Iruka 15:1-32
15 Miꞌi hawyi putꞌok iꞌatuꞌe Iesui ete yt nakuaria i sese ihay kape teꞌeruwanetup teran. Tukupteꞌen itote saꞌup sat haria. Miꞌiria ti taꞌatuhep miitꞌin kaipyi saꞌup morekuat watno. Iꞌewyte iꞌatu rakaria yne nakuat i nug haria.
2 Miꞌiria Iesui tiꞌatumuꞌe kahato miꞌiria. Miꞌi hawyi iraniaꞌin itotiaria woꞌonapin haria wanꞌi wanꞌi haria teꞌeroꞌe -Kat poteĩ Iesui ihay yt nakuaria i wywo iꞌatuꞌe. Iꞌewyte tenuk yt nakuaria wywo iꞌatuꞌe toꞌope.
3 Miꞌi hawyi Iesui tikuap iꞌatuꞌe hap hawyi hãꞌãkap wuo toꞌe iꞌatuepe
4 Pyno so wẽtup ok toineꞌen tohũ 100 Uweiria rakat apykok hat e. Miꞌi hat so wẽtup eꞌat pe toiꞌatumorania kahato toikuap taꞌyn wẽtup ok howosat rakat toineꞌen. Miꞌi pote totiat raꞌyn tohũria 99 ok takaria mekewat wẽtup ok hoꞌowasat rakat kat hamo. Yt ipohep i ikat hamo ipuẽti hap kape.
5 Miꞌi tusake ti toipuẽti raꞌyn tohũ hoꞌowasat hap tote. Miꞌi hawyi totat hawyi tohupit hawyi toterut i raꞌyn towepiit hap wywo toipuẽti raꞌyn pote.
6 Miꞌi hawyi putꞌok toꞌe toꞌyat piat hawyi towyriaꞌin toiꞌatukay kay tuwewawi tuwepiit haypiat hap enoi hamo. -Koitywy uiwepiit hap eꞌat pe katupono uihũ hoꞌowasat rakat atipuẽti i raꞌyn e. Pyno waku eiperia wy wepiit haria wo eweikupteꞌen uihũ puẽti hap ete e. E Iesui henoi hãꞌãkap wuo itote.
7 Miꞌi hawyi iãꞌãkap etiat Iesui henoi -Taꞌi karãpe aihũ watipuẽti hoꞌowasat rakat aimowepiit kahato hap toineꞌen e. Miꞌi hap ewy kahato ti Tupana toineꞌen wẽtup ok miit hoꞌowasat rakat toipuẽti hawyi tuwemowepiit kahato e. Karãpe hoꞌowasat rakat wẽtup ok toipuẽti hawyi atipy piaria iꞌatuwepiit kahato Tupana wywo e. Taꞌi tukupteꞌen 99 rakaria waku pe raꞌyn tukupteꞌen maꞌato wẽtup ok howasat hawyi toikat kahato ipuẽti hamo.
8 Miꞌi hawyi wẽtup te Iesui henoi hãꞌãkap wuo. Pyno haryporia 10 a parata kawiat toineꞌen towatnuat wen maꞌato wẽtup taꞌat hawyi howasat raꞌyn. Wãtymꞌi pote ariãty tutunug ikat hamo. Saware wo tohywytip kahato toꞌyat. Haty wo toikat ipuẽti hamo.
9 Miꞌi hawyi toipuẽti raꞌyn hawyi haryporia iwepiit kahato torannia 10 a rakaria toineꞌen iraꞌyn hawyi e. Miꞌi hawyi toiꞌatukay kay raꞌyn towyriaꞌin tekatuwyriaꞌin tuwewawi toꞌe iꞌatuepe. -Ewepiit ro e katupono uhetineiru wẽtup a parata kawiat howasat raꞌyn maꞌato atikat kahato hawyi atipuẽti raꞌyn hawyi uimowepiit hap sese uhete e.
