Iesui Aru E Hap 19:1-21
19 Tawa Papironia wukꞌe hawyi atikuap wepy hap iꞌatuehay typyꞌi kahato hap ewy typyꞌi kahato haty wo heremo kahato iꞌatuehay. Mio tã iꞌatuꞌe teꞌeruwepy -Urutuwehum kahato ewowi Tupana iꞌatuꞌe. En yn uruehakyeraꞌat hat iꞌatuꞌe. En yn urumimotypot iꞌatuꞌe. En yn urueTupana ereineꞌen Wuatꞌi Porekuat no iꞌatuꞌe.
2 En yn waku miitꞌin apiheg kuap hat katupono En yn etikuap iꞌatupyꞌa piat koꞌi kat koꞌi kat koꞌi hap iꞌatuꞌe. Pywo hap upi yn etiꞌatuꞌapiheg iꞌatuꞌe. Saꞌawyꞌi tawa Papironia piaria haryporia yt iweꞌeg i kahato rakat ewy tukupteꞌen katupono taꞌatuꞌatumuꞌe kahato yi totiaria yt naku i nug hamo wuatꞌi haryporia wywo wuatꞌi ihainia wywo iꞌatuꞌe. Miꞌi hawyi emipoꞌoro emiitꞌin auka haria tukupteꞌen miꞌiria maꞌato mesup etiꞌatumoma yne miꞌiria emiitꞌin suu okpun hap upi iꞌatuꞌe. Waku kahato En iꞌatuꞌe.
3 Etiꞌatuꞌatupoepyk taꞌyn mote urutuwehum kahato ewowi Tupana iꞌatuꞌe. Miꞌi hawyi mekewat tawa Papironia wuk hap yt karãpe i aru hoꞌosep iꞌatuꞌe. Ywyhig hun yn naꞌyn taꞌam itote pyi aat kaꞌap wuatꞌi eꞌat pe iꞌatuꞌe. Waku kahato En Tupana iꞌatuehay atipy piaria sem wepy hawe.
4 Miꞌi hawyi mekewat saꞌawyꞌi wuaria 24 ok takaria teꞌeruwepỹꞌãtutuk Tupana ewowi imotypot hamo. Iꞌewyte 4 ok takaria wuatꞌi eꞌat piaria teꞌeruwepỹꞌãtutuk howawi pywo kahato ti rat iꞌatuꞌe hap ewy. Iꞌewyte urutuwehum ewowi urueTupana iꞌatuꞌe.
5 Miꞌi hawyi uito Iuwãu atikuap sehay aikope Tupana taꞌapyk Morekuat no hap kaipyi mio tã e -Mehinꞌin manaꞌin e toꞌiro watuwehum ahehay wo Tupana kape e. Toꞌiro Tupana eropat haria watimotypot Tupana ahehay wo e. Torannia aito sio aito morekuaria sio aito semiit toꞌiro watuwehum kahato Tupana kape ahehay wo e sehay aikope Tupana taꞌapyk kaipyi.
6 Miꞌi hawyi uito Iuwãu atikuap wẽtup i wepy hap typyꞌi kahato rakaria. Teꞌeruwepy kahato aikotã ywytu uato sese puehay ewy -Urutuwehum ewowi Tupana urutuwehum ewowi Tupana urutuwehum ewowi Tupana mio tã urutoꞌe katupono etunug esaꞌyru raꞌyn Wuatꞌi Porekuat no urumikyꞌesat ewy iꞌatuꞌe teꞌeruwepy puo.
7 -Toꞌiro watuwemowepiit iꞌatuꞌe toꞌope. Toꞌiro watuwehum Tupana kape ahehay wo iꞌatuꞌe toꞌope. Toꞌiro waku kahato En katupono mesup etum esaꞌyru pe iharyꞌi ikahu kahato rakat iꞌatuꞌe. Waku pe tuwepainug me ikahu kahato pe iharyꞌi toineꞌen iꞌatuꞌe.
8 Heꞌaito Tupana Saꞌyru ikahu rakat no toineꞌen tesokpe pe ikytsig rakatno esokpe ikahu kahato piꞌã iꞌatuꞌe. Ikytsig imehit kahato aikotã Tupana emiitꞌin imimokytsig ewy esokpe ikahu hap ewy iꞌatuꞌe.
