Iruka 20:1-47
20 Wẽtup eꞌat pe Iesui toineꞌen Tupana motypot yat pe turan toiꞌatumuꞌe kahato itotiaria tehay wakuat Tupana etiat. Miꞌi turan putꞌok iꞌatuꞌe howawi paꞌi akag koꞌi miwan ehay enoi haria wywo iꞌewyte nagnia akag koꞌi wywo.
2 Miꞌi hawyi apo iꞌatuꞌe Iesui pe -Uwe epoꞌoro hat gaꞌatpo miitꞌin sytpok Tupana motypot yat pyi Iꞌatuꞌe.
3 Miꞌi hawyi Iesui tiꞌatuwesat -Pyno ahenoi aru ehepe uwe uipoꞌoro Tupana motypot yat apykok hamo maꞌato saꞌawyꞌi atikyꞌesat uiwesat hap ehepiat e.
4 Pyno uiwesat ro uwe sese ahetꞌok hat Iuwãu poꞌoro hat apo toineꞌen sio Tupana tipoꞌoro Iuwãu sio miitꞌin tipoꞌoro ahetꞌok hap nug hamo apo are e.
5 Miꞌi hawyi teꞌeroꞌe toꞌope -Aikotã som waku watiwesat Iesui katupono iꞌatu kahato mesuwe ahetꞌok hat Iuwãu motypot kahato rakaria iꞌatuꞌe toꞌope. Pyno Tupana ipoꞌoro hat watoꞌe pote apo e irane ahepe Iesui -Kat poteĩ pyno yt eweimohey i te urumimohey Iuwãu toꞌe aru ahepe iꞌatuꞌe toꞌope.
6 Maꞌato miitꞌin Iuwãu poꞌoro haria watoꞌe pote mesuwat iraniaꞌin sem Iuwãu kyꞌe haria meremo aiꞌauka katupono taꞌatumohey imienoi. Tupana ehay moherep hat koro Iuwãu iꞌatuꞌe toꞌope.
7 Mio tã iꞌatuꞌe toꞌope hawyi taꞌatuwesat raꞌyn Iesui apo e hap -Yt uruikuap i kahato uwe sese Iuwãu poꞌoro hat iꞌatuꞌe. Uwe ehay pyi Iuwãu tuut miitꞌin setꞌok hamo hap yt uruikuap kahato i iꞌatuꞌe.
8 Miꞌi hawyi Iesui tiꞌatuwesat -Pyno yt uiwesat i pote uito eipe ewywuat yt worohoꞌowesat i uwe hay upi atiꞌatusytpok mesuwepyi Tupana motypot yat piat yt naku i nug haria e Iesui paꞌi kororia pe miwan ehay moherep haria pe nagnia akagnia pe.
Ypia Piat Apykok Hanuaria Yt Naku I Rakaria
9 Miꞌi hawyi hãꞌãkap wuo Iesui henoi Tupana motypot yat koro piaria pe tewanikaptia pe -Wẽtup eꞌat pe so wẽtup yi wato kaꞌiwat Uwa ypia toiꞌatukoi kahato. Iwato kahato Uwa toikoi. Waku raꞌyn hawyi so toipuru teꞌuwa ypia miitꞌin me iꞌatuꞌapykok hamo. Miꞌi Uwa ypia kaꞌiwat toto raꞌyn wẽtup tama kape.
10 Meiũran mekewat Uwa ypia kaꞌiwat tipoꞌoro temiit pya pyi mekewat Uwa ypia apykok haria pe towatnuat Uwa sat hamo hoꞌohep hap kaipyi. Maꞌato hemiitꞌin Uwa ypia apykok haria taꞌatupok pok hawyi taꞌatupoꞌoro i raꞌyn yt kat i hin i iꞌatupo pe wywo e.
11 Miꞌi hawyi Uwa ypia kaꞌiwat wẽtup ok i raꞌyn toipoꞌoro raꞌyn toꞌuwa ypia piat ipotpap takaria kape Uwa koꞌi towatnuat saꞌup sat hamo iꞌatumipoꞌoksuꞌat hamo maꞌato iꞌewyte yt kat i taꞌatuhaꞌupium tope maꞌato taꞌatupok pok imipoꞌororia saꞌawyꞌi wuaria ewy hawyi taꞌatuporeraꞌaipok yt kat i wywo i e.
12 Miꞌi hawyi wẽtup ok temiit Uwa ypia kaꞌiwat tipoꞌoro i raꞌyn maꞌato miꞌi miit miꞌi hare taꞌatuꞌahyk ahyk hawyi taꞌatupun naꞌyn Uwa ypia pyi e.