10 Miꞌi hawyi toꞌe i itotiaria -Taꞌi aikotã haryporia tipuẽti tetineiru toipuẽti hawyi tuwehum iwepiit kahato hap ewy ti Tupana hoꞌowasat rakat aipok towawiat hap ete tuwehum kahato e. Karãpe wẽtup ok miit taꞌaipok Tupana ewowi hawyi atipy piaria iꞌatumowepiit kahato haria wo tukupteꞌen e Iesui itotiaria pe.
Wẽtup Saꞌyru Towatꞌyp Koꞌi Toipun Naꞌyn
11 Miꞌi hawyi Iesui wẽtup te tohenoi -Saꞌawyꞌi so wẽtup ok ihainia typy ok haꞌyru rakat toineꞌen.
12 Miꞌi hat so wẽtup ok haꞌyru watꞌypꞌi toꞌe toꞌywot pe --Papai yt atikyꞌesat i epowatꞌyp ekuꞌuro turan hawyi e maꞌato mesup taꞌyn atikyꞌesat e. Pyno etipatꞌok o kat koꞌi kat koꞌi uhepe epowatꞌyp uiat Papai e. Miꞌi pote toꞌywot timoꞌẽ raꞌyn tekat koꞌi tokuꞌuro hap owakai e.
13 Miꞌi hawyi toꞌywot miium tohytmoĩ yne raꞌyn hawyi toto raꞌyn wẽtup tama kape e. Miꞌi hap tote toipun kahato raꞌyn yne topowatꞌyp koꞌi toieineꞌen yt naku I nug
14 Miꞌi hawyi yne hekat koꞌi toipun naꞌyn. Miꞌi turan putꞌok e itote wesyꞌat hap katupono yt kat i miꞌu itote miitꞌin poi hamo. Yne miitꞌin itotiaria hesyꞌat rakaria wo teꞌeropyhuꞌat
15 Miꞌi hawyi tesyꞌat sese raꞌyn hawyi tohoꞌokat topoi hanuat. Toikyꞌesat topotpap hap miꞌu hit saꞌup mo. Miꞌi hawyi motpap hap toipuẽti. Wẽtup ok ti ipoꞌoro hamuat asuwai koꞌi apykok hamo. Miꞌi hawyi toto hamaut asuwai koꞌi apykok hamo e.
16 Miꞌi tote hamaut asuwai pyꞌasetpiat toineꞌen turan hesyꞌat sese hap putꞌok e tuete hawyi ti toꞌe tuwepe -Pyno waku ahuꞌu hamaut asuwai miꞌu ape kumana ape maꞌato yt uwe i toineꞌen ipoi hamo e.
17 Miꞌi hawyi hesyꞌat sese hap tuete hawyi ti tuwewanetup kahato -Are paĩ e areineꞌen hesyꞌat sese maꞌato yne uiꞌywot eropat haria teꞌerenuk aat kaꞌap kahato uiꞌywot yat pe. Miꞌu iwato kahato toineꞌen uiꞌywot yat pe maꞌato uito yt kat I hin I uimiꞌu e. Uhesyꞌat kahato raꞌyn. Yt naku pe i areineꞌen mesuwe e tuwepe.
18 Pyno waku araꞌaipok i uiꞌywot yat kape hawyi -Papai areꞌe aru tope woromaꞌat kahato en uiminug saꞌag wo iꞌewyte ti Tupana maꞌat hatno areineꞌen are aru tope e. Pywo pe ti Tupana ehamo atiꞌaparap iꞌewyte ehewowi wy areꞌe aru e tuwepe.
19 --Pyno Papai uhewaku hap yt putꞌok e i te raꞌyn esaꞌyru wat uheineꞌen hamo are aru Papai pe e. Miꞌi tupono waku eropat hatno raꞌyn uinug Papai are aru e.
20 Miꞌi hawyi ti paa e sese raꞌyn itote hawyi topoĩꞌam hawyi meremo toto raꞌyn toꞌywot kape. Miꞌi turan iꞌywot taꞌakasa pya howawi muap upiat huut turan. Miꞌi pote iꞌywot hatyꞌu kahato topyꞌa pe katupono toikyꞌe kahato tosaꞌyru. Miꞌi pote so iꞌywot punꞌe howa kape hawyi iporokaꞌat tosaꞌyru ete hawyi toiꞌãpysig tosaꞌyru e.
