Iruka 24:1-53
24 Miꞌi hawyi hunete mytuꞌu eꞌat pe haryporiaꞌin saꞌawyꞌi wuat Iesui wywuaria iraniaꞌin haryporiaꞌin wywo tuwat Iesui syp hap kape mohag hy ikamhigse kahato rakat wywo ipiit pen hamuat Iuteu ywania eko ewy.
2 Putꞌok iꞌatuꞌe hawyi mekewat nu kaꞌa hap ete isyp hap ete hawyi yt kat i te okenꞌypy nu kawiat saꞌawyꞌi ewy toineꞌen itote maꞌato tuweꞌokenhypꞌok pe raꞌyn taꞌatupuẽti Iesui syp hap.
3 Miꞌi hawyi Iesui emiitꞌin haryporia kawiat tuwehytꞌok taꞌyn woꞌosyp hawe mekewat yi kaꞌa pe hawyi maꞌato Iesui piit yt taꞌatupuẽti hin i itote.
4 Miꞌi hawyi teꞌeruwanetup kahato ipiit weityk hap etiat turan teꞌeruwemoherep taꞌyn iꞌatupyꞌasetpe typy ok ihainia atipy kaipywiat suut haria. Iꞌatuesokpe hẽtyhot kahato wywo teꞌeruwemoherep taꞌyn.
5 Miꞌi hawyi haryporiaꞌin iꞌatupupi teꞌerokenꞌẽ kahato hawyi yi kape neꞌi hewo genꞌẽ pono. Miꞌi hawyi wemoherep haria atipy kaipywiaria teꞌeroꞌe iꞌatuepe -Kat pote ieineꞌen hat eweikat woꞌosyp hawe map haria pyꞌasetpe apo iꞌatuꞌe.
6 Taꞌi Iesui yt uwe i meiũpe katupono toineꞌen i raꞌyn aikotã iꞌe hap ewy iꞌatuꞌe. Waure eweiꞌe apo raꞌyn kat som iꞌe ehepiat eweikupteꞌen tawa Karireia pe turanuat aikotã Iesui toꞌe -Myẽꞌym eꞌat hawyi arẽtem guꞌuro pyi e hap apo iꞌatuꞌe.
7 Taꞌi mio tã iꞌe hap ewy topyhuꞌat mesup iꞌatuꞌe. Mio tã toꞌe ehepe -Pyno iraniaꞌin yt nakuaria i uiꞌauka wyti aru e. Miꞌi hawyi uikuꞌuro miitꞌin ekawiatno maꞌato myẽꞌym eꞌat uikuꞌuro sese hawyi areineꞌen i raꞌyn guꞌuro po pyi e ti raꞌyn kue Iesui ehepe yi Karireia pe turan iꞌatuꞌe atipy kaipywiaria haryporiaꞌin me.
8 Miꞌi hawyi haryporiaꞌin teꞌeruwewanetup saꞌawyꞌi wuat Iesui e hap kape hawyi tuwenoꞌẽ raꞌyn isyp hap kaipyi.
9 Miꞌi hawyi teꞌeraꞌaipok Iesui potmuꞌeria kape 11 ok takaria kape iꞌewyte iraniaꞌin Iesui emiitꞌin me hawyi putꞌok iꞌatuꞌe hawyi teꞌeraꞌakasa hap taꞌatuhenoi -Iesui ti toineꞌen i raꞌyn an tuwẽtem naꞌyn guꞌuro pyi ti an iꞌatuꞌe.
10 -Pywo Iesui toineꞌen iꞌatuꞌe mana Maria yi Matarena kaipywiat iꞌewyte mana Iuanã hawyi wẽtup ok mana Maria Iesui potmuꞌe Tiaku ty iꞌewyte iraniaꞌin haryporiaꞌin saꞌawyꞌi wuat haria Iesui syp hap akasa haria. Miꞌiria ti teꞌeraꞌaipok hawyi taꞌatuhenoi yne raꞌyn Iesui potmuꞌeria pe.
11 Miꞌi hawyi ipotmuꞌeria pe haryporiaꞌin henoi yne atipy piaria e hap koꞌi hawyi -Heso kahato manaꞌin iꞌatuꞌe haryporiaꞌin me. Yt taꞌatumohey hin i.
