Iesui Aru E Hap 21:1-27
21 Miꞌi hawyi uito Iuwãu arahaꞌat i raꞌyn hawyi araꞌakasa yi waikiru waty koꞌi ipakup koꞌi sese raꞌyn. Koran nuat saipepiat koꞌi ipakup takaria Tupana minug koꞌi. Miꞌi hawyi koran nuat yt kat hamo i raꞌyn. Ikahu kahato yi pakup waikiru koꞌi pakup waty pakup aat pakup wote teꞌeruwemoti kahato neꞌi raꞌyn yianmiat aat waikiru waty mytyyp.
2 Miꞌi hawyi arahaꞌat ywaipe turan araꞌakasa tawa Ierusarẽi ipakup taꞌapyk turan wakuat kahato Tupana ewywuat wakuat. Iꞌewyte ikahu sese rakat aikotã haryporia ikahu sese rakat ewy. Are paĩ ikahu kahato aikotã haryporia tuwepainug toꞌokyiꞌat hap eꞌat pe hap ewy are saĩke Iro pote. Miꞌi hawyi atikuap miꞌi tawa Tupana etawa Ierusarẽi ipakup e hap het rakat areꞌe.
3 Miꞌi hawyi wẽtup ok tuwẽpowat atipy kaipywiat Tupana ieineꞌen hap kaipyi miitꞌin pyꞌasetpiat raꞌyn ieineꞌen hat. Waku pe i raꞌyn toineꞌen mesup yi tote e. Miitꞌin topyhuꞌat Tupana ywania wo i raꞌyn e. Wuatꞌi miitꞌin topyhuꞌat hemiitꞌin no e. -AheTupana sese En iꞌatuꞌe i raꞌyn koitywy tope e. -Eipe uimepytꞌin e Tupana iꞌatuepe e.
4 Miꞌi hawyi yt eweiwak poꞌog neiꞌo e. Koitywy ti aru yt karãpe i teꞌeruwak poꞌog e. Yt kat i iꞌatuꞌarot hap e. Yt kat i poꞌog haty hap itote e iꞌatuehãite sese itote katupono yt kat i saꞌawyꞌi wuat ewy e. Ipakup we tukupteꞌen mesup e.
5 Miꞌi hawyi toꞌe Aipotypot Iesui uhepe atipy kaipyi Morekuat eiam kaipyi -Koitywy atomopakup i yne uiminug saꞌawyꞌi wuat wuatꞌi e. Yne aru topyhuꞌat uimienoi uiꞌe hap ewy e. Etiwan no uiꞌe hap ewy Iuwãu e uhepe.
6 Koitywy atunug i raꞌyn waku pe yne i raꞌyn uiꞌe hap ewy e. Waku pe i raꞌyn uimikyꞌesat ewy atunug e. Pyno haꞌawynug saꞌawyꞌi hat Uito iꞌewyte yne saipepiat nug hat Uito e. Yne wyro hat Uito e. Waku pe yne atunug uimikyꞌesat ewy e Iesui uhepe. Uwe uwe tikuap sese teran Tupana miꞌi hat pe atimoherep Tupana yt kat saꞌup i uhegyiꞌat hap oktan e. Atum tope Uiꞌywot kuap hap e. Aikotã etipuẽti yꞌy hitꞌi ihy kahu rakat ereꞌyꞌutui kahato turan hawyi ereꞌyꞌu yt kat saꞌup ete i hap ewy atum Tupana kuap hap wuatꞌi eꞌat piat eimoieineꞌen hamuat e. Atunug uiꞌe hap ewy e.
7 Uwe uwe ahiag miat toiãꞌãg hap yt naku i nug hamuat akit hat miꞌi hat pe atum yne Tupana wat e. Miꞌi hat pe areꞌe -Uhaꞌyru sese en uhakiꞌyt sese en areꞌe. Miꞌi hawyi uiwesat miꞌi hat -En ni Uiꞌywot sese iꞌatuꞌe e.
