Iruka 9:1-62
9 Iesui tuwẽtem Iairu yat pyi hawyi toiꞌatukay kay tuwewowi temiitꞌin sese 12 ok takaria. Miꞌi hawyi toꞌe temiitꞌin sese pe -Uiwyriaꞌin mesup atum naꞌyn ehepe uhesaika hap ahiag sopo hamuat e. Iꞌewyte atum naꞌyn ehepe uhesaika hap iꞌahuu rakaria moehãite hamuat.
2 Miꞌi hawyi toiꞌatupoꞌoro temiitꞌin miitꞌin muꞌe hamo aikotã Tupana toineꞌen morekuatno hap etiat hamo. Iꞌewyte iꞌahuu rakaria moehãite hamo.
3 Miꞌi hawyi toꞌe topotmuꞌeria pe -Yt kat reiꞌo ewetioto eiwewywo yt eipoꞌyha i wyti iꞌewyte yt ehekuriwuꞌa i wyti iꞌewyte yt eimiꞌu i wyti iꞌewyte uhetineiru i wyti iꞌewyte wẽtup ehesokpe yn waku ewetioto e.
4 Karãpe eiwehytꞌok taꞌyn wẽtup tawa pe hawyi uwe -Ereke ro uiꞌyat pe e hat yat pe waku eweikupteꞌen. Karamuo eiwenoꞌẽ iraꞌyn mekewat tawa pywiat hap kape.
5 Maꞌato mekewat tawa piaria yt eikyꞌesat i pote waku meremo eiwenoꞌẽ mekewat tawa pyi maꞌato eiwenoꞌẽ turan waku eiwepiit pitꞌok eipy tawa sawiu meimuẽ ti miitꞌin yt nakuaria i e hap moherep hamo e.
6 Mio tã e hawyi tuwat raꞌyn hemiitꞌin wuatꞌi miitꞌin piat sehay wakuat Iesui etiat enoi hamo. Iꞌewyte tuwat turan taꞌatumoehãite kahato wuatꞌi tawa puo iꞌahuu rakaria.
Morekuat Eroti Iuwãu Pupi Tokenꞌẽ
7 Miꞌi hawyi tama Karireia piat morekuat Eroti tikuap taꞌyn aikotã Iesui minug koꞌi etiat hawyi tuwanetup kahato. Katupono iraniaꞌin Iuwãu wyti tuwehymut iraꞌyn
8 Iraniaꞌin teꞌeroꞌe -Mekewat Tupana ehay moherep hat saꞌawyꞌi wuat Eria tuwehymut iraꞌyn guꞌuro pyi iꞌatuꞌe maꞌato iraniaꞌin teꞌeroꞌe mekewaria saꞌawyꞌi wuaria Tupana ehay moherep hat haria teꞌereuwemoherep iraꞌyn.
9 Miꞌi pote Eroti toꞌe -Uhehay pyi meke taꞌatuꞌakag tek taꞌyn Iuwãu e. Maꞌato iraniaꞌin henoi kahato te wẽtup ok iminug etiat. Uweĩ miꞌi miit e. Miꞌi hawyi Eroti tikat raꞌyn Iesui tehaꞌat teran haype.
10 Miꞌi hawyi Iesui potpoꞌororia teꞌeraꞌaipok i raꞌyn tawa koꞌi kaipyi ihay moherep haria. Miꞌi hawyi taꞌatuhenoi aikotã aikotã ipuꞌap muat upi taꞌatuminug hap koꞌi taꞌatuewyry hap upi taꞌatuhenoi henoi yne yne Iesui pe. Taꞌatuhenoi yne raꞌyn hawyi Iesui teꞌerepoꞌok i raꞌyn temiitꞌin wẽtup tawa kape tawa Pesaita kape taꞌatuweran temiitꞌin nywo hap toikyꞌesat.
11 Maꞌato miitꞌin typyꞌi rakaria tikuap hawyi tuwat raꞌyn Iesui upi. Putꞌok iꞌatuꞌe hawyi waku kahato eiweꞌe e Iesui Iꞌatuepe hawyi toiꞌatumuꞌe kahato Tupana toineꞌen morekuatno hap ete. Iꞌewyte toiꞌatumoehãite kahato taꞌatumoehãite hap kyꞌesat haria.
