Iruka 8:1-56
8 Miꞌi hawyi Iesui toto yne tawa koꞌi upi temiitꞌin 12 ok takaria wywo sehay wakuat enoi hamo. Aikotã Tupana topyhuꞌat irane Wuatꞌi Ywania Porekuatno hap tomohey hawyi hap moherep hamo raꞌyn yne tawa hit yne tawa watoꞌin koꞌi upi.
2 Temiitꞌin sem koꞌi wywo tuwat iꞌewyte haryporiaꞌin tuwat hupi miꞌu nug hamo. Wẽtup ok haryporia Maria tawa Matarena piat e hap het rakat saꞌawyꞌi wuat 7 ok ahiagnia ipiit piat rakat Iesui tisopo raꞌyn nakat.
3 Miꞌi hawyi Iuana mekewat Kusa eharyꞌi toto hupi hemiitꞌin eropat hamo. Heꞌaito ti mekewat Kusa morekuat Eroti yat pe toineꞌen. Yne motpap hap koꞌi morekuat yat piat toineꞌen Kusa po pe. Miꞌi hawyi mana Susana iꞌewyte iraniaꞌin haryporia Iesui potpoꞌororia powyro haria teꞌeropyhuꞌat. Miꞌi hawyi taꞌatuekat kaipyi taꞌatukyiꞌat kat koꞌi kat koꞌi Iesui powyro hamo.
Iãꞌãkap Iãꞌỹi Koꞌi Hat Etiat
4 Miꞌi hawyi yne tawa kaipywiaria aikope pyi aikope pyi teꞌeruwaꞌatunug Iesui ewowi. Miꞌi hawyi iãꞌãkap puo wẽtup sehay tohenoi yne itotiaria pe.
5 Mio tã tohenoi hãꞌãkap wuo -Wẽtup eꞌat pe so hãꞌỹi sytpok hat toto toko kape hãꞌỹi sytpok hamo maꞌato yt yne i hewo go sese tote e. Iraniaꞌin hãꞌỹi go puꞌap upi hewo e. Miꞌi ti miitꞌin ikohyewyry iko puꞌap tote hawyi taꞌatuꞌakit akit neꞌi raꞌyn hãꞌỹi hawyi weitaria tuꞌu yne hãꞌỹi koꞌi hewo rakat muap upiat e.
6 Iraniaꞌin hãꞌỹi nu upi yi heg upi hewo e. Wẽtup tuereto hẽtyt maꞌato meiũran ikuꞌuro yt kat i yꞌy yi kaipyi hãꞌỹi nu totiat neꞌi pote e.
7 Iraniaꞌin hãꞌỹi iꞌanam me hu ypia pe hewo e. Miꞌiria hẽtyt wen maꞌato iꞌanam wywo toꞌoꞌewy neꞌi pote meiũran iꞌanam tohik neꞌi raꞌyn hawyi yt tuwenug i raꞌyn e.
8 Iraniaꞌin yi wakuat rote hewo hewo go tote e. Miꞌiria ti iꞌatuehãite kahato hawyi wẽtup sat kaipyi 100 iãꞌỹi tuwemoherep e. Pyno ehewaure kaꞌa pote iwanetup kahato o mesuwat uhehay iãꞌãkap puat uimienoi ape e Iesui miitꞌin sem me.
9 Miꞌi hawyi ipotmuꞌeria apo iꞌatuꞌe Iesui pe -Pyno kat e hap som ehenoi teran iãꞌãkap wuo hãꞌỹi koi hap ete iꞌatuꞌe.
10 Miꞌi hawyi Iesui tiꞌatuwesat -Taꞌi uiwyriaꞌin ahenoi teran ehepe wuatꞌi mikuap yt heremo i rakat i aikotã Tupana topyhuꞌat irane Wuatꞌi Miitꞌin Porekuat no hap etiat e. Maꞌato iraniaꞌin me miitꞌin sem me hãꞌãkap wuo ahenoi teran yt uikuap teran i haria miꞌiria pote e. Teꞌeraꞌakasa wen uipiit kape maꞌato uhehay yt hotꞌokꞌe i iꞌatuete pote.
11 -Pyno koitywy ahenoi i ehepe mesuwat iãꞌỹi iãꞌãkap etiat eweikuap sese hamo. Pyno uhehay iãꞌãkap wuo katupono Tupana ehay topyhuꞌat mekewat iãꞌỹi ewy e.
