Iruka 10:1-42
10 Wẽtup eꞌat Iesui tiꞌatuꞌairo iraniaꞌin 70 ok temiitꞌin wo Miꞌiria ti toiꞌatupoꞌoro typy ok tuereto teꞌyian me yne tawa koꞌi kape aikowo toto teran hap tawa koꞌi upi.
2 Maꞌato toiꞌatupoꞌoro hap eꞌyian mete toiꞌatunapin. Mio tã e -Mikoi ypia wyti iwato kahato wen maꞌato ipotpap takaria wyti yt typyꞌi hin i. Miꞌi pote waku ewehẽtup mikoi ypia kaꞌiwat pe mekewat mikoi sat terek hap etiat ipotpap takat nuaria poꞌoro hamo e.
3 -Miꞌi hawyi eweiwat ro e maꞌato worohoꞌopoꞌoro hawyi eweikupteꞌen eipe aikotã Uweiria koꞌi tukupteꞌen Awahuru koꞌi pyꞌasetpe hap ewy.
4 Maꞌato yt eiwetioto teiꞌo ehekuriwuꞌa iꞌewyte ehesokpe eiam iꞌewyte yt eipy sokpe i wy ti. Iꞌewyte yt eweipyhuꞌat reiꞌo muap upi iraniaꞌin wywuat ehehay hamo.
5 Karãpe putꞌok eweiꞌe hawyi eiwehytꞌok wẽtup getap we hawyi waku saꞌawyꞌi ewehẽtup -Uikyꞌesat woꞌowese hap meiũwat getap piaria wywo eweiꞌe.
6 Uwe yat pe eweihytꞌok hawyi waku woꞌowese hap ewehẽtup Tupana kaipyi itotiaria poityro hamuat. Miꞌi hawyi waku rakaria pote eimiẽtup topyhuꞌat itotiaria poityro hamuat maꞌato yt iꞌatuwese i pote eimiẽtup Tupana kaipyi taꞌaipok taꞌyn eimiẽtup hap.
7 -Miꞌi Hawyi waku eweikupteꞌen mekewat eikyꞌe haria yat pe yn. Itote yn waku ewehenuk iꞌewyte eweꞌyꞌu. Kat som iꞌatumiium waku ewetuꞌu katupono ipotpap takaria ti aru hum ehepe eipo saꞌup. Miꞌi tupono yt kat hamo i ehewyry kowoꞌi kowoꞌi iraniaꞌin yat puo.
8 Karãpe eiwehytꞌok tawa piat turan ti aru eikyꞌe kahato miꞌiria miium waku ewetuꞌu.
9 Waku eweiꞌatumoehãite mekewat tawa piaria hawyi waku eweiꞌe itotiaria miitꞌin me -Tupana toineꞌen morekuatno hap wyti putꞌok e raꞌyn mesup ehete eweiꞌe.
10 Maꞌato karãpe eiwehytꞌok tawa piat turan yt eikyꞌesat i hawyi waku eiwenoꞌẽ tawa pyꞌasetpuo muap upi hawyi eweiꞌe
11 -Tawa sawiu urupy etiat uruipit pitꞌok yt urukyꞌe i ehepiat hap moherep hap. Miꞌi hap ete aru eweikuap taꞌyn yt pya hin i Tupana toineꞌen morekuatno ehewowiat hap maꞌato yt eweikyꞌesat i.
12 Miꞌi hawyi poꞌog Iesui toꞌe -Taꞌi mekewat eꞌat pe ti aru Tupana uwe waku uwe yt tohenoi hamo mekewat tawa yt eikyꞌesat hanuaria Tupana apiheg haria wo teꞌeropyhuꞌat. Miꞌiria ti poꞌog yt nakuaria i wo teꞌeropyhuꞌat saꞌawyꞌi wuat tawa Sutuma piaria kai. Saꞌawyꞌi wuat tawa Sutuma Tupana miwuk wo topyhuꞌat e. Maꞌato mekewat tawa yt eikyꞌesat haria poꞌog iꞌatuꞌapiheg hap topyhuꞌat e Iesui topotmuꞌeria pe.