8 Maꞌato iraniaꞌin teꞌerokenꞌẽ uimohey hap moherep hamo e. Miꞌi pote miꞌiria aru tukupteꞌen wuatꞌi eꞌat pe mekewat aria emyiꞌa wato pe ytyghe wuk hap ewywuat pe e. Iꞌewyte woꞌopotꞌauka haria paini koꞌi iꞌewyte hewaire hewaire rakaria iꞌewyte wuat minug Tupana motypot haria iꞌewyte woꞌomaꞌatꞌi maꞌatꞌi haria iꞌewyte yt uimohey i haria iꞌewyte yt naku i nug haria miꞌiria typuat i map hanuaria hoꞌopot wuatꞌi eꞌat pe aria ẽty emyiꞌa ewywuat pe e uhepe Aipotypot Iesui atipy kaipywiat morekuat eiam note pyi.
Tupana Etawa Ipakup Takat Kape Araꞌakasa
9 Miꞌi hawyi uito Iuwãu arahaꞌat hawyi araꞌakasa wẽtup ok mekewat saꞌawyꞌi wuaria 7 ok takaria yianmiat kamuti howapy rakat erut hat tuut uhowowi. Miꞌi hawyi ihay uiwywo -Mehin e toꞌiro uhupi e. Atimoherep teran epe uwe topyhuꞌat Tupana Saꞌyru eharyꞌi e hap e. Uwe ikuꞌuro aikotã aihũ ikuꞌuro saꞌawyꞌi aikawiatno hap ewy e. Miꞌi wat ikahu rakat iharyꞌi teran e. -Toꞌiro e.
10 Miꞌi hawyi uhereto uimuꞌetu itote hawyi Tupana Paꞌãu timoherep yne uhepe. Miꞌi hawyi toꞌe uhepe -Eraꞌapyk to meiũpe yityꞌok ywaiti sese rakat rote e. Erahaꞌat ro e hawyi arahaꞌat hawyi araꞌakasa Tupana etawa sese iwato kahato iminug ikahu kahato Tupana ewy. Hãpyk kahato Tupana eꞌokipy. Miꞌi taꞌapyk yi kape tawa Ierusarẽi e hap het rakat.
11 Are paĩ hẽtyhot kahato mekewat Tupana etawa areꞌe. Tuwekaipyi hẽtyhot hap toineꞌen ikahu tonug hat ewy ikahu hap areꞌe. Taꞌi nu ikahu rakat ewy imehit ihup ihyrypꞌi ikaꞌay. Mekewat nu haꞌup woity rakat koꞌi ewy areꞌe. Mekewat nu Iasipi ewy ikahu kahato mekewat tawa areꞌe. Nu yt ipit pit hin i rakat ewy aikotã nu Tiamante ewy areꞌe.
12 Miꞌi hawyi araꞌakasa 12 okenꞌypy mekewat tawa wato ete -Waku eiwehytꞌok e hap mekewat tawa ete. Miꞌi puo yn waku wateke mekewat tawa pe. Katupono tawa pyhyp hap ywaiti rakat toineꞌen mekewat tawa Ierusarẽi mipueri wo. Atipy piat surara toineꞌen yne okenꞌypy rania tukupteꞌen 12 okenꞌypy ete. 12 set toineꞌen okenꞌypy rania. Wẽtup set toineꞌen yne okenꞌypy ete ikuap hamuat. Ahaꞌaseꞌi Iako saꞌyruꞌin 12 ok takaria Iuteuria koꞌi set 12 ywania set toineꞌen itote yne okenꞌypy kuap hamo.
13 Mekewat tawa akipy owa ete okenꞌypy koꞌi ete kokai myẽꞌym okenꞌypy hawyi kokai okenꞌypy myẽꞌym okenꞌypy kokai myẽꞌym okenꞌypy kokai myẽꞌym okenꞌypy tuereto auriwo. Myẽꞌym okenꞌypy aat minꞌe hap kai myẽꞌym okenꞌypy aat wẽtem hap kai myẽꞌym okenꞌypy aat posak kai kokawiatno myẽꞌym okenꞌypy iꞌewyte kokawiatno aat posak kawiatno myẽꞌym okenꞌypy.
