kahato uhemiitꞌin miꞌi tã ewetunug haype hap kaipyi e. Miꞌi pote worohoꞌoꞌapiheg eipe e. Maꞌato ewehoꞌosatyꞌi satyꞌi hap kai aru poꞌog torannia kai e Tupana. Eweiꞌatumosoꞌopot kahato uhemiitꞌin typyꞌi kahato saꞌawyꞌi e. Yt miitꞌin ewy i ewetunug e. Maꞌato koran atunug ehete aikotã ewetunug uhemiitꞌin ete hap kai poꞌog naꞌyn yt naku i atunug ehete e.
7 Aikotã wepiit weneru haria sese ewy eweikupteꞌen tawa Papironia piaria e. -Yt karãpe i ikahuro uheꞌaitoria e haria ewy. Pyno uhekat rakatno motꞌi areineꞌen eweiꞌe. Yt karãpe i uhatek eweiꞌe pote yt iweꞌeg i rakat haryporia ewy eweikupteꞌen e. Aikotã teꞌeroꞌe -Uito areineꞌen morekuat eharyꞌi wo e haria ewy tawa Papironia piaria maꞌato yt miꞌi tã hin i e. Ihakyꞌe i rakaria sese eweikupteꞌen e. Aikotã aikotã ewehoꞌopot kak eweiꞌe kak eweiꞌe e. Eheꞌaito kak potiat ewy e Tupana. Saꞌawyꞌi eweimowato kahato ehekat koꞌi -Uruto poꞌog e hamo maꞌato Uito poꞌog eiꞌe pote Tupana eiwemowato hap kai poꞌog worohoꞌomohit neꞌi e Tupana.
8 Wẽtup eꞌat pe yn atunug eimoma hap eiꞌahuu hap ehesyꞌat hap eimoma hap e. Paa eiꞌe hap eiꞌauka e. Worohoꞌowuk yne eipe aria wo e. Uhesaika kahato ti katupono Uito Tupana Wuatꞌi akag wo areineꞌen mote e. Uito yn atikuap e. Uito Tupana sese pote atikuap kahato tawa Papironia piaria iꞌatuminug saꞌag koꞌi hap e. Miꞌi pote uimiꞌapiheg wuaria wo teꞌeropyhuꞌat Papironia piaria e.
Morekuaria Tuwat Kahato Tawa Papironia Moma Hap Hawyi
9 Worohoꞌowuk turan yhig hun aria saꞌag kawiat taꞌam wuatꞌi mesuwarotiaria ehamo ehetawa pyi e. Miꞌi hawyi morekuaria tuwak tuwak eiwuk hap taꞌakasa hawyi e. -Uheharyꞌi ikahu rakat aimikyiꞌat ikuꞌuro raꞌyn iꞌatuꞌe. Ahetupanaria aria miꞌu wo raꞌyn iꞌatuꞌe. Aikotã aru ahewaire waire hap mesup ahekat sat hamo katupono wukꞌe yne raꞌyn mote iꞌatuꞌe toꞌokakꞌi kahato.
10 Pya pyi neꞌi raꞌyn tuwak popuo teꞌeroꞌe -Yt naku i kahato an paĩ iꞌatuꞌe ahetawa koro Papironia tuwemoma wẽtup eꞌat pe turan yn iꞌatuꞌe. Imiꞌapiheg sese wo tukupteꞌen iꞌatuꞌe toꞌokakꞌi popuo. Pya pyi teꞌerahaꞌat katupono teꞌerokenꞌẽ kahato aria satꞌe taꞌatuetiat hap pupi.
11 Miꞌi hawyi weneru haria teꞌeroꞌe -Saꞌawyꞌi tawa Papironia piaria kape watiweneru aipiit ahetupana koꞌi yi totiaria karaiwa koꞌi kape iꞌatuꞌe. Koitywy hawyi yt aikope kuap i watiweneru kuap iꞌatuꞌe toꞌokakꞌi popuo. Aikaꞌiwaria topap yne raꞌyn iꞌatuꞌe.