12 Maꞌato Peteru tikuap hawyi meremo teput raꞌyn Iesui syp hap kape tehaꞌat hamo. Putꞌok toꞌe hawyi iꞌywytꞌokpypuo tehaꞌat. Tehaꞌat hawyi Iesui suwy hap sokpe yn toipuẽti itote. Miꞌi hawyi taꞌaipok taꞌyn toꞌyat kape maꞌato tuwanetup kahato taꞌakasa hap koꞌi etiat.
Iesui Potmuꞌeria Tawa Emau Kape
13 Iꞌewyte mekewat mytuꞌu eꞌat pe tuwat raꞌyn typy ok Iesui potmuꞌeria tawa hit Emau kape tawa wato Ierusarẽi kaipyi. Tawa hit Emau yt pya hin i Ierusarẽi pyi. Wãtymꞌi hap kaipyi wãtym hap kape hap ewy wahewyry muap upi hap ewy taꞌatuhewyry.
14 Miꞌiria toꞌoehay kahato toꞌope yne taꞌatuꞌakasa hap Iesui kuꞌuro hap ete taꞌatuehay muap upi.
15 Miꞌi turan Iesui putꞌok e iꞌatuwywo tewyry hamo.
16 Maꞌato yt taꞌatukuap i uwe sese Iesui hap. Teꞌeraꞌakasa raꞌyn wen maꞌato yt taꞌatukuap i sese uwe Iesui katupono Tupana minug yt taꞌatukuap i uwe.
17 Miꞌi hawyi Iesui toꞌe iꞌatuepe -Kat eweiꞌe ehehay eiwoꞌope eikohyewyry hap upi uhytꞌiꞌin e. Kat pote paa eweiꞌe. Yt eweipiit i haria eiperia e.
18 Miꞌi hawyi wẽtup ok ihainia mehin Keupa e hap apo e Iesui pe -En ni Ierusarẽi miat ieineꞌen porap i hat apo e. Yt etikuap i te apo aikotã tokosap Ierusarẽi me eꞌihatꞌok pe turan apo e.
19 Mio tã toꞌe hawyi Iesui apo e -Aikotã som tokosap itote e. Miꞌi hawyi toiwesat -Saꞌag kahato taꞌatunug naꞌyn itote wẽtup ok ete mekewat Iesui ete mekewat tawa hit Nasare kaipywiat hat ete e. Taꞌi Tupana ehay enoi hat kahato e. Pywo pe ti iminug koꞌi iwato kahato tutunug yt uwe minug ewywuat i e. Waku kahato Tupana wywuat iꞌewyte miitꞌin miitꞌin wanetup hawe iꞌatuꞌe.
20 Miitꞌin powyro rakat pykai ahepaꞌi koro koꞌi iꞌewyte aiꞌakagnia imaꞌat kahato rakaria wo tukupteꞌen hawyi taꞌatupag Iesui morekuaria ahewanikaptia po pe raꞌyn iꞌauka hamo e. Miꞌi hawyi iꞌatuꞌe hap upi ariaꞌyp posak ete hawyi taꞌatuꞌauka raꞌyn iꞌatuꞌe.
21 -Taꞌi uruwanetup hawe aiꞌywania Isareu ywania wanikaptia po pywiat ehakyeraꞌat hatno toineꞌen. Miꞌi hawyi koitywy myẽꞌym eꞌat tokosap taꞌyn ikuꞌuro hawyi iꞌatuꞌe.
22 Miꞌi hawyi haryporiaꞌin Iesui emiitꞌin uruwywuaria urumogyt kahato katupono mesup ti hunete tuwat Iesui syp hap kape hawyi yt kat i ipiit taꞌatupuẽti itote.
23 Miꞌi hawyi teꞌeraꞌaipok uruewawi hawyi mio tã iꞌatuꞌe uruepe -Mesup taꞌyn tuwemoherep taꞌyn atipy kaipywiaria uruewawi iꞌatuꞌe haryporiaꞌin teꞌeraꞌaipok hawyi iꞌatuꞌe.
24 Miꞌi hawyi iraniaꞌin uiwyriaꞌin tuwat raꞌyn haryporiaꞌin mienoi kuap hamo sio pywo sio yt kuap hamo. Miꞌi hawyi Iesui syp hap teꞌeraꞌakasa haryporiaꞌin mienoi ewywuat taꞌatupuẽti itote wen maꞌato Iesui piit sese yt taꞌatupuẽti hin i iꞌatuꞌe Iesui pe yt ikuap i te turan.
25 Miꞌi hawyi Iesui toꞌe iꞌatuepe -Are paĩ kat poteĩ yt eweimohey i te saꞌawyꞌi wuat Tupana ehay enoi haria miwan miat e hap koꞌi apo e.
