Iesui Aru E Hap 2:1-29
2 Miꞌi hawyi Aheykeꞌet Iesui toꞌe uhepe -Iuwãu e mio tã etiwan no uimohey haria tawa Ewesu apykok hat pe tawa Ewesu piaria etiat. Mio tã ereꞌe -Pyno atikyꞌesat ereineꞌen uipo pe katupono tukupteꞌen uipo sese kai raꞌyn 7 waikiru koꞌi ewy 7 ok takaria Tupana motypot yat piaria apykok haria e. Uito ti uhewyry eipyꞌasetpe aikotã aikotã ariãty yt hẽtyhot kahato i rakat moẽtyhot hat ewy e. Uhewyry eipyꞌasetpe eimoẽtyhot hamuat e. Eipe wẽtup haga 7 haga pyꞌasetpiat ariãty eiam ewy mekewat 7 ariãty wẽtup eiam hekat rakat pyꞌasetpuo e.
2 Uimohey haria tawa Ewesu piaria worohoꞌokuap kahato eipe. Uipotpap nug kahato haria eipe are e. Yt eipohep hin i uheropat hap ete e. Yt eweikyꞌe hin i yt naku i nug hap neꞌi. Atikuap eheko waku hap. Karãpe wẽtup ok putꞌok e eimuꞌe hamo turan hepama ihay eweimohey sio uhehay wo sio yt hap kuap hamo e. Maꞌato yt uhehay i neꞌi pote meremo -Eso i rat eweiꞌe tope. Ewehãꞌãg kahato mekewat sio Tupana mipoꞌoro wẽtup miit sio tuwehay pyi neꞌi hap kuap hamo e.
3 Ewehoꞌopot kahato raꞌyn uimohey hap upi e uimohey motꞌi haria eipe e. Taꞌi uheropat motꞌi kahato haria eipe paĩ are.
4 Waku kahato eipe e wen maꞌato wẽtup yt naku i eikawiat yt uimowepiit hin i hap toineꞌen. Saꞌawyꞌi uikyꞌe kahato haty wo maꞌato mesup yt saꞌawyꞌi wuat yt ewy i raꞌyn uikyꞌe eipe. Uiꞌatoiat uikyꞌe saꞌawyꞌi wuat hap ete e. Haty kahato uipyꞌa pe miꞌi hap uhete e.
5 Pyno eiwanetup o aikotã saꞌawyꞌi wuat uikyꞌe haty wo ehepiat hap kape uimikyꞌeria e. Mesup uikyꞌe hap waure haria wo eweikupteꞌen e. Eweiꞌaipok to uhowowi i uikyꞌe pote areꞌe ehepe maꞌato yt pote ariot eheꞌariãty sasep hamo e. Miꞌi hawyi iꞌypyryp hap yn toineꞌen itote e. Koitywy 7 ariãty toineꞌen maꞌato ahasep hawyi ti aru eiwat pote iꞌypyryp yt naku i topyhuꞌat e. Eweiꞌaipok to uhowowi areꞌe ehepe tawa Ewesu piaria e.
6 Tukupteꞌen tawa Ewesu piaria uimohey haria muꞌe haria uhyt Nikuraita mimuꞌeria -Waku eharyꞌi uiat uheharyꞌi wo hawyi uheharyꞌi ewatno e haria toꞌope yt naku u. Waku ehaiwot ro eweikupteꞌen miꞌi potmuꞌeria ete katupono Uito iꞌewyte uhaiwot areineꞌen iꞌatupotmuꞌe hap upiaria ete e Iesui.
7 Uimohey haria ehewaure kaꞌa kahato ro kat som Tupana Paꞌãu toꞌe topotmuꞌeria pe Tupana motypot yat piaria pe yi Asia tote e. Ewetum no ehewaure kaꞌa Tupana Paꞌãu einapin hap kape e. Uimohey haria e pywo pe ti uimikoi ypia pe toineꞌen wẽtup uimikoi ywa pyꞌasetpe eimoieineꞌen wuatꞌi eꞌat piat hap e. Uwe uwe uimohey tokuꞌuro hap kape iꞌewyte uwe uwe topyhuꞌat ahiag potiãꞌãg hap akit hat tokuꞌuro hap kape miꞌi hat pe aru areꞌe -Waku etuꞌu ro uimikoi ypia ywa eimoieineꞌen wuatꞌi eꞌat piat hamo areꞌe aru e Tupana Paꞌãu ehepe e mekewat waikiru ipupiat rakat uimiwan nug hamuat tawa Ewesu piaria pe.