12 Yt kat i poꞌog nu imehit rakat ahekat koꞌi aimikyiꞌat wuat aimiweneru wuat iꞌatuꞌe. Yt kat i poꞌog nu ikahu rakat koꞌi hekat rakat koꞌi painug hap iꞌatuꞌe. Yt kat i poꞌog wahi hekat rakat koꞌi painug hap iꞌatuꞌe. Yt kat i sokpe kype ikahu rakat poꞌog iꞌatuꞌe. Yt kat i sokpe ipewiu rakat haꞌup woity rakat iꞌatuꞌe. Hekat rakaria esokpe yt kat i ihyrypꞌi rakat ikaꞌay rakat iꞌatuꞌe. Yt kat i morekuat painug hap yt kat i ariaꞌyp aimikyiꞌat wuat aimiweneru wuat iꞌatuꞌe. Yt kat i poꞌog heiam ikahu rakaria Erewãti nu ikahu rakat kawiat heiam imehit rakat kawiat ariaꞌyp itig nakat kawiat yt kat i raꞌyn iꞌatuꞌe. Ikag ikytsig kahato rakat kawiat aipainug hap yt kat i poꞌog aimiweneru aimikyiꞌat wuat iꞌatuꞌe teꞌeruwak popuo iꞌatuꞌe.
13 Yt kat i aimiꞌu mosẽꞌẽ hap iꞌatuꞌe. Yt kat i aimokamhigse Kanera e hap. Yt kat i aimiwuk wuat aiꞌyat mokamhig se hap iꞌatuꞌe. Mahy yt kat i wy iꞌatuꞌe. Yt kat i aimiꞌu mokap hap iꞌatuꞌe. Yt kat i aheꞌuꞌi iꞌatuꞌe. Yt kat i aheman nug hap iꞌatuꞌe. Yt kat i ipuꞌi aimiꞌu wo iꞌatuꞌe. Yt kat i Wewato ahup aimiweneru wo aimikyiꞌat wo iꞌatuꞌe. Iꞌewyte yt kat i aihũ Kaneiru koꞌi iꞌatuꞌe. Yt kat i aihũ Kawaru ahereto hap iꞌatuꞌe. Aheꞌyara koꞌi yt kat i iꞌatuꞌe. Yt kat i ahemiit wuatꞌi eropat haria yt kat saꞌup i etiaria aimiweneru nuat aimikyiꞌat wuat iꞌatuꞌe miitꞌin mesuwarotiaria teꞌeruwak popuo iꞌatuꞌe. Yt naku i ahetawa Papironia yhig hun aria saꞌag kawiat miꞌu wo mesup ahetawa akag Papironia topyhuꞌat Tupana miwuk iꞌatuꞌe. Miꞌi hawyi aikotã aru iꞌatuꞌe.
14 Miꞌi hawyi teꞌeroꞌe toꞌope -Yt naku i yt naku i iꞌatuꞌe. Ahekareꞌen aipainug kahato hap aimikyꞌesat kahato koꞌi aimikat koꞌi yt kat i mesup raꞌyn ahetawa wato aria hun tuꞌu yne iꞌatuꞌe. Imehit hap aimokahu hap aipainug hap yt kat hamo i rakat Tuwat yne raꞌyn wukꞌe yne raꞌyn iꞌatuꞌe. Watikat pykai yt kat i watipuẽti itote mekewat waku hap koꞌi iꞌatuꞌe toꞌope.
15 Wuatꞌi kyiꞌat haria wuatꞌi weneru haria taꞌatuepiok kahato tawa ikuꞌuro rakat hawyi kak iꞌatuꞌe -Saꞌawyꞌi ekat kahato kaipyi urutopyhuꞌat hekat rakaria wo iꞌatuꞌe. Koitywy yt wateke kuap tawa wato Papironia pe katupono urutokenꞌẽ kahato sio satꞌe mekewat aria aimosoꞌopot hat iꞌatuꞌe toꞌope yt taꞌatuwepiit hin popuo i.
16 Saꞌawyꞌi tawa Papironia teꞌeruwepainug kahato morekuaria ewy iꞌatuꞌe. Iꞌatuesokpe hekat rakaria sese wo ipewiu kahato rakatno ihup hawyi ihyrypꞌi iꞌatuꞌe. Iꞌatupainug hap imehit kahato rakat uru kawiat iꞌatupuiꞌiã piat koꞌi ti ikahu rakaria ihup ikaꞌay rakaria iꞌatuꞌe. Iꞌewyte iꞌatuewahi koꞌi ti ikahu rakaria iꞌatuꞌe. Iꞌatupainug hap ti hekat rakaria sese wo iꞌatupainug hap iꞌatuꞌe toꞌope.
17 Koitywy yt uwe i itote tuweityk yne raꞌyn iꞌatuꞌe. Meremo iꞌatuekareꞌen koꞌi yt kat hamo iꞌatuꞌe. Saꞌawyꞌi iꞌatu kahato tawa wakuat Papironia wã tote tukupteꞌen yara wato piaria iꞌatuꞌe. Saꞌawyꞌi urutioto yne ahekareꞌen koꞌi aikope aikope mesuwat yi tote iꞌatuꞌe. Mesup yt kat i yara tawa Papironia wã tote paĩ an iꞌatuꞌe.
