Iesui Aru E Hap 8:1-13
8 Miꞌi hawyi mekewat Kuteiru tipik taꞌyn popera mosatꞌe hap torannia raꞌyn mekewat 7 hap taꞌyn. Toipik yne raꞌyn hawyi iꞌatupoꞌinik yne atipy piaria. Wẽtup ora patꞌok turan yt uwe hin i ihay atipy pe hap kape araꞌakasa. Ipoꞌinik sese itote toipik yne raꞌyn mote.
2 Miꞌi hawyi araꞌakasa raꞌyn 7 ok takaria atipy piat gupteꞌen haria Tupana pyꞌasetpe imikyꞌesat nug hanuaria. Yne miꞌiria kape tutum hu huꞌe hap akuara wato.
3 Miꞌi hawyi wẽtup ok atipy piat ieineꞌen hat putꞌok e raꞌyn mekewat aimiium Tupana kapiat yparakai wato Tupana ywyt pe. Toineꞌen ipo pe heiam nu imehit rakat kawiat. Toineꞌen mekewat heiam me mohag hy ikamhig se rakat wẽtup ok miium iwuk hamuat. Saꞌawyꞌi wuat aimiium Tupana kapiat ieineꞌen hap tote toineꞌen Tupana emiit iꞌatumienoi Tupana kapiat ywytpe. Miꞌi hawyi wẽtup ok tum tope ahehay Tupana kapiat sehay wuatꞌi imohey haria ehay Tupana kapiat sehay ewywuat mekewat mohag ikamhig se rakat ewywuat. Miꞌi totopag heiam me mohag hy puo hawyi toiwuk Tupana mowepiit hamuat.
4 Miꞌi hawyi mekewat heiam kaipyi taꞌam naꞌyn ywyhig iꞌatumiẽtup Tupana kapiat eꞌyhig. Miꞌi turan heiam toineꞌen Tupana yatypiat ieineꞌen hat po pe raꞌyn. Miꞌi hawyi ikamhig se rakat taꞌam aria upi Tupana kape imowepiit hap.
5 Miꞌi hawyi mekewat atipy piat tipag naꞌyn aria teiam kamuti pe yparakai aikope aria wo watum aimiium Tupana kapiat hap tote pyi hawyi toto kamuti topo piat wywo hawyi toipun naꞌyn yi kape aipytyp kape. Toipun naꞌyn yi kape hawyi atikuap sehay yi tote hu huꞌe hap ewy ihay pirik. Miꞌi hawyi merep merepꞌe iꞌewyte mytyyp tyryꞌe kahato.
6 Miꞌi hawyi 7 ok takaria iꞌatuehu hu iꞌaturania tukupteꞌen iꞌatupo pe iꞌatumopy wuat.
Saꞌawyꞌi Wuat Hu Hu E Hap
7 Miꞌi hawyi wẽtup ok i hu huꞌe raꞌyn tuwepy raꞌyn. Miꞌi pote iꞌaman ewy nukara toꞌopype suu wywo tuwemoherep. Miꞌi hawyi taꞌat raꞌyn yi kape. Miꞌi pote gaꞌapy piat wukꞌe raꞌyn ariaꞌyp watoꞌin iꞌewyte gaꞌakyt hyp koꞌi ipatꞌok wukꞌe raꞌyn.
Hu Hu E Hap Typy Rakat
8 Miꞌi rakirẽ wẽtup ok tuwehuhupy akuara wato. Miꞌi ti imipy typy hap. Totopy raꞌyn mote wẽtup yityꞌok aria kawiat taꞌat yꞌy wato pe. Miꞌi hawyi yꞌy wato puaria hoꞌopap kahato wẽtup ikuꞌuro myẽꞌym puo yꞌy piaria.
9 Miꞌi pote yꞌy wato piat gupteꞌen haria hoꞌopap taꞌyn yne yꞌy hit upi yꞌy wato upi. Iꞌewyte yara wato koꞌi ipatꞌok taꞌyn toimoma.
Hu Hu E Hap Myẽꞌym Nakat
10 Miꞌi hawyi wẽtup ok i 7 ok takaria tehuhupy. Miꞌi wyti iꞌokhyt pun naꞌyn waikiru iwato rakat ewywuat taꞌat raꞌyn atipy kaipyi yꞌy hitꞌi koꞌi ete.
11 Mekewat waikiru set nop e hap katupono taꞌat raꞌyn mekewat waikiru yꞌy hitꞌi koꞌi piat hawyi iꞌewyte nop taꞌyn iꞌewyte yresa koꞌi teꞌeropyhuꞌat nop taꞌyn. Miꞌi hawyi miitꞌin teꞌereꞌyꞌu mekewat nop takat wo hawyi topap taꞌyn.
Hu Hu E Hap 4 Rakat
12 Miꞌi hawyi wẽtup ok i 7 ok takaria iꞌuhu teꞌakuara wato hawyi wãtym naꞌyn aikope aikope yt hẽtyhot hin i raꞌyn aat waty iꞌewyte waikiru ihatꞌok puo yt hẽtyhot hin i yt heremo i raꞌyn aikotã wãtymꞌi ewy aikotã wãtym yt heremo i hap ewy.
13 Miꞌi hawyi arahaꞌat hawyi uheha wo atikuap wẽtup ok atipy piat ywaiti pe topopy raꞌyn yi totiaria muꞌe hamo. Miꞌi kaipyi sehay atikuap ihay pirik wo toꞌe -Yt naku i kahato yt naku i kahato yt naku i kahato topyhuꞌat irane mesuwe katupono toineꞌen myẽꞌym atipy piaria yt iꞌuhu teꞌakuara wato i te taꞌatuehuhu myẽꞌym ok takaria e tehay pirik wo yi totiaria pe.
