Iruka 19:1-48
19 Miꞌi hawyi Iesui teke raꞌyn tawa Ieriko pe. Miꞌi hawyi tawa Ieriko sakpo toto mekewat tawa puꞌap upi tuwat.
2 Miꞌi tawa pe toineꞌen hekat kahato rakat Sakeu e hap het rakat. Miꞌi miit ri yt naku i kahato rakat toineꞌen iraniaꞌin wanetup hawe katupono ipotpap Iuteu ywania wanikaptia morekuat powyro toꞌywania ekareꞌen pyhyp hamo.
3 Miꞌi hawyi Sakeu taꞌakasa teran kahato Iesui kape maꞌato yt itypore i sese rakat pote yt taꞌakasa kuap i miitꞌin tok piat sakpo Iesui kape.
4 Miꞌi pote punꞌe iraniaꞌin eꞌyian me wẽtup ariaꞌyp muap upiat kape hawyi meremo taꞌam haga tote ywaipe pyi tehaꞌat kahato Iesui ewowi tokosap turan.
5 Putꞌok e Iesui ariaꞌyp ypyke hawyi tehaꞌat kahato ywaiti hawyi toꞌe -Uhyt Sakeu e eraꞌapyk to uhowowi uhyt e. Mesuwat eꞌat pe areineꞌen ewywo eꞌyat pe mehin e.
6 Miꞌi hawyi meremo taꞌapyk hawyi iwepiit hap wywo -Pyno waku kahato ereineꞌen uiꞌyat pe e Iesui pe.
7 Maꞌato iraniaꞌin tikuap Sakeu yat kapiat Iesui to hap hawyi teꞌeroꞌe toꞌope -Yt naku i Iesui iꞌatuꞌe katupono yt nakuat i rakat yat kape toto iꞌatuꞌe. Ahewanikap yat kape toto iꞌatuꞌe toꞌope.
8 Miꞌi hawyi Iesui toto mekewat muap pyhyp hat upi toꞌyat kape. Putꞌok iꞌatuꞌe itote hawyi teꞌerenuk hawyi Sakeu Iꞌam me toineꞌen Iesui pe toꞌe hamo -Uikaꞌiwat e ipatꞌok uhekat yne ti rat atimoꞌẽ mesup yt hekat i rakaria pe e. Iꞌewyte uwe uwe uimimaꞌat haria pe tukupteꞌen atimohãpyk kahato uimimaꞌat hap etiat e. Pywo ti rat miitꞌin ekareꞌen pyhyp hap koꞌi miitꞌin maꞌat hap koꞌi atum mesup iꞌatuepe e. Wẽtup hyt uꞌi atat uimipohari pote poꞌog atum 4 hyt uꞌi atiporeraꞌaipok tuwewawi e. Pywo uwe uimimaꞌat haria uheso hap kaipyi atum wyti aru 4 poꞌog uimipohari hap kai e Iesui pe Sakeu.
9 Miꞌi hawyi Iesui toꞌe iraniaꞌin itotiaria pe -Mesup taꞌyn Tupana miehakyeraꞌatno topyhuꞌat mehin Sakeu e. Pywo pe ti miꞌi miit ahaꞌaseꞌi Aparãu emiariru howosat rakat toineꞌen wen maꞌato mio raꞌyn Tupana miehakyeraꞌat hatno toineꞌen e.
10 Mesup taꞌyn Tupana miehakyeraꞌatno topyhuꞌat. Pywo ti Uito Eheykeꞌet ariot mesuwat mytyyp kape hoꞌowasat rakaria ehakyeraꞌat hamo.
Miitꞌin Kaꞌiwat Totoiat Hekat Temiitꞌin Po Pe Imowato Hamuat
11 Miꞌi hawyi miitꞌin tuwat tawa wato Ierusarẽi kape. Saꞌawyꞌi wuat Iesui e hap etiat teꞌerewanetup. Pywo yt pya hin I Tupana toineꞌen miitꞌin porekuatno. Waku meremo tuwemoherep teꞌeruwanetup. Iesui tikuap Iꞌatuwanetup hap hawyi iãꞌãkap wuo tohenoi temiitꞌin me.
12 Mio tã e -Wẽtup ok morekuat toto raꞌyn wẽtup tama kape mekewat etama towatnuat mopywo hamo hawyi taꞌaipok iraꞌyn saꞌawyꞌi wuat hetama kape.
