Iesui Aru E Hap 3:1-22
3 Miꞌi hawyi mekewat Miit waikiru koꞌi 7 rakaria topo piat hat toꞌe i raꞌyn uhepe -Iuwãu e etiwan no uhehay Tupana mohey haria tawa Saratu piaria kape e. Etiwan hawyi etipoꞌoro iꞌatuꞌapykok hat kape. Kotan ereꞌe o etiwan e -Uito ti Tupana Paꞌãu yne eiam e. Koitywy atimoꞌẽ ehewowi Tupana motypot yat piaria 7 tawa yi Asia totiaria pe e. Iꞌewyte toineꞌen uipo pe mekewat waikiru koꞌi 7 rakaria. Atikuap kahato eiminug wakuat koꞌi e. Wakuat kahato eipe iꞌatuꞌe miitꞌin mesuwarotiaria. Wuatꞌi miitꞌin mimotypot koꞌi eipe wen maꞌato uiwanetup hawe ikuꞌuro rakat ewy eweikupteꞌen katupono yt karãpe i uiwesat eipe e. Uikyꞌe hap eipyꞌa piat ikuꞌuro raꞌyn e.
2 Eweꞌeg wo o kat pote kurin uimohey hap eipyꞌa pe topyhuꞌat e. Miꞌi pote ikuꞌuro rakat ewy uimohey ehepiat hap e. Waku eweiwyro o ehepiat uimohey hit hap. Maꞌato yt pote ikuꞌuro aru eipyꞌa pe uimohey hap katupono atipuẽti eipotpap hap Tupana kapiat yt pywo pe i. Eiminug wakuat uimotypot hamuat yt uimowepiit hin i uimohey ehepiat hap yt iwato i pote e. Pyno kurin kat uimohey hap ekawiat etimotag no e.
3 Uimohey haria saꞌawyꞌi uhehay sat kahato haria eipe e. Saꞌawyꞌi ehewaure kaꞌa yn uhehay kape maꞌato mio yt e. Tawa Saratu piaria eweiꞌaipok to uimohey hap kape aikotã eweimoheg eheha peꞌok hap ewy eweimoheg uimohey hap ehepiat katupono ariot ehewowi aikotã seroꞌok e hat ewy. Waku surara ewy eweikupteꞌen maꞌato yt pote yt eweikuap hin i uhuut hap e. Pyno eiwehymut ro katupono eiket kai putꞌok are sereꞌokꞌe hat ewy e.
4 Maꞌato wẽtup ok wẽtup ok toineꞌen eipyꞌasetpe uimohey te kahato hap wywo e. Miꞌiria ete yt aremoti hin i -Uheropat haria eipe areꞌe hamuat yt taꞌatuhãꞌãg hin i iraniaꞌin ewy saꞌag nug hap ete. Katupono ehewaku hap putꞌok e uhupiat ehewyry uiwywo hamo areꞌe ehepe ipatꞌok etiat tawa Saratu piaria pe. Pywo pe ti ehepe ti aru atum eipainug hap ikytsig kahato rakat ehepe uhemiit sese eipe hap moherep hamo e.
5 Pywo Uimohey haria torannia pe areꞌe -Uwe uwe uimohey motꞌi tokuꞌuro hap kape uwe uwe tiꞌakit yne ahiag miat toiãꞌãg hap koꞌi miꞌiria atiꞌatupainug kahato sokpe ikytsig nakatno uhemiit sese eipe hap moherep hamo e. Iꞌewyte iꞌatuset yne atimoherep wuatꞌi ehamo. Iꞌatuset koꞌi atimoherep miwan me atipy pe e. Yt karãpe i atiꞌatusetmoweityk mekewat miwan myi areꞌe. Tupana mimoieineꞌen koꞌi wuatꞌi eꞌat piat gupteꞌen hanuaria miꞌiria e. Miꞌiria uhemiit sese koꞌi areꞌe atipy piaria pe. Miꞌiria uhekatuwyria sese areꞌe Uiꞌywot pe e.
6 Pyno waku ehewaure kaꞌa kahato kat e som Tupana Paꞌãu toꞌe 7 Tupana motypot yat koꞌi piaria pe katupono yne Tupana mohey haria kape wy ihay mesuwe.