8 Miꞌi hawyi toꞌe i raꞌyn uhepe mekewat 7 waikiru ipo piat rakat -Iuwãu e wẽtup uhehay etiwan hawyi etipoꞌoro wẽtup Tupana motypot yat piaria kape e. Etipoꞌoro uhehay iꞌatuꞌapykok hat kape. Uimohey haria tawa Simina piaria kape e. Mio tã etiwan -Tawa Simina piaria uimohey haria Uito ti areineꞌen wuatꞌi eꞌyian miat ieineꞌen hat e. Iꞌewyte areineꞌen aru yi waikiru koꞌi kahuro pykai hap eꞌat e. Mesuwe saꞌawyꞌi uikuꞌuro maꞌato mesup areineꞌen i raꞌyn e.
9 Uimohey haria tawa Simina piaria worohoꞌokuap kahato eipe. Waku sakpoꞌe eipe e. Uheropat haria seseria kahato eipe e. Atikuap ewehoꞌopot uhetiatno hap e. Atikuap aikotã hoꞌopot kahato popuo eipotpap uimikyꞌesat nug hap ete. Satek takaria eweikupteꞌen maꞌato uiwanetup hawe hekat kahato rakaria wuatꞌi eꞌat piaria eweikupteꞌen e. Iꞌewyte atikuap aikotã itotiaria tukupteꞌen hap eiꞌatusatyꞌi satyꞌi kahato haria e. Atikuap aikotã uruto yn ni Tupana kuap haria katupono Iuteu ywania sese uruto iraniaꞌin ehepe maꞌato eipe yt eweiꞌe. Miꞌiria taꞌatuehay saꞌag wo ehepe. Yt Tupana emiitꞌin hin i miꞌiria maꞌato ahiag motypot yat piaria miꞌiria e. Yt Iuteu ywania hin i maꞌato ahiag ywania saꞌag tukupteꞌen miꞌiria Iuteu ywania ran neꞌi koꞌi e.
10 Yt eweikenꞌẽ teiꞌo ahiag mupi e katupono miꞌiria ahiag motypot haria eiꞌatuiãꞌãg aru eimosoꞌopot ehepiat imohey hap saꞌag hamo ehepiat uimohey hap moweityk hap kyewi. Maꞌato yt eweitoiat reiꞌo ehepiat uimohey hap ehãꞌãg hap upi 10 eꞌat hap ewy ewehoꞌopot uimohey hap waure hamo. Eweipyhuꞌat ro uimohey hap mywo eikuꞌuro hap eꞌat kape pote eheineꞌen hap sese ikahu rakat wuatꞌi eꞌat piat atum ehepe aru e. Yt kat i saꞌag atipuẽti eikai e. Miꞌi hawyi worohoꞌopainug morekuaria wo uimimotypot wuatꞌi eꞌat piaria wo raꞌyn uimohey haria sese eweikupteꞌen mote areꞌe ehepe tawa Simina totiaria pe e uhepe uimiwan nug hamuat tawa Simina piaria pe.
11 -Pywo ti wuatꞌi uimohey haria pe mio tã e te Tupana Paꞌãu are aikotã areꞌe tawa Simina piaria pe hap ewy e. Waku ehewaure kaꞌa kahato Tupana Paꞌãu e hap uiwẽ pywiat e hap kape e torannia 7 Tupana motypot yat piaria pe. Uwe uwe ahiag miat toiãꞌãg hap akit hat topyhuꞌat tokuꞌuro hap kape miꞌi hat yt ikuꞌuro i typuat hap mekewat wuatꞌi eꞌat piat miitꞌin mosoꞌopot aat kaꞌap hap e Tupana Paꞌãu ahepe.