13 Miꞌi hawyi poꞌog tohenoi tawa koꞌi puaria yt tomohey haria i etiat -Pywo pe ti tawa Kurasĩ miaria gupteꞌen haria iꞌewyte tawa Pesaita piaria Tupana miꞌapiheg haria wo teꞌeropyhuꞌat wen maꞌato miꞌiria teꞌerehaꞌat uiminug wakuap koꞌi kape eiperia eimiꞌakasa hap ewy pote meremo teꞌeruweꞌaipok taꞌyn Tupana kape. Teꞌerehaꞌat uiminug hap koꞌi kape pote sokpe iꞌanam nakat taꞌatunug taꞌatupiit ete weꞌaipok hap Tupana kapiat moherep hamo. Iꞌewyte ywyryp koꞌi taꞌatunug taꞌatuꞌakag note e Iesui.
14 Taꞌi Nimo kahato tawa Tiro piaria tawa Sitau piaria Tupana miꞌapiheg haria wo teꞌeropyhuꞌat iꞌatuminug saꞌag kaipyi wen maꞌato miꞌiria ti mekewat eꞌat pe karãpe Tupana uwe waku uwe yt tohenoi turan Tiro piaria iꞌewyte Sitau piaria poꞌog waku pe tukupteꞌen uipotpoꞌororia pun haria kai e.
15 Iꞌewyte tawa Kawanaum piaria yt putꞌok eweiꞌe hin i atipy piat pe. -Taꞌi uruto poꞌog naꞌyn toranniaꞌin kai urutopyhuꞌat e haria eipe wen maꞌato eiwemaꞌat neꞌi mio tã eweiꞌe katupono ti aru eikuꞌuro hawyi eikuꞌuro sese rakaria wywo eweipyhuꞌat.
16 Miꞌi hawyi toꞌe i raꞌyn topotpoꞌororia pe -Uwe eimienoi kapiat wanetup hat wyti aru iꞌewyte uimienoi kapiat wanetup hanuat. Yt eikyꞌesat i hat ti aru iꞌewyte yt Uito i wyti uikyꞌesat hat raꞌyn e. Yt uikyꞌesat hat i pote iꞌewyte yt Uipoꞌoro Hat Tupana kyꞌesat hat i e 70 ok takaria pe iꞌatupoꞌoro haype.
Tuwat Raꞌyn Iraniaꞌin Iesui Hewatꞌypmo Piaria
17 Miꞌi hawyi 70 ok takaria Iesui tiꞌatupoꞌoro raꞌyn tawa koꞌi upiat tehay henoi hamo. Miꞌi hawyi 70 ok takaria tuwat hawyi iꞌatukohyewyry hap tawa koꞌi upi miitꞌin muꞌe hamo hawyi teꞌeraꞌaipok i raꞌyn Iesui kape iꞌatuwepiit kahato. Miꞌi hawyi teꞌeroꞌe -Urukaꞌiwat iꞌatuꞌe pywo wyti ahiag tuwat raꞌyn esaika wuat uruiꞌatusopo hawyi iꞌatuꞌe. Eset nywo uruiꞌatusopo kuap kahato ahiagnia iꞌatuꞌe Iesui pe.
18 Miꞌi hawyi Iesui toꞌe i raꞌyn 70 ok takaria pe -Taꞌi uimiium uhesaika hap poꞌog ahiag kai e. Saꞌawyꞌi ahiag atipy pe toineꞌen Tupana yatype hemiitno wen maꞌato tuwemowato teran poꞌog Tupana kai hawyi Tupana tipun ahiag atipy kaipyi yi kape e. Miꞌi hap Uito araꞌakasa ahiag Tupana tiꞌokhytpun turan. Merep merepꞌe hap putꞌok e hap ewy turan taꞌat atipy kaipyi e.
19 Miꞌi pote uimiium uhesaika hap ehepiat poꞌog hesaika ahewanikap sese ahiag kai. Iꞌewyte eikohyewyry hap upi miitꞌin muꞌe uhehay wo turan moiꞌok yt hesaika i ehete iꞌewyte sapot yt haty kuap i eipiit ete e. Pywo pe ti yt kat i eipyhyp kuap eipe uhehay ehewyry hap upi uhehay moherep hamuat turan e Iesui temiitꞌin me.
