Iruka 6:1-49
6 Miꞌi hawyi Tupana motypot hap eꞌat Iesui tokosap taꞌyn mekewat awati ypia pyꞌasetpuo temiitꞌin wywo. Miꞌi hawyi hemiitꞌin hoꞌopik taꞌyn awati hawyi taꞌatuehoꞌok hawyi taꞌatuꞌu raꞌyn.
2 Miꞌi pote iraniaꞌin woꞌonapin haria apo iꞌatuꞌe -Kat poteĩ meketã ewetunug iꞌatuꞌe katupono ainapin hawe yt naku i kahato ewetunug Tupana motypot hap eꞌat pe iꞌatuꞌe.
3 Mio iꞌatuꞌe pote Iesui tiꞌatuwesat -Yt eweimowẽpapꞌi apo aikotã saꞌawyꞌi wuat morekuat Tawi minug temiitꞌin esyꞌat turan wuat iminug etiat e.
4 Miꞌi ti teke raꞌyn Tupana motypot yat pe hawyi totat man koꞌi Tupana piat miium koꞌi. Miꞌi ti tutuꞌu hawyi toimoꞌẽ temiitꞌin me. Miꞌi ti yt hãpyk i tutunug katupono yt uwe kuap i iꞌu mekewat man katupono miꞌi ti paꞌiria yn iꞌu kuap takat.
5 Miꞌi hawyi Iesui ihay kahu raꞌyn hawyi toꞌe -Uito ti miitꞌin ykeꞌet areineꞌen Tupana motypot eꞌat kaꞌiwat e.
6 Wẽtup eꞌat pe Iesui teke Tupana motypot hap eꞌat pe woꞌomuꞌe koro yat pe. Itote toiꞌatumuꞌe kahato miitꞌin. Miꞌi turan wẽtup ok miit toineꞌen ipo sese kawiat ipo kĩꞌã rakat.
7 Miꞌi turan wanꞌi wanꞌi e haria tukupteꞌen itote iꞌewyte woꞌonapin haria. Miꞌiria ti teꞌerehaꞌat Iesui kape hawyi teꞌeruwanetup sio apuru toimoehãite Tupana motypot hap eꞌat pe iꞌatuꞌe. Taꞌatukyꞌesat kahato aikotã me pywiat ikuasa hap haype taꞌatuwoꞌonapin hap yt ewy i tutunug hap upi.
8 Maꞌato Iesui tikuap iꞌatuwanetup hap hawyi toꞌe mekewat miit ipokiã rakat pe -Epoĩꞌam no hawyi waku ereineꞌen yꞌam me miitꞌin pyꞌasetpe. Mio tã e hawyi mekewat miit ipoĩꞌam naꞌyn.
9 Miꞌi hawyi Iesui toꞌe -Pyno apo are ehepe kat eĩ toꞌe aiwoꞌonapin hawe mekewat Tupana motypot eꞌat ete. Kan waku watunug pyno mesup eꞌat pe sio wakuap sio yt. Sio waku watihakyeraꞌat miit sio waku watiꞌauka wẽtup ok miit.
10 Miꞌi hawyi itotiaria teꞌerehaꞌat torannia mekewat miit ipo kĩꞌã rakat auri wuat ieineꞌen haria kape hawyi toꞌe mekewat miit pe -Erepoha ro e hawyi mekewat miit topoha raꞌyn hawyi waku raꞌyn ipo.
11 Miꞌi pote wanꞌi wanꞌi e haria iꞌewyte woꞌonapin haria iꞌatupyꞌahak kahato raꞌyn Iesui ete hawyi iꞌatuehay kahato raꞌyn aikotã waku Iesui kuasa hap ete.
Iesui Tiꞌairo Topotmuꞌeria
12 Mekewat eꞌat pe Iesui toto raꞌyn yityꞌok kape Tupana wywuat tehay hamo. Wãtym muo kaꞌap toineꞌen itote ihay Tupana wywo.