Tupana Mienoi Tupana Motypot Yat Tawa Pekamu Pe
12 Miꞌi hawyi poꞌog tohenoi uhepe -Iuwãu e etiwan uhehay uimohey haria tawa Pekamu piaria pe yi Asia totiaria pe e. Kotan ere o etiwan miꞌiria pe -Tawa Pekamu piaria uimohey haria apykok hat e uhehay ti surara ekyseꞌyp typy hãi nakat toꞌowa piat hãihyk takat ewy kahato.
13 Uimohey haria tawa Pekamu piaria worohoꞌokuap kahato eipe e. Atikuap aikotã eweikupteꞌen uimohey haria sese wo ahiag emiitꞌin sem pyꞌasetpe e. Atikuap eweikupteꞌen aikope ahiag topyhuꞌat morekuat no hap tote e. Atikuap aikotã uikyꞌe sese haria eweikupteꞌen itote. Yt eiwemoti hin i uhet enoi itotiaria piat hamo waĩꞌe ahiag pykai e. Atikuap aikotã uimohey sese kahato haria eweikupteꞌen itote. Atikuap aikotã yt eweipun hin i te kue uikuap ehepiat hap e. Atikuap saꞌawyꞌi aikotã uhehay moherep hat wakuat kahato Antipa ahiag etama piaria tiꞌauka eipyꞌasetpiat uhehay enoi uimohey hap kaipyi pote e. Uimipoꞌoro taꞌatuꞌauka hawyi atikuap sese yt naku i miꞌiria ehetawa piaria e.
14 Maꞌato tukupteꞌen eipyꞌasetpiaria uimohey ran haria uhehay ewanikaptia tawa Pekamu piaria. -Uruto Tupana ehay moherep haria iꞌatuꞌe wen maꞌato wẽtup sehay moherep haria aikotã nimo sehay yt hãpyk i rakat enoi hat Parãu mienoi ewy taꞌatumoherep. Nimo Tupana ehay moherep hat Parãu e hap het rakat tiꞌatumuꞌe kahato Isareu ywania ewanikaptia eporekuat Parake e het rakat Tupana emiit Isareu ywania moꞌakagꞌaia Tupana set etiat hap tehay wo. Mio tã e Parãu -Waku ewetunug ienuk hap iwato hawyi eweiꞌauka eihũria Tupanaria iãꞌãkap koꞌi motypot hamo e. Miꞌi hawyi waku yne haryporiaꞌin wywo toꞌope eweikupteꞌen e. Miꞌi etunug mote ewanikaptia Isareu ywania Tupana miꞌapiheg wo tukupteꞌen eipyꞌasetpe e Parãu morekuat Parake pe tominapin e uhepe uimiwan nug hamuat.
15 Iꞌewyte sehay yt naku i moherep haria tukupteꞌen eipyꞌasetpe. Wẽtup sehay saꞌag moherep haria uimopyꞌahak kahato miꞌi ti mekewat uhyt Nikuraita ehay upiat gupteꞌen haria mekewat -Waku ahewaire waire watunug iꞌatuꞌe saꞌag uimopyꞌahak haria e.
16 Ewetoiat ro yne Tupanaria areꞌe. Ewetoiat ehewaire hap yne areꞌe. Eweiꞌaipok to uhowowi uimienoi koꞌi nug hamo e. Yt pote ariot ehewowi eiwuꞌuka hap erut hamo e. Mekewat uiwẽ piat kyseꞌyp typy hãihyk takat wywo areto ehewowi surara ewy e. Eiweꞌeg woꞌo areꞌe tawa Pekamu piat uimohey haria pe.
17 Iꞌewyte yne eipe uimohey haria kape mio tã are aikotã Tupana Paꞌãu eimuꞌe hap ewy e. Ehewaure kaꞌa pote ewewanetup to aikotã areꞌe 7 Tupana motypot yat piaria pe yi Asia piaria pe. Uwe uwe uimohey potꞌi ahiag miat toiãꞌãg pykai toiꞌakit neꞌi toiãꞌãg hap tokuꞌuro hap kape miꞌi hat pe atum man a atipy kaipywiat aikotã Uiꞌywot tum saꞌawyꞌi yahig note man a Iuteu ywania pe hap ewy atum tope uimiium toꞌewy. Uito yn atikuap aikope mekewat man a uimiium uimohey sese haria piat nuat hap e. Iꞌewyte uimohey sese hat ahetꞌok het pakup atum tope. Atiwan nu ikytsig sese rakat rote hawyi atum tope. Mekewat nu etiat uimiset pehik uito yn atikuap het. Iꞌewyte nu kytsig sat hat ikuap het maꞌato iraniaꞌin yt ikuap i toset uiat uimiwan. Miꞌi atum uimohey tokuꞌuro hap kapiat haria pe paĩ areꞌe uimohey haria 7 ywania yi Asia totiaria pe e mekewat hesokpe ikytsig nakat uhepe uimiwan nug hamuat tawa Pekamu piaria napin hamuat iꞌewyte ahepe yne imohey haria pe napin hamo.
