Iesui Aru E Hap 9:1-21
9 Miꞌi hawyi uito Iuwãu arahaꞌat i hawyi araꞌakasa wẽtup ok atipy piat Tupana eropat hat mekewat 7 ok takaria kaipyi wẽtup ok 7 ok hap. Miꞌi iꞌuhu teꞌakuara wato. Hu huꞌe hawyi wẽtup ok atipy piat taꞌat yi kape waikiru wato aat hap ewy. Maꞌato mekewat atipy kaipywiat waikiru ewywuat hẽtyhot kahato rakat toineꞌen. Miꞌi hawyi Tupana tum naꞌyn tope tesaika hap yi kaꞌa wato saꞌag okenhypꞌok hamo yi kaꞌa yn nakat yt ikaꞌa sasat rakat i okenhypꞌok hamo.
2 Tohoꞌoꞌokenhypꞌok hawyi heꞌyhig hun am yi kaꞌa wato pyi aikotã go wato wuk hap ewy. Miꞌi hawyi ywyhig hun tomoꞌypyryp yne raꞌyn aat iꞌewyte yt hẽtyhot kuap i raꞌyn mekewat ywyhig hun taꞌam yi kaꞌa pyi pote.
3 Miꞌi hawyi hewo hewo mekewat ywyhig hun kaipyi pohit iwato kahato koꞌi sem kasi kasi iwato kahato koꞌi sem tuwenoꞌẽ mekewat ikaꞌa wato pyi. Miꞌiria pe Tupana tum sapot ewywuat haty hap miitꞌin atumosoꞌopot hamuat miitꞌin hok hok hap hamuat.
4 Miꞌi hawyi Tupana toꞌe kasi kasi wato pohit wato saꞌag koꞌi pe -Yt ewetuꞌu teiꞌo poꞌog upip yhop ariaꞌyp koꞌi e. Maꞌato eweiwat ro miitꞌin iraniaꞌin kape iꞌatumosoꞌopot hamo areꞌe e. Yt kat i miwan Uhet etiat rakaria iꞌatuowatuꞌa ete pote waku etiꞌatumosoꞌopot ihok hok hap mywo e.
5 Miꞌi hap ete 5 ewaty iꞌypyryp we eweimosoꞌopot ro miꞌiria e. Maꞌato yt eweiꞌauka teiꞌo maꞌato aikotã sapot piat miitꞌin hok hap turan wuat saty hap ewy o ewetunug miꞌiria e Tupana sapot iwato kahato ewywuaria pe. Miꞌi hawyi tuwat raꞌyn pohit kasi kasi koꞌi miitꞌin hok hok hamuat. Yt Tupana mohey i haria iꞌatuꞌapiheg hamo.
6 -Haty paĩ haty an iꞌatuꞌe haty kahato uhete haty kahato uhete kak iꞌatuꞌe kak iꞌatuꞌe. Urukuꞌuro teran urukuꞌuro teran iꞌatuꞌe maꞌato guꞌuro hap pya kahato urukai iꞌatuꞌe toꞌope. Uiꞌauka ro iꞌatuꞌe maꞌato 5 ewaty turan taꞌatuhoꞌopot maꞌato yt uwe i ikuꞌuro.
7 Meimuẽwat kasi kasi wato kahato rakaria koꞌi pohit wato kahato rakaria koꞌi sapot ewywuat miꞌiria owa koꞌi miit ewy. Morekuat ewy iꞌatueꞌamatap imehit rakat kawiat uru kawiat. Iꞌatupiit aikotã surara hũria ewy Kawaru ewy tuꞌuka turanuat teꞌeruwepainug hap ewy iꞌatupiit ete meimuẽwat kasi kasi koꞌi sapot ewywuat koꞌi hap kape arahaꞌat.
8 Iꞌatuiãi koꞌi awyato iãi ewy. Iꞌatuꞌasap koꞌi iꞌywop kahato aikotã makuptia asap ewy.
9 Iꞌatupotiꞌa ete surara ewy iꞌatuꞌauka hap sopo hamo iheg kahato rakat ewy. Miꞌi hawyi teꞌeruwepopy turan iꞌatupopesap ipuehay kahato aikotã surara sem Kawaru totiaria ikohyeput tuꞌuka hamo hap ewy aikotã suraraꞌin eꞌyara sem yi upiat puehay ewy.
10 Iꞌatusuwaipo miitꞌin hok hamuat aikotã sapot ewywuat. Miꞌi wo taꞌatusoꞌopot kahato yt Tupana mohey haria i 5 ewaty turan.
11 Meimuẽwat sapot ewywuat potypot set wuatꞌi moma hat e. Miꞌi yi kaꞌa saꞌag upiaria topyhuꞌat. Iuteuria pusu puat taꞌatusetꞌok Apatãu iꞌatuꞌe maꞌato Kereku pusu puo Apariãu iꞌatuꞌe ahiag iꞌatuꞌe.
12 Pyno wẽtup raꞌyn tokosap hoꞌopot hap sese hap maꞌato typy te toineꞌen hoꞌopot hap sese hap katupono typy ok te yt hu huꞌe i te.
Hu Hu E Hap 6 Rakat
13 Miꞌi hawyi uito Iuwãu arahaꞌat i hawyi araꞌakasa wẽtup atipy piat hu huꞌe irane rakat kape. Akuara wato ipo pe toineꞌen. Miꞌi hawyi atikuap sehay aimiium Tupana kapiat yparakai kaipyi yparakai 4 eꞌaut rakat kaipyi mekewat yparakai imehit kahato rakat uru kawiat rakat kaipyi.
