Iruka 16:1-31
16 Miꞌi hawyi Iesui henoi hãꞌãkap wuo topotmuꞌeria pe wuatꞌi nagnia ehay enoi haria pyꞌasetpe. -Saꞌawyꞌi wuat ieineꞌen hat so hekat kahato rakat toineꞌen iꞌatuꞌe so e. Iꞌewyte toineꞌen wẽtup ok hekat rakat eropat hat hekareꞌen apykok hamuat imowato hamuat hat. Maꞌato toeropat hat tokaꞌiwat maꞌat hat toineꞌen. Iraniaꞌin henoi raꞌyn hekat rakat kape hawyi toikay kay raꞌyn heropat hat hewowi apo e hamo.
2 Toikay kay temiit tekareꞌen apykok hat tuwewawi hawyi toꞌe -Uhyt e iraniaꞌin uhemiitꞌin henoi kahato ti uhepe eminug uimaꞌat hap koꞌi etiat e maꞌato yt atikuap i sio pywo sio yt e. Miꞌi pote etimoherep aikotã aikotã eminug epopera piat hap koꞌi uhyt e. Pywo uimaꞌat hamo pote yt kan hamo i ereineꞌen poꞌog uipotpap nug hamuat e.
3 Mio tã hekat rakat e toeropat hat pe hawyi heropat hat tuwanetup kahato kat som waku tutunug. -Are paĩ aikotã aru atunug e katupono toikuap aru uimiwan koꞌi kaipyi tomaꞌat uhepiat hap e. Miꞌi hawyi aru yt kat i raꞌyn uipotpap hamuat toineꞌen hawyi uhehakyꞌeꞌi aru arepyhuꞌat e. Uhesaika hap yt putꞌok e i te uiweko nug hamo e iꞌewyte yt areineꞌen neran sẽtup sẽtup e hatno e tuwepe tuwanetup hawe.
4 Aikotã aru atunug paĩ e tuwepe. Pyno waku mesup taꞌyn arewyꞌinug aru uikaꞌiwat piat eweterut haria wywo e. Miꞌi hawyi yt kat i uhetineiru hawyi miꞌiria uiwyriaꞌin wo teꞌeropyhuꞌat e.
5 Miꞌi hawyi ikaꞌiwat hekat rakat piat weteweru haria toiꞌatukay kay tuwewawi. Miꞌi hawyi toꞌe wẽtup ok pe -Karania upi keĩ eweterut uikaꞌiwat piat hap mehin e.
6 -Taꞌi iwato kahato tig uhyt e aikotã 100 kamuti howapy kahato hap ewy Uriweiria kap muat rakat ewy uhyt e. Miꞌi hawyi hekat rakat emiit toꞌe miꞌi miit pe -Pyno ti waku watipatꞌok hawyi waku 50 kamuti ikap yn eweterut hap e. Waku watunug popera tote ewetuweru hap 50 kamuti yn eweterut hap e.
7 Miꞌi hawyi wẽtup ok i toikay kay weteweru hat hawyi -Karania upi keĩ uikaꞌiwat piat eweterut hap uhyt e. -Taꞌi iwato kahato e. Wẽtup miu hyt uꞌi kapiat hap ewy uhyt e. Miꞌi hawyi hekat rakat emiit tiwesat -Pyno waku popera tote watunug 800 yn eweterut hap toineꞌen e.
8 Miꞌi hawyi ikaꞌiwat tikay kay tuwewawi hawyi tokaꞌiwat toꞌe temiit pe -Are paĩ pyno koitywy yne uiweteweru haria ewyriaꞌin no tukupteꞌen uimaꞌat kahato hap upi. Yt naku I etunug pykai eweꞌeg nakat ereineꞌen e. Miꞌi hawyi toꞌe i Iesui iꞌatuepe -Taꞌi mesuwarotiaria poꞌog iꞌatuweꞌeg nakaria teꞌeropyhuꞌat mekewaria ariãty piat pe hewyry rakaria koꞌi kai e.