14 Miꞌi hawyi arahaꞌat tawa kape hawyi areꞌe -Pywo ti rat arewanetup yt karãpe i iꞌaporokꞌe okenꞌypy koꞌi mekewat okenꞌypy koꞌi ni kawiat imehit kahato hap ewy aikotã wahi iꞌa rakat ikahu rakat nu koꞌi yn heꞌokipy wo. Iwato kahato rakaria 12 okenꞌypy toineꞌen itote areꞌe. Ikahu kahato meimewat nu koꞌi toꞌotote tote yityꞌok ewy. Toineꞌen yne wyti itote uruset koꞌi Tupana hũ Iesui potmuꞌeria 12 ok takaria set koꞌi tukupteꞌen yne tawa 12 akipy ete hap araꞌakasa. Iꞌewyte uhet Iuwãu itote araꞌakasa wy areꞌe.
15 Miꞌi hawyi mekewat atipy piat toꞌe i uhepe -Mesup atikuap teran koran iwato koran iꞌywop hap Tupana etawa Ierusarẽi pakup e. Toineꞌen ipo pe hãꞌãg hap ikahu kahato rakat imehit rakat Tupana etawa iãꞌãg hamuat typy miit ywaiti hap ewy iãꞌãg hap. Miꞌi hawyi okenꞌypy koꞌi iꞌewyte tohãꞌãg koran iwato koran iꞌywop hap ewy. Iꞌewyte nu pype iꞌãpeꞌok takat tohãꞌãg atipy piat tawa pyhyp hap.
16 Tohãꞌãg hawyi iwato kahato e uhepe iꞌywop hap iwato hap ywaiti hap toꞌokupitu kupitu Tupana etawa 2253 kiru meteru hap oktan hap ewy e uhepe.
17 Iꞌanam kahato mekewat tawa pyhyp hap wẽtup go iꞌanam hap ewy e. Pywo ti rat yt uheso i iwato hap ete. Uipo piat hãꞌãg hap hãpyk kahato rakat. Yi totiat iãꞌãg hap toꞌoꞌewyꞌewy e.
18 Ikahu kahato Tupana tunug tetawa. Poꞌog yi kape tawa Ierusarẽi pakup heꞌokipy suwy ipyhyp hap nu apeꞌok wẽtup nu kawiat ikahu kahato rakat ihyrypꞌi nu Iasipi e hap het rakat ikahu kahato imehit kahato nu uru ewy. Heremo kahato ipuo.
19 Miꞌi rẽ arahaꞌat hawyi atikuap Tupana etawa pytyp 12 wuat toꞌotote tote ikahu kahato. Miꞌi tote typy nu wo tawa pakup heꞌokipy suwy nu haꞌup woity rakat ihyrypꞌi atipy ewy nu Sawira e hap nu kawiat. Myẽꞌym nu wo tawa Ierusarẽi pakup hakipy suwy haꞌup woity rakat kawiat wo ihyrypꞌi imehit hap aikotã pykasu atig eꞌaia etiat ewy itig hap ewy nu Kausetunia kawiat haꞌup woity rakat. Miꞌi hawyi 4 nu wuat Tupana etawa eꞌokipy suwy hap toineꞌen nu haꞌup woity sese rakat ihyrypꞌi gaꞌapy ewy mekewat nu Emerauta e hap nu kawiat wo.