12 Mekewat mikoi iãꞌỹi go puꞌap upiat ti hewo rakat iãꞌỹi wẽtup ok wẽtup ok wanetup hat ewywuat e. Teꞌeruwanetup maꞌato meremo ahiag putꞌok e iꞌatuwanetup hap ete hawyi Tupana ehay mikoi iãꞌỹi ewywuat toihep taꞌyn iꞌatuewaure pyi. Yt toikyꞌesat i taꞌatukuap katupono taꞌatukuap hawyi taꞌatuehakyeraꞌat hamuat taꞌatukuap taꞌyn e.
13 Miꞌi hawyi ti nu totiat hewo rakat ewywuat wẽtup ok wẽtup ok wanetup hat ewy e. Teꞌeruwanetup hawyi waku kahato taꞌatupuẽti uimienoi hawyi iꞌatuwepiit kahato uhehay taꞌatukuap hawyi. Pywo kahato iꞌatuꞌe maꞌato miꞌiria iãꞌỹi yt hapo rakaria i ewywuaria tukupteꞌen e. Miꞌi pote yt toineꞌen motꞌi i kuap uhehay mohey hap Iꞌatuete e. Meiũran iraniaꞌin toꞌokyryꞌi iꞌatuete iꞌatuiãꞌãg hap uimohey hap kaipyi hawyi meremo taꞌatuwaure raꞌyn Tupana ehay e.
14 Iꞌewyte ti mekewat iãꞌỹi iꞌanam miat hu ypia puat hewo rakat wẽtup ok wẽtup ok wanetup hat ewywuat e. Miꞌiria teꞌeruwanetup kahato uhehay wakuat kapiat hawyi taꞌatumohey ran hawyi taꞌatunug neran Tupana mikyꞌesat ewywuat koꞌi wen maꞌato taꞌatupotpap iwato hap kape taꞌatumikyꞌesat ewywuat nug hap kape yn teꞌeruwanetup hawyi uhehay toĩ wen iꞌatukai maꞌato yt karãpe i iꞌatag hap ewy toineꞌen iꞌatupyꞌa pe maꞌato iꞌakyt ewywuaria neꞌi topyhuꞌat iꞌatupyꞌa pe.
15 Maꞌato mekewat hãꞌỹi yi wakuat rotiat hewo rakaria wyti wẽtup ok wẽtup ok wanetup hat ewywuat e. Miꞌiria ti iꞌatupyꞌa piat yi wakuat ewywuat pote teꞌeruwanetup aat kaꞌap Tupana ehay kape hawyi yt taꞌatuwaure hin i maꞌato taꞌatuhytmoĩ kahato taꞌatupyꞌa pe Tupana ehay hawyi taꞌatunug naꞌyn Tupana mikyꞌesat ewy e. Miꞌi pote mikoi haat kahato rakat ewywuat teꞌeropyhuꞌat teꞌeruwenug kahato rakaria ewy e Iesui.
Iãꞌãkap Ariãty Etiat
16 Miꞌi hawyi wẽtup iãꞌãkap wuo Iesui henoi towyriaꞌin me -Getap we wãtym hawyi yt uwe i ariãty hẽtyhot hap ipag neran kamuti pe migꞌi wo e. Iꞌewyte yt taꞌatupag i yni ywytꞌokpype neꞌi maꞌato ywaiti pe waku pe heiam note yn taꞌatuhupit teran e. Miꞌi hawyi wehytꞌok haria meremo teꞌeraꞌakasa hẽtyhot hap e.
17 Pywo ti aru miitꞌin minug koꞌi heremo kahato topyhuꞌat. Yt kat i migꞌi wo toineꞌen. Kat kat koꞌi mio migꞌi wo toineꞌen wen maꞌato meiũran ti aru heremo yne raꞌyn e miitꞌin minug koꞌi.
18 Pyno eweiwanetup to uimienoi kape uhytꞌiꞌin manaꞌin e Iesui. Eweiwanetup haty wo hawyi eiwewaure kaꞌa kahato uhehay kape. Miꞌi pote aru poꞌog naꞌyn putꞌok e eiwanetup hap moẽtyhot hamuat. Maꞌato iraniaꞌin yt urutuwanetup teran i imienoi kape e haria ti. Uruto uruweꞌeg kahato e haria maꞌato mio tã e haria wanetup hawyi tuweityk yne raꞌyn e.
Iesui Wyriaꞌin Sese Putꞌok Iꞌatuꞌe Raꞌyn
19 Miꞌi turan Iesui ty putꞌok e Iesui ywytꞌin wywo hawyi tuwehytꞌok teran Iesui ewowi wen maꞌato yt tuwehytꞌok kuap i katupono ipotmuꞌeria typyꞌi kahato getap we pote.