12 Miꞌi hawyi wãtym i kape hemiitꞌin 12 ok takaria teꞌeroꞌe Iesui pe -Urumuꞌe hat etiꞌatupoꞌoro i ro miitꞌin sem tawa koꞌi kape itotiat iꞌatuket hamo iꞌewyte itote taꞌatupuẽti kuap taꞌatumiꞌu wuat koꞌi. Meiũpiat yahig wato totiat yt kat i pote iꞌatuꞌe.
13 Mio tã iꞌatuꞌe hawyi Iesui toꞌe -Eweiꞌatupoi ro hesyꞌat rakaria e temiitꞌin me. Miꞌi hawyi -Mehin kurin kahato aimiꞌu mesuwe iꞌatuꞌe. Toineꞌen aimiꞌu 5 man typy pira yn wuatꞌi poi hamo yt putꞌok e kuap i iꞌatuꞌe. Sio apo etikyꞌesat urutuwat tawa kape miꞌu kyiꞌat poꞌog iwato hamo typyꞌi rakaria moenuk hamo iꞌatuꞌe.
14 Pywo tukupteꞌen meiũpe miitꞌin sem kahato aikotã 5 miu ihainiaꞌin hap ewy iꞌatuꞌe. Miꞌi hawyi Iesui toꞌe temiitꞌin me -Pyno eweiꞌapyk to yi upi eweiꞌe ro kowo 50 kowo 50 eweiꞌe ro waꞌatunug haria pe e Iesui temiitꞌin me.
15 Miꞌi hawyi hemiitꞌin tunug naꞌyn Iesui e hap ewy hawyi taꞌatupoꞌoro raꞌyn miitꞌin torannia Iꞌatuꞌapyk hamo.
16 Miꞌi hawyi Iesui tat raꞌyn 5 man iꞌewyte typy pira hawyi tehaꞌat atipy kape hawyi -Waku kahato emiium uruepiat urumiꞌu wuat Tupana e. Mio tã toꞌe hawyi toipatꞌok taꞌyn man koꞌi iꞌewyte pira koꞌi hawyi tutum naꞌyn temiitꞌin me miitꞌin piat imoꞌẽ hamo.
17 Miꞌi hawyi torannia teꞌerenuk hawyi iꞌatuꞌok kahato raꞌyn hawyi hemiitꞌin tiꞌatunug iraꞌyn iꞌatumiꞌu ieĩpyt. Miꞌi taꞌatupuẽti 12 yrysakag me topyhuꞌat. Tuwemowato kahato itotiaria erenuk hap. Miꞌi hawyi iꞌatuꞌok taꞌyn.
18 Wẽtup eꞌat pe Iesui tuweran toineꞌen Tupana wywo tehay hamo. Miꞌi turan hemiitꞌin putꞌok iꞌatuꞌe hewowi hawyi apo e iꞌatuepe -Uweĩ uito iraniaꞌin me e.
19 Miꞌi hawyi taꞌatuwesat -Iraniaꞌin wyti teꞌeroꞌe epe Iuwãu woꞌosetꞌok hat meiẽ iꞌatuꞌe iraniaꞌin wyti teꞌeroꞌe Eri wyti meiẽ iꞌatuꞌe maꞌato iraniaꞌin wyti teꞌeroꞌe epe saꞌawyꞌi wuaria Tupana ehay moherep haria wyti tuwẽtem naꞌyn guꞌuro pyi iꞌatuꞌe.
20 Miꞌi hawyi apo e iraꞌyn temiitꞌin me -Maꞌato ehepe uweĩ uito e Iesui. Mio tã e pote Peteru tiwesat -Taꞌi En wyti uruehakyeraꞌat hanuat Tupana Mipoꞌoro e.
21 Mio tã e hawyi Iesui tiꞌatunapin haty wo temiitꞌin -Pyno uiwyriaꞌin e uikuap ehepiat hap o yt uwe pe teiꞌo ewehenoi e.