20 Miꞌi hawyi 5 wuat Tupana etawa pytyp miꞌi ti haꞌup woity rakat sese ihup kahato rakat nu Satuniu e hap het rakat. Miꞌi hawyi 6 wuat nu tawa pytyp ihup kahato suu ewy nu Satiu e hap het rakat haꞌup woity rakat. Miꞌi hawyi 7 wuat nu tawa pytyp wẽtup ikaꞌay kahato ikahu kahato rakat haꞌup woity rakat nu Kisoritu e hap het rakat. Miꞌi hawyi mekewat 8 wuat nu tawa pytyp ihyrypꞌi hawyi itig ikytsig kahato rakat no nu Periru e hap het rakat. Miꞌi hawyi 9 wuat nu tawa pytyp wẽtup nukara imehit ikaꞌay rakat hap ewy nu Tupasiu e hap het rakat. Miꞌi hawyi 10 wuat nu tawa pytyp ihyrypꞌi pakuꞌa ewy imehit hap nu tawa pytyp nu Kisopasu hap het rakat. Miꞌi hawyi 11 wuat nu tawa pytyp haꞌup woity rakat ihyrypꞌi kyre rakat nu Iasintu e hap het rakat. Miꞌi hawyi 12 wuat nu tawa akipy toran hap heꞌokipy ikahu sese rakat ihyrypꞌi kyre heremo kahato ipuo nu Ametita e hap het rakat.
21 Pyno 12 Tupana eꞌokenꞌypy koꞌi ete ikahu kahato rakaria aikotã wahi ikahu rakat ewy. Wẽtup a yne okenꞌypy ete aikotã wahi ikytsig kahato rakat iꞌa nu Perura e hap het rakat imehit kahato rakat.
22 Miꞌi hawyi uito Iuwãu arahaꞌat tawa Ierusarẽi Pakup kape hawyi atikat mekewat aikotã saꞌawyꞌi tawa Ierusarẽi potꞌi pe toineꞌen Tupana motypot yat iwatoꞌin kahato rakat hap ewy. Arewanetup toineꞌen Tupana motypot yat aikotã tawa Ierusarẽi potꞌi piat ewy areꞌe uiwanetup hawe haype. Maꞌato atikat pykai yt atipuẽti Tupana motypot yat nu kawiat minug. Kat pote are. Miꞌi hawyi atikuap hawyi paĩ -Aikaꞌiwat koro Tupana Tohũ Kuteiru wywo koitywy tuwenug Tupana motypot yat miitꞌin eiam mo tomotypot hamo toineꞌen mesup areꞌe uiwepe.
23 Hẽtyhot kahato tawa Ierusarẽi Pakup we. Tupana kahu hap Ihũ Kuteiru kahu hap topyhuꞌat mekewat tawa imoẽtyhot hamo ariãty ewy aat kaꞌap. Saꞌawyꞌi wuat aat waty waikiru koꞌi yt imoẽtyhot i raꞌyn itote.
24 Tupana topyhuꞌat tohũ Kuteiru wywo toꞌewy aat waty waikiru ewy mesuwat yi tote wuatꞌi ywania tomiehakyeraꞌat moẽtyhot hamo. Iꞌewyte yne iꞌatuꞌakag koꞌi Tupana motypot haria tukupteꞌen Ihũ Kuteiru motypot haria wo. Miꞌi hawyi miitꞌin akag koꞌi tuwat tawa Ierusarẽi Pakup kape Tupana motypot hamo -Uruporekuat sese En iꞌatuꞌe hamo.
25 Tupana yt tipyhyp hin i itote -Eiwehytꞌok o e yn. Maꞌato saꞌawyꞌi wuat tawa Ierusarẽi potꞌi pe taꞌatupyhyp wãtym hawyi maꞌato Ierusarẽi Pakup we yt taꞌatupyhyp i wãtym yt kat i itote pote.
26 Miꞌi hawyi yne ywania teꞌeroꞌe -Tawa Ierusarẽi Pakup poꞌog yne kai iꞌatuꞌe. Toꞌiro watuwat tawa Ierusarẽi Pakup kape aheTupana motypot hamo iꞌatuꞌe. Toꞌiro watioto ahekat aimiium Tupana piat motypot hamo iꞌatuꞌe.
27 Tupana nimo waku koꞌi yn teke kuap hetawa pe Tupana Hũ Kuteiru miset pehik koꞌi miwan etiat -Miꞌiria uimimoieineꞌen koꞌi yn tuwehytꞌok kuap mesuwe e. Yt naku i nug haria heso heso rakaria miitꞌin maꞌat haria yt uwe i itote Tupana etawa pe.