13 Miꞌi hawyi Uwa ypia kaꞌiwat tuwanetup -Aikotã waku atunug e tuwepe hawyi toꞌe tuwepe -Pyno atikuap taꞌyn aikotã waku atunug e tuwepe taꞌi Uhaꞌyru sese uimikyꞌe kahato atipoꞌoro hawyi ti aru taꞌatumotypot miꞌi miit Uhaꞌyru sese pote e tuwanetup hawe.
14 Miꞌi hawyi toipoꞌoro raꞌyn wen maꞌato teꞌuwa ypia apykok haria teꞌeraꞌakasa hawyi teꞌeroꞌe toꞌope -Toꞌiro waku watiꞌauka mesuwat yi Uwa ypia koro kaꞌiwat saꞌyru iꞌatuꞌe toꞌope. Taꞌi paĩ watiꞌauka haꞌyru hawyi ti aru haꞌyru ywot ikuꞌuro hawyi ipowatꞌyp koꞌi Uwa ypia aipo pe topyhuꞌat raꞌyn iꞌatuꞌe teꞌeroꞌe toꞌope.
15 Miꞌi hawyi taꞌatusat haꞌyru hawyi taꞌatupugha saꞌag ipiit iꞌywot mikoi ypia pyi hawyi itote taꞌatuꞌauka neꞌi haꞌyru e Iesui hãꞌãkap wuo. Miꞌi hawyi Iesui apo e iꞌatuepe -Pyno aru kat haꞌyru ywot tunug aru tomikoi ypia apykok haria saꞌag ete e maꞌato taꞌatuwesat i.
16 Pyno ahenoi ehepe kat som tutunug. Uwa ypia kaꞌiwat toto ypia apykok haria tosaꞌyru auka haria kape hawyi meremo toiꞌatuꞌuka kahato teꞌuwa apykok haria hawyi tutum aru teꞌuwa ypia iraniaꞌin me tomikoi Uwa ypia iraniaꞌin po pe iꞌapykok hamo e Iesui toꞌywania pe tehay pun haria pe. Miꞌi hawyi itotiaria tikuap Iesui ehay iãꞌãkap hawyi -Yt teiꞌo Yt naku i kahato ehay aiꞌywania ete Uhyt iꞌatuꞌe Iesui pe.
17 Miꞌi hawyi Iesui tehaꞌat tewanikaptia ewowi hawyi toꞌe -Pyno topyhuꞌat aru uiꞌe hap ewy aikotã Tupana toꞌe saꞌawyꞌi tehay miwan miat ewy e. Mio tã toꞌe -Toineꞌen Nu waku rakat yat nug hamuat e maꞌato yat nug haria yt naku i iꞌatuꞌe hawyi taꞌatupun naꞌyn. Taꞌi poꞌog waku iraniaꞌin kai maꞌato taꞌatupugha raꞌyn. Maꞌato mekewat iꞌatumipugha rakat yat moheg hap imoesaika hap sese topyhuꞌat e Iesui iꞌatuepe.
18 Uwe ipy aparap mekewat Nu ete pik e rakat topyhuꞌat. Maꞌato uwe pe mekewat Nu taꞌat raꞌyn Nu iꞌauka hap topyhuꞌat.
19 Mio tã toꞌe hawyi paꞌi akag koꞌi iꞌewyte nagnia ehay enoi haria teꞌeroꞌe toꞌope -Yt naku i Iesui ehay ahete iꞌatuꞌe toꞌope. Miꞌi pote taꞌatupytyk teran Iesui iꞌauka hamo maꞌato miitꞌin pupi teꞌerokenꞌẽ katupono iraniaꞌin Iesui mimuꞌeria -Waku kahato aimuꞌe Iesui iꞌatuꞌe toꞌope miꞌi tupono yt taꞌatupytyk kuap i.
Waku Wahaꞌupnug Morekuat Sesa Pe Apo
20 Taꞌatukat kahato Iesui pytyk hamo. Taꞌatuhaꞌup nug ihainiaꞌin me yt nakuaria i Iesui maꞌat haria taꞌatuehay wo. Miꞌiria wakuaria ewywuaria tõꞌẽ taꞌatuehay wuat Iesui maꞌat hamo. Iꞌatupoꞌoro haria taꞌatupag neran Iesui taꞌatuporekuat nuat po pe iꞌauka hamo.
21 Putꞌok iꞌatuꞌe hawyi taꞌatumaꞌat reran taꞌatuehay wo -Woꞌomuꞌe hat iꞌatuꞌe hãpyk kahato emienoi miitꞌin me uruwanetup hawe iꞌatuꞌe. Uruikuap aikotã Tupana mikyꞌesat yn ewy etunug miitꞌin me iꞌatuꞌe. Taꞌi yt erekenꞌẽ hin i rasig miitꞌin pupi Tupana ehay etimoherep wuatꞌi miitꞌin me turan iꞌatuꞌe Iesui pe.