13 Maꞌato toto wẽtup tama kape owakai toiꞌatukay kay raꞌyn 10 ok takaria toeropat haria tuwewawi hawyi so -Areto raꞌyn wẽtup etama kape hawyi atikyꞌesat eipe uimiꞌairoria uhetama apykok haria wo eweikupteꞌen e. Miꞌi hawyi tutum iꞌatuepe tineiru myẽꞌym ewaty saꞌup mo.
14 Miꞌi hawyi toto raꞌyn tetama pyi. Miꞌi hawyi muap upi te morekuat toineꞌen turan so tetama piaria sehay taꞌatupoꞌoro morekuat eꞌyian me te enoi hamo. Mio tã iꞌatuꞌe -Yt uruikyꞌesat i miꞌi ti uruporekuatno toineꞌen iꞌatuꞌe.
15 Pyno morekuat tatat raꞌyn wẽtup tama towatnuat hawyi taꞌaipok saꞌawyꞌi wuat tetama kape. Miꞌi tote hawyi toiꞌatukay kay raꞌyn toeropat haria tuwewawi temiit 10 ok takaria teropat haria aikotã iꞌatupotpap hap moherep hamo aikotã tomiium saꞌawyꞌi taꞌatumowato hap kuap hamo.
16 Miꞌi hawyi saꞌawyꞌi wuat putꞌok e hawyi toꞌe morekuat pakup we -Saꞌawyꞌi wẽtup ape nu mehit rakat hekat kahato rakat etum uhepe e. Koitywy 10 rakat nu mehit rakat hekat kahato hap ewy aterut ewowi Uikaꞌiwat e.
17 Miꞌi hawyi mekewat tokaꞌiwat iwepiit kahato hawyi toiwesat -Waku kahato etunug uhekat wywo areto hap turan e. Pyno eweꞌeg kahato uhekat wywo pote mesup woronug en uhemiit koro wo 10 uhetawa pe e temiit wakuat pe.
18 Miꞌi hawyi wẽtup ok teke henoi hamo -Pyno saꞌawyꞌi etum uhepe wẽtup ape nu mehit rakat hekat rakat e. Koitywy 5 toineꞌen mekewat wẽtup kaipyi e.
19 Miꞌi hawyi morekuat toꞌe mekewat temiit pe -Waku pyno etunug mehin e. Yt uimaꞌat hin i pote mesup atum epe 5 tawa koꞌi iꞌatupoꞌoro epiat hamo e.
20 Miꞌi hawyi wẽtup i teke towat etiat enoi hamo -Heno uikaꞌiwat meiũ ti emiium oktan e. Saꞌawyꞌi wuat emiium ewywuat atum epe e. Sokpe puo atiꞌapykok kahato mesuwat emiium hekat rakat e. Koitywy toineꞌen ne yne mesuwat sokpe pe emiium iwato hap oktan.
21 Pywo arekenꞌẽ epupi pote waku pe kahato atunug iheg me mekewat nu imehit kahato koꞌi e. Atiꞌapykok kahato katupono worokuap kahato en uhyt e. Atikuap wy eweꞌeg kahato hap kaipyi yt ewat i pykai etiꞌatuporeraꞌat ekat koꞌi e. Iꞌewyte yt emikoi i pykai ehoꞌohep kuap iraniaꞌin ko koꞌi hap atikuap e.
22 Miꞌi hawyi ikaꞌiwat toꞌe tope topyꞌahak popuo -Uhemiit saꞌag kahato wo ereineꞌen paĩ are e. Etikuap taꞌyn aikotã atipuẽti yt uiatno e hap koꞌi iꞌewyte aikotã yt uimikoi i pykai ahoꞌohep taꞌyn wen maꞌato etikuap taꞌyn pykai yt etimowato hin i uimiium epiat hap e.
23 Pyno erekenꞌẽ uipupi hawyi kat pote kahu uhekat kahato hap yt etimowato i en wẽtup ok potpap nug hap kai e. Kat pote yt etipuru i wẽtup ok pe uhekat mowato hamo e temiit iperup takat pe.
24 Miꞌi hawyi tokaꞌiwat toꞌe iraniaꞌin temiit pe -Eweitat ro meiũwat uhekat uhemiit yt iweꞌeg i rakat po pyi hawyi ewetum no ipo piat uimiium uhemiit wakuat pe 10 rakat topo piat pe.
