Iruka 14:1-35
14 Miꞌi hawyi yt iꞌatupotpap i hap eꞌat pe putꞌok e itote Tupana motypot yat pyi wẽtup getap kape Iesui toto Tupana motypot yat piaria apykok hat yat kape toto. Itote iꞌatu kahato nagnia ehay enoi haria. Itote Iesui taꞌapyk tenuk iꞌatuꞌakag wywo hamo. Miꞌi hap kape teꞌerahaꞌat kahato Iesui kape. Taꞌatukyꞌesat kahato Iesui tiꞌaparap hap.
2 Itote ti toineꞌen ihainia iꞌahuu kahato rakat ipiit puk takat.
3 Miꞌi turan Iesui apo e Itotiaria pe -Waku apo miitꞌin moehãite hamuat yt motpap i hap eꞌat pe turan sio yt apo e.
4 Maꞌato yt taꞌatuwesat hin i. Miꞌi hawyi Iesui tipopytyk ipiit puk takat ipo hawyi ipiit puk takat ihãite i raꞌyn topyhuꞌat. Miꞌi hawyi Iesui imimoehãite rakat pe -Pyno waku raꞌyn eete mehin e. Waku ereto i ro eꞌyat kape e.
5 Toto hawyi Iesui toꞌe itotiaria pe -Worohoꞌokuap eipe. Eihũ Wewato ahup taꞌat yi kaꞌa pe yt aipotpap i hap eꞌat pe turan enotem hap ete eipotpap miꞌi hap eꞌat pe pywo are sio yt. Taꞌi pywo miꞌi tã ti ewetunug yt naku i aipotpap e hap eꞌat pe pykai.
6 Miꞌi hawyi iraꞌyn yt taꞌatuwesat kuap i.
Eweꞌeg Wo O Eweiꞌapyk Wenuk Iwato Rakat Tote
7 Miꞌi hawyi toiꞌatumuꞌe i tehay iãꞌãkap wo Iesui katupono toikuap itotiaria teꞌeruwemowato hap pote. Taꞌatukyꞌesat morekuat eꞌyparakai totiat taꞌatuꞌapyk ienuk hap eꞌat turan. -Uito poꞌog torannia kai taꞌatuꞌe hap moherep teran haype. Morekuat eꞌokipy tote teꞌerenuk teran.
8 Miꞌiria pe Iesui toꞌe -Uhytꞌiꞌin karapeĩ eikay kay woꞌokyiꞌat hap kape hawyi yt eiwoꞌoꞌapyk teiꞌo iwatoꞌin nakaria eꞌamyap tote eiwemowato haype hap e. Pyno poꞌog waku yi kape rakaria wywo ereꞌapyk. Iwatoꞌin rakaria wywo hawyi putꞌok e wẽtup ok poꞌog ekai hawyi emohit hap topyhuꞌat.
9 Miꞌi hawyi aru ienuk hap kaꞌiwat toꞌe aru ehepe -Apuete uhyt etum no eꞌamyap meiũwat uiwy pe e aru. Miꞌi hawyi eraꞌapyk kuepe e aru. Miꞌi pote aru eiwemoti hap kahato topyhuꞌat ehete e.
10 Miꞌi pote worohoꞌonapin teran uhytꞌiꞌin. Karãpe ekay kay ienuk hap kape turan waku eraꞌapyk yt uwe mikuap i yatype. Miꞌi pote aru ienuk kaꞌiwat tuut ehewowi hawyi -Poꞌog waku morekuat amyap tote ro eraꞌapyk uhyt e aru ahepe. Miꞌi hawyi emotypot hap itote topyhuꞌat. Iꞌewyte aru itotiaria ekuap taꞌyn morekuaria mimotypotno ereineꞌen hap are.
11 Katupono uwe iwemowato rakaria iwemohit haria wo tukupteꞌen. Maꞌato uwe wemohit haria miitꞌin mimotypot haria wo teꞌeropyhuꞌat e.
12 Miꞌi hawyi tuwemorem hawyi Iesui toꞌe i ienuk kaꞌiwaria pe -Uhytꞌiꞌin e karãpe ienuk hap iwato rakat ewetunug pote yt eweiꞌatukay kay ienuk hap pote meiũran iꞌewyte eikay kay taꞌatuenuk wato hap kape eipoi hamo. Yt eweiwẽka teiꞌo eiwyriaꞌin hekat rakaria ekatuwyria iꞌewyte ewyriaꞌin sese yt eweikay kay teiꞌo.
13 Poꞌog waku eweiꞌatukay kay eiꞌyat kape tenuk hamo hatek sese rakaria ipiit saꞌag nakaria ipy saꞌag nakaria poꞌog waku eweiꞌe. Waku yt ihapytig i rakaria yt miitꞌin mikyꞌe koꞌi i eweiꞌatukay kay eiꞌyat kape ienuk hamo.
