Iruka 3:1-38
3 15 anu toineꞌen morekuatno Tiperiu Sesa turan Pũsiu Piratu toineꞌen yi Iuteia tote morekuatno. Miꞌi turan Eroti toineꞌen morekuatno yi Karireia pe. Maꞌato Iꞌywyt Wiripi toineꞌen mekewat yi Itureia tote iꞌewyte Takunite tote. Maꞌato Iritania toineꞌen mekewat Atirene tote.
2 Mekewat eꞌat pe paꞌi koro Anasi iꞌewyte Kaꞌiwasi. Miꞌiria ti mekewat eꞌat pe paꞌi kororia iwatoꞌin nakaria tukupteꞌen. Miꞌi turan Tupana tum naꞌyn tehay yahig wato tote Sakaria saꞌyru Iuwãu me.
3 Miꞌi hawyi meremo tuweꞌysakpo raꞌyn Iutãu hy sakpo. Itote tohenoi kahato raꞌyn Tupana ehay wesetꞌok hap ete. Iꞌewyte iꞌatuminug saꞌag kaipywiat iꞌatuꞌaipok hamuat ete.
4 Aikotã saꞌawyꞌi wuat Isaia Tupana ehay moherep hat miwan miat ewy. -Tuut wyti aru tehay pirik wuat woꞌomuꞌe hat yahig wato tote. Miꞌi ti aru eimuꞌe -Eweimohap to eiminug yt naku i hap koꞌi hawyi eweiꞌaipok to Tupana kape e hap ewy.
5 Hawyi torannia yihot koꞌi iherep taꞌyn tukupteꞌen. Iꞌewyte torannia yityk mutꞌa koꞌi ipepꞌi raꞌyn tukupteꞌen. Iꞌewyte muap koꞌi ipori pori rakaria hãpyk puo raꞌyn tukupteꞌen. Iꞌewyte muap koꞌi ywaiti wuat yt ywaiti i raꞌyn. Torannia isym iraꞌyn tukupteꞌen.
6 Torannia mesuwiaria miitꞌin wyti aru teꞌerehaꞌat aru Tupana miium woꞌoehakyeraꞌat hat kape e Tupana Isaia miwan 40.3 pe Tosaꞌyru Iesui etiat.
7 Miꞌi turan miitꞌin sem tuwat kahato raꞌyn Iuwãu kape teꞌeresetꞌok hamo. Maꞌato toꞌe torannia pe -Eiperia ti moĩ iãi hy woꞌoꞌauka hap ewywuaria maꞌato eweikyꞌesat eiwemig Tupana saiwot hap eiꞌapiheg hap pupi pote.
8 Waku eiwemoherep yne eiminug yt naku i hap koꞌi hawyi waku rakaria wo eweikupteꞌen. Eiperia ti uruto ti Aparãu emiariruꞌin eweiꞌe maꞌato miꞌi pykai Tupana tunug kuap nu Aparãu emiariruꞌin wo.
9 Ywyhap wyti waku pe raꞌyn yt haat i rakat mikoi ypugha hamuat. Torannia meimewat mikoi yt haat kahato i rakaria wyti aru miꞌypugha wo raꞌyn tukupteꞌen hawyi aria miꞌu wo raꞌyn tukupteꞌen.
10 Miꞌi hawyi miitꞌin sem apo iꞌatuꞌe -Aikotã som pyno waku urutunug iꞌatuꞌe.
11 Miꞌi hawyi Iuwãu tiꞌatuwesat -Uwe toĩ typy hesokpe pote etum no yt hesokpe i rakaria pe wẽtup. Iꞌewyte uwe toineꞌen imiꞌu pote etum no yt imiꞌu i rakaria pe.
12 Miꞌi turan iraniaꞌin miitꞌin kaipywiat saꞌup poreraꞌat haria tõꞌẽ hawyi apo iꞌatuꞌe Iuwãu me. -Urumuꞌe hat aikotã som pyno waku urutunug iꞌatuꞌe.
13 Pyno yt ewehẽtup teiꞌo poꞌog saꞌup miitꞌin kaipyi eiporekuat eipoꞌoro hat miẽtup kai e Iuwãu tiꞌatuwesat.
14 Iꞌewyte iraniaꞌin suraraꞌin apo iꞌatuꞌe -Uruto a som aikotã waku urutunug wy iꞌatuꞌe. Miꞌi hawyi Iuwãu tiꞌatuwesat -Yt ewetat reiꞌo iraniaꞌin etineiru iꞌewyte yt ewetat reiꞌo ehesaika hap wywo wẽtup ok yt pywo piat i ikuasa hap upi. Iꞌewyte yt karãpe teiꞌo yt naku i eweiꞌe ipo saꞌup ete.