22 Pyno ehenoi uruepe sio waku watum saꞌup aiporekuat wato Sesa e hap het rakat pe sio yt iꞌatuꞌe
23 Miꞌi hawyi meremo Iesui tomaꞌat hap toikuap tuwepe hawyi toꞌe iꞌatuepe.
24 -Eweterut ro uhowowi mekewat saꞌup wẽtup eꞌat piat aipotpap saꞌup e. Miꞌi hawyi taꞌatuium iꞌape rakat Iesui pe hawyi apo e iꞌatuepe -Pyno uwe miit akag iãꞌãkap mesuwe miwan me uwe set toineꞌen meiũ saꞌup iꞌape tote e. Miꞌi pote -Taꞌi mekewat morekuat Sesa e hap iãꞌãkap mekewat iꞌape tote toineꞌen iꞌatuꞌe taꞌatuwesat.
25 Pyno morekuat wato Sesa set toineꞌen itote pote Sesa watnuat toineꞌen are e. Miꞌi pote waku ewetum no morekuat Sesa watnuat tohẽtup e. Iꞌewyte Tupana miẽtup hap waku ewetum no Tupana pe are e Iesui tomaꞌat reran e haria pe apo e haria pe.
26 Miꞌi hawyi teꞌeruwemoti kahato Iesui pupi yt taꞌatumaꞌat kuap i haype katupono Iesui poꞌog poꞌog iweꞌeg nakat tomaꞌat reran haria kai pote. Miꞌi hawyi iꞌatupohep taꞌyn miitꞌin sem ehamo Iesui apo iꞌatuꞌe hap.
27 Miꞌi hawyi tõꞌẽ Iesui ewowi Tupana ehay miwan miat miitꞌin muꞌe haria akag koꞌi Satuseuria e hap koꞌi. Miꞌiria ti -Aikuꞌuro hawyi yt kat i raꞌyn aheineꞌen pakup i hap e haria.
28 Tõꞌẽ hawyi apo iꞌatuꞌe Iesui pe -Woꞌomuꞌe hat aheꞌaseꞌi Muisei miwan me mio tã toꞌe ahepe -Eꞌykeꞌet ikuꞌuro hawyi maꞌato yt kat i te mepyt rakat pote waku iykeꞌet i hehiwu heꞌaito wo toineꞌen iꞌywyt saꞌyru nug hamo hakiꞌyt nug hamo ikuꞌuro yt kat i haipepiaria pote e ti ahaꞌaseꞌi Muisei tomiwan me iꞌatuꞌe.
29 -Pyno saꞌawyꞌi so tukupteꞌen so 6 ywytꞌin taꞌatuykeꞌet etawa pe. Iꞌatuykeꞌet toineꞌen teharyꞌi wywo hawyi ikuꞌuro yt kat hin i haꞌyru hakiꞌyt te turan ikuꞌuro so
30 Miꞌi hawyi so iꞌywyt poꞌog wuat yian nakat wywo raꞌyn hehiwu maꞌato iꞌywyt ikuꞌuro wy yt kat i imepyt i te turan.
31 Miꞌi hawyi so wẽtup ok iꞌywyt wywo raꞌyn hehiwu toineꞌen maꞌato iꞌewyte yt imepyt i te turan ikuꞌuro so. Mio tã hap ewy 6 ok takaria iꞌywytꞌin hehiwu wywo toineꞌen tuereto hawyi yne so topap hawyi taꞌatuehiwu yt kat i imepyt rakatno te so.
32 Miꞌi hawyi so iꞌewyte iꞌatuehiwu ikuꞌuro iꞌatuꞌe yt imepyt i te turan ikuꞌuro so iꞌatuꞌe Iesui pe.
33 Pyno uruikuap teran karapeĩ tukupteꞌen yne miitꞌin guꞌuro pyi hawyi apuru uwe wary wo aru mekewat hiwu iꞌatuꞌe katupono 7 ok heꞌaito apo iꞌatuꞌe Iesui pe.
34 Miꞌi hawyi Iesui tiꞌatuwesat -Pywo pe ti mesuwarotiaria woꞌokyiꞌat hap taꞌatunug ihainiaꞌin haryporiaꞌin aikotã aikotã aheko ewy wen maꞌato atipy pe yt miꞌi tã hin i e.
35 Taꞌi miitꞌin tuwẽtem guꞌuro pyi hawyi atipy piaria ewywuaria tukupteꞌen wuatꞌi eꞌat pe yt kat i woꞌokyiꞌat hap itote yt taꞌatunug i woꞌokyiꞌat hap itote are e.