20 Miꞌi pote wẽtup ok toꞌe Iesui pe -Uhyt iuẽ ety putꞌok e okenꞌypyke hawyi eꞌywytꞌin nywo iꞌatuehay teran so ewywo e Iesui pe.
21 Miꞌi hawyi Iesui toꞌe getap wiaria pe -Pywo pe ti areꞌe uity sese uheꞌywytꞌin sese uheinytꞌin sese uimienoi kapiat wanetup haria. Iꞌewyte uimienoi taꞌatukuap hawyi taꞌatunug Tupana mikyꞌesat koꞌi e. Miꞌiria ti teꞌeropyhuꞌat uity uiywytꞌin uheinytꞌin e.
Iesui Timonik Taꞌyn Ywyt Uato
22 Wẽtup eꞌat pe Iesui toꞌe temiitꞌin me -Toꞌiro yara puo hyemyiꞌa wato sakpo e. Miꞌi hawyi toto raꞌyn yara wato kape hawyi teke temiitꞌin wywo. Tuwehytꞌok yara pe hawyi tuwat raꞌyn hyemyiꞌa wato sokpo e.
23 Yꞌy pyꞌasetpiat turan Iesui toket raꞌyn. Miꞌi turan ywytu kahato putꞌok e yꞌy ete hyemyiꞌa wato pyꞌasetpiat ikupteꞌen turan hawyi ywytu tipetek kahato raꞌyn yara pote yꞌy teke teke raꞌyn iꞌatueꞌyara pe. Miꞌi pote -Yt naku i kahato pote wataꞌapyꞌat hamuat raꞌyn iꞌatuꞌe taꞌyn. Ipoityꞌi kahato raꞌyn iꞌatuete.
24 Miꞌi hawyi teꞌeruwẽpowat Iesui kape -Urukaꞌiwat urukaꞌiwat erehymut ro iꞌatuꞌe. Wataꞌapyꞌat irane raꞌyn iꞌatuꞌe. Yꞌy teke teke kahato aheꞌyara pe iꞌatuꞌe. Watopap hamuat raꞌyn iꞌatuꞌe hawyi Iesui tuwehymut hawyi ipoĩꞌam naꞌyn hawyi iwẽpapꞌi raꞌyn ywytu kape -Epohep to ywytu iꞌewyte epoꞌinik to yꞌy e. Mio tã e hawyi ipohep taꞌyn ywytu iꞌewyte ipoꞌinik taꞌyn yꞌy.
25 Miꞌi hawyi apo e haty wo topotmuꞌeria pe -Uiwyriaꞌin kat poteĩ yt uimohey i e. Aikopeĩ ehepiat uimohey hap e. Miꞌi hawyi teꞌeruwanetup kahato raꞌyn iminug ete hawyi teꞌeroꞌe toꞌope -Uwe som pyno Meiũ Miit Iesui katupono ihay pyi ipoꞌinik kuap meremo ywytu iꞌewyte yꞌy esaika hap iꞌatuꞌe.
26 Miꞌi hawyi yi Kerasa eꞌy sakpo putꞌok iꞌatuꞌe yi Karireia kaipyi hawyi yi Kerasa wã tote teꞌeruwehik taꞌyn.
27 Hawyi tuwẽtem naꞌyn yara wato pyi turan putꞌok e raꞌyn hewowi wẽtup ok ahiagnia sem ipiit piat rakat tawa Kerasa piat ieineꞌen hat. Miꞌi ti yt toineꞌen kuap i towyriaꞌin wywo tetawa pe katupono ipyꞌahak kahato hawyi hesoꞌok tuereto pote. Miꞌi haype toineꞌen woꞌosyp hap tote yn yt tesokpe pe i.
28 Tehaꞌat Iesui kape hawyi tehay pirik wo tuwewahik yi totiat hawyi iwẽpapꞌi tehay pirik wo -Worokuap En Tupana Ywaitiat Ieineꞌen hat Saꞌyru En e. Kat aru etunug uhete e haty wo Iesui pe. Uhyt waĩ urusatyꞌi satyꞌi teiꞌo e ahiagnia miit piit pyi.