Tupana Mienoi Tupana Motypot Yat Tawa Tiatira Pe
18 Miꞌi hawyi mekewat ariãty eiam 7 haga rakat puat hewyry rakat toꞌe uhepe -Iuwãu etiwan uiꞌe hap koꞌi hawyi etipoꞌoro uimohey haria awa Tiatira piaria kape iꞌatuꞌapykok hat kape etipoꞌoro. Mio tã etiwan -Tawa Tiatira piaria Uito ti Tupana Saꞌyru e uhehay sese atipoꞌoro ehewowi e. Uheha koꞌi ti aria sapuẽ sapyhot hap ewy nu mehit hap ewy e.
19 Worohoꞌokuap kahato eipe. Atikuap eipotpap koꞌi waku kahato hap e. Wakuap nug hap koꞌi ewetunug hap atikuap. Atikuap eiwoꞌokyꞌe kahato eiwoꞌopowyro eipotpap etiat kaipyi hap atikuap. Aikotã eiwoꞌomotypot eiwoꞌoehay upiat hap kaipyi hap atikuap e. Iꞌewyte atikuap aikotã eweikupteꞌen motꞌi uimohey wywo hap e. Atikuap mesup taꞌyn uheropat poꞌog haria wo eweikupteꞌen hap e. Atikuap aikotã haꞌawytewuat kai poꞌog naꞌyn waku eipe hap koꞌi atikuap yne.
20 Maꞌato iꞌewyte atikuap aikotã ehewaku hap toineꞌen kahato pykai toineꞌen yt naku i hap itote yt eweitoiat hin i te e. Miꞌi hap nug hap ete ehewanikap wo kahato areineꞌen e. Toineꞌen wẽtup ok haryporia eipyꞌasetpe -Uito Tupana ehay moherep hat e hat Iesapeu e hap het rakat e. -Pyno sig waku ahewaire hewaire e Tupanaria motypot hamo iꞌewyte waku Tupanaria iãꞌãkap motypot ienuk hamo e Tupana uhepe e hat Mana Iesapeu. Miꞌi ete toiꞌatumuꞌe uhemiit pykai yt kat eweiꞌe i tope. Yt eweipoꞌoro hin i eipyꞌasetpyi. Yt naku i kahato ewetunug tawa Tiatira uimohey haria e.
21 Saꞌawyꞌi areꞌe -Mana Iesapeu pe -Etoiat ro ewaire waire hap meremo hawyi eraꞌaipok to uhowowi mana areꞌe. Karania wo neꞌi mio tã areꞌe tope maꞌato -Yt an e neꞌi uhepe e.
22 Pyno koitywy Mana ewaire waire hap eꞌyni eꞌahuu hap eiam mo topyhuꞌat e. Haryporia yt weꞌeg i hat mio koitywy woroꞌapiheg epiat hoꞌopot hap mywo. Iꞌewyte ihainiaꞌin etiat wemaꞌat haria iꞌewyte atiꞌatuꞌapiheg yne emoꞌahuu hap eꞌyni pe e. Torannia emoewaire haria iꞌatuꞌahuu emoewaire hap taꞌatueꞌyni pe uhepiat taꞌatuꞌapiheg eꞌapiheg tuwywuat. Eiwoꞌoꞌewy ewy motꞌi mana Iesapeu e. Ewetoiat eiminug saꞌag hawyi eweiꞌaipok to uhowowi hawyi waure wo areineꞌen maꞌato yt pote uimiꞌapiheg koꞌi wo eweikupteꞌen ehehatek hap sese topyhuꞌat e. Iwato kahato hoꞌopot aru e.