15 Miitꞌin hekatup kahato raꞌyn haype teꞌeruwanetup torannia Iuwãu etiat miꞌi haype teꞌeroꞌe sio meiẽ aipotypotnuat Tupana ipoꞌoro raꞌyn iꞌatuꞌe.
16 Mio tã iꞌatuꞌe pote Iuwãu tiꞌatuwesat -Uito ti worohoꞌosetꞌok yꞌy wo yn maꞌato wẽtup ok poꞌog uikawiat waku rakat putꞌok e hamuat. Katupono uiat uhewaku hap wyti yt putꞌok e i ipy saity pok hamo. Maꞌato miꞌi ti aru ehetꞌok Tupana Paꞌãu wakuatno raꞌyn iꞌewyte aria wo.
17 Ipo pe ti toineꞌen ypꞌype miꞌi iwo toiꞌairo Sereai iãꞌỹi. Miꞌi hawyi aru toiꞌatunug naꞌyn Sereai heiam me iꞌyat pe. Maꞌato iꞌape koꞌi toiwuk taꞌyn aria pe hawyi yt karãpe i hasep kuap.
18 Karãpe tohenoi raꞌyn sehay wakuat turan Iuwãu henoi kahato raꞌyn miitꞌin me kat e hap kat e hap etiat koꞌi.
19 Iꞌewyte tohenoi kahato morekuat Eroti tunug yt hãpyk hin i hap kat pote ti totat teharyꞌi wo toꞌywyt eharyꞌi Erotia e hap. Iꞌewyte poꞌog iminug koꞌi ipoityꞌi kahato aikotã aikotã hap yt naku i hap koꞌi.
20 Miꞌi hawyi Eroti tunug wẽtup poꞌog yt naku i hap. Toipag Iuwãu woꞌopyhik hawiat hap.
Iesui Wesetꞌok Hap
21 Pyno Maꞌato Iuwãu pyhik hap owakai toiꞌatusetꞌok kahato miitꞌin. Iꞌewyte Iesui tuut hewowi tosetꞌok hap toikyꞌesat. Miꞌi hawyi ihay raꞌyn Tupana kape turan atipy tuweꞌokenhypꞌok taꞌyn.
22 Hawyi Tupana Paꞌãu putꞌok e raꞌyn iꞌapy tote pykasu ewywuat hawyi tuut raꞌyn wẽtup sehay atipy kaipyi -En wyti uhaꞌyru uimikyꞌe kahato uimowepiit hat sese ereineꞌen e.
Yne Iesui Saipepiaria Etiat
23 Karãpe Iesui haꞌawynug topotpap 30 anu turan. Hewowi iraniaꞌin teꞌeruwanetup -Meiẽ ti Iuse saꞌyru neꞌi Eri emiariru neꞌi iꞌatuꞌe. Pyno Iesui ywot hit ewywuat Iuse imotag hap topyhuꞌat. Pyno Iesui eꞌaseꞌi Iuse ywot Eri e hap toineꞌen miwan me iꞌatuꞌe.
24 Miꞌi hawyi Iesui eꞌaseꞌi Eri ywot Matate e hap toineꞌen. Miꞌi hawyi Matate ywot Irewi toineꞌen iꞌatuꞌe. Miꞌi hawyi Irewi ywot Meuki e hap. Miꞌi pykai Meuki ywot Ianai iꞌatuꞌe. Ianai e hap ywot Iuse pot iꞌatuꞌe.
25 Pyno Iuse pot ywot Matatia iꞌatuꞌe. Miꞌi hawyi Matatia ywot Amo iꞌatuꞌe. Miꞌi hawyi Amo ywot Naũ iꞌatuꞌe. Pyno Naũ ywot Esire iꞌatuꞌe. Esire ywot Nakai iꞌatuꞌe.
26 Miꞌi hawyi Nakai ywot Maate iꞌatuꞌe. Maate ywot Matatia iꞌatuꞌe. Matatia ywot Semei iꞌatuꞌe. Semei ywot Iuseki iꞌatuꞌe. Iuseki ywot Iota iꞌatuꞌe.
