Iesui Aru E Hap 20:1-15
20 Miꞌi hawyi uito Iuwãu arahaꞌat hawyi araꞌakasa wẽtup ok atipy kaipywiat suut hat. Topo pe toterut haity korente iheg sese rakat iꞌanam kahato rakat. Miꞌi hawyi toto atipy kaipyi yi kaꞌa kape yt ikaꞌa sasat rakat i kape. Ipo pe hesaika hap yi kaꞌa sese ewãhyp hamuat.
2 Miꞌi hawyi atipy piat tat haty wo mekewat moiꞌok ipoꞌi poꞌi hamo ipyhyp motꞌi sese hamo. Miꞌi hawyi toipyhyp taꞌyn mekewat wẽtup het ahiag wẽtup het Satanai -Woropyhyp en wẽtup 1 miu anu e atipy kaipywiat suut hat ahiag me.
3 Miꞌi hawyi moiꞌok toiꞌokhytpun yi kaꞌa saꞌag yt ikaꞌa sasat rakat i pe hawyi tohewãhyp yi kaꞌa hawyi tutunug imoheg hap itote. Miꞌi hawyi ahiag yt tomaꞌat kuap i mesuwarotiaria miitꞌin wẽtup 1 miu anu itote toineꞌen. Yt tohãꞌãg kuap i wuatꞌi ywania topyhyp wiat pote turan. Miꞌi hawyi atipy piat suut hat toꞌe uhepe -Wẽtup 1 miu anu tokosap hawyi aru atiporenoꞌẽ ikaꞌa pyi ahiag e. Miꞌi hap kape araꞌakasa uimuꞌetu.
4 Miꞌi hawyi uito Iuwãu arahaꞌat morekuaria typyꞌi kahato Tupana mipoꞌoro aipotypot nuat koꞌi. Miꞌiria teꞌeraꞌapyk aiporekuaria wo Iesui wywo yne miitꞌin mesuwarotiat karaiwaria wo. Saꞌawyꞌi miꞌiria timoherep kahato taꞌatuehay wo Iesui etiat miitꞌin me. Miꞌiria yt imotypot hin i mekewat saꞌag nug hat -Uito Tupana e hat heso rakat. Yt taꞌatumotypot i -Uito Tupana e hat minug iãꞌãkap koꞌi. Yt taꞌatunug i mekewat ihay saꞌag nakat -Yt ewetunug i uhet ehowatuꞌa ete eipo ete pote woroꞌauka e rakat. Maꞌato mio tã e pykai -Yt iꞌatuꞌe yt urutunug i iꞌe hap ewy iꞌatuꞌe tipyt taꞌatuꞌauka miꞌiria saꞌawyꞌi. Maꞌato miꞌiria tukupteꞌen i raꞌyn morekuaria wo uwe waku uwe yt hap enoi hamuat. Tupana Mipoꞌoro Aiporekuat nuat emiitꞌin wuatꞌi ywania morekuaria wo. Miꞌiria ti Aikaꞌiwat Iesui mimoieineꞌen koꞌi torannia tomohey haria eꞌyian notiaria koꞌi. Miꞌi hawyi ahiag toineꞌen 1 miu anu kaꞌap pe turan miꞌiria tukupteꞌen morekuaria wo wuatꞌi ywania pyꞌasetpe.
5 Miꞌi turan iraniaꞌin Iesui mohey haria yt tuwenoꞌẽ i te guꞌuro pyi. Maꞌato wẽtup 1 miu aat pot tokosap hawyi tuwenoꞌẽ guꞌuro pyi. Miꞌiria yn yian mete teꞌerehymut katupono Iesui tiꞌatukawiatno miꞌiria saꞌawyꞌi katupono yt Tupana mohey i haria miꞌauka koꞌi wo tukupteꞌen saꞌawyꞌi pote.