14 Miꞌi hawyi toꞌe 6 rakat hu huꞌe hat pe -Mehin e tukupteꞌen yꞌy wato Euwarate ywytꞌokpype iheg me taꞌatukytyt puo yi kaꞌa pe 4 ok takaria e. Miꞌiria saꞌawyꞌi Tupana atoiat haria teꞌeropyhuꞌat maꞌato mesup taꞌatuꞌasaity iheg nakat ete tukupteꞌen yꞌy wato Euwarate e hap het rakat ywytꞌokpype e. Etihep iꞌatukytyt hap kaipyi e.
15 Miꞌi hawyi toto mekewat yꞌy wato Euwarate e hap kape mekewat atipy piat miꞌi hawyi 4 ok takaria toiꞌatuporenotem iꞌatupyhyp hawyi -Aheꞌat raꞌyn iꞌatuꞌe toꞌope aimikyꞌesat saꞌag nug hamo iꞌatuꞌe. Waku watunug aimikyꞌesat saꞌag mesup taꞌyn iꞌatuꞌe. Waku watuwepotpap katupono miꞌi nug hamo ainug saꞌawyꞌi iꞌatuꞌe. Pyno toꞌiro wahoꞌoꞌauka miitꞌin iꞌatuꞌe. Waku yne myẽꞌym miitꞌin kaipyi watiꞌauka wẽtup miit iꞌatuꞌe katupono miꞌi nug hamo watoineꞌen mesup eꞌat pe iꞌatuꞌe. Toꞌiro miitꞌin hoꞌoꞌauka hamo iꞌatuꞌe. Mesup eꞌat aheꞌat miitꞌin sem atuuka hamo iꞌatuꞌe toꞌope.
16 Miꞌi hawyi teꞌeruwaꞌatunug kahato suraraꞌin sem iꞌatu kahato yne teꞌeraꞌapyk iꞌatuhũ okpe tote. Miꞌi hawyi wẽtup ok toꞌe uhepe -Iuwãu e etikuap apo karania surara tukupteꞌen itote miitꞌin atuuka haria apo uhepe. -U yt atikuap i areꞌe hawyi uiwesat -Pywo pe ti iꞌatu kahato yt aimikuap i koꞌi hap ewy tukupteꞌen 200.000.000 suraraꞌin iꞌatu hap tukupteꞌen e uhepe.
17 Miꞌi hawyi uimuꞌetu araꞌakasa mekewat suraraꞌin sem taꞌatuhũ Kawaru sem okpe tote. Iꞌatuesokpe iꞌatupyt etiat suraraꞌin wat ewywuat taꞌatuꞌauka hap sopo hap maꞌato aria kawiat toineꞌen nu hup ewy aria sapuẽ hapyke rakat ewy. Miꞌi hawyi iꞌatuhũria Kawaru akag koꞌi awyato akag ewy. Miꞌi hawyi taꞌatuwẽ pyi tuwẽtem aria ẽty hun ytyghe wuk hap ewy tuwẽtem haty wo iꞌatuwẽ pyi miitꞌin hoꞌoꞌatuꞌuka hamo.
18 Miꞌi hawyi mekewat aria iꞌatuwẽ pywiat hoꞌoꞌauka kahato miitꞌin myẽꞌym kaipyi wẽtup miit taꞌatuꞌauka.
19 Iꞌatuesaika hap topyhuꞌat iꞌatuwẽ pyi miitꞌin auka hamuat. Katupono aria sapuẽ hapyke rakatno taꞌatuꞌatuowa iraniaꞌin taꞌatuwẽpyi. Iꞌewyte iꞌatusuwaipo ãpy ete moĩ akag ewy. Iꞌatusuwaipo wo miitꞌin mosoꞌopot hap topyhuꞌat.
20 Miꞌi hawyi taꞌatuꞌatumoma kahato miitꞌin yi totiaria 30 kaipyi 10 ok miit taꞌatumoma kahato miitꞌin. Maꞌato miꞌi pykai iraniaꞌin yt ikuꞌuro i rakaria yt teꞌeruwemorem hin i Tupana kape. Teꞌeraꞌakasa yne hoꞌopot hap pykai yt paa iꞌatuꞌe hin i. Taꞌatumotypot rẽ ahiagnia. Taꞌatunug ne tupanaria hekat rakaria ihup ikytsig ikaꞌay rakaria taꞌatuꞌatumotypot rẽ. Miꞌi hawyi taꞌatumotypot yt ihapytig i rakaria tupanaria taꞌatuminug koꞌi yt kat kuap haria i yt hewyry kuap i rakaria taꞌatuꞌatumotypot kahato te. Yt taꞌatumotypot teran hin i Taꞌatunug Hat Sese. Taꞌatuhoꞌopot pykai yt teꞌeraꞌaipok hin i Tupana Sese kape.
21 Iꞌewyte taꞌatuminug saꞌag koꞌi yt taꞌatoiat hin i. Miitꞌin auka haria wo te teꞌeropyhuꞌat iꞌewyte paini koꞌi wo te tukupteꞌen ne miitꞌin maꞌat hamo. Taꞌatumaꞌat hap topyhuꞌat mekewat paini mimoherep. Yt nakuaria i tukupteꞌen ne. Iꞌatuewaire atuewaire te. Seroꞌok iꞌatuꞌe te. Miꞌiria Tupana tiꞌatuꞌapiheg kahato pykai yt paa iꞌatuꞌe hin i iꞌatuminug saꞌag nug hap ete. Maꞌato poꞌog taꞌatuꞌatunug yt Tupana mikyꞌesat koꞌi i.