9 Pyno uiwyriaꞌin waku iweꞌeg haria wo eweikupteꞌen ehekat wywo Tupana motpap nug hamo. Miꞌi tã hap ewy hawyi wuatꞌi eꞌat piat ieineꞌen hap toineꞌen atipy pe e.
10 Pyno uiwyriaꞌin eiweꞌeg nakaria eweikupteꞌen kurin kat wywo pote atikuap taꞌyn eiweꞌeg nakaria eweikupteꞌen iwato rakat wywo. Maꞌato mekewaria kurin nakat wywo yt iweꞌeg i pote iꞌewyte yt iꞌatuweꞌeg I rakaria tukupteꞌen iwato rakat wywo e.
11 Uiwyriaꞌin eiweꞌeg wo o ehekat moꞌẽ hap ete. Waku hãpyk kahato eweimoꞌẽ Tupana miium ehepiat koꞌi pote ehekat sese tutum ehewowi wyti aru e.
12 Iꞌewyte yt eiweꞌeg iraniaꞌin ekat eipo piat hawyi yt kat i putꞌok e ehewowi ehekat ewatno sese iꞌapykok hamo e.
13 Uiwyriaꞌin Miꞌi hawyi Iesui henoi topotpoꞌororia pe. -Pyno wẽtup sehay i ahenoi teran ehepe e. Yt naku i kahato typy eikaꞌiwat e. Niatpo kahato ti pyno typy ok eikaꞌiwat pote e. Katupono typy eikaꞌiwat hap kaipyi wẽtup eikaꞌiwatno sese eimikyꞌe wo toineꞌen hawyi wẽtup ewanikap mo toineꞌen yt eimikyꞌe i wo hin i toineꞌen e. Yt eweimotypot kuap i typy ok ehekaꞌiwatno koꞌi e.
Iesui Timosatyꞌi Raꞌyn Muisei Woꞌonapin Hanuaria
14 Mio tã e pote itotiaria wekareꞌen kyꞌe haria Muisei mienoi kaipywiat enoi haria teromopusu kahato Iesui mienoi hap ete.
15 Miꞌi pote Iesui tiꞌatuwesat -Eiperia miitꞌin mimotypot haria wo eweikupteꞌen neran pykai Tupana tikuap kahato raꞌyn aikotã eipyꞌa piat hap koꞌi e. Taꞌi eweikupteꞌen miitꞌin mimotypotno maꞌato yt nakuaria i wo eweikupteꞌen Tupana wywo e.
16 Saꞌawyꞌi Muisei miwan iꞌewyte yne Tupana ehay moherep haria toineꞌen miitꞌin muꞌe hamuat hap. Miꞌi hawyi Iuwãu putꞌok e hawyi tohenoi raꞌyn aikotã wyti aru Tupana topyhuꞌat morekuatno hap etiat. Miꞌi hawyi miitꞌin tuwehytꞌok teran kahato aikope Tupana toineꞌen morekuatno hap tote.
17 Yne ti topyhuꞌat aru Tupana e hap ewy. Yne iꞌatumiwan hit koꞌi aikotã aikotã aru hap koꞌi topyhuꞌat yne e. Pyno yt karãpe i miꞌi hap iꞌatumiwan ikahuro aru e. Niatpo kahato mytyyp atipy moweityk hamuat hap maꞌato poꞌog niatpo Tupana ehay tuweityk hamuat. Yt karãpe ikahuro aru e.
Waku Ahekatuwy Watoiat Sio Yt
18 Miꞌi hawyi poꞌog Iesui henoi. Mio tã e -Pyno yt etoiat teiꞌo eharyꞌi e. Etoiat hawyi yt naku i wẽtup ok etat e. Maꞌato wẽtup ok i etat hawyi yt naku i nug hatno ereineꞌen e. Aikotã hewaire hewaire rakatno ewy ereineꞌen Tupana wanetup hawe e. Yt etat reiꞌo haryporia saꞌawyꞌi wuat heꞌaito miꞌatoiat e. Maꞌato etat pote hewaire hewaire rakat ereineꞌen Tupana wanetup hawe e.