23 Yt eweꞌeg i kahato i mana pote topap topap kahato aru hirokaria emepytꞌin koꞌi e. Woroꞌapiheg kahu hawyi uimohey haria teꞌeruwanetup kahato aikope aikope teꞌeruwaꞌatunug yi Asia totiaria teꞌeruwanetup kahato aru eꞌapiheg hap emimuꞌeria e -Tupana tikuap kahato aiminug wuatꞌi yt naku i rakat koꞌi iꞌatuꞌe aru are e. Meiẽ toikuap sewaire waire nug i wuatꞌi wywuat hap iꞌatuꞌe aru e. Pywo ti rat Tupana tikuap aiwanetup hap iꞌewyte aiminug koꞌi sio waku sio yt hap koꞌi iꞌatuꞌe aru. Are paĩ aipoepyk aiminug oktan ne sio waku sio yt iꞌatuꞌe aru uimohey haria yne 7 tawa koꞌi piaria e.
24 Maꞌato tukupteꞌen eipyꞌasatpe haryporia yt iweꞌeg i rakat ehay upiat yt tuwat i rakaria uimohey haria. Miꞌiria ihainia iweꞌeg kahato rakaria -Yt naku i kahato ahewaire e. Miꞌiria pe Worohoꞌokyꞌe kahato e Tupana katupono yt eweiwat i mekewat Iesapeu wẽ pywiat poꞌog ahiag ehay saꞌag wuatꞌi kawiat rakat upi areꞌe e Tupana tawa Tiatira piaria piat pe. Saꞌawyꞌi Iesapeu toꞌe -Toꞌiro worohoꞌomuꞌe yt eimikuap i te ete e. Miꞌi ahenoi teran ehepe maꞌato wẽtup sehay piat pe. Toꞌiro ahewaire waire migꞌi wo ahiag ehay pyi e. Maꞌato yt iꞌatuꞌe iraniaꞌin. Miꞌiria pe yt worohoꞌonapin teran i katupono -Yt eweiꞌe raꞌyn mana Iesapeu mienoi hap kape.
25 Pyno mio tã areꞌe waku nug haria pe tawa Tiatira piaria pe. Uimohey motꞌi ro e. Karamuo ariot hap kape uhuut ehowawiat hap kape eweikupteꞌen no uimohey haria motꞌi pote morekuat nuaria wuatꞌi piatnuaria worohoꞌonug e.
26 Uwe uwe eipe uimohey motꞌi rakaria iꞌewyte uwe uwe iꞌakit ahiag miat toiãꞌãg hap iꞌewyte uwe uwe inug uhehay tokuꞌuro hap kape miꞌi haria pe are aru -Waku kahato eipe are. Worohoꞌonug eipe wuatꞌi ywania porekuat wo wuatꞌi eꞌat pe aru are e.
27 Saꞌawyꞌi sese mio tã toꞌe Uiꞌywot uhepe -Uhaꞌyru e aikotã aikotã kamuti nug hat tiꞌaporok tominug yt hãpyk i hawyi miꞌi hap ewy ti aru waku etiꞌatuꞌapiheg o yt naku i nug haria wẽtup ywania wẽtup ywania yt uimohey teran i haria e nimo Uiꞌywot uhepe.
28 Pyno koitywy kat Uiꞌywot toꞌe uhepe miꞌi hap ewy are ehepe. Pywo ti rat eipe uiꞌewywuat pote worohoꞌonug eipe wuatꞌi ywania porekuaria wo uiꞌewy eweikupteꞌen aru wuatꞌi eꞌat piat are. Iꞌewyte meiũran ti aru ariot ehewowi aikotã aikotã mekewat waikiru wato aat wẽtem hap enoi hap eꞌyian mete wuat ipohup aat tuerut hap ewy ariot ehewowi iꞌypyryp hap moma hamuat eimowepiit hamuat ariot aru ehewowi are e.
29 Waku ehewaure kaꞌa kahato kat som areꞌe uipotmuꞌeria 7 Tupana motypot yat koꞌi piat weꞌatunug haria pe yi Asia totiaria pe areꞌe e. Uito Iuwãu pyno waku watikuap kahato torannia aitoria wuatꞌi Tupana Paꞌãu mimoherep ahepe mesuwat uimiwan me.
