Iesui Aru E Hap 22:1-21
22 Pywo ti rat ikahu kahato tawa Ierusarẽi Pakup e atipy piat uhepe. Erahaꞌat ro yꞌy kape e hawyi arahaꞌat yꞌy kape. Miꞌi turan ikahu kahato yꞌy. Yt ihy pit pit hin i. Miitꞌin moehãite rakat toineꞌen itote. Ihyeput kahu kahato. Ihy pyꞌasetpiat ikahu sese rakat ewy. Aikope Tupana taꞌapyk Tohũ Kuteiru wywo miꞌi hap ywyꞌokpy kaipyi ihyeput yꞌy.
2 Yꞌy wyti ihyeput muap pyꞌasetpuo areꞌe. Yꞌy ẽpe ete wyti ariaꞌyp koꞌi kokai kokai ikahuria kahato rakaria tukupteꞌen areꞌe. Iꞌywa koꞌi hewo kahato maꞌato yt toꞌoꞌewy hin i hewo tuereto kat kat ywa koꞌi. Wẽtup ewaty wẽtup ywa hewo hawyi wẽtup waty hawyi wẽtup ywa hewo tuereto. 12 wo hewo wẽtup 12 waty pe. Watuꞌu mekewat kat kat ywa koꞌi hawyi aimoieineꞌen wuatꞌi eꞌat aipiit ipakup wuatꞌi eꞌat pe hap topyhuꞌat. Iꞌyhop koꞌi mohag ewy wuatꞌi ywania moehãite hamo.
3 Saꞌawyꞌi Tupana toꞌe Atãu me -Uiꞌatoiat hawyi eꞌyi yt ihãite i e. Maꞌato itote yi pakup hawe hesaika kahato toineꞌen katupono Tupana toꞌe yi pe -Yt woroꞌakurek poꞌog i raꞌyn e. Erenug i ro e yi pe. Iꞌatu kahato itote Tupana Hũ eropat haria wo. Koitywy Tupana toineꞌen iꞌatupyꞌasetpe Morekuat no Iesui wywo e. Wuatꞌi ywania iꞌatupotpap kahato imikyꞌesat nug hap ete.
4 Tuwehik kahato iꞌatuete. Mesup yt pya hin i iꞌatukai e. Toꞌohaꞌat toꞌoewawi tokyꞌe haype e. Toset no toiꞌatumowekuap iꞌatuewatuꞌa ete e.
5 Yt kat i ariãty itote kat pote yt kat i iꞌypyryp hap itote pote. Wãtym yt kat i katupono Aipotypot Tupana toineꞌen aheꞌariãty wo. Topyhuꞌat Aikaꞌiwat hẽtyhot puo aikohyewyry e. Miꞌi pote yt kat hamo i aat itote. Miꞌi hawyi Iesui eropat haria teꞌeropyhuꞌat iraniaꞌin yi totiaria morekuaria wo wuatꞌi eꞌat pe e.
6 Miꞌi hawyi toꞌe uhepe atipy piat -Iuwãu e yne aru uiꞌe hap topyhuꞌat aikotã areꞌe hap ewy e. Yt pya i raꞌyn tuut aru uiꞌe hap eꞌat Aipotypot Tupana e hap e. Saꞌawyꞌi ihay tehay moherep haria wẽ pyi aikotã aikotã topyhuꞌat hamuat hawyi iꞌe hap ewy topyhuꞌat. Koitywy Tupana uipoꞌoro atipy kaipyi teropat haria mesuwarotiaria muꞌe hamo aikotã aru topyhuꞌat mesuwarote hap e. Pywo yn Tupana ihay uiwẽ pyi e.
7 Miꞌi hawyi atikuap Tupana Hũ Kuteiru Iesui ehay -Uhytꞌiꞌin manaꞌin e ehewaure kaꞌa ro uhowowi kat pote ariot merep hap ewy ehewowi hamuat e. Eiweꞌeg wo o katupono yt uwe i ikuap karãpe ariot hap. Mesuwe uhemiit Iuwãu tiwan uhehay koꞌi yne aikotã aikotã topyhuꞌat aru eimoweꞌeg hamo hap yt uwe i eimaꞌat hamuat e. Worohoꞌonapin kahato mesuwat miwan me e. Pyno ewetunug o uhepiat einapin hap mesuwat miwan miat e.
8 Pyno uito Iesui potmuꞌe Iuwãu areꞌe. Mesuwe uimiwan me yne toimoherep Tupana yn uhewaure miẽtup mo hap. Ipatꞌok araꞌakasa ipatꞌok atikuap atipy piat wẽ pyi hawyi arepỹꞌãtutuk howawi imotypot hamo. Miꞌi hawyi areꞌe -Ikahu kahato ti emimoherep emienoi uhewowi areꞌe. Woromotypot kahato En paĩ areꞌe.