13 Miꞌi hawyi hunete toiꞌatukay kay raꞌyn tuwewowi topotmuꞌeria. Miꞌiria kaipyi toiꞌairo 12 ok hawyi toꞌe iꞌatuepe -Eipe ti uimiꞌairoria uipotpoꞌororia 12 ok takaria e.
14 Miꞌi hawyi Simau toiꞌairo maꞌato miꞌi pe toꞌe -Pyno Simau mio eset atum epe Peteru are. Iꞌewyte toiꞌairo iꞌywyt Antere toikay kay iꞌewyte Tiaku hawyi Iuwãu hawyi Wiripi hawyi Patorumeu
15 Mateu hawyi Tume hawyi Tiaku Aweu saꞌyru hawyi Simau mekewat Seruti e hap.
16 Miꞌi hawyi Iuta Tiaku saꞌyru. Miꞌi ti Iesui maꞌat hanuat neꞌi topyhuꞌat.
17 Iesui tiꞌatuꞌairo 12 ok takaria temiitꞌin hawyi ipotꞌapyk yityꞌok kaipyi yt hot kape. Miꞌi tote tukupteꞌen Iesui kat haria iꞌatu kahato rakaria. Miꞌiria tawa Iuteu kaipyi tawa Ierusarẽi kaipyi iꞌewyte yꞌy wato yẽpe etiat tawa Tiro kaipyi hawyi Sitau kaipywiaria toiꞌatupuẽti yihot pe.
18 Tõꞌẽ Iesui ehay kapiat teꞌeruwanetup hamo. Iꞌewyte iꞌahuu rakaria taꞌatuehãite hap kyewi haria tõꞌẽ. Iꞌewyte tukupteꞌen itote ahiag ipiit piat rakaria. Taꞌatukyꞌesat Iesui tiꞌatusopo yne iꞌatupiit pyi.
19 Miꞌi hawyi torannia õꞌẽ haria hemig neran kahato Iesui kat pote hemig hap kaipyi hesaika hap tuwẽtem topiit pyi miitꞌin torannia iꞌatuehãite hamo.
20 Miꞌi hawyi Iesui tehaꞌat topotmuꞌeria kape hawyi toꞌe -Tupana mipoityro kahato koꞌi eiperia. Yt hekat rakaria i eweikupteꞌen pykai maꞌato Tupana ieineꞌen hap eheineꞌen hamuat.
21 Miꞌi hawyi Tupana mipoityro kahato koꞌi eiperia. Miꞌi pote koran hesyꞌat rakaria eweikupteꞌen pykai ipoityꞌi kahato aru eimiꞌu koꞌi. Tupana mipoityro kahato eiperia pykai koran eweiwak kahato maꞌato miꞌi pykai aru iwepiit rakaria wo eweikupteꞌen.
22 Tupana mipoityro kahato eiperia pykai aru iraniaꞌin yt iꞌatuwese i ehete eiporenotem aru taꞌatupyꞌaset pyi. Miꞌi haype aru teꞌeroꞌe ehepe yt nakuaria i miꞌiria Iꞌatuꞌe aru uimohey haria eipe pote.
23 Maꞌato waku miꞌi tã taꞌatunug ehetiat pykai eiwepiit yn naꞌyn katupono toineꞌen iwato kahato saꞌup eiwatnuat atipy pe katupono saꞌawyꞌi wuaria Tupana ehay moherep haria eiꞌewy wuaria ete ehetiat ewy te taꞌatunug.
Hekat Koꞌi Mesuwat Totiat Yn
24 Pyno eiweꞌeg wo o hekat rakaria kat pote toĩ yne raꞌyn ehekat koꞌi wen maꞌato mesuwarotiat eimowepiit hamuat yn toineꞌen.
25 Iꞌewyte eiweꞌeg wo o eimiꞌu iwato kahato hap wywo kat pote miꞌi ti mesuwarotiat yn pote aru hesyꞌat rakaria wo meiũran eweikupteꞌen. Iꞌewyte eiweꞌeg wo o koran wuat eiwepiit hap ete kat pote meiũran aru eweikupteꞌen wak haria wo neꞌi e.