21 Miꞌi pote haꞌyru toꞌe toꞌywot pe -Papai atiꞌaparap kahato Tupana ehamo Iꞌewyte ehewowi e. Miꞌi pote yt putꞌok are i raꞌyn ehaꞌyru uheineꞌen hamo uiꞌywot e.
22 Mio tã pykai toꞌywot toꞌe heropat haria pe -Pyno eweterut sokpe ipakup takat ikahu rakat uhaꞌyru watno e. Iꞌewyte etunug no topuiꞌiãpiat muiꞌãpiat ikahu rakat e.
23 Miꞌi hawyi eweterut ro wẽtup Wewato ahup mepyt aimiꞌu wo ikap takat e. Miꞌi hawyi eweiꞌauka hawyi ewetey hawyi waku watenuk kahato e. Miꞌi hawyi waku aiwepiit hap sese watunug meiũpe e teropat haria pe.
24 Uhaꞌyru saꞌawyꞌi hoꞌowasat rakat toineꞌen ikuꞌuro rakat ewy maꞌato guꞌuro pyi hap ewy tuwẽtem. Waku watenuk waku aimowepiit kahato hap e toꞌywot.
25 Miꞌi turan ti iykeꞌet putꞌok e toko kaipyi hawyi yt pya hin i turan iꞌyat kai turan toikuap pypy e miitꞌin mowepiit kahato hap toikuap
26 Toikuap hawyi toikay kay raꞌyn wẽtup ok eropat hat hawyi apo e kan hamo mekewat wepiit hap.
27 Miꞌi hawyi heropat hat tiwesat -Mehin e eꞌywyt mesup tuut iraꞌyn e. Miꞌi hawyi eꞌywot iwepiit kahato waku pe toꞌyat pe Iraꞌin toineꞌen Miꞌi pote eꞌywot iwepiit kahato hawyi mesup tutunug aiwoꞌomowepiit hap e. Toiꞌauka tohũ mepyt ikap takat aimiꞌu aiwepiit haypiat wuat e.
28 Miꞌi e hap toꞌykeꞌet tikuap taꞌyn hawyi yt teke teran i toꞌyat pe. Miꞌi pote iꞌywot toto raꞌyn howawi toꞌyat pyi ikay kay hamo -Ereke ro uhaꞌyru e.
29 Maꞌato -Yt rat e. Pyno yt karãpe i etiꞌauka ehũ ikap takat uimowepiit hap nug hamo uiwyriaꞌin wywo e toꞌywot pe. Karania anu raꞌyn areineꞌen eꞌyatype emikyꞌesat nug hamo emotpap hap nug hamo wen maꞌato yt karãpe i etunug wenuk hap uimowepiit hamuat e.
30 Maꞌato ti mekewat uheꞌywyt ekareꞌen sem pun hat esaꞌyru aipok hap hawyi eiꞌauka raꞌyn ehũ ienuk iwato rakat nug hamuat yt naku i rakat pykai e. Taꞌi ehekat toipun kahato raꞌyn haryporiaꞌin yt iweꞌeg i rakaria kyiꞌat hamo. Maꞌato miꞌi pykai etiꞌauka ehũ imowepiit hap nug hamo
31 Miꞌi hawyi toꞌe iꞌywot tosaꞌyru yian miat pe -Uhaꞌyru e atikuap ewat ewaku hap. Pywo ereineꞌen waku pe uiꞌyatype. Yne uhekat ewatno toineꞌen.
32 Pyno wo aimowepiit hap atunug katupono eꞌywyt saꞌawyꞌi ikuꞌuro rakat ewy toineꞌen maꞌato aikotã toineꞌen iraꞌyn hap ewy e. Pywo hoꞌowasat rakat wen maꞌato mesup ti aipuẽti raꞌyn e iykeꞌet pe tosaꞌyru poꞌog nag nakat pe. Mio tã Iesui henoi itotiaria pe hãꞌãkap wuo.