14 Pyno miꞌi tã eiminug hap kaipyi eipotyro kahato hap topyhuꞌat. Miꞌiria ti hatek takaria yt karãpe i eimoenuk kuap i. Miꞌi hawyi eweinoꞌẽ eikuꞌuro hap pyi hawyi aru taꞌaipok kahato ehewowi waku hap koꞌi ehegyiꞌat hap kaipyi e Iesui.
Wenuk Nug Hat Saꞌawyꞌi Wuaria Imikay Kay Yt Tõꞌẽ I
15 Miꞌi hawyi wẽtup ok miit itote Iesui ehay toikuap hawyi toꞌe -Ikahu kahato tig ehay e. Pywo uwe toineꞌen Tupana porekuatno ieineꞌen hap tote ienuk wato hap eꞌat pe turan Tupana mipoityro sese rakaria wo teꞌeropyhuꞌat e.
16 Miꞌi hawyi Iesui tiwesat iãꞌãkap wuo -Pyno ahenoi ehepe miꞌi iãꞌãkap wuo. Wẽtup eꞌat pe so hekat kahato rakat tiꞌatukay kay kahato tominug ienuk hap iwato kahato rakat kape.
17 Miꞌi hawyi ienuk waku raꞌyn hawyi toipoꞌoro temiit yne imikay kay rakaria kape henoi hamo. -Eweiõꞌẽ ro waku raꞌyn aimiꞌu raꞌyn e hamo.
18 Maꞌato -Apuete iꞌatuꞌe. Yt naku i te mesup areto e. Etikuap kat pote yt uipohepap i te mesup katupono atikyiꞌat raꞌyn mesup yi wakuat uiweko nug hamuat hawyi areto raꞌyn Iꞌakasa hamo e. Pyno waku ereꞌe morekuat pe -Yt uiwepyi yt areto kuap enuk hap waku ere morekuat ienuk kaꞌiwat pe.
19 Miꞌi hawyi wẽtup ok pe i -Toꞌiro morekuat enuk hap kape mehin e. Miꞌi ti toiwesat -Waku mehin e wen maꞌato ti mesup te yt areto kuap i e yt uipohepap i te mesup katupono naꞌatpo atikyiꞌat 5 Wewato ahup. Miꞌi pote mesup areto uiꞌakasa hamo waku sio yt hap kuap hamo. Pyno miꞌi pote ereꞌe o ienuk kaꞌiwat pe -Areto teran wen waku kahato hap kape maꞌato yt areto kuap i. Pyno waure wo o toineꞌen uikai mehin e.
20 Miꞌi hawyi ienuk kaꞌiwat emiit wẽtup ok kape toto ienuk waku e hap etiat henoi hamo. -Aimiꞌu raꞌyn mehin e. Pyno toꞌiro mehin e. Miꞌi hawyi toiwesat -Pyno waku areto teran ni maꞌato ti yt uipohepap i te koitywy ienuk hap kape e. Gaꞌatpo uiwoꞌokyiꞌat hap eꞌat pe hawyi uheharyꞌi pakup wywo areineꞌen neran e. Pyno waku ereꞌe ekaꞌiwat pe -Waure wo soke ereineꞌen ere yt uipohepap i waku ere ekaꞌiwat pe e.
21 Miꞌi hawyi heropat hat taꞌaipok i raꞌyn tokaꞌiwat kape. -Yt tõꞌẽ i wyti ewyriaꞌin e hamo. Ienuk kaꞌiwat temiit mienoi hap toikuap hawyi ipyꞌahak kahato iꞌatuete hawyi toꞌe temiit pe -Pyno ereto i ro wuatꞌi muap wato upi wuatꞌi muap hit koꞌi upi. Miꞌi hap upi etiꞌatukay kay wuatꞌi hakyꞌeꞌi rakaria hatek takaria uhenuk hap kape e. Waku etiꞌatukay kay yne tawa wato piaria yt hekat rakaria ipykiã rakaria yt ihapytig i rakaria yt hewyry kuap i rakaria ipiit saꞌag nakaria yt uwe mikyꞌe i koꞌi miꞌiria meikowo henuk hap kape etiꞌatukay kay ro e morekuat temiit pe.
22 Miꞌi hawyi temiit toto raꞌyn tokaꞌiwat enoi hap ewy nug hamo. Waku hawyi taꞌaipok taꞌyn tokaꞌiwat pe enoi hamo. -Uikaꞌiwat eꞌe hap ewy atunug naꞌyn maꞌato ienuk yat yt hawopy hin i te e tokaꞌiwat pe.