25 Maꞌato miꞌiria teꞌeroꞌe morekuat pe -Urukaꞌiwat iꞌatuꞌe iwato kahato raꞌyn ipo pe toineꞌen 10 a ipo pe iꞌatuꞌe.
26 Miꞌi hawyi morekuat toꞌe -Pywo pe ti uhekat mowato hat pe poꞌog poꞌog atum aru saꞌawyꞌi wuat kai e. Maꞌato yt iweꞌeg i rakat pe uhekat mohit hat pe iwato kahato atum tope maꞌato mesup yt kat i poꞌog atum tope e. Miꞌi hawyi mekewat kurin ipo piat towatnuat tuweityk taꞌyn hawyi yt kat i topyhuꞌat topo pe aru e morekuat temiitꞌin me.
27 Miꞌi hawyi meimuẽwat saꞌawyꞌi wuaria morekuat ewanikaptia etiat mio tã toꞌe -Pyno mekewaria yt uruikyꞌesat mekewat uruporekuatnuat e haria waku eherepoꞌok uhewowi e. Taꞌatuerut hawyi morekuat toꞌe Pyno meiũpe raꞌyn uhowakai te eweiꞌatuꞌuka ro miꞌiria e so mekewat morekuat itote e Iesui tehay iãꞌãkap wuo.
Iesui Tuwehytꞌok Taꞌyn Tawa Ierusarẽi Me Iumentu Okpe Tote
28 Mio tã e tohenoi hawyi Iesui toto i raꞌyn muap upi mekewat tawa wato Ierusarẽi kape.
29 Putꞌok e mekewat mikoi ypia pe mekewat Uriweiria ypia koꞌi eꞌyityꞌok totiat mekewat yi yt pya i tawa hit Pewake kai tawa hit Petania kai hawyi Iesui henoi typy ok temiitꞌin me.
30 Mio tã toꞌe -Eweiwat ro meiẽwat tawa hit kape hawyi putꞌok eweiꞌe itote hawyi eiwehytꞌok tawa hit pe turan aru iꞌatuhũ hit Iumentu mepyt eweipuẽti itote e. Miꞌi iꞌatuhũ eweterut uhewowi e. Pyno yt uwe i te hewyry mekewat iꞌatuhũ hit okpe tote are e.
31 Itotiaria tikuap teran aru kan hamo iꞌatuhũ asaity eweipok e pote waku eweiꞌatuwesat miꞌiria -Taꞌi Aikaꞌiwat Iesui tikyꞌesat wyti eihũ waku eweiꞌe apo e haria pe e Iesui temiitꞌin typy ok takaria pe.
32 Tuwat raꞌyn meimuẽwat tawa hit kape hawyi Iesui toꞌe hap ewywuat kahato taꞌatupuẽti.
33 Iꞌatuhũ taꞌatuꞌasaitypok turan putꞌok iꞌatuꞌe mekewat hũ kaꞌiwaria hawyi -Kan hamoĩ uruhũ eweiꞌasaitypok hamuat apo taꞌatuꞌe.
34 Miꞌi hawyi Iesui emiitꞌin iꞌatuwesat -Aikaꞌiwat Iesui tikyꞌesat kahato ti eihũ iꞌatuꞌe.
35 Waku Iꞌatuꞌe hũ kaꞌiwaria hawyi taꞌatuꞌeroto Iumentu hit Iesui kape. Pukꞌok iꞌatuꞌe Iesui kape hawyi taꞌatuporokpun naꞌyn taꞌatuesokpe koꞌi mekewat hũ okpe tote hawyi taꞌatumoꞌapyk taꞌyn Iesui ihũ hit okpe tote.
36 Miꞌi hawyi muap upiaria tiporokpun taꞌatuesokpe muap tote Iesui to hap owakai ipuꞌap ikahu rakat nug hamo.
37 Miꞌi hawyi Iesui ipotꞌapyk mekewat yityꞌok Uriweiria ypia piat kaipyi tawa wato Ierusarẽi kape toto turan itotiaria iwywuaria iꞌatuwepiit hap wywo Iꞌatuehay pirik wo taꞌatumotypot kahato Tupana teꞌerehaꞌat kahato raꞌyn iꞌatuminug hap koꞌi kape pote.