20 Pywo kahato uhesaika hap toineꞌen eikai ahiag koꞌi sopo hamuat. Miꞌi pote eiwepiit kahato mesup e. Maꞌato poꞌog waku miꞌi kai ehet sese toineꞌen miwan me atipy pe e. Miꞌi ti poꞌog waku ehesaika hap ahiag sopo miitꞌin moehãite hap kai poꞌog waku eweiꞌe eipyꞌa e.
21 Miꞌi hawyi Tupana Paꞌãu timowepiit raꞌyn Iesui hawyi toꞌe toꞌywot pe -Papai waku kahato ti En e. Atipy piat Morekuat nuat iꞌewyte mesuwarotiat Morekuat nuat. Waku kahato en Papai katupono yt etimoherep i emikuap koꞌi -Uruto poꞌog uruweꞌeg iraniaꞌin kai e haria pe. Miꞌiria pe migꞌi wo toineꞌen emienoi koꞌi. Maꞌato hirokaria ewywuaria pe etimoherep taꞌyn emienoi koꞌi emikyꞌesat ewy e Iesui toꞌywot pe.
22 Miꞌi hawyi Iesui toꞌe miitꞌin me -Tupana tum naꞌyn uhepe towatnuat koꞌi apykok hamo tesaika hap e. Taꞌi uiꞌywot yn nyti Uito Tosaꞌyru kuap hat sese e. Iꞌewyte Uito yn nyti uiꞌywot kuap hat e. Maꞌato uwe uwe pe atimoherep teran uiꞌywot kuap hamuat miꞌiria ti aru uiꞌywot kuap haria teꞌeropyhuꞌat e.
23 Miꞌi hawyi tuwemorem naꞌyn temiitꞌin sese kape hawyi toꞌe -Uiwyriaꞌin e Tupana mipoityro sese rakaria wo eweipyhuꞌat katupono eheha koꞌi ewaꞌakasa raꞌyn yt uwe wuat i ewy e Iesui topotpoꞌororia 12 ok takaria pe.
24 Katupono saꞌawyꞌi te wuaria Tupana ehay enoi haria iꞌewyte porekuat nuaria koꞌi hekatup kahato mesuwat eꞌat piat e. Teꞌeraꞌakasa teran eiꞌakasa hap koꞌi kape maꞌato mesuwat eꞌat pe yt putꞌok e i te iꞌatukupteꞌen hap eꞌat pe e.
25 Miꞌi hawyi wẽtup ok miwan enoi hat apo e Iesui pe -Urumuꞌe hat e aikotã som waku uheineꞌen hap sese puẽti hamo atunug e maꞌato yt pywo pe i. Toimaꞌat reran haype neꞌi apo e.
26 Miꞌi hawyi Iesui tiwesat -Etikuap apo aikotã Muisei mienoi koꞌi e.
27 -Taꞌi atikuap e. -Etikyꞌe o Tupana yn epyꞌa pe e. Etikyꞌe yne ewanetup hawe. Etikyꞌe Tupana yne eweꞌeg hawe e. Iꞌewyte etiꞌatukyꞌe iraniaꞌin yne ro ewekyꞌe hap ewy e tomiwan me e miwan enoi hat Iesui apo e hawyi.
28 -Pywo kahato uiwesat en uhyt e Iesui. Miꞌi koꞌi etunug hawyi eieineꞌen hap sese etipuẽti raꞌyn e.
29 Miꞌi pote mekewat miwan kuap hat imowato hap toimoherep taꞌyn pote apo e Iesui pe -Uwe pyno waku atikyꞌe iraniaꞌin apo e.
30 Miꞌi hawyi Iesui henoi sehay iãꞌãkap tope uwe waku watikyꞌe hap enoi hamuat -Saꞌawyꞌi so wẽtup ok Iuteu ywania kaipywiat toto raꞌyn tawa Ierusarẽi kaipyi tawa Ieriko kape. Miꞌi hawyi muap upi tuwemoherep seroꞌok takaria. Miꞌiria muap upiat hat esokpe taꞌatuhep yne hawyi taꞌatuꞌahyk ahyk neꞌi porap taꞌatuꞌauka. Miꞌi hawyi taꞌatuꞌatoiat muap tote e. Iꞌewyte taꞌatueroto yne hekareꞌen e.