23 Miꞌi pote morekuat toꞌe -Are paĩ e pyno waku ereto ro yne muap hit i koꞌi upiat muap iwato rakat upi miitꞌin kay kay hamo e. Yne tawa hit koꞌi kape gaꞌapy piaria kape e. Miꞌiria etiꞌatukay kay meikowo hamo e. Katupono ti atikyꞌesat uiꞌyat pytꞌat nug yne miitꞌin miat hap e.
24 Saꞌawyꞌi wuaria uimikay kay koꞌiria uimopyꞌahak kahato uiwyriaꞌin sese miꞌiria pykai yt karãpe i aru miꞌiria teꞌerenuk uimiꞌu wakuat rakat ete.
25 Miꞌi hawyi Iesui toto i raꞌyn hawyi typyꞌi rakaria miitꞌin tuwat raꞌyn hupi. Miꞌi hawyi tuwesaipeꞌok toupiat õꞌẽ haria muꞌe hamo.
26 Eweipyhuꞌat teran uipotpoꞌororia uhemiit sese wo pote waku eweikupteꞌen uimikyꞌesat ewywuat nug haria wo e. Uhupi ereto hap etikyꞌesat pote waku eweitoiat kuap yne ewyriaꞌin eꞌywot ety eharyꞌi emepytꞌin eheꞌykeꞌet eheywyt ekypyꞌyt e. Waku uikyꞌe hap poꞌog miꞌiria kai toineꞌen epyꞌa piat pe e. Iꞌewyte waku eweiꞌe kuap -Uikuꞌuro pote uikuꞌuro maꞌato areto eupi waku eweiꞌe kuap uhemiit ereineꞌen neran mote. Pywo yt mio tã ewetunug kuap pote yt putꞌok eweiꞌe uipotmuꞌe haria wo e.
27 Maꞌato eweikenꞌẽ eikuꞌuro hap pupi pote ariaꞌyp posak ete eikuꞌuro hap yt eiwehupit kuap i pote yt eweiwat kuap i uhupi uhemiitꞌin sese wo uipotpoꞌororia wo e.
28 Pyno so wẽtup ok surara akag tunug neran ywaiti rakat tawa apykok hamuat hap pote saꞌawyꞌi inug hap eꞌyian me te tuwanetup kahato karania upi miꞌi hap nug hamuat sio tekat putꞌok e inug hamo sio yt hap kuap hamo.
29 Miꞌi hawyi tuwepe toꞌe -Pyno uiweꞌeg wo mesuwat nug hap ete e. Yt naku i atunug ipatꞌok yn e. Maꞌato ahaꞌawynug hap yn mote miꞌi hawyi uhekat yt putꞌok e i raꞌyn hawyi miitꞌin mikyryꞌi areineꞌen aru e.
30 Pyno waku atunug yne e katupono ipatꞌok yn atunug kuap pote ten toꞌokyryꞌi kahato uiminug ipatꞌok hap ete e.
31 Pyno saꞌawyꞌi so wẽtup tawa porekuat timoma teran hewanikaptia hesuraraꞌin wywo wen maꞌato tuwat wuuka nug hamo owakai tuwanetup kahato sio tesuraraꞌin 10 miu rakaria taꞌatumoma kuap hewanikaptia esuraraꞌin 20 miu rakaria.
32 Morekuat yt timoma kuap e hawyi toipoꞌoro raꞌyn temiitꞌin tewanikaptia õꞌẽ haria kape tukupteꞌen ne muap upi te turan woꞌowese hap puẽti hamo.
33 Pyno mesuwat uhehay iãꞌãkap wuo ahenoi teran ehepe aikotã waku eweiwat uhupi hap uhemiitꞌin sese watnuat hap. Katupono yt eweitoiat kuap i yne mesuwarotiat hap koꞌi pote yt putꞌok eweiꞌe uhupi eweiwat hamo e Iesui areto teran ehupi e haria pe.
Topotmuꞌeria Ukyt Ewy Teꞌeropyhuꞌat
34 Miꞌi hawyi Iesui toꞌe temiitꞌin me -Pyno eiperia aikotã ukyt ewy eweikupteꞌen e. Pywo ukyt hẽꞌẽ kahato waku kahato aimiꞌu mosẽꞌẽ hamo. Maꞌato ukyt yt naku i rakat yt he i pote yt toimoseꞌe kuap I aimiꞌu. Yt kan hamo i e.
35 Ukyt yt naku i pote yt putꞌok e aimikoi ete. Miꞌi pote miitꞌin mipugha muap tote ahetama pe. Pyno waku ehewaure kaꞌa apypok kahato uhehay kape e Iesui toupiat wat haria pe muap upi.
