Iesui Aru E Hap 4:1-11
4 Saꞌawyꞌi uito Iuwãu Iesui potmuꞌe 12 ok takat araꞌakasa okenꞌypy ewy atipy pe. Miꞌi puo heremo yne atipy kape. Miꞌi hawyi atipy kaipyi sehay atikuap sehay wen maꞌato hu huꞌe hap ewy -Iuwãu e eriot ro mesuwe atipy kape e. Atimoherep teran epe aikotã aru topyhuꞌat hamuat sese hap e. Yne aru topyhuꞌat uiꞌe hap ewy e uhepe saꞌawyꞌi.
2 Miꞌi hawyi meremo Tupana Paꞌãu uimoehapyhotꞌok aikotã wẽtup ok miit ewy areineꞌen Tupana Paꞌãu wywo. Miꞌi hawyi uhereto atipy kape. Miꞌi tote araꞌakasa yne uimuꞌetu ewy ikahu kahato.
3 Saꞌawyꞌi araꞌakasa Aipotypot Koro Iesui apyk pe wuatꞌi kaꞌiwat no. Ikahu kahato topyhuꞌat itote. Aikotã nu ikahu hekat rakat imehit hap ewy aikotã hẽtyhot merihupꞌokꞌe mekewat nu Iasipi hẽtyhot hap ewy aikotã nu Satuniu ewy Aiꞌakag Koro Iesui kahu hap. Iꞌewyte Morekuat apyk hap apypueri wo toineꞌen ipainug hap weꞌyp ikahu kahato rakat ewy. Aikaꞌiwat eꞌamyap herypꞌi ikahu rakat nu Emerauta mehit hap ewy.
4 Iꞌewyte itote araꞌakasa 24 miit apyk pe Morekuat eꞌamyap apypueri wo saꞌawyꞌi wuaria poꞌog Tupana mohey haria. Iꞌatuesokpe ikytsig kahato rakat. Iꞌatuꞌakag note iꞌatuꞌamãtap hekat rakat nu uru kawiat morekuat painug hap koꞌi.
5 Miꞌi hawyi arahaꞌat i Aipotypot Tupana eꞌamyap wato kape. Miꞌi heiam myi tuwẽtem merep merepꞌe hap koꞌi iꞌatu kahato. Huru huruꞌe kahato itote sehay ewywuat wen hu huꞌe ihay pirik takat ewywuat tuwẽtem itote pyi. Ikahu kahato itote areꞌe uiwepe. Miꞌi hawyi arahaꞌat hawyi araꞌakasa ariãty itote wen maꞌato Tupana Paꞌãu kawiat. Ikahu kahato itote katupono 7 ariãty ewywuat tuwẽtem itote pyi 7 ariãty eiam itote pote hap kape araꞌakasa itote atipy pe.
6 Miꞌi hawyi arahaꞌat i hawyi araꞌakasa hyemyiꞌa iwatoꞌin nakat ewy. Itote Aipotypot wat amyap toineꞌen hyemyiꞌa pyꞌasetpe. Mekewat hyemyiꞌa wato Ewa ete heremo yne aipaꞌãu. Mekewat hyemyiꞌa yꞌy yt ipit pit hin i heremo kahato ipuo aikotã mekewat Nu hekat rakat Tiamante ewy. Miꞌi hawyi araꞌakasa 4 ok atipy piaria itote. Miꞌiria pe ete iha koꞌi yne iꞌatupiit ete. Miꞌi hap kape araꞌakasa.
7 Wẽtup ok atipy piat awyato eowa ewywuat. Wẽtup ok atipy piat Wewato ahup mepyt eowa ewywuat. Wẽtup ok atipy piat miit eowa ewywuat. Wẽtup ok atipy piat hywi wato eowa ewywuat toineꞌen.
8 Yne 4 ok atipy piaria tukupteꞌen topopy kuap takaria 6 ipepo wẽtup atipy piat ete. Iꞌewyte yne iꞌatupepo ete iha koꞌi torannia puo. Ipepo ywytꞌokpy puo iꞌewyte iha koꞌi tukupteꞌen. Miꞌiria yt teꞌeroket hin i maꞌato teꞌeruwepy aat kaꞌap Tupana kape -Wakuat sese En Tupana iꞌatuꞌe. Wakuat sese En Tupana iꞌatuꞌe. Wakuat sese En Tupana iꞌatuꞌe. En yn urueTupana iꞌatuꞌe. En yn urupotypot Sese iꞌatuꞌe. En yn poꞌog poꞌog hesaika torannia kawiat rakat iꞌatuꞌe. Wuatꞌi eminug hap eꞌyian mete ereineꞌen En iꞌatuꞌe. Iꞌewyte mesup te wuatꞌi eꞌat pe ereineꞌen iꞌatuꞌe. Iꞌewyte ikahuro hap ekuekai te ereineꞌen teꞌeruwepy aat kaꞌap meimuẽwat 4 ok takaria atipy piaria.
9 -Uruimotypot motypot kahato En Tupana iꞌatuꞌe. Hãpyk kahato En iꞌatuꞌe. Ewato kahato En iꞌatuꞌe. Urutuwehum wehum kahato ewowi Tupana iꞌatuꞌe. Wuatꞌi eꞌat ieineꞌen hat iꞌatuꞌe. Ereineꞌen no Wuatꞌi Porekuat no iꞌatuꞌe teꞌeruwepy puo meimuẽwat 4 ok atipy piaria.
10 Miꞌiria teꞌeruwepy turan meimuẽwat 24 miit saꞌawyꞌi wuaria poꞌog Tupana mohey haria teꞌeruwepỹꞌãtutuk iꞌatuewa yi kape morekuat wato koro Ewa kape imotypot hamo. Miꞌi hawyi iꞌatueꞌamatap wakuat koꞌi taꞌatuhep iꞌatuꞌakag totepyi hawyi taꞌatupugha Aipotypot py ywytꞌokpype hawyi -Uruporekuat En iꞌatuꞌe. Ereineꞌen no wuatꞌi eꞌat pe wuatꞌi Porekuat no urutoꞌe iꞌatuꞌe.
11 En yn ni urukaꞌiwat urupotypot iꞌatuꞌe. Ewaku hap putꞌok e sakpoꞌe wuatꞌi piat emotypot hamo iꞌatuꞌe. Miꞌi pote uruimotypot motypot En iꞌatuꞌe. Wuatꞌi Mimotypot En iꞌatuꞌe. Wuatꞌi Mimowato En iꞌatuꞌe. Poꞌog poꞌog wuatꞌi kai En iꞌatuꞌe. Iꞌewyte esaika hap poꞌog poꞌog torannia kai iꞌatuꞌe. Waku uruimotypot En katupono urunug Hat En Wuatꞌi Nug hat En mote iꞌatuꞌe. Emowepiit hap sese eminug koꞌi katupono iꞌatukahu hap timoherep Ekahu hap iꞌatuꞌe. Urutuwehum kahato emiium ete emikyꞌesat ewy pote iꞌatuꞌe. Emotypot hap koꞌi yne miꞌi eminug koꞌi iꞌatuꞌe 24 ok takaria saꞌawyꞌi wuaria poꞌog imohey haria.