9 Miꞌi hawyi atipy piat toꞌe uhepe -Iuwãu e etiwan no kat som areꞌe epe hap koꞌi e katupono Tupana e hap ahenoi epe -Waku raꞌyn Uhaꞌyru eharyꞌi hap eꞌat e. Mesup atunug ienuk hap imotypot hamo e. Uhaꞌyru eharyꞌi hap motypot hap ienuk hap kape worohoꞌokay kay wen maꞌato yt ehewaku hap kaipyi i worohoꞌokay kay eipe e. Worohoꞌokay kay Uhaꞌyru eharyꞌi hap motypot hap ienuk hap kape worohoꞌokyꞌe kahato pote e. Worohoꞌoꞌairo uimipoityro koꞌi uhegyiꞌat pote e Tupana e.
10 Miꞌi hawyi wẽtup ok toꞌe atipy piat uhepe Iuwãu e Tupana sese ihay teran ewywo e. Miꞌi hawyi arepỹꞌãtutuk mekewat atipy piat Tupana ehay moherep hat kape hawyi atimotypot kahato miꞌi wen maꞌato -Iuwãu e yt uimotypot teiꞌo katupono uito eꞌewywuat Tupana eropat hat yn e. Yne ewyriaꞌin Iesui mohey haria ewywuat arepyhuꞌat Tupana eropat hat e. Uito ti yt poꞌog i ekai e. Waku Tupana yn watimotypot katupono saꞌawyꞌi wuaria Tupana ehay moherep haria Iesui etiat taꞌatuhenoi taꞌatuwẽ pyi yian mete taꞌatuhenoi Iesui minug koꞌi e miꞌiria ewy areineꞌen e atipy piat uhepe.
Iesui Poꞌog Hesaika Toineꞌen Yt Nakuat I Rakat Iꞌewyte Mekewat Yt Hãpyk I Enoi Hat Kai
11 Miꞌi hawyi uito Iuwãu arahaꞌat atipy kape turan heremo ipuo wuatꞌi araꞌakasa yne itote hawyi itote araꞌakasa waku kahato rakat. Miꞌi ti taꞌapyk tohũ Kawaru ikytsig kahato rakat rote. Mekewat waku rakat Yt Aimaꞌat Kuap I hap het rakat Miꞌi. Wẽtup iwat het Aimimohey kahato rakat. Iꞌewyte Pywo Sese rakat wẽtup iwat het. Toikuap kahato uwe waku uwe yt hap koꞌi e. Yt naku i nug haria wywo wuꞌuka hamo toto raꞌyn e.
12 Miꞌi hawyi mekewat Waku Sese Rakat tehaꞌat kahato aikotã hẽtyhot pya hap. Iꞌakag ete iꞌatu kahato ipainug hap amãtap Morekuaria Akag Sese ewy. Het toineꞌen miwan me maꞌato yt uwe i ikuap tuwewi yn toset toikuap e.
13 Miꞌi ti araꞌakasa huu ewy kahato yne hesokpe ete. Maꞌato het aipusu puo Tupana Ehay Yne e hap.
14 Miꞌi hawyi mekewat toto atipy kaipyi yi kape tohũ Kawaru kytsig nakat ok tote. Iꞌewyte hesuraraꞌin tuwat hupi taꞌatuhũria kytsig nakaria okpe tote. Iꞌatuesokpe ikytsig sese hawuo tuwat hupi.
15 Topyꞌahak wywo toto tesuraraꞌin wywo wuatꞌi ywania tewanikaptia akit hamo. Ihay kyseꞌyp hãihyk takat ewywuat wywo toto ipo pe. Hekaraꞌyp ihũria atusiu hap maꞌato iheg kahato rakat nu ewywuat wanikaptia moperupꞌi hamo. Miꞌi hawyi teꞌerokenꞌẽ ipo piat hekaraꞌyp pupi. Miꞌi hawyi taꞌatunug iꞌe hap ewy. Miꞌi hawyi tewanikaptia toiꞌatuꞌakit yne. Toiꞌatuꞌakit miꞌiria topyꞌahak hap wywo Tupana saiwot hap wywo poꞌog haiwot torannia kai. Toiꞌatuꞌakit akit tewanikaptia aikotã watihep Kana hy hap ewy.