18 Karãpe yara wato piaria teꞌeraꞌakasa iwuk hap kapiat yahig hun saꞌag kapiat hawyi teꞌeroꞌe taꞌatuehay pirik wo -Yt naku i raꞌyn katupono ahetawa Papironia poꞌog ikahu torannia kawiat yt kat i raꞌyn mesup iꞌatuꞌe teꞌeruwak popuo.
19 Ahekat iwato kahato tuwat yne iꞌatuꞌe kak taꞌatuꞌe popuo. Ahetawa wato yahig ewy topyhuꞌat iꞌatuꞌe toꞌokakꞌi haype taꞌatuwywo yi taꞌatuꞌakag note e taꞌatueko ewy paa iꞌatuꞌe hap moherep hamo. Eiwehaꞌat ro iꞌatuꞌe aimoekat hat tuweityk taꞌyn iꞌatuꞌe. Saꞌawyꞌi aheꞌyara taꞌatupuru saꞌup ete aheꞌyara wato iꞌatuekareꞌen ereto hamo aikope aikope haꞌup iwato taꞌatuium iꞌatuꞌe. Maꞌato mesup yt kat kuap i raꞌyn watioto iꞌatuekat wukꞌe yne hawyi iꞌatuꞌe teꞌeruwak popuo.
20 Miꞌi hawyi uito Iuwãu areꞌe atipy piaria pe -Waku kahato eiwemowepiit ro atipy pe katupono Tupana tiwuk taꞌyn tawa saꞌag Papironia areꞌe. Eiwehum no itotiaria katupono Tupana ehay moherep haria Papironia piaria miꞌauka koꞌi yt uwe i aru waku eweiꞌe areꞌe. Iꞌewyte uiwyriaꞌin 12 ok takaria Iesui potpoꞌororia eiwemowepiit ro katupono mesup Tupana eipoepyk taꞌyn eiꞌauka haria tawa Papironia piaria yt uwe i mesup wote areꞌe uimuꞌetu.
Tawa Papironia Topyhuꞌat Tuweityk Hap Ewy
21 Miꞌi hawyi surara akag atipy piat hesaika kahato rakat totat nu myyp wato oktan hawyi toipun haty wo atipy kaipyi hawyi taꞌat yꞌy wato sese pe. Miꞌi hawyi minꞌe hawyi toꞌe haty wo -Meiẽ mekewat nu wato ewy topyhuꞌat aru tawa wato Papironia ewywuat katupono Tupana tipugha tawa Papironia aikotã yt heremo hin i uimipun nu wato hap ewy e. Yt uwe i aru ipuẽti kuap mekewat tawa e haty wo.
22 Yt kat i hairu saꞌag Papironia pe aru e. Yt kat i wepy hap eweipuẽti aru e. Yt eweipuẽti aru wyti akuara pywiat wepy hat. Yt uwe i hu huꞌe haria itote e uhepe. Yt kat i moryꞌa saity pywiat wepy hap e. Yt kat i getap nug haria e. Yt wẽtup ok i kat koꞌi kat koꞌi nug hat e. Yt kat i tõg tõgꞌe hap e. Yt kat i itote man koꞌi nug hap e atipy piat e.
23 Yt wẽtup i hẽtyhot hap eweipuẽti e katupono yt karamuo i wẽtup ok ariãty nug hat toineꞌen aru tawa Papironia pe e. Yt karamuo i aru eweipuẽti wepiit hap itote e. -Atikyꞌesat en uheharyꞌi wo atikyꞌesat en uheꞌaito wo e hap yt kat i raꞌyn e. Yt uwe i ihainiaꞌin wywuat hat yt uwe i haryporiaꞌin wywuat hat saꞌawyꞌi miꞌi yn itote pykai e. Karaiwa akag koꞌi yn itote saꞌawyꞌi heso rakaria woꞌomoꞌakagꞌaia haria yne mesuwarotiat woꞌomaꞌat haria yt miit ewy i taꞌatumoherep taꞌatupo wo miitꞌin ekat kyewi maꞌato mekewat eꞌat pe yt wẽtup i itote e atipy piat uhepe.
24 Tupana eiꞌapiheg aru tawa Papironia piaria e kat pote toipuẽti kahato ehetawa pe temiitꞌin suu tomipoꞌoro koꞌi tehay moherep haria eimiꞌauka koꞌi suu okpun hap toipuẽti temiitꞌin koꞌi suu eimiꞌauka koꞌi yne pote eiꞌapiheg sese aru haty wo e atipy piaria hesaika kahato rakat tehay pirik wo.