9 Miꞌi hawyi mekewat wẽtup atipy piat sehay erut hat toꞌe uhepe -Yt uimotypot teiꞌo Tupana ewy katupono uito Tupana eropat hat sese neꞌi eiꞌewywuat rẽ neꞌi uito e. Eweimotypot ro Tupana yn e. Tupana eropat hat no areineꞌen aikotã saꞌawyꞌi wuat Tupana ehay moherep haria powyro hat rẽ areineꞌen e. Miꞌi hap ewy te mesup woropowyro teran Iesui mohey haria e uhepe. Meiũran aru iꞌatu kahato mesuwat emiwan wo mopywo haria hawyi taꞌatunug iꞌe hap ewy haria e. Miꞌiria powyro hat areineꞌen e. Maꞌato yt atikyꞌesat i uimotypot hap maꞌato atikyꞌesat Uipoꞌoro Hat Tupana Iesui motypot hap e atipy piat uhepe.
10 Miꞌi hawyi toꞌe uhepe -Iuwãu e etimoherep o mesuwat emiwan e. Yt atikyꞌesat i migꞌi wo neꞌi etimoherep e. Epiat ikuap kat aru kat aru toineꞌen hap ewy atikyꞌesat iraniaꞌin ikuap wy e. Kat pote atikyꞌesat yne ikuap miitꞌin aikotã aru topyhuꞌat hap yian me te iꞌatumoweꞌeg hamo -Pywo miwan iꞌatuꞌe hamo. Katupono yt pya i miwan miat tuut aru e hap koꞌi e.
11 Miꞌi hawyi toꞌe -Eiweꞌeg wo o mehinꞌin manaꞌin e. Waku eweimohey yne torannia kat e som toꞌe mesuwat miwan me hãpyk hap yt putꞌok e yne i te pykai e. Yt naku i eweimohey ran neꞌi kat e som hap koꞌi sio mukiꞌite eꞌihatꞌok eweiꞌe iꞌe hap mohey hap ete e. Mukiꞌite atimohey eweiꞌe pote potꞌi poityꞌi kat pote merep i hap ewy tuut Aikaꞌiwat. Maꞌato huut turan atomohey Iesui ereꞌe neꞌi turan tuut pote yt naku i nug haria wo eweikupteꞌen. Yt naku i eiwanetup huut turan ipit pit kahato eiwanetup hawe e. Maꞌato waku nug haria eweikupteꞌen turan tuut pote waku kahato rakaria wo te eweikupteꞌen ne itote e. Maꞌato Tupana kape ewanetup hap huut turan mote -Eipe waku kahato e tuut hawyi. Pyno eiweꞌeg wo e kat pote mukiꞌite atimohey Iesui eweiꞌe pote potꞌi poityꞌi e atipy piat ahepe.
12 Miꞌi hawyi Iesui toꞌe uhepe ahepe -Ehewaure kaꞌa ro e. Yt pya hin i uhuut hap eꞌat e. Meremo ehaꞌup wywo ariot eiminug wakuap oktan ium ehepe hamo e. Eiminug yt naku i hap oktan atum ehepe haꞌup e.
13 Yne saꞌawyꞌi watnuat nug hat sese Uito aikotã miwan toineꞌen saꞌawyꞌi pyi ikahuro hap kape aikotã aru toineꞌen hap atunug yne aru iꞌe hap ewy e. Miꞌi hap ewy ahaꞌawynug aikotã woꞌomuꞌe hap ete toineꞌen miwan me saꞌawyꞌi hap ewy atunug aru e. Miꞌi e hap ewy areineꞌen yne eꞌyian mete e. Miꞌi hap ewy areineꞌen yne wyro hamo e. Aikotã miwan toineꞌen moꞌywopo wuat hawyi yt kat i raꞌyn miwan toineꞌen poꞌog kat pote toran hap taꞌyn hap ewy atunug yne raꞌyn Tupana e hap atunug aru e hap ahaipe piat nug hat areineꞌen ne e Iesui ahepe.
14 Miꞌi hawyi toꞌe atipy piat -Uwe uwe inug mesuwat piat tonapin hap miꞌi Tupana mipoityro wo toineꞌen. Pywo ti rat uwe uwe Tupana mipoityro wo toineꞌen uwe uwe tunug Tupana mikyꞌesat miꞌi hat pe ti aru Tupana toꞌe -Waku etuꞌu kat kat ywa wuatꞌi eꞌat piat eimoieineꞌen hamuat uimikoi kaipyi e aru Tupana miꞌi hat pe. Ereke mehin ereke mana uhetawa pakup we e aru tomikyꞌesat nug haria pe e.