16 Miꞌi hawyi araꞌakasa iꞌok poꞌi hap hesokpe ete. Het Wuatꞌi Porekuat Porekuat e. Wuatꞌi Kaꞌiwat e miwan ok poꞌi hap ete hesokpe ete. Uito Iuwãu araꞌakasa yne uimuꞌetu.
17 Miꞌi hawyi uito Iuwãu arahaꞌat aat kape hawyi araꞌakasa atipy piat yꞌam me. Miꞌi hawyi tuwẽpowat haty wo itote pyi -Uruwu koꞌi hywi koꞌi weita koꞌi e eweikuap eimiꞌu raꞌyn koitywy e. Tupana tunug naꞌyn miꞌu eiwatnuat e. Eiweꞌatunug no meikowo eipopy puo aikope aikope pyi ewehenuk hamo Tupana piat eipoi hap kape e.
18 Meiẽ iꞌatu kahato morekuaria piit eimiꞌu wo e. Ewetuꞌu ro morekuaria puꞌi e. Ewetuꞌu ro surara akag koꞌi puꞌi surara hesaika kahato rakaria puꞌi ewetuꞌu ro e. Iꞌatu suraraꞌin hũria Kawaru koꞌi puꞌi eimiꞌu wo raꞌyn e. Eiweꞌatunug no weitaria uruwu koꞌi hiwu koꞌi katupono eimiꞌu raꞌyn e. Ipuꞌi yn mesuwe karaiwaria puꞌi e. Iꞌatuemiit puꞌi hekat rakaria puꞌi iꞌewyte miit emiit puꞌi miitꞌin mikuap koꞌi puꞌi iꞌewyte yt miitꞌin mikuap i koꞌi puꞌi e. Waku eiwepopy meikowo katupono mukiꞌite ehenuk hap eꞌat raꞌyn e atipy piat tehay pirik atipy kaipyi.
19 Miꞌi hawyi Uito Iuwãu arahaꞌat hawyi araꞌakasa mekewat yt naku i rakat -Uito Tupana e hat heso rakat torannia tesuraraꞌin wywo taꞌatuꞌakag koꞌi wywo. Tuwat tuwat tuꞌuka hamo Morekuat Porekuat apyk piat ieineꞌen tohũ kytsig totiat kape. Mekewat atipy kaipywiaria ete iꞌewyte yne Iesui mohey haria hesuraraꞌin ete tuꞌuka hamo.
20 Miꞌi hawyi tuꞌuka kahato itote. Maꞌato Iesui tiꞌatuꞌakit kahato neꞌi -Uito Tupana e hat heso rakat yt naku i nug hat. Iꞌewyte taꞌatuꞌakit mekewat heso rakat -Uito Tupana ehay moherep kahato hat e woꞌomaꞌatꞌi maꞌatꞌi hat neꞌi mekewat yt naku i nug hat set howatuꞌa etiat rakaria woꞌomaꞌatꞌi maꞌatꞌi hat. Toiꞌakit neꞌi mekewat -Eweimotypot ro Tupana iãꞌãkap e hat. Miꞌi haria Waku Rakat esuraraꞌin koꞌi tiꞌatuꞌakit yne. Miꞌi hawyi Wuatꞌi Porekuat Porekuat topytyk taꞌyn mekewat awyato tig saꞌag iꞌewyte mekewat -Uito Tupana ehay moherep hat woꞌomaꞌatꞌi hat hawyi toiꞌatupugha miꞌiria mekewat ihyemyiꞌa wato aria sapuẽ sapyhot pe ytyghe wuk hap puo rakat pe. Toipytyk taꞌyn wen maꞌato yt toiꞌatuꞌauka hin i maꞌato taꞌatupuhu hap wywo toiꞌatupugha aria pe wuatꞌi eꞌat piat pe. Miꞌi hap ewy araꞌakasa.
21 Miꞌi hawyi mekewat Waku Rakat Kawaru okpe totiat rakat Aipotypot Iesui timoma yne iꞌatuesuraraꞌin tehay wo. Miꞌi rẽ toꞌe -Weitaria uruwuria eimiꞌu raꞌyn e. Miꞌi hawyi toiꞌatunug yne mesuwarotiat hawyi weitaria iꞌatuꞌok wuatꞌi Tupana wanikaptia puꞌi wo.