36 Katupono atipy piaria ewywuaria wo teꞌeropyhuꞌat miꞌiria tuwenoꞌẽ guꞌuro pyi hawyi yt iꞌatukuꞌuro i wuatꞌi eꞌat pe tukupteꞌen Tupana mepytꞌin sese wo are e.
37 Iꞌewyte ahaꞌaseꞌi Muisei miwan kaipyi watimuꞌe hawyi watikuap aheineꞌen pakup i hap katupono mio tã toꞌe Muisei tomiwan me -Taꞌi mekewat ariaꞌyp wukꞌe hap kaipyi Tupana toꞌe uhepe -Uito ti ewat eꞌaseꞌi Aparãu eTupana e. Uito ti eꞌaseꞌi Isaki eTupana e uhepe. Iꞌewyte Uito ti ewat eꞌaseꞌi Iako eTupana e uhepe ariaꞌyp wukꞌe hap kaipyi e Muisei tomiwan me mekewat eꞌat ihay Tupana wywo hap eꞌat pe turan e.
38 Miꞌi tupono ahaꞌaseꞌi Muisei miwan kaipyi watikuap ahaꞌaseꞌi Aparãu Isaki Iako toineꞌen ne taꞌatukuꞌuro pykai katupono aheTupana ieineꞌen haria eTupana wo toineꞌen are.
39 Miꞌi hawyi wẽtup ok miwan ehay enoi hat itote toꞌe Iesui pe -Woꞌomuꞌe hat waku kahato uruwesat hap e.
40 Miꞌi hawyi yt apo iꞌatuꞌe kuap i poꞌog naꞌyn Iesui pe miwan kuap kahato rakaria. Miꞌi hawyi iꞌatuponik taꞌyn.
Iesui Tawi Haꞌyru Sio Yt
41 Miꞌi hawyi Iesui toꞌe i Muisei miwan kuap kahato rakaria pe yt apo toꞌe hap wesat kuap i rakaria pe -Woꞌomuꞌe haria e kat pote ri eweiꞌe eimuꞌe haria pe -Tupana Mipoꞌoro Aiporekuat nuat ri morekuat Tawi emiariru emiariru kaipywiat tuwemoherep eweiꞌe e.
42 Katupono saꞌawyꞌi sese ahaꞌaseꞌi pot morekuat Tawi toꞌe tomiwan me towepy hawe -Uipotypot koro Tupana toꞌe Uipotypot koro Tupana pe -Eraꞌapyk o Uimimotypot no mesuwe uipo sese kai e.
43 Waku ereineꞌen mesuwe uikai hawyi ti aru atunug ewanikaptia yne epy ywytꞌokpype e Tupana Uikaꞌiwat pe e ahaꞌaseꞌi morekuat Tawi towepy hawe e.
44 Pyno Tupana Mipoꞌoro Aikaꞌiwat nuat toineꞌen paĩ Tawi Kaꞌiwat koro wo e. Kat pote pyno eweiꞌe -Morekuat Tawi emiariru emiariru topyhuꞌat aru Tupana Mipoꞌoro Aikaꞌiwat Koro wo eweiꞌe.
45 Miꞌi hawyi itotiaria teꞌeruwanetup kahato Iesui e hap kape turan Iesui toꞌe temiitꞌin me.
46 Uhekatuwyria e eiweꞌeg wo o mekewaria Tupana ehay mikuap haria pupi are. Miꞌiria hewyry tawa pyꞌasetpe sokpe paꞌi wat ikahu rakat puo. Taꞌatumotypot hap miitꞌin miat muap upi taꞌatukyꞌesat kahato. Tupana motypot yat pe teꞌeraꞌapyk poꞌog wakuaria apyk hawe. Iꞌewyte tuwat tenuk iwato rakat kape hawyi miꞌi tote wy ienuk kaꞌiwat yatype teꞌeraꞌapyk uito poꞌog iraniaꞌin kai e hamo.
47 Miꞌiria iꞌatuwẽpap se kahato Tupana kape maꞌato yt pywo pe i e. Iꞌatuehay iꞌywop kahato taꞌatunug Tupana kape miitꞌin ehamo miitꞌin mikuap mo -Uruto Tupana kuap kahato haria e hamo iraniaꞌin me. Miꞌiria ihakyꞌeꞌi rakaria hiwu rakaria ekareꞌen ereꞌok haria wo teꞌeropyhuꞌat. Pywo miꞌiria ti iꞌatuꞌapiheg hap iꞌatumoma hap topyhuꞌat aru e Iesui temiitꞌin me.