15 Maꞌato iraniaꞌin me -Ereke ro yt e hin i e. Yt karãpe i -Ereke ro uhetawa pe e paini koꞌi pakup we e. Yt karãpe i -Ereko ro e woꞌoꞌauka haria pe e. Yt karãpe i -Ereke ro e hewaire waire rakaria pe e. Iꞌewyte uwe uwe imotypot mo wuat Tupana miꞌi haria pe -Ereke ro yt e hin i Iꞌewyte uwe uwe miitꞌin potmaꞌatꞌi maꞌatꞌi hat toineꞌen miꞌi hat pe -Ereke ro uhetawa pakup we yt e i e atipy piat.
16 Miꞌi hawyi Iesui toꞌe uhepe ahepe -Uito Iesui morekuat Tawi saipepiat sese aikotã ahewatꞌyp ikuꞌuro miꞌi hawyi toineꞌen iꞌypykyt hap ewy areineꞌen morekuat Tawi saipepiat meiũran iꞌyp wato kahato aru e. Uito areineꞌen aikotã mekewat waikiru tuut ihatꞌok kai i aat uut hap enoi hamuat hap ewy atimoherep Tupana uut hap e. Miꞌi hap ewy atipoꞌoro raꞌyn wẽtup ok uipotpoꞌoro atipy kaipyi yne mesuwat miwan moherep ehowawiat uimohey haria kape Iuwãu miwan myi e Iesui.
17 Miꞌi pote mesup -Eraꞌaipok to Iesui meikowo watoꞌe. Aikotã haryporia tikyꞌesat kahato tehaytuwy pya ieineꞌen hat hawyi -Eraꞌaipok to eraꞌaipok to e hap ewy watoꞌe -Eraꞌaipok to watoꞌe aipyꞌa pyi epe Iesui. Iꞌewyte Tupana Paꞌãu ehay moherep haria saꞌawyꞌi wuaria iꞌewyte koran wuaria -Eraꞌaipok to meikowo Iesui iꞌatuꞌe Tupana Paꞌãu ehay moherep haria iꞌewyte aito. Iꞌewyte waku yne mesuwat miwan kuap haria teꞌeroꞌe -Eraꞌaipok to Iesui waku watoꞌe. Uiwyriaꞌin eweikupteꞌen teran wuatꞌi eꞌat pe pote ewetat ro yt kat saꞌup i aikotã mekewat yꞌy aimoieineꞌen hap yt kat saꞌup i Tupana etawa pe rakat hap ewy waku watomohey.
18 Uito ti Iuwãu. Iꞌe hap ewy yn atiwan. Waku eweimohey uimiwan hap areꞌe. Yt etimoꞌapyꞌi teiꞌo mesuwat sehay katupono Tupana ehay yn atimoherep. Yt mesuwat uiat kaipyi i maꞌato iꞌe hap ewy yn atiwan areꞌe. Yt naku i mesuwat miwan eweiꞌe pote Tupana miꞌapiheg no eweikupteꞌen aru aikotã yne mesuwat uimiwan aikotã aikotã aru mesuwe hoꞌopot hap ewy. Miꞌi hap oktan tohenoi aru.
19 Maꞌato ipatꞌok yn etimohey pote miꞌi hawyi etihep uhehay kurin naꞌyn mesuwat miwan myi pote miꞌi haria pe Tupana toꞌe -Eipe yt ewetuꞌu kuap i eimoehãite hamuat uimikoi kat kat ywa e uhetawa pakup we mesuwat miwan miat mienoi ewy eweihep wẽtup uhehay wakuat mesuwat miwan myi pote worohoꞌohep eset uimiwan myi uwe toineꞌen wuatꞌi eꞌat pe aru uiꞌe hap uimiwan miat kaipyi e Tupana.
20 Pywo kahato mesuwat miwan me toꞌe Iesui -Ariot aru merepꞌe hap ewy e. Pyno -Eriot ro Iesui waku watoꞌe Aikaꞌiwat pe.
21 -Uikaꞌiwat Iesui etiꞌatupoityro o egyiꞌat hap kaipyi yne mesuwat yi Asia piaria iꞌewyte etipoityro mesuwat miwan mohey haria yt iꞌatuewaku hap upi i wen maꞌato iꞌatukyꞌe hap wywo hap oktan. Miꞌi hap ahẽtup Iesui set upi waku.