26 Taꞌi saꞌawyꞌi wuaria Tupana ehay wan haria taꞌatuhenoi kahato Miꞌi Miit ete e. Mio tã iꞌatuꞌe saꞌawyꞌi -Tupana Mipoꞌoro Ahehakyeraꞌat tohoꞌopot kahato aru tohoꞌopot kahato raꞌyn hawyi miitꞌin miꞌauka wo topyhuꞌat. Miꞌi hawyi taꞌaipok atipy kape i raꞌyn teẽtyhot hap kape iraꞌyn e.
27 Miꞌi hawyi Tupana ehay moherep hat akag Muisei miwan kaipyi Iꞌewyte yne Tupana ehay moherep haria mienoi kaipyi tohenoi iꞌatuepe tuwepiat muap tote.
28 Miꞌi hawyi tuwat i tawa hit Emau kape hawyi yt pya i tawa hit Emau kai hawyi Iesui toꞌe iꞌatuꞌe pe -Pyno meiũran irane uhytꞌiꞌin e.
29 Maꞌato -Yt mehin eropyhuꞌat ro mesuwe uruwywo katupono wãtym naꞌyn iꞌatuꞌe Iesui pe. Miꞌi tupono topyhuꞌat topotmuꞌeria wywo maꞌato yt taꞌatukuap hin i te uwe hap.
30 Miꞌi hawyi Iesui tenuk iꞌatuwywo turan man teneg totat hawyi -Waku e Tupana pe hawyi toipik aikotã saꞌawyꞌi wuat ewy hawyi tutum naꞌyn iꞌatuepe.
31 Toipik mekewat man teneg topo wywo saꞌawyꞌi wuat ewy hawyi meremo taꞌatukuap taꞌyn uwe hap hawyi Tupana tomog naꞌyn yt iꞌatueha pytig i hap ewy hawyi meremo taꞌatukuap Iesui itote hawyi tuweityk taꞌyn iꞌatupyꞌasetpyi Iesui.
32 Miꞌi hawyi teꞌeroꞌe toꞌope -Pywo pe ti rat Aiꞌakag Iesui ihay turan aria ewy aipyꞌa pe toineꞌen muap upi ihay aiwywo turan iꞌatuꞌe.
33 Miꞌi hawyi meremo teꞌeraꞌaipok taꞌyn iraniaꞌin Iesui mohey haria kape tawa wato Ierusarẽi kapiaria enoi hamo. Putꞌok iꞌatuꞌe itote hawyi taꞌatupuẽti raꞌyn mekewat 11 ok takaria iraniaꞌin ipotmuꞌeria wywo.
34 Putꞌok iꞌatuꞌe hawyi itotiaria teꞌeroꞌe typy ok takaria pe -Pywo pe ti rat tuwẽtem naꞌyn Aikaꞌiwat Iesui katupono tuwemoherep taꞌyn mesup Simau me iꞌewyte uhepe e.
35 Miꞌi hawyi mekewaria Emau kaipywiaria taꞌatuhenoi aikotã muap upiat Iesui tuwemoherep iꞌatuepe. -Pywo urutenuk hap turan toipik aheman aikotã Iesui tipik man saꞌawyꞌi wuat man imipik hap ewy hawyi uruikuap taꞌyn uwe Iesui iꞌatuꞌe.
36 Mio tã taꞌatuhenoi turan tuwemoherep taꞌyn Aikaꞌiwat Sese Iesui iꞌatupyꞌasetpe. Miꞌi hawyi toꞌe topotmuꞌeria pe -Tupana eimowepiit uiwyriaꞌin e.
Iesui Imoherep Topotmuꞌeria Pe
37 Miꞌi hawyi maꞌato -Miit ehog iꞌatuꞌe taꞌatuwanetup hawe teꞌerokenꞌẽ kahato hawyi Iesui pupi.
38 Miꞌi hawyi apo e -Kat poteĩ eweiwanetup kahato kowoꞌi kowoꞌi eipyꞌa pe yt kat i eiwepiit hap wywo e. Kat poteĩ tig yt eweimohey i te uheineꞌen guꞌuro pyi hap e.
39 Pyno uimohey ro e. Eiweponug no uipiit ete uipiit suk hap koꞌi ete sio Uito sio yt e. Uito rat ewehaꞌat ro yt miit ehog hin i Uito katupono uikag koꞌi wywo uipiit puꞌi wywo areineꞌen e topotmuꞌeria pe.