6 Waku puo kahato tukupteꞌen miꞌiria katupono Tupana mimotypot sese koꞌi miꞌiria. Miꞌi pote toiꞌatumoieineꞌen miꞌiria iraniaꞌin eꞌyian mete. Maꞌato meiũran iꞌewyte taꞌatuꞌauka haria yt naku i nug haria Tupana tiꞌatumoieineꞌen ne hamuat hawyi toiꞌatupoꞌoro wẽtup iꞌatueiam kape iꞌatumosoꞌopot hamuat kape iꞌatukuꞌuro typuat i hap kape. Maꞌato iꞌatumiꞌauka koꞌi Iesui kawiatno koꞌi yt karãpe i topap typua i iraniaꞌin ewy. Yt karãpe i taꞌatusoꞌopot miꞌiria tukupteꞌen morekuaria wo Aikaꞌiwat wywo wuatꞌi eꞌat pe. Miitꞌin ehay moherep Tupana kapiat hanuaria wo tukupteꞌen. Wẽtup 1 miu anu turan morekuaria wo tukupteꞌen yi tote. Tupana motypot haria sese miꞌiria.
Ahiag Tuwẽtem Naꞌyn Ipyhik Hawe Kaipyi
7 Wẽtup 1 miu anu tokosap hawyi mekewat atipy piat taꞌaipok taꞌyn yi kaꞌa okenhypꞌok hamo hawyi toipok korente ahiag ete pyi hawyi tohewyhypꞌok taꞌyn hawyi toꞌe -Toran naꞌyn epyhyp hap e ahiag me.
8 Miꞌi hawyi ahiag toto itote pyi aikope aikope wuatꞌi ywania moꞌakagꞌaia hamo. Hewyry kahato mesuwarotiat wuatꞌi ywania pe toꞌe hamo -Toꞌiro uhupi tawa Ierusarẽi moma hamo e wuatꞌi ywania pe yi Koki piaria yi Makuki piaria pe. -Toꞌiro Tupana mohey haria moma hamo e. Miꞌi hawyi imimaꞌat koꞌi tuwat kahato hupi. Iꞌatu kahato tuwat iꞌatuesuraraꞌin aikotã yi kyt yt watimorania kuap i hap ewy tuwat ahiag upi tuꞌuka hamo Tupana emiitꞌin moma teran hamo.
9 Miꞌi hawyi ahiag topyhuꞌat iꞌatuesuraraꞌin akag wo hawyi toiꞌatupoꞌoro tesuraraꞌin Tupana etawa Ierusarẽi apypueri hamo. Iuteuria yi wato hap oktan suraraꞌin yn teꞌeropyhuꞌat itote. Miꞌi hawyi tõꞌẽ tõꞌẽ wanikaptia ahiag esuraraꞌin Tupana Mikyꞌe Sese kahato etawa moma hamo. Miꞌi ti wanikaptia tiꞌapypueri taꞌatuꞌapyhik saꞌag maꞌato miꞌi turan Tupana tipoꞌoro atipy kaipywiat aria mekewaria tewanikaptia wuk hamo. Miꞌi hawyi aria tuꞌu yne miꞌiria.
10 Miꞌi hawyi mekewat woꞌomaꞌat hat Tupana topytyk hawyi toipun aria emyiꞌa wato pe. Saꞌawyꞌi mekewat moiꞌok toipun mekewat aria pe iꞌewyte mekewat yt naku i rakat -Uito Tupana e hat heso rakat toipun tope te. Miꞌiria wywo ahiag hoꞌopot sese aat kaꞌap wuatꞌi eꞌat pe. Miꞌi tã hap ti atikuap uimuꞌetu aikotã aikotã topyhuꞌat irane hap.