19 Miꞌi hawyi wẽtup sehay Iesui henoi iꞌatuepe. -Toineꞌen hekat rakat e. Miꞌi hesokpe ikahu kahato e. Wuatꞌi eꞌat pe yne imikyꞌesat koꞌi toineꞌen e. Ienuk hap tutunug kahato e. Yne miitꞌin itotiaria ikuap miꞌi hap ete e.
20 Toineꞌen wy itote wẽtup ok yt hekat i rakat iꞌahuu kahato rakat hepihi pihi rakat Irasaru e hap het rakat e. Miꞌi ti wuatꞌi eꞌat pe iwyriaꞌin terut hawyi taꞌatuꞌatoiat hekat rakat eꞌokenꞌypyke kat ẽtup ẽtup hamo e.
21 Mipun miꞌu ieĩpyt koꞌi soꞌoẽtup hamo hekat rakat miꞌu iwato kahato mipun kaipyi. Toineꞌen itote turan Awareria putꞌok e hepihi pihi koꞌi herep herep hamo.
22 Meiũran Irasaru ikuꞌuro raꞌyn hawyi atipy piaria tioto raꞌyn ieineꞌen hap kape haꞌaseꞌi Aparãu eꞌyatypiat heineꞌen hamo e. Miꞌi hawyi hekat rakat ikuꞌuro hawyi taꞌatusyp taꞌyn e.
23 Maꞌato aria kape toto hoꞌopot hap aria wato pe toineꞌen e. Miꞌi hawyi hoꞌopot hap kaipyi hekat rakat tehaꞌat ywaipe hawyi taꞌakasa raꞌyn Irasaru aseꞌi Aparãu eꞌyatype raꞌyn toineꞌen.
24 Miꞌi hawyi tuwẽpowat -Aseꞌi e etipoꞌoro ro meikowo uhowowi Irasaru yꞌy wywo e. Waku topuiꞌiã etiat yꞌy wo uhẽku pen e. Ahoꞌopot kahato raꞌyn mesup uito aria pe e.
25 Mio tã e pote Aparãu tiwesat -Uhaꞌyru e etiwaure raꞌyn apo eieineꞌen ne turan aikotã waku hap koꞌi yn emikyꞌesat koꞌi eheineꞌen turan maꞌato Irasaru ieineꞌen yi totiat turan hoꞌopot hap yn toineꞌen tuete ihakyꞌeꞌi e.
26 Pyno Iꞌewyte yt uwe i mesuwiaria tokosap kuap ewowi. Toineꞌen aipyꞌasetpe yihot pya kahato e. Iꞌewyte uwe i mekepe pyi tokosap meikowo e Aparãu hekat rakat hoꞌopot hawe pe ieineꞌen hat.
27 Miꞌi hawyi hekat rakat toꞌe I aseꞌi Aparãu me. -Pyno etipoꞌoro ro Irasaru uiꞌywotꞌin yat piaria pe mesuwat hoꞌopot hap etiat enoi hamo e.
28 Tukupteꞌen uheꞌywytꞌin 5 ok takaria itote pote yt atikyꞌesat i raꞌyn wyti miꞌiria tõꞌẽ meiũpe uhepiat hoꞌopot hap kape uiwyriaꞌin e.
29 Maꞌato Aparãu tiwesat -Uhaꞌyru e tukupteꞌen kahato eꞌywytꞌin napin hanuaria itote. Waku teꞌeruwanetup Muisei potnapin hap koꞌi kape iꞌewyte Tupana ehay enoi haria mienoi kape e.
30 Miꞌi hawyi hekat rakat -Yt rat e maꞌato wẽtup ok wẽtem guꞌuro pywiat hat henoi iꞌatuepe pote taren taꞌatumohey e. Teꞌeruwemorem Tupana kape taꞌatuminug saꞌag kaipyi e.
31 Miꞌi hawyi Aparãu toꞌe i raꞌyn -Pyno yt teꞌeruwanetup i Muisei mienoi kape yt teꞌeruwanetup i Tupana ehay moherep haria kape pyno ti iꞌewyte yt guꞌuro kaipywiat wẽtem hat Irasaru kape teꞌeruwanetup e Aparãu aria piat ieineꞌen hat pe e Iesui hekat rakaria pe.