22 Miꞌi hawyi poꞌog Iesui toꞌe -Pywo uito miitꞌin ykeꞌet wyti aru uimosoꞌopot kahato Iuteuria akagnia po wo iꞌewyte paꞌi kororia akag koꞌi iꞌewyte wanꞌi wanꞌi e haria. Miꞌiria ti aru uiꞌauka raꞌyn maꞌato ti aru myẽꞌym eꞌat uikuꞌuro hawyi arẽtem iraꞌyn guꞌuro pyi e.
23 Miꞌi hawyi Iesui toꞌe torannia pe -Uwe toto teran uhupi miꞌi haria waku iwaure yne tomikyꞌesat nug hap koꞌi hawyi waku totioto wuatꞌi eꞌat pe hoꞌopot hap teꞌariaꞌyp posak uhupiat toto hamo.
24 Uwe uwe ikuꞌuro uipotpap we uhehay wakuat enoi hamo miꞌiria wyti aru taꞌatuieineꞌen hap sese puẽti wuatꞌi eꞌat pe mesuwe iꞌewyte atipy pe e. Maꞌato iraniaꞌin taꞌatuieineꞌen hap mesuwarotiat kape yn wanetup haria taꞌatuieineꞌen hap sese pun haria wo neꞌi tukupteꞌen e.
25 Pyno yt kat hamo i mesuwarotiat kareꞌen koꞌi yne toineꞌen epo pe eheineꞌen hap sese pun hatno ereineꞌen pykai. Howosat rakatno neꞌi ereineꞌen.
26 Uwe uwe uipupi tuwemoti iꞌewyte uhehay tomuꞌe hap pupi tuwemoti pote ti aru uito miitꞌin ykeꞌet aremoti miꞌiria pupi wy karãpe ariot uhesaika hap hẽtyhot puo uiꞌywot piat uipoꞌoro hap eꞌat pe.
27 Yt eweiwaure teiꞌo mio wuat uiꞌe hap e. Pywo ti rat tukupteꞌen meiũpe Tupana topyhuꞌat morekuat nuat hap kapiat akasa haria e Aikotã Tupana topyhuꞌat Morekuatno hap kapiat akasa taꞌatukuꞌuro hap eꞌyian me te rakaria e.
Iesui Mohit Hap Etiat Yityꞌok Tote
28 Miꞌi hawyi 7 eꞌat hawyi Iesui tioto raꞌyn topotmuꞌeria sese Peteru Iuwãu Tiaku tuwewywo yityꞌok kape tehay Tupana wywuat hamo.
29 Miꞌi hawyi Iesui ihay toꞌywot wywo turan howa tuweupi toineꞌen yt saꞌawyꞌi wuat ewy i. Iꞌewyte hesokpe ikytsig kahato imehit kahato.
30 Miꞌi hawyi meremo teꞌeruwemoherep iwywo typy ok saꞌawyꞌi wuat Tupana ehay moherep haria atipy kaipyi. Wẽtup ok aseꞌi Muisei wẽtup ok aseꞌi Eria.
31 Miꞌiria atipy piat hẽtyhot hap wywo teꞌeruwemoherep hawyi iꞌatuehay Iesui wywo. Taꞌatuhenoi ikuꞌuro hamuat tawa Ierusarẽi me Tupana mikyꞌesat nug hap upi.
32 Miꞌi turan Peteru Iuwãu Tiaku teꞌeroket kahato itote maꞌato teꞌeruwehymut hawyi teꞌeraꞌakasa raꞌyn Iesui ẽtyhot hap. Iꞌewyte iꞌyatype teꞌereꞌakasa saꞌawyꞌi wuaria Tupana ehay moherep haria aseꞌi Muisei aseꞌi Eria iwywo.
33 Miꞌi hawyi mekewat Iesui yatypiaria tuwat iraꞌyn pykai Peteru toꞌe Iesui pe -Urumuꞌe hat e waku meiũpe watoineꞌen wuatꞌi eꞌat pe. Miꞌi pote waku myẽꞌym eheꞌog urutunug eirania. Wẽtup ewatno wẽtup Muisei watno iꞌewyte wẽtup Eria watno maꞌato Peteru mio tã e yt tepiat ikuap pykai i.
