Iesui Aru E Hap 7:1-17
7 Miꞌi hawyi uito Iuwãu arahaꞌat yi kape. Miꞌi turan araꞌakasa 4 ok atipy piaria Tupana mipoꞌoro koꞌi yi aipytyp tote wasere hewyry yi totiat pyhyp hamo. Wẽtup Tupana mipoꞌoro toineꞌen yꞌam me aikope aat tuwẽtem hap tote. Miꞌi hawyi toipyhyp sese wasere aat wẽtem hap kaipywiat. Wẽtup Tupana mipoꞌoro toineꞌen yꞌam me aat minꞌe hap tote mekewat aat minꞌe hap kaipywiat wasere pyhyp hamo. Maꞌato wẽtup ok atipy kaipywiat Tupana mipoꞌoro toineꞌen yꞌam me aat posak pe wasere pyhyp hamo. Irokirẽ wẽtup ok Tupana mipoꞌoro kokawiatno toineꞌen aat posak pe yꞌam me kokawiatno wasere pyhyp hamo. Miꞌi tã me taꞌatupyhyp yne wasere aipytyp tote. Miꞌi hawyi yt kat i wasere hewyry aipytyp tote hawyi ihyemyiꞌa wato koꞌi ihy nik kahato raꞌyn. Miꞌi hawyi gaꞌapy ete yt wasere hin i. Miꞌi hawyi gaꞌapy koꞌi yt iꞌywa yt hẽꞌẽ hin i raꞌyn yt kat i wasere pote. Miꞌi kape arahaꞌat yne atipy kaipyi yi kape.
2 Miꞌi hawyi uito Iuwãu arahaꞌat aat tuwẽtem hap kape. Miꞌi turan araꞌakasa wẽtup ok Tupana mipoꞌoro atipy kaipywiat Tupana eropat hat sese. Miꞌi ti topopy puo taꞌam aat wẽtem hap kaipyi. Miꞌi hawyi toikat Tupana eropat haria sese yi totiaria. Tupana eropat hat sese toipuẽti yi tote hawyi toiwan miꞌi miit owatuꞌa miꞌi ete Tupana pusu puo -Uheropat hat sese miꞌi e hamo howatuꞌa ete uwe Tupana emiit sese moherep hamo.
3 Topopy aat wẽtem hap kaipyi turan tuwẽpowat tehay pirik wo wasere pyhyp haria atipy kaipywiaria kape -Wasere pyhyp haria yt eweipyhyp ti teiꞌo wasere yi totiat yꞌy wato totiat. Yt eweiꞌapiheg teiꞌo yi yꞌy e. Aputꞌi te e atimowekuap teran uwe Tupana eropat sese haria e. Iꞌatuewatuꞌa atipehik iwan iꞌatuewatuꞌa tote e tehay pirik wo wasere pyhyp haria pe.
4 Miꞌi hawyi toiꞌatumorania Tupana emiit sese hap mekewat miwan wywuat toiwan iꞌatuewatuꞌa sokpe ete. Miꞌi hawyi atikuap karania. 144 miu miit Tupana watnuat iꞌatuꞌe hap atikuap. Torannia miꞌiria Iuteu ywania meimuẽwat yne aseꞌi pot Isareu emiariru koꞌi. 144 miu miit Iuteu ywania kawiat iꞌatuꞌe hap atikuap.
5 Pyno 12 miu miit aseꞌi Iuta ywania kaipyi Tupana eropat haria sese. Miꞌi hawyi 12 miu miit aseꞌi Hupĩ ywania kaipywiat. 12 miu miit aseꞌi Kate kaipywiat.
6 Miꞌi hawyi 12 miu miit aseꞌi Asa kaipywiat. Miꞌi hawyi 12 miu miit aseꞌi Natari kaipywiat. Miꞌi hawyi 12 miu miit aseꞌi Manase kaipywiat toiꞌatumorania.
7 Miꞌi hawyi aseꞌi Simiãu kaipywiat 12 miu miit. Miꞌi hawyi 12 miu miit aseꞌi Irewi kaipywiaria. Miꞌi hawyi 12 miu miit aseꞌi Isaka kaipywiaria toiꞌatumorania.
8 Miꞌi hawyi aseꞌi Sepurum kaipywiaria 12 miu miit. Miꞌi hawyi 12 miu miit aseꞌi Iuse kaipywiat toiꞌatumorania. Miꞌi hawyi 12 miu miit aseꞌi Pesami kaipywiat toiꞌatumorania. Yne Aseꞌi Pot Isareu haꞌyruꞌin kaipywiaria 12 miu miit torannia Tupana eropat haria sese mesuwat yi tote toiꞌatumorania 144 miu miit Aseꞌi Pot Isareu ywania saꞌyruꞌin 12 ok takaria emiariru emiariru koꞌi mesuwat yi totiaria. Miꞌi hap kape araꞌakasa torannia miꞌiria Iuteu ywania Iesui mohey haria pakup takaria hehay wakuat moherep haria.