27 Iota ywot Iuanã iꞌatuꞌe. Iuanã ywot Iresa iꞌatuꞌe. Iresa ywot Surupapeu iꞌatuꞌe. Surupapeu ywot Seatieu iꞌatuꞌe. Seatieu ywot Nere iꞌatuꞌe.
28 Miꞌi hawyi Nere ywot Meuki iꞌatuꞌe Meuki ywot Ati iꞌatuꞌe. Ati ywot Kusã iꞌatuꞌe. Kusã ywot Eumutã iꞌatuꞌe. Eumutã ywot Ete iꞌatuꞌe.
29 Miꞌi hawyi Ere ywot Iusue iꞌatuꞌe. Iusue ywot Eriese iꞌatuꞌe. Eriese ywot Iurĩ iꞌatuꞌe. Iurĩ ywot Matate iꞌatuꞌe. Matate ywot Irewi iꞌatuꞌe.
30 Irewi ywot Simeãu iꞌatuꞌe. Simeãu ywot Iuta iꞌatuꞌe. Miꞌi hawyi Iuta pot ywot Iuse iꞌatuꞌe. Iuse ywot Iona iꞌatuꞌe. Iona ywot Eriakĩ iꞌatuꞌe.
31 Eriakĩ ywot Merea iꞌatuꞌe. Merea ywot Mena iꞌatuꞌe. Mena ywot Matata iꞌatuꞌe. Matata ywot Natã iꞌatuꞌe. Miꞌi hawyi Natã ywot ahaꞌaseꞌi Morekuat Tawi iꞌatuꞌe.
32 Miꞌi uimiwan kaipyi watikuap taꞌyn Aipotypot Iesui Morekuat Tawi Emiariru Emiariru hap. Miꞌi hawyi Morekuat Tawi ywot Iese iꞌatuꞌe. Iese ywot Iupete iꞌatuꞌe. Iupete ywot Puasi iꞌatuꞌe. Puasi ywot Samũ iꞌatuꞌe. Samũ ywot Naasũ iꞌatuꞌe.
33 Miꞌi hawyi Naasũ ywot Aminatapi iꞌatuꞌe. Aminatapi ywot Atimi iꞌatuꞌe. Atimi ywot Arani iꞌatuꞌe. Arani ywot Eserũ ywot Pere iꞌatuꞌe. Miꞌi hawyi Pere ywot aseꞌi pot Iuta iꞌatuꞌe.
34 Aseꞌi pot Iuta ywot Iako iꞌatuꞌe. Iako ywot Isaki iꞌatuꞌe. Isaki ywot ahaꞌaseꞌi koro Aparãu iꞌatuꞌe. Miꞌi uimiwan kaipyi watikuap Aipotypot Iesui ahaꞌaseꞌi koro Aparãu Emiariru Emiariru hap. Miꞌi hawyi ahaꞌaseꞌi Aparãu ywot Tare iꞌatuꞌe. Tare ywot Naku iꞌatuꞌe.
35 Miꞌi hawyi Naku ywot Seruki iꞌatuꞌe. Seruki ywot Irakãu iꞌatuꞌe. Irakãu ywot Wareki iꞌatuꞌe. Wareki ywot Epet saꞌyru. Miꞌi hawyi Epet ywot Sare iꞌatuꞌe.
36 Miꞌi hawyi Sare ywot Kaina iꞌatuꞌe. Kaina ywot Awasate iꞌatuꞌe. Awasate ywot SẼ iꞌatuꞌe. Sẽ ywot wuatꞌi eꞌaseꞌi pot Nuꞌe iꞌatuꞌe.
37 Nuꞌe ywot Irameki iꞌatuꞌe. Irameki ywot Metusarẽi mekewat ieineꞌen motꞌi kahato hat iꞌatuꞌe. Miꞌi hawyi Metusarẽi ywot Inoki iꞌatuꞌe. Inoki yt ikuꞌuro i katupono Tupana tioto atipy kape miꞌi miit. Miꞌi hawyi Inoki ywot Iarete iꞌatuꞌe. Iarete ywot Marereu iꞌatuꞌe. Miꞌi hawyi Merereu ywot Kaina iꞌatuꞌe.
38 Kaina ywot Enu iꞌatuꞌe. Enu ywot Sete iꞌatuꞌe. Sete ywot Atãu iꞌatuꞌe. Atãu ni Tupana minug mekewat miit saꞌawyꞌi wuat miitꞌin eꞌaseꞌi pot.