34 Mio tã e turan ywyhig putꞌok e raꞌyn Peteru Iuwãu Tiaku ete hawyi teꞌerokenꞌẽ kahato raꞌyn.
35 Miꞌi hawyi Tupana ehay taꞌatukuap taꞌyn ywyhig kaipyi -Mekepe eipyꞌasetpe ti Wẽtup ok Miit toineꞌen. Miꞌi ti Uhaꞌyru Uimiꞌairo Wuatꞌi Miitꞌin Ehakyeraꞌat hanuat e. Pyno eiwanetup to Uhaꞌyru mienoi kape e.
36 Sehay atipy kaipywiat ipohep taꞌyn turan Iesui yn naꞌyn tuweran teꞌereꞌakasa. Miꞌi hawyi hemiitꞌin atunik kahato raꞌyn tukupteꞌen mekewat eꞌat pe. Yt iꞌatuehay hin i raꞌyn katupono yt uwe i raꞌyn saꞌawyꞌi wuat iꞌatuꞌakasa hap koꞌi pote.
37 Eꞌihatꞌok pe hawyi Iesui topotmuꞌeria wywo ipotꞌapyk yityꞌok kaipyi yihot kape. Miꞌi turan putꞌok iꞌatuꞌe typyꞌi rakaria Iesui ete.
38 Miꞌi hawyi wẽtup ok miitꞌin tok piat tikay kay raꞌyn Iesui -Urumuꞌe hat erahaꞌat ro uhaꞌyru wẽtup yn nakat kape e.
39 Maꞌato maꞌãu saꞌag teke hawyi meremo uimepyt ihay pirik tuereto hawyi hesoꞌok kahato hawyi iwẽ inãpuk taꞌyn. Maꞌãu saꞌag tiꞌahyk ahyk kahato hawyi tuereto pote yt ipohep kuap i maꞌãu saꞌag uimepyt ete pyi.
40 Emiitꞌin me ahẽtup maꞌãu sopo hamuat wen maꞌato yt taꞌatusopo kuap i e Iesui pe.
41 Miꞌi hawyi Iesui toꞌe itotiaria pe -Are paĩ eipe ti yt Tupana mohey haria hin i. Areineꞌen motꞌi raꞌyn eiwywo eimuꞌe hamo pykai. Miꞌi hawyi Iesui toꞌe mekewat miit pe. -Eterut ro emepyt meikowo uhewowi.
42 Miꞌi hawyi kurum putꞌok e Iesui etiat turan maꞌãu saꞌag teke iraꞌyn kurum piit pe hawyi maꞌãu saꞌag tipun tipun kahato raꞌyn yi tote. Miꞌi pote Iesui toꞌe maꞌãu saꞌag me -Erẽtem no maꞌãu saꞌag e. Mio tã e hawyi waku iraꞌyn kurum ete hawyi tohenoi iraꞌyn kurum iꞌywot pe.
43 Miꞌi pote torannia teꞌeruwanetup kahato raꞌyn -Iwato kahato Iesui mimoherep Tupana esaika hap kape. Miꞌi hawyi torannia itotiaria teꞌeruwanetup kahato kat kaipyi Iesui tunug meketã iꞌatuꞌe. Mio tã iꞌatuꞌe pote Iesui toꞌe temiitꞌin me
44 -Yt eweiwaure teiꞌo kat are saꞌawyꞌi ehepiat hap koꞌi. -Uito miitꞌin ykeꞌet pykai ti aru uipag aru miitꞌin po pe uiꞌauka hamo uiꞌe hap.
45 Maꞌato yt taꞌatukuap hin i kat toꞌe hawe mio tã e hap. Taꞌatuewyi neꞌi migꞌi wo yt taꞌatuepiat yt ikuap pykai. Kat pote teꞌerokenꞌẽ kahato apo taꞌatuꞌe hamuat haype.