Miitꞌin Iꞌatu Rakaria Yt Toimorania Kuap Rakaria
9 Miꞌi hawyi uito Iuwãu arahaꞌat i hawyi araꞌakasa miitꞌin sem kahato yt watimorania kuap i hap ewy. Katupono typyꞌi kahato miꞌiria. Teꞌeruwaꞌatunug Tupana Hũ Kuteiru owa kape Morekuat koro apyk hap tote teꞌeruwaꞌatunug. Tupana Hũ hit Kuteiru motypot hamo teꞌeruwaꞌatunug. Typyꞌi kahato araꞌakasa. Miꞌi hawyi arahaꞌat meimuẽwuaria kape hawyi atikuap yne ywania pyꞌasetpyi teꞌeruwaꞌatunug yt toꞌoꞌewy hin i. Iꞌatupiit koꞌi ihup ikytsig hun. Katupono yne tama kaipyi iꞌatueko yt toꞌoꞌewyꞌewy hin i miꞌiria katupono wuatꞌi pusu kuap hap kaipyi teꞌeruwaꞌatunug wuatꞌi morekuaria etama kaipyi teꞌeruwaꞌatunug Tupana Hũ Kuteiru owa kape. Yne iꞌatupo puat ikahu rakaria ariaꞌyp iaga koꞌi taꞌatuerut Tupana Hũ Kuteiru hit motypot hamo. Taꞌatuesokpe ikytsig nakat ikahu rakat puo tõꞌẽ imotypot hamo.
10 Miꞌi hawyi iꞌatuwẽpapꞌi taꞌatuehay wo -Tupana En yn uruehakyeraꞌat kuap hat katupono Esaꞌyru Iesui ikuꞌuro urukawiatno hawyi emihakyeraꞌat koꞌi wo urutukupteꞌen iꞌatuꞌe. Wakuat En wakuat En iꞌatuꞌe. Waku ereꞌapyk uruporekuat koro wo wuatꞌi eꞌat pe aru iꞌatuꞌe. Eraꞌapyk to eiam ikahu rakat tote. Waku morekuat akag epuratig toineꞌen epope wuatꞌi eꞌat pe iꞌatuꞌe. Wakuat En wakuat En iꞌatuꞌe iꞌatuwẽpapꞌi haty wo.
11 Miꞌi hawyi wuatꞌi atipy piaria iꞌewyte mio tã iꞌatuꞌe iꞌatuwẽpapꞌi meimuẽwaria 24 ok takaria poꞌog imohey saꞌawyꞌi wuat haria teꞌeruwẽpowat iraniaꞌin iꞌewyte te. Miꞌi hawyi meimuẽwat 4 ok takaria atipy piat ieineꞌen haria teꞌeruwepỹꞌãtutuk iꞌatuowa yi kape mekewat wuatꞌi Porekuat Koro Atipy Piat Apyk Piat Iesui motypot hamo -Waku sakpoꞌe En waku sakpoꞌe En iꞌatuꞌe. Poꞌog waku wuatꞌi ewaku hap kai iꞌatuꞌe. Uruimotypot motypot kahato En wuatꞌi eꞌat pe iꞌatuꞌe haty wo iꞌatuꞌe.
12 Pywo sese ti rat En. Uruhewaku En uruimowato En katupono wuatꞌi weꞌeg hap heiam En iꞌatuꞌe. Emiium uruepiat ete urutuwehum kahato iꞌatuꞌe. Uruimowato En uruehay wo iꞌatuꞌe. Eropyhuꞌat ro wuatꞌi mimotypot wo wuatꞌi akag wo. Esaika poꞌog poꞌog wuatꞌi kai iꞌatuꞌe. Wuatꞌi mimotypot sese wo poꞌog poꞌog rakatno ereineꞌen. Ewaku poꞌog poꞌog urutoꞌe. Emiium poꞌog waku urutoꞌe. Emiium waku yne urutoꞌe. En yn Tupana wẽtup yn wuatꞌi eꞌat piat ieineꞌen hat En urutoꞌe. Tupana wo ereineꞌen esaika hap yne esaika hap torannia kai iꞌatuꞌe miitꞌin sem taꞌatuesokpe kytsig puo atipy piaria torannia wywo.