Tupana Mienoi Tupana Motypot Yat Tawa Wirateu Pe
7 Miꞌi hawyi poꞌog Iesui henoi uhepe -Iuwãu e mesup etiwan uimiꞌatunapin uimohey haria tawa Wiratewia piaria kape. Etiwan hawyi etipoꞌoro uiꞌe hap iꞌatuꞌapykok hat kape -Uiwyriaꞌin Uito ti mekewat wakuat sese rakat Tupana ewywuat e. Hãpyk sese rakatno areineꞌen pywuat yn uhehay e. Taꞌi Uito morekuat Tawi Saipepiat Sese e. Miꞌi pote Wuatꞌi Porekuat no areineꞌen e. Miꞌi pote areꞌokenhypꞌok kuap kahato iꞌewyte atunug kuap kahato muap ehewyry hamo e. Ahoꞌokenhypꞌok hawyi yt uwe i uhemiitꞌin pyhyp kuap mesuwarote e. Wuatꞌi Ywania Porekuat no areineꞌen. Uito Tawi Saipepiat Sese Are. Katupono morekuat Tawi tum tepuretig uhepe ipowatꞌyp sese uipo pe toineꞌen e. Miꞌi pote uhehay wo ahoꞌokenhypꞌok kuap wuatꞌi puꞌap uipotpap nug hamuat iꞌewyte atipyhyp kuap wuatꞌi puꞌap ewanikaptia wat e. Yt uwe i uipyhyp kuap e.
8 Uimohey haria tawa Wirateu piaria worohoꞌokuap kahato eipe e. Ehesaika hap mesuwarote yt iwato hin i hap atikuap wen maꞌato miꞌi pykai uiwanetup hawe ehesaika kahato uhesaika hamo katupono ewetunug yne uhepiat einapin hap koꞌi e. Waku kahato eipe katupono yt eiwemoti hin i uimohey hap moherep hamuat hap uhetiat enoi enoi iraniaꞌin miat hamo. Miꞌi pote worohoꞌopoꞌoro eipe wuatꞌi miitꞌin kape uhehay moherep hamo e. Yt uwe i uipyhyp kuap paĩ e. Yt uwe i uheꞌokenhypꞌok kuap e. Miꞌi pykai Uito wuatꞌi uhewanikaptia eꞌokenhypꞌok kuap hat areineꞌen e. Uipyhyp kuap haria yt uwe i e. -Yt ehenoi teiꞌo ehay mesuwe iꞌatuꞌe pykai ahenoi te itote uhehay e. Yt uhehay pyhyp kuap i. Miꞌi pote uito atikuap kahato eipoꞌoro uhehay moherep hamuat wuatꞌi ywania muꞌe hamuat uimikyꞌesat ewywuat hap katupono worohoꞌokuap kahato wakuap nug haria eipe hap e. Koitywy worohoꞌopoꞌoro wuatꞌi miitꞌin muꞌe hamo yt hekat rakaria hin i eipe pykai e.
9 Maꞌato tukupteꞌen ehetawa pe ahiag motypot sese haria -Uruto poꞌog eikai iꞌatuꞌe ehepe katupono uruto ti Aparãu emiariru sese koꞌi maꞌato eiperia yt iꞌatuꞌe. Iꞌatuꞌeso mio tã iꞌatuꞌe pote. Yt Iuteu ywania hin i miꞌiria e. Pyno atiꞌatumohit kahato miꞌiria hawyi eimotypot hamo teꞌeruwepỹꞌãtutuk ehewowi -Aparãu emiariru sese eipe iꞌatuꞌe aru ehepe katupono Iesui mikyꞌe sese koꞌi eipe iꞌatuꞌe aru ehepe. Atiꞌatumohit kahato miꞌiria ehamo hawyi teꞌeruwepỹꞌãtutuk ehewowi e.
10 Waku kahato uhehay mohey motꞌi haria eipe e. Taꞌi yt eipo hep hin i uhehay moherep hap ete uhehay nug hap ete e. Meiũran aru torannia iãꞌãg koro hap eꞌat putꞌok e mesuwarotiaria wuatꞌi miitꞌin iãꞌãg hamo sio uhemiit sese sio yt hap kuap hap eꞌat sese maꞌato miꞌi hap eꞌat eꞌyian me worohoꞌohep mesuwat yi pyi eiperia katupono worohoꞌokuap taꞌyn uhehay nug motꞌi haria eipe hap atikuap taꞌyn e. Miꞌi pote mekewat eꞌat wuatꞌi iãꞌãg hap yt putꞌok e i eiwat ehãꞌãg hamuat e.