31 Taꞌatuꞌatoiat hawyi paꞌi Iuteu kaipywiat toto ipuo e. Miꞌi taꞌakasa hawyi tokosap neꞌi miꞌahyk ahyk ywytpuo e Iesui.
32 Miꞌi hawyi Irewi ywania kaipywiat hat Tupana yat piat motpap nug hat tuut e. Miꞌi ti iꞌewyte ipuẽti mekewat iꞌatumiꞌahyk ahyk maꞌato Iuteu ewywuat tokosap neꞌi iꞌywytpuo e.
33 Miꞌi hawyi meiũran putꞌok e wẽtup ywania mekewat yi Samaria kaipywiat e. Yt Iuteuria ywania mikyꞌe hin i Samaria ywania maꞌato miꞌi pykai mekewat yi Samaria kaipywiat tehaꞌat kahato mekewat miꞌahyk ahyk kape hawyi toikyꞌe kahato topyꞌa pe.
34 Miꞌi hawyi tuwepohagnug mohag ikap takatno iꞌewyte mahy ewy wuatno hawyi sokpe wo raꞌyn toipoꞌi poꞌi. Miꞌi hawyi tohupit raꞌyn tohũ ok tote hawyi getap kapiat totioto hamo. Miitꞌin ket howare pe hawyi hekatuwy wo toineꞌen wãtym muo kaꞌap iꞌapykok hamo e.
35 Eꞌihatꞌok pe hawyi yi Samaria kaipywiat tum naꞌyn saꞌup iwato kahato rakat getap kaꞌiwat pe mekewat seroꞌok miꞌahyk ahyk poi hamo hawyi toꞌe -Etikyꞌe ro meiũwat iꞌahuu rakat e. Miꞌi hawyi ariot hawyi poꞌog atum epe ikyꞌe hap saꞌup mo e.
36 Tohenoi hawyi Iesui apo e raꞌyn Tupana ehay miwan miat enoi hat pe -Uwe kahu meiẽwat seroꞌok takaria miꞌahyk ahyk kyꞌe hat e.
37 Miꞌi hawyi miwan enoi hat tiwesat -Mekewat yi Samaria kaipywiat iwese rakat ikyꞌe kahato hat e. Miꞌi hawyi Iesui toꞌe -Pyno ereto ro iꞌewywuat nug hamo ewanikaptia kyꞌe hamo e mekewat Uwe waku watikyꞌe iraniaꞌin apo e hat pe.
Mata Hawyi Maria Etiat
38 Miꞌi hawyi Iesui temiitꞌin wywo putꞌok iꞌatuꞌe wẽtup tawa pe. Miꞌi tote haryporia Mata e hap het rakat -Eiwehytꞌok o uiꞌyat pe Mimi e Iesui pe.
39 Miꞌi hawyi teꞌeruwehytꞌok hawyi mana Mata kypyꞌyt Maria toineꞌen Iesui yatype imienoi kapiat tuwanetup hamo.
40 Maꞌato mana Mata ipotpap yn miꞌu toiꞌatuꞌanug kahato Iesui moenuk hamo. Ikypyꞌyt yt ipowyro i hawyi ipyꞌahak taꞌyn tokypyꞌyt ete hawyi toꞌe -Uiporekuat e uikypyꞌyt Maria wyti yt uipowyro hin i e Iesui pe. Uiweran kahato uipotpap an e. Pyno etipoꞌoro o uikypyꞌyt Maria uipowyro hamo e.
41 Miꞌi hawyi Iesui tiwesat -Mata e eminug koꞌi kape yn erewanetup kahato e.
42 Waku wen maꞌato toineꞌen poꞌog waku hap uimiꞌu nug hap kai katupono uhehay kuap hap mana Maria tiꞌairo raꞌyn e. Pywo kahato uikuap hap mana Maria piat wyti aru yt uwe i ihep kuap uiꞌyatype tuwemuꞌe hap e Iesui mana Mata pe.