26 Iꞌewyte eiweꞌeg wo o mesuwarotiat eiwemotypot hap wywo kat pote saꞌawyꞌi wuaria Tupana ehay moherep haria heso rakaria wyti teꞌeruwemotypot kahato hap neꞌi inug.
27 Pyno areꞌe ehepe waku eiwewaure kaꞌa kahato uhehay kape. Pyno waku eweikyꞌe kahato o ewanikaptia. Waku ewetunug wakuap yn naꞌyn yt eikyꞌe i haria pe.
28 Pyno waku yt naku i nug ehetiat haria poityro haria wo o eweikupteꞌen. Miꞌi hawyi waku ewehẽtup ehetiat ihay saꞌag nakaria upi.
29 Sio karãpe wẽtup ok ehewa petek turan waku eiwemorem hawyi -Waku kokai i ro uiꞌahyk eweiꞌe eiꞌahyk hat pe. Iꞌewyte karãpe wẽtup ok epohara esokpe ete hawyi waku ereꞌe tope -Pyno waku poꞌog wẽtup etioto eweiꞌe.
30 Iꞌewyte karãpe wuatꞌi miit hẽtup eepe ekat pote waku ewetum tope. Karãpe wẽtup ok tioto ekat turan o eterut rẽ o uhekat emieroto yt eweiꞌe teiꞌo e.
31 Waku ewetunug iraniaꞌin me iraniaꞌin minug ehepiat oktan.
Uwe Waku Aimikyꞌe Koꞌi Wo
32 Maꞌato eweiꞌatukyꞌe eikyꞌe haria yn pote mesuwarotiaria ewy neꞌi eweikupteꞌen. Katupono miitꞌin mesuwarotiaria yt nakuat i tikyꞌe taꞌatukyꞌe sese haria yn.
33 Iꞌewyte ewetunug wakuap mekewat ehepiat wakuap nug hat pe yn miꞌi pote ti aru eweikupteꞌen mesuwarotiaria ewywuaria neꞌi katupono miitꞌin yt nakuaria i wyti inug miꞌi tã neꞌi.
34 Maꞌato eweipuru ehekat mekewat miit ehepiat haꞌupnug tuereto hat pe yn pote ti aru eweikupteꞌen mesuwarotiaria ewywuaria neꞌi katupono yt nakuaria i miitꞌin wyti ipuru taꞌatuekat taꞌatuꞌewywuat yt nakuaria i ekat yn katupono miꞌiria ti ikyꞌesat taꞌatuekat taꞌatumipuru saipepiat rakaria.
35 Pyno uito ti tuweupi kahato worohoꞌomuꞌe waku eweikyꞌe ro ehewanikaptia. Waku ewetunug wakuap koꞌi iꞌatuepe. Karãpe eweipuru ehekat hawyi yt ewehekatup teiꞌo heraꞌaipok ehewowiat hap kape katupono kat som emipuru kaipyi ti aru iwato kahato hãipe piat saꞌup eweipuẽti hawyi eweikupteꞌen Tupana ywaiti piat mepytꞌin wo raꞌyn. Maꞌato yt miꞌi tã i ewetunug pote eweikupteꞌen yt nakuaria i wo neꞌi.
36 Pyno waku hegyiꞌat kahato rakaria wo eweikupteꞌen aikotã eiꞌywot atipy piat hegyiꞌat kahato hap ewy.
37 Yt naku i en yt eweiꞌe i iraniaꞌin me pote Tupana iꞌewyte yt naku i eipe yt e i ehepe. Yt eweipun i iraniaꞌin iꞌapiheg hamo. Miꞌi pote ti aru Tupana yt mipun wo i eweikupteꞌen. Maꞌato waku waure wo ereineꞌen iraniaꞌin minug saꞌag eete pote iꞌewyte Tupana ti waure wo toineꞌen eminug yt naku i hap ete.