29 Mio tã iꞌatuꞌe katupono Iesui tiꞌatusopo teran mekewat miit piit pyi ahiagnia pote. Saꞌawyꞌi ahiagnia topytyk tuereto mekewat miit ipiit ete hawyi hesoꞌok kahato tuereto. Iꞌewyte iraniaꞌin ipoꞌi poꞌi haity iheg rakatno pykai toiterek neꞌi. Iꞌewyte ipy ipo koꞌi taꞌatupoꞌi poꞌi pykai toiterek neꞌi hawyi ahiag tioto yahig wato kape.
30 Miꞌi hat pe Iesui toꞌe -Kat eĩ eset e tope. Miꞌi hawyi -Isem e rat uhet katupono saꞌawyꞌi ahiagnia typyꞌi kahato rakaria tuwehytꞌok uipiit pe pote hawyi miitꞌin uhetꞌok Isem Iꞌatuꞌe.
31 Miꞌi hawyi ahiagnia teꞌeroꞌe Iesui pe taꞌatuemiit piit pyi -Uhyt iꞌatuꞌe yt urupoꞌoro teiꞌo En wuatꞌi eꞌat piat guꞌuro hap kape iꞌatuꞌe.
32 Miꞌi turan tukupteꞌen itote hamaut koꞌi typyꞌi kahato rakaria. Miꞌi pote teꞌeroꞌe -Pyno meimuẽwat hamaut koꞌi kape ro urupoꞌoro iꞌatuꞌe. Mio tã iꞌatuꞌe hawyi Iesui toꞌe iꞌatuepe -Eiwehytꞌok to pyno mekewat hamaut koꞌi piit pe ahiagnia pe.
33 Miꞌi hawyi tuwenoꞌẽ raꞌyn mekewat miit hesoꞌok rakat piit pyi hamaut koꞌi kapiat tuwehytꞌok hamo. Miꞌi hawyi hamaut koꞌi ikohyeput i kohyeput i yityꞌok tote pyi yꞌy wato kape hawyi hewo hewo raꞌyn yꞌy wato pe hawyi topap yne raꞌyn.
34 Miꞌi hawyi hamaut apykok haria teꞌeraꞌakasa hawyi meremo tuwat henoi hamo tawa koꞌi kape. Iꞌewyte muap upiat gupteꞌen haria pe taꞌatuhenoi.
35 Pyno iꞌatuepiat henoi hawyi tõꞌẽ kahato Iesui kape. Putꞌok iꞌatuꞌe turan mekewat saꞌawyꞌi wuat ahiag ipiit piat rakat waku raꞌyn taꞌatupuẽti sokpe pe raꞌyn toineꞌen Iesui yatype. Iwanetup hap hãpyk iraꞌyn.
36 Miꞌi hawyi saꞌawyꞌi wuat akasa haria henoi yne aikotã aikotã Iesui timoehãite hap etiat õꞌẽ haria pe.
37 Miꞌi tupono mekewat tawa Kerasa kaipywiaria teꞌerokenꞌẽ kahato Iesui pupi haype teꞌeroꞌe -Mehin ereto ro meiũpe pyi iꞌatuꞌe Iesui pe. Yt uruikyꞌesat i meiũpe ereineꞌen poꞌog iꞌatuꞌe. Mio tã iꞌatuꞌe hawyi Iesui teke i raꞌyn yara pe hawyi taꞌaipok iraꞌyn yꞌy wato sakpo.
38 Teke turan saꞌawyꞌi wuat ahiag ipiit piat rakat -Uikaꞌiwat areto teran eupi katupono areineꞌen epotmuꞌe wato wo teran e Iesui pe.
39 Maꞌato Iesui -Yt uhyt waku poꞌog eraꞌaipok eꞌyat kape hawyi ehenoi aikotã Tupana tunug ehetiat hap koꞌi. Mio tã e hawyi mekewat miit toto raꞌyn wuatꞌi tawa koꞌi kape hawyi tohenoi henoi raꞌyn tepiat Iesui minug koꞌi tetawa piaria pe toto. Miꞌi tote yne tawa piaria pe aikotã Iesui tunug tetiat hap tohenoi kahato.
40 Miꞌi hawyi Iesui tuweꞌysakpo iraꞌyn turan miitꞌin typyꞌi kahato toiꞌatupuẽti itote. Iꞌatuwepiit kahato katupono taꞌatuhekatup kahato Iesui putꞌok e hap.
41 Miꞌi turan tuut Iesui ewowi wẽtup ok Tupana motypot yat piaria akag Iairu e hap het rakat. Miꞌi ti Iesui owa kape tuwepỹꞌãtutuk hawyi tuwewahik yi kape hawyi toꞌe Iesui pe -Mehin eriot ro uhupi uiꞌyat kape e.