13 Miꞌi hawyi wẽtup ok 24 rakaria apo e uhepe -Iuwãu e etikuap apo uwe miꞌiria miitꞌin sem iꞌatuesokpe kytsig nakat piaria. Etikuap karãpe tukupteꞌen aru miꞌiria yi tote e uhepe.
14 -U paĩ areꞌe yt atikuap i rat. En yn etikuap mehin are. Miꞌi hawyi uiwesat -Pyno ahenoi miꞌiria etiat epe Iuwãu e. Miꞌiria tõꞌẽ tõꞌẽ meikowo taꞌatuhoꞌopot hoꞌopot sese hap kaipyi. Haꞌawyte miꞌiria miitꞌin mimosoꞌopot kahato wo tukupteꞌen yi tote taꞌatumohey Tupana Saꞌyru hawyi e. Wakuaria kahato miꞌiria katupono Tupana Hũ Kuteiru ikuꞌuro iꞌatukawiatno. Taꞌatumohey hawyi Tupana tihep taꞌyn iꞌatuminug saꞌag hap koꞌi e. Saꞌawyꞌi iꞌatuminug saꞌag iꞌatupiit pit hap ewy maꞌato koitywy ikytsig hap ewy teꞌeropyhuꞌat miꞌiria Tupana Hũ Kuteiru suu mikoho koꞌi raꞌyn e. Saꞌawyꞌi iꞌatuminug saꞌag sokpe hun hap ipit pit rakat ewy teꞌeropyhuꞌat e. Maꞌato taꞌatumohey hawyi sokpe koho hap ewy Iesui suu puo hap ewy hawyi ikytsig naꞌyn iꞌatuesokpe teꞌeropyhuꞌat e uhepe.
15 Miꞌi tupono Tupana ehamo tukupteꞌen kuap mesup e. Tupana owa kape teꞌerahaꞌat kuap e. Miꞌi hawyi toꞌoehay Tupana wywo toꞌoewa kape. Miꞌi pote Aipotypot amyap ikahu rakat yatype tukupteꞌen miꞌiria e. Miꞌi pote tukupteꞌen aat kaꞌap ihamo e. Taꞌatueropat aat kaꞌap wuatꞌi eꞌat pe Tupana mikyꞌesat nug hap ete e. Miꞌi pote Tupana yt paa e hin i iꞌatuete katupono toineꞌen iꞌatupyꞌasetpe taꞌatueTupana wo e uhepe.
16 Saꞌawyꞌi Miitꞌin misatyꞌi satyꞌi kahato haria miꞌiria miitꞌin mimoesyꞌat koꞌi wo tukupteꞌen e. Teꞌereꞌyꞌutui kahato pykai yt kat i yꞌy taꞌatuium e. Saꞌawyꞌi taꞌatuhoꞌopot aat kaꞌap imohey pote e. Miitꞌin mimosoꞌopot motpap wiat haria iꞌatupiit sero hakup pono haria e. Koitywy yt hakup i haria wo yt iãꞌãg haria wo i raꞌyn tukupteꞌen e. Koitywy waku pe tukupteꞌen e. Yt kat i poꞌog hoꞌopot hap katupono Tupana mipoi koꞌi tukupteꞌen e. Koitywy Tupana mowepiit aat kaꞌap takaria wo tukupteꞌen miꞌiria e uhepe.
17 -Koitywy Tupana Hũ Kuteiru topyhuꞌat iꞌatuꞌapykok hat sese. Toiꞌatuꞌapykok mekewat Morekuat eꞌamyap ikahu rakat rote pyi. Koitywy Tupana Saꞌyru topyhuꞌat iꞌatupoi hat e. Teꞌereꞌyꞌutui hawyi Tupana Hũ hit timoherep yꞌy wakuat rakat yt ipit pit hin i rakat aimoieineꞌen wuatꞌi eꞌat piat hat yꞌy e. Toiꞌatuꞌykesat yresa sese koꞌi kape iꞌatumoieineꞌen sese hamo e. Tupana sese topyhuꞌat iꞌatumowepiit hat -Uhaꞌyruꞌin uhakiꞌytꞌin waĩ ehekiri teiꞌo e. Koitywy ti aru yt karamuo i raꞌyn eheha hy hom homꞌe ehekiri hap upi e. Atihep yne ehepiat hatyꞌu hap e. Koitywy wuatꞌi eꞌat pe eweikupteꞌen waku pe eweikupteꞌen e Tupana Hũ Kuteiru Hit mekewat hoꞌopot haria kape e uhepe mekewat wẽtup ok 24 rakaria kaipywiat hat. Araꞌakasa yne mekewat kape uimuꞌetu Uito Iuwãu.