Morekuat Sese Toineꞌen Apyk pe Uwe Waku Uwe Yt E Hamo
11 Miꞌi hawyi Uito Iuwãu arahaꞌat mekewat Morekuat Porekuat Akag apyk hap kape. Araꞌakasa hawyi -Ikahu kahato heꞌamyꞌap are. Ikytsig kahato are. Miꞌi hawyi arahaꞌat howa kape. Ikahu kahato rasig paĩ are. Poꞌog ikahu aat waikiru waty koꞌi kai iꞌewyte mytyyp koꞌi kai poꞌog ikahu areꞌe. Miꞌi hawyi aat waikiru waty koꞌi mytyyp koꞌi teꞌeruwemoti kahato hawyi teꞌeruwemig ipupi hap ewy poꞌog ikahu iꞌatukai pote poꞌog hẽtyhot poꞌog imehit iꞌatukai. Miꞌi rakirẽ poꞌog arahaꞌat waikiru waty aat mytyyp kape. Maꞌato miꞌi turan yt araꞌakasa hin i raꞌyn iꞌatuewowi yt taꞌatueiam note hin i raꞌyn apo paĩ pote areꞌe.
12 Miꞌi hawyi Tupana toꞌe ikuꞌuro rakaria pe -Eiwenoꞌẽ ro eweikupteꞌen i ro yne eipe e. Miitꞌin mikuap koꞌi iꞌewyte yt miitꞌin mikuap koꞌi i eweikupteꞌen i ro e. Eweĩꞌẽ ro uhowowi e Tupana saꞌawyꞌi wuaria ikuꞌuro rakaria pe. Miꞌi hawyi teꞌeruwaꞌatunug heꞌamyꞌap kape. Miꞌi hawyi miwan koꞌi ahyt araꞌakasa itote. Miꞌi miwan myi Tupana timoherep aikotã aikotã tehamuat iꞌatuminug koꞌi toiꞌapypok miwan ahyt hawyi taꞌatuieineꞌen mytyyp tote te turanuat aikotã itotiat rẽ turan taꞌatunug waku sio yt hap toimoherep. Sio miꞌiria hap Tupana miꞌapiheg wo teꞌeropyhuꞌat sio yt. Iꞌewyte toineꞌen wẽtup miwan itote yt iraniaꞌin ewy hin i. Miꞌi ti toiꞌapypok hawyi Tupana mimoieineꞌen sese koꞌi toimoherep wuatꞌi eꞌat piat ieineꞌen haria.
13 Miꞌi hawyi uito Iuwãu arahaꞌat yꞌy wato kape. Miꞌi turan yꞌy piat ikuꞌuro rakaria tuwenoꞌẽ yꞌy wato pyi Tupana e hap ewy. Iꞌewyte woꞌosyp hap kaipyi tuwenoꞌẽ kahato. Aikope aikope miitꞌin ikuꞌuro hap kaipyi tuwenoꞌẽ hawyi Tupana kape teꞌeruwaꞌatunug hawyi wẽtup ok wẽtup ok pe -Waku en kat pote yi tote waku etunug ereineꞌen hap turan e. Maꞌato wẽtup ok pe -En ni yt naku i etunug ereineꞌen hap turan e Tupana map haria pe.
14 Miꞌi hawyi Tupana tehaꞌat mekewat wẽtup miwan kape hawyi toꞌe i -Uwe uwe wat toineꞌen mesuwe het miwan me miꞌi hat yt toto hin i aria wato ẽty pyꞌaset kape e maꞌato yt kat i het mesuwe miwan me pote miꞌi hat toto meremo e. Maꞌato Tupana yt tipuẽti i miwan me het koꞌi rakaria Tupana tipugha aria emyiꞌa wato kape. Yt toipuẽti i tomiehakyeraꞌat nuat set miwan me pote. Miꞌiria yt tomohey i haria raꞌyn.
15 Miꞌi hawyi Tupana tat guꞌuro hap miitꞌin auka hap iꞌahuu hap iꞌewyte hoꞌopot hap iꞌewyte satek hap hawyi toiꞌatupugha yne miꞌi saꞌag koꞌi aria pe. Miꞌi hawyi toꞌe tomipun koꞌi pe -Koitywy eikuꞌuro typuat i hap putꞌok e raꞌyn e. Ewehoꞌopot ro wuatꞌi eꞌat pe e. Miꞌi hap koꞌi kape araꞌakasa uimuꞌetu.