Iesui Potmuꞌeria Tuꞌuka Toꞌope Uwe Poꞌog Hap Etiat
46 Miꞌi hawyi Iesui potmuꞌeria tuꞌuka toꞌope taꞌatuehay wo uwe som poꞌog iwato rakatno toineꞌen hap ete.
47 Miꞌi hawyi Iesui tikuap taꞌyn iꞌatuwanetup hap hawyi Iesui teꞌeroꞌokosap hirokat hawyi toiporokpun toꞌywytpe.
48 Miꞌi hawyi Iesui toꞌe -Uwe ikyꞌe kahato meiũwat hirokat miꞌi hat wyti uikyꞌe hat toineꞌen. Iꞌewyte uwe uikyꞌe miꞌi hat wyti uimipoꞌoro hat kyꞌe hat toineꞌen. Kat pote uwe toineꞌen poꞌog ipyꞌa perupꞌi kahato rakat eipyꞌasetpiat miꞌi yn wyti toineꞌen kuap poꞌog iwato rakatno.
49 Miꞌi hawyi Iuwãu toꞌe Iesui pe. -Urukaꞌiwat gaꞌatpo urutaꞌakasa raꞌyn wẽtup ok ahiag koꞌi sopo hat e. Eset wo toiꞌatusopo kahato ahiag wen yt hewyry hin i ahupi hat. Miꞌi pote -Waĩ urutoꞌe tope katupono yt karamuo i uruwywo hewyry rakat i pote e.
50 Mio tã e Iuwãu pote Iesui toꞌe Iuwãu me Iꞌewyte iraniaꞌin temiitꞌin me -Yt naku i waĩ eweiꞌe miꞌiria pe katupono miꞌiria eiꞌewywuaria tukupteꞌen yt karãpe i ikohyewyry eiwywo pykai e.
51 Miꞌi hawyi yt pya raꞌyn Iesui toto atipy kapiat hap eꞌat pote toto teran tawa Ierusarẽi kape yn.
52 Miꞌi hawyi Iesui toiꞌatupoꞌoro iraniaꞌin teꞌyian me toket hap kat iꞌatuepiat hamo hawyi putꞌok iꞌatuꞌe raꞌyn tawa Samaria pe.
53 Maꞌato itotiat ieineꞌen haria yt ikyꞌesat i Iesui kat pote taꞌatukuap toto Ierusarẽi kapiat hap pote.
54 Mio tã iꞌatuꞌe hap hemiitꞌin Tiaku hawyi Iuwãu tikuap taꞌyn hawyi teꞌeroꞌe -Urukaꞌiwat waku apo uruikay kay aria atipy kaipyi meimewuaria miitꞌin moma hamo iꞌatuꞌe.
55 Miꞌi hawyi Iesui tuwemorem haty wo waĩ toꞌe hamo.
56 Miꞌi hawyi tuwat i raꞌyn wẽtup tawa kape wẽtup muap upi yi Samaria sakpo.
57 Karãpe Iesui toto raꞌyn muap upi temiitꞌin wywo miꞌi turan wẽtup ok miit toꞌe Iesui pe -Areto teran eupi mehin aikowo aikowo ereto hap upi e.
58 Miꞌi hawyi Iesui tiwesat -Pyno ereto teran pote waku saꞌawyꞌi eto hap owakai te erewanetup kahato katupono Awahuru koꞌi ti tukupteꞌen taꞌatukaꞌa puo. Iꞌewyte weitaria ti teꞌeroket taꞌatusok koꞌi puo. Maꞌato uito Miitꞌin Ykeꞌet pykai yt kat i uiket hap e.
59 Hawyi Iesui toꞌe wẽtup ok miit pe -Toꞌiro uhupi e. Mio tã e pote toiwesat -Uikaꞌiwat pyno saꞌawyꞌi waku araꞌaipok uiꞌyat kape uiꞌywot syp hamo e.
60 Mio tã e pote Iesui toꞌe -Tero ikuꞌuro rakaria toꞌosyp mekepe toꞌope maꞌato waku en ereto aikotã Tupana toineꞌen morekuatno hap etiat enoi miitꞌin piat hamo.
61 Miꞌi hawyi wẽtup ok toꞌe Iesui pe -Taꞌi uito areto teran eupi mehin e maꞌato saꞌawyꞌi waku arenoi ti uiꞌywotꞌin me e.
62 Miꞌi hawyi Iesui tiwesat -Uwe ipotpap mekewat yi morem hap etiat turan tehaꞌat tosaipe pe neꞌi miꞌi hat wyti yt putꞌok e kuap i Tupana toineꞌen morekuatno hap tote.