38 Eweimoꞌẽ iraniaꞌin me ehekat miꞌi pote ti aru Tupana hãipe piat nug yne ehepe eimiium iraniaꞌin piat oktan. Miꞌi hap ewy ti aru ewetat iwato kahato hãipe piat. Torannia eimiereto kuap oktan wyti aru Tupana tum ehepe hãꞌãg wo ewetum iraniaꞌin me miꞌi hap ewy te ti aru Tupana tum hãꞌãg wo ehepe.
39 Miꞌi hawyi Iesui ihay poꞌog iãꞌãkap wuo -Pyno yt ihapytig i rakat wyti toꞌope yt ihapytig i rakaria yt toꞌoporereto kuap i maꞌato miꞌiria toꞌoporereto pote meremo hewo yne yi kaꞌa pe.
40 Yt wẽtup ok i wyti toineꞌen mimuꞌe poꞌog tomuꞌe hat kai. Maꞌato karãpe mimuꞌe imoma raꞌyn tuwemuꞌe hap hawyi toineꞌen tomuꞌe hat ewy raꞌyn.
41 Kat poteĩ erehaꞌat ewy ehapiat ipit pit kurin kat kape neꞌi katupono ewat eha piat yt erehaꞌat hin i katupono ewat eha pe ti poꞌog iwato rakat ariaꞌyp sapen toineꞌen e.
42 Aikotã ten pyno ereꞌe ewy ok pe -Atihep teran eha piat ipit pit ere maꞌato miꞌi pykai ewat eha piat yt erehaꞌat hin i ariaꞌyp sapen toineꞌen eha piat pykai. Pyno typy ihay rakaria waku saꞌawyꞌi etihep ewat eha piat ri ariaꞌyp sapen hawyi ehapytig naꞌyn hawyi waku etihep ewy ok eha piat ipit pit e.
Kat Kat Ywa Waku Yp Kaipyi Iꞌewyte Yt Naku I Rakat Kaipyi
43 Pyno mikoi yp wakuat kaipyi ti yt karãpe i ywa saꞌag neꞌi tuwẽtem. Iꞌewyte mikoꞌi yp saꞌag kaipyi yt karãpe i ywa wakuat tuwẽtem.
44 Kat koꞌi kat koꞌi mikoi yp koꞌi watikuap iꞌatusat koꞌi ete. Pyno yt aikotã kuap i ti Wiku sat tuwẽtem hu yp kaipyi neꞌi. Iꞌewyte Uwa wyti yt tuwẽtem i hu yp kaipyi neꞌi.
45 Pyno miit waku rakat wyti imoherep topyꞌa piat waku rakat. Maꞌato miit yt nakuat i wyti topyꞌa piat yt naku i rakat imoherep. Kat pote topyꞌa piat yt naku i sese rakat toimoherep towẽ pyi.
Typy Rakat Tupana Napin Hap
46 Kat pote ti uikay kay eipe uikaꞌiwat uikaꞌiwat eweiꞌe pykai yt ewetunug hin i uiꞌe hap koꞌi.
47 Torannia uwe uwe uhewowiat õꞌẽ haria ikuap uhehay hawyi inug uiꞌe hap ewy. Pyno atimoherep ehepe uwe ewy tukupteꞌen miꞌi haria hap ehepe.
48 Miꞌi miit wyti aikotã netap nug kuap kahato hat ewy. Toipan yi pya pe kahato hawyi totopag Iꞌapyꞌyha wo nu iheg kahato rakat ewy. Miꞌi pote karãpe yꞌy mutꞌe kahato pykai yt hyryꞌe hin i iꞌyat tutunug hãpyk kahato pote hap ewy.
49 Maꞌato uwe tuwanetup uhehay kape pykai yt toimohey i miꞌi hat wyti aikotã miit tuweꞌyat nug yi tote yt kat i iꞌapyꞌyha iheg nakat wywo rakat ewy. Miꞌi pote karãpe ywutu hawyi yꞌy tiꞌapy hep hawyi meremo toiꞌaporok taꞌyn mekewat netap hap ewy.