38 -Waku kahato En Tupana iꞌatuꞌe. Waku kahato Emiꞌairo uruporekuat nuat iꞌatuꞌe taꞌatuehay pirik wo. Woꞌowese hap kahato raꞌyn atipy piat pe toineꞌen. Wakuat kahato Tupana toẽtyhot popuo iꞌatuꞌe.
39 Miꞌi taꞌatunug kahato itote hawyi woꞌomuꞌe haria itotiaria teꞌeroꞌe Iesui pe -Woꞌomuꞌe hat iꞌatuꞌe etiꞌatumopoꞌinik to epotmuꞌeria iꞌatuꞌe.
40 Miꞌi hawyi Iesui tiꞌatuwesat -Pyno miꞌiria iꞌatupoꞌinik uimotypot hap ete pote meremo aru mesuwat nu koꞌi muap upiat teꞌeruwẽpowat uimotypot hap e Iesui tewanikaptia pe.
41 Miꞌi hawyi porap putꞌok e Ierusarẽi me hawyi Iesui tehaꞌat tawa wato kape hawyi tuwak popuo toꞌe
42 Ierusarẽi miaria Ierusarẽi miaria ariot raꞌyn maꞌato yt uikuap i eiperia e. Aterut teran ehewowi wuatꞌi eꞌat piat eimowepiit hap eiwoꞌowese hap wen maꞌato miꞌi hawyi yt heremo i raꞌyn yt eweikat i uimierut e tuwak popuo e.
43 Uimohey hap pun haria eipe pote ti aru ehewanikaptia esuraraꞌin sem tõꞌẽ tõꞌẽ kahato irane eimoma hamo are e. Putꞌok taꞌatuꞌe ehetawa wato ete hawyi yne muap taꞌatupyhyp ehetawa kapiat e. Miꞌi hawyi eimiꞌu yt kat i toineꞌen aru e. Miꞌi hawyi yt eiwenoꞌẽ kuap i ehetawa pyi.
44 -Miꞌi hawyi ehetawa wato pe tuwehytꞌok kahato ehewanikaptia suraraꞌin sem wẽtup ywania eiwuꞌuka hamuat eimoma yne hamuat aru e. Taꞌatuꞌatuꞌuka torannia ehetawa piaria mekewat eꞌat pe aru e. Iꞌewyte ehetawa piaria topap topap yne e. Eiꞌyat koꞌi taꞌatupuruk yne wyti aru e. Yt wẽtup i nu ehetawa piat tukupteꞌen aru eiꞌyat nug hap katupono itote taꞌatupugha yi kape yne eiꞌyat koꞌi e. Pywo ti rat eimoma hap yn topyhuꞌat aru e. Tupana miꞌapiheg koꞌi eweipyhuꞌat aru kat pote Tupana Mipoꞌoro Ehehakyeraꞌat hanuat mohey hap pun haria eipe pote e.
Iesui Tihywytip Taꞌyn Tupana Motypot Yat
45 Miꞌi hawyi Iesui teke raꞌyn tawa Ierusarẽi me hawyi Tupana motypot yat koro pe teke hawyi toiꞌatusopo kahato kareꞌen weneru weneruꞌi haria itote.
46 Miꞌi hawyi toꞌe wuatꞌi weneru haria pe -Waĩ neiꞌo e yt ewetunug ne Tupana motypot yat kat weneru kat weneru hap netap e. Saꞌawyꞌi mio tã e Tupana tehay moherep haria miwan me -Uiꞌyat yi tote atikyꞌesat wuatꞌi ywania uhowawiat uiwywuat iꞌatuehay hamuat hap atikyꞌesat uiꞌyat e Tupana saꞌawyꞌi Isaia miwan 56.7 pe.
47 Miꞌi hawyi mekewat eꞌat koꞌi turan wuatꞌi eꞌat pe turan Iesui tiꞌatumuꞌe miitꞌin Tupana motypot yat koro piaria. Maꞌato paꞌi akagnia miwan enoi haria iꞌewyte tawa piaria akagnia iꞌauka teran kahato haype itote.
48 Miꞌi hawyi hewanikaptia tiꞌatukat kahato aikotã waku Iesui auka hap maꞌato yne itotiaria iꞌatupap kahato Iesui ehay upi pote yt taꞌatupuẽti i muap iꞌauka hamuat.