11 Pywo ti rat ariot merepꞌe hap ewy e. Yt uwe i Uito hawyi meremo aremoherep i. Ahut hap eꞌat pe worohoꞌopainug eipe morekuaria wo mekewat eꞌat pe e. Pyno eweimohey ro uiꞌe hap eipyꞌa pe uhuut hap kape e. Yt naku i wẽtup sehay upi neꞌi eweiwat eimaꞌat hap upi neꞌi e. Maꞌato eimaꞌat hap upi eweiwat pote yt atum kuap i eimiẽtup e. Yt worohoꞌonug kuap i morekuaria wo e. Mekewat wuatꞌi eꞌat piat morekuaria wo hap eweipun hawyi.
12 Miꞌi pote are torannia pe uwe uwe iꞌakit ahiagnia piat toiãꞌãg hap yt naku i nug hamuat miꞌi hat uimotypot sese hat topyhuꞌat wuatꞌi eꞌat pe Tupana motypot yat atipy pe e. Aikotã Tupana motypot yat eꞌãkukag iwatoꞌin nakat nu heg kawiat ikahu rakat ewywuat eweikupteꞌen atipy pe aru Tupana motypot yat apyꞌaha wo katupono ahiag miat eimaꞌat hap pun haria yne eweipyhuꞌat pote e. Mekewat eꞌat pe aru eipiit ete atiwan uhet pakup iꞌewyte Uiꞌywot etawa set atipehik ehete mekewat Nusaken Pakup i het rakat atiwan ehete. Mekewat tawa atipy kaipywiat yi kapiat suut hat set mekewat tawa wakuat Uiꞌywot Tupana mipoꞌoro set atiwan aru ehete katupono eheko saꞌag akit haria eweikupteꞌen pote areꞌe uimohey haria tawa Wirateu piaria pe e.
13 Pyno waku ehewaure kaꞌa kahato kat e kat e Tupana Paꞌãu toꞌe Tupana motypot yat piaria pe. Kat e toiꞌatunapin tomohey haria itotiaria hap kape.
Tupana Mienoi Tupana Motypot Yat Tawa Irautiseia Pe
14 Pyno miꞌi hawyi poꞌog toꞌe uhepe -Iuwãu e etiwan no tawa Irautiseia piaria kape e. Uhet Iesui. Taꞌi yt uipo hep hin i pywuat sehay enoi hamuat ete e. Taꞌi saꞌawyꞌi mesuwat mytyyp nug hap eꞌyian mete areineꞌen itote wuatꞌi Tupana Mikyꞌesat Nug Hatno yi atipy aat waty waikiru koꞌi ahaꞌawynug yne Uito e Iesui uhepe.
15 Uimohey haria tawa Irautiseia piaria worohoꞌokuap kahato eipe e. Atikuap kahato aikotã eiwepotpap uimikyꞌesat nug hap ete e. Are paĩ yt haty wo hin i eiwepotpap uipotpap nug hap ete uimikyꞌesat nug hap ete -Hepama waku hap neꞌi eweiꞌe. Eipiit yt aat hakup hin i uipotpap nug hap ete hap atikuap. Iꞌewyte -Aipiit yt raꞌak hin i Tupana potpap nug hap ete eweiꞌe hap atikuap. Maꞌato eiperup i potꞌi eiwepotpap areꞌe. Uiwanetup hawe poꞌog waku haty wo eiwepotpap sio eiperupꞌi sese hap wywo maꞌato -Mukiꞌite ti rat waku watunug eiꞌe hap yt uimowepiit hin i hap e.
16 Pyno yt eipyꞌa pyi i hin i uikyꞌe e. Eiwepotpap wen maꞌato -Arepotpap teran kahato Tupana potpap hap ete haty wo yt eweiꞌe hin i eipyꞌa pe. Miꞌi pote worohoꞌopugha aru e. Yt atikyꞌesat i miꞌi tã haria uipotpap nug haria hap e. Uito atikyꞌesat eipyꞌa pyi eiwanetup hawe -Atunug neran kahato e haria maꞌato yt pote uimopyꞌahak haria wo eweikupteꞌen e.