42 -Mehin e uhakiꞌyt 12 anu rakat ikuꞌuro teran kahato raꞌyn e. Mio tã e hawyi Iesui toto raꞌyn Iairu yat kape. Miꞌi turan muap upi miitꞌin sem tohik kahato kokai kokai.
43 Miꞌi turan toineꞌen iꞌatuꞌok pe kai wẽtup ok haryporia huu wato rakat 12 anu raꞌyn hoꞌopot hat. Toipun yne raꞌyn tekat koꞌi paini koꞌi upi mohag nug haria koꞌi upi tomoehãite hap kyewi wen maꞌato yt toipuẽti hin i tehãite hap.
44 Miꞌi ti tokosap Iesui ape kai hawyi totemig naꞌyn hesokpe ẽpe hawyi meremo huu teke raꞌyn hawyi waku iraꞌyn.
45 Miꞌi hawyi tesokpe emig hawyi Iesui apo e -Uweĩ uhemig hat meikope e. Mio tã e pote Peteru toꞌe Iesui pe -Uikaꞌiwat miitꞌin typyꞌi kahato rakaria pyꞌasetpe ahewyry pote miitꞌin ahemig hemig kahato e.
46 Maꞌato Iesui toꞌe -Peteru e uhemig hat wyti uimohey kahato hat miꞌi pote uhemig turan uhesaika hap tuwẽtem uipiit pyi imoehãite hamo.
47 Toikuap taꞌyn hawyi hemig hat tyry toꞌe popuo tuut hewowi. Miꞌi hawyi tuwepỹꞌãtutuk Iesui ewowi. Mio tã e -Mimi mesup taꞌyn migꞌi wo woromig uimoehãite hap kyewi e. Woromig hawyi meremo epiat uimoehãite hap atipuẽti e Iesui pe wuatꞌi ehamo.
48 Miꞌi hawyi Iesui toꞌe tomimoehãite hat pe -Uhakiꞌyt pyno waku raꞌyn en e. Uimohey hap kaipyi emoehãite hap etipuẽti raꞌyn e. Waku pyno eraꞌaipok i raꞌyn eꞌyat kape ewepiit hap wywo e.
49 Miꞌi turan Iesui piat henoi imoehãite hap turan putꞌok e wẽtup ok Iairu yat kaipyi. Miꞌi toꞌe Iairu piat henoi hamo. -Uhyt e ikuꞌuro sese raꞌyn wyti esakiꞌyt e. Pyno yt kan hamo i wahenoi poꞌog aimuꞌe hat Iesui pe e.
50 Miꞌi hap Iesui tikuap hawyi toꞌe Iairu pe -Yt gytꞌere teiꞌo esakiꞌyt ikuꞌuro hap pupi maꞌato etimohey yn naꞌyn Tupana hawyi waku pe esakiꞌyt e.
51 Miꞌi hawyi Iesui putꞌok e Iairu yat ete hawyi Iesui toꞌe miitꞌin sem me -Yt atikyꞌesat i miitꞌin typyꞌi poityꞌi ikuꞌuro rakat yatype e. Waku Peteru Iuwãu Tiaku iꞌewyte iꞌywot ity yn atikyꞌesat ikuꞌuro yatype e.
52 Teke hawyi Iesui tiꞌatupuẽti itote miitꞌin wak haria hakiꞌyt ikuꞌuro pote teꞌeruwak taꞌatueko ewy. Miꞌiria pe Iesui toꞌe -Yt eweiwak teiꞌo e eipoꞌinik to e. Yt ikuꞌuro i rat maꞌato toket neꞌi rat e.
53 Miꞌi pote wak haria toꞌokyryꞌi neꞌi Iesui ehay ete -Pywo ti rat ikuꞌuro sese hakiꞌyt iꞌatuꞌe.
54 Iesui teke raꞌyn ikuꞌuro rakat kape iwywuat pe hawyi toipopytyk taꞌyn hawyi toꞌe tehay pirik wo -Piꞌã epoĩꞌam no e.
55 Miꞌi hawyi tuwehymut iraꞌyn hakiꞌyt ikuꞌuro rakat hawyi -Koitywy etopoi ro emepyt mana e.
56 Miꞌi hawyi iꞌywotꞌin teꞌerehum kahato Iesui minug ete maꞌato Iesui toꞌe iꞌatuepe -Yt uwe pe teiꞌo ewehenoi uiminug ete emepyt moehãite hap e.