40 Mio tã toꞌe hawyi toimoherep taꞌyn topo suk hap kaꞌa koꞌi topy suk hap kaꞌa koꞌi hawyi -Uito ti rat uimohey ro eipe e.
41 Maꞌato niatpo kahato imohey hamuat ipotmuꞌeria. Teꞌeruwanetup kahato itote iꞌewyte iꞌatuwepiit kahato raꞌyn. Miꞌi hawyi Iesui apo e iꞌatuepe yt taꞌatumohey i pote -Toineꞌen apo meiũpe eimiꞌu uiwyriaꞌin e.
42 Miꞌi hawyi pira iwyp takat taꞌatupuẽti hawyi taꞌatuium naꞌyn Iesui pe.
43 Miꞌi hawyi Iesui tuꞌu raꞌyn topotmuꞌeria ehamo miit Uito hap moherep hamo.
Iesui Timoherep Topotmuꞌeria Pe Yne Saꞌawyꞌi Wuat Hap Etiat
44 Tutuꞌu hawyi poꞌog Iesui toꞌe temiitꞌin me -Saꞌawyꞌi areineꞌen eipyꞌasetpiat turan ahenoi kahato ehepe aikotã aru topyhuꞌat uhete hap. Mesup eꞌat pe ahenoi teran ahaꞌaseꞌi Muisei miwan kaipyi Tupana ehay enoi haria miwan kaipyi yne uhetiat e. Iꞌewyte morekuat Tawi wepy hap miwan kaipyi uhetiat yne atimoherep teran yne uhetiat e. Koitywy topyhuꞌat raꞌyn yne iꞌatumienoi yian miat uhetiat hap ewy e.
45 Miꞌi hawyi heremo yn naꞌyn iꞌatuwanetup hawe Tupana ehay Iesui tunug. Miꞌi hawyi taꞌatukuap kahato raꞌyn miwan saꞌawyꞌi wuat kai Iesui etiat hap hawyi heremo raꞌyn iꞌatuepyꞌa pe yne Iesui ete.
46 Miꞌi hawyi Iesui toꞌe i -Taꞌi miwan saꞌawyꞌi wuat Tupana mimoherep tohenoi kahato uhetiat ahoꞌopot hap etiat uikuꞌuro hawyi myẽꞌym eꞌat uikuꞌuro raꞌyn hawyi areineꞌen i hap e Tupana miwan me saꞌawyꞌi wuat pe e.
47 Taꞌi yian me Tupana henoi kahato uhetiat tehay wan haria po wo aikotã aru taꞌatuhenoi kahato tesaika hap wywo torannia ywania pe aikotã waku miitꞌin teꞌeruwemorem Tupana kape iꞌatuminug saꞌag hap koꞌi kaipyi uhet upi hap tohenoi miwan me e Iesui. Waku tawa Ierusarẽi me tohaꞌawynug naꞌyn mesuwat sehay wakuat hawyi waku yne ywania kape taꞌatuhenoi Uhaꞌyru ete e Tupana miwan me e.
48 -Pyno eipe ti eweikuap taꞌyn uheineꞌen guꞌuro pyi hap uhowowi eweiꞌakasa hawyi e.
49 Pyno Tupana mikyꞌesat ewy atum ehepe Tupana Paꞌãu eimoesaika hamuat e. Maꞌato waku meiũpe tawa Ierusarẽi me eweikupteꞌen hawyi meiũran areto hawyi atum aru ehepe Tupana Paꞌãu eimoesaika kahato uipotpap nug hamuat hap e topotmuꞌeria pe Iesui.
50 Miꞌi hawyi Iesui tioto raꞌyn topotmuꞌeria tawa wato Ierusarẽi myi tawa hit Petania kape. Miꞌi tote ipo koꞌi ywaiti pe tutunug hawyi -Tupana etipowyro uimohey haria wuatꞌi eꞌat pe etiꞌatupoityro miꞌiria ahẽtup e.
51 Miꞌi toꞌe Tupana pe turan Iesui taꞌam naꞌyn atipy kape.
52 Miꞌi hawyi taꞌatumotypot kahato itote Tupana hawyi teꞌeraꞌaipok taꞌyn tawa wato Ierusarẽi kape iꞌatuwepiit sakpo hap wywo.
53 Putꞌok iꞌatuꞌe hawyi teꞌeropyhuꞌat Tupana motypot yat hawe hawyi -Waku kahato En Tupana taꞌatuꞌe itote aat kaꞌap.