17 Miꞌi hap ewy arewanetup ehewowi tawa Irautiseia piaria. Maꞌato -Waku kahato rakaria uruto eweiꞌe iraniaꞌin me. Waku kahato uruto eweiꞌe eiwoꞌope. Waku pe kahato uruto eweiꞌe. Ahekat kahato rakaria aito eweiꞌe eiwoꞌope. Aimikyꞌesat oktan topyhuꞌat raꞌyn mesup aipo pe eweiꞌe eiwoꞌope. Maꞌato yt miꞌi tã hin i eweikupteꞌen uiwanetup hawe areꞌe e. Yt naku i pe eweikupteꞌen uikyꞌe ran haria e. Pywo ti rat aikotã satek takaria ewy ti rat eweikupteꞌen e. Aikotã sẽtup i sẽtup i e haria ewy eweikupteꞌen e. Aikotã yt ihapytig i rakaria ewy eweikupteꞌen e. Aikotã yt hesokpe i rakaria ewywuat eweikupteꞌen e. Miꞌi ewywuat eweikupteꞌen mytkai -Waku pe watoineꞌen eweiꞌe eiwoꞌope. Maꞌato yt iꞌatuwepiit hin i rakaria ewy eipe e.
18 Tawa Irautiseia piaria Uimohey haria koitywy worohoꞌonapin neran aikotã ehekat wuatꞌi eꞌat piat sat hap kuap hap ete e. Uimohey haria eweikyiꞌat ro uipo pyi ehekat sese yt ikahuro rakat i e. Toineꞌen uipo pe hekat kahato rakat wuatꞌi eꞌat piat e. Miꞌi ti aria yt iꞌu kuap i hap ewy e Imehit kahato rakat miꞌi mekewat nu uru kawiat ewywuat e. Miꞌi eweikyiꞌat uikai hawyi hekat rakaria sese rakatno eweikupteꞌen are e. Eweikyiꞌat ro uipo pyi ehesokpe sese wuatꞌi eꞌat piat nuat e. Eipainug ikahu rakat sese mekewat ikytsig sese rakat eweikyiꞌat ro eipainug sese wuatꞌi eꞌat pe hap e. Maꞌato yt pote eiwemoti kahato aru yt kat i ehesokpe turanuat ewy pote eweikupteꞌen wuatꞌi ehamo wuatꞌi eꞌat pe e. Iꞌewyte eweikyiꞌat mohag sese seha pohag eheha moehapytig hamuat wuatꞌi eꞌat piat nuat e.
19 Pywo ti rat uimohey haria uimikyꞌe sese koꞌi atiꞌatunapin meremo atiꞌatuꞌapiheg meremo yt naku i taꞌatunug hawyi uimepytꞌin mote e. Iꞌatuminug saꞌag koꞌi atimoherep kahato iꞌatuepe. Eiwemorem no eiminug saꞌag koꞌi kaipyi hawyi eweiꞌaipok to uhowowi yne ehesaika hap wywo hawyi ewetunug no uimikyꞌesat ewywuat areꞌe yn e.
20 Uimohey haria pywo ti rat areineꞌen ehoꞌokenꞌypy ete hawyi miꞌi kaipyi worohoꞌokay kay -Mehinꞌin manaꞌin are areke teran eiꞌyat pe areꞌe aat kaꞌap Uiꞌywot Tupana motypot yat piaria pe e. Uwe uwe kay kay uiꞌe hap ikuap hawyi uiwesat -Waku Mehin waku Mimi -Ereke ro e. Miꞌi hat pe areke sese hawyi arenuk iwywo iꞌewyte tenuk uiwywo itote -Ereke ro Mehin Mimi e haria pya pe areineꞌen e Iesui ahepe.
21 Saꞌawyꞌi atiꞌakit kahato neꞌi ahiag hawyi areineꞌen wuatꞌi Porekuat no Uiꞌywot yatype e. Iꞌewyte uwe uwe iꞌakit ahiag uiꞌewy iꞌewyte uwe uwe uimohey tokuꞌuro hap kape miꞌi hat pe aru areꞌe -Waku eraꞌapyk to uiwywo mesuwe uiꞌyatype areꞌe aru mekewat uikyꞌe hat pe e.
22 Pyno mio tã are uimohey haria weꞌatunug haria pe mekewat 7 Tupana motypot yat piaria pe yi Asia totiaria pe. Iꞌewyte torannia uimohey haria pe areꞌe waku ehewaure kaꞌa kahato mesuwat uiꞌe hap kape e. Waku eiwewanetup kahato mesuwat Tupana Paꞌãu mienoi kape kat areꞌe sese Tupana motypot yat piaria pe e Iesui ahepe.
