Karasia 1:1-24
1 Uito ti meiũ Pauru Tupana Mipoꞌoro wuatꞌi miitꞌin muꞌe hamuat ti uito are. Aipotypot Iesui mipoꞌoro sese uito are. Iꞌewyte Aiꞌywot Tupana mihymut guꞌuro pywiat Iesui mipoꞌoro uito are. Yt karãpe i miitꞌin mesuwarotiaria uiꞌairo Tupana mipoꞌoro Aiporekuat nuat ehay moherep hamo. Yt miitꞌin miꞌairo hin i uito. Iꞌewyte yt Iesui potpoꞌororia miꞌairo hin i uito maꞌato Tupana mipoꞌoro uito are.
2 Miꞌi tupono mesup atipoꞌoro uimiwan uheꞌywytꞌin Iesui mohey haria tawa Karasia piaria kape. Maꞌato yt uito yn i maꞌato torannia meiũpiaria Iesui mohey haria ipoꞌoro mesuwat taꞌatuekuekatu ehewowi uruwyriaꞌin are.
3 Koitywy mio tã areꞌe Tupana pe ehepiat -Uiꞌywot pyno koitywy etiꞌatupowyro ro tawa Karasia piaria Esaꞌyru mohey haria are. Atikyꞌesat kahato miꞌiria egyiꞌat hap oktan sese kuap haria hap atikyꞌesat are. Atikyꞌesat etimoherep iꞌatuepe aikotã iwato hap iꞌatukyꞌe hap epiat hap atikyꞌesat etimoherep itotiaria pe ahẽtup. Tupana are etiꞌatunug itotiaria yt wanetup koꞌi koꞌi haria wo i are maꞌato woꞌowese kahato rakaria wo etiꞌatunug miꞌiria are. Miꞌi tã are yn ahẽtup mesuwe Aiꞌywot Tupana pe iꞌewyte Aipotypot Iesui pe ehepiat uiwyriaꞌin.
4 Iesui tikyꞌesat kahato ti miitꞌin ehakyeraꞌat hap. Toikyꞌesat kahato iꞌatuminug saꞌag kaipywiat teꞌeraꞌaipok hap. Miꞌi hamo tuweium ariaꞌyp posak ete Toꞌywot mikyꞌesat ewy. Miꞌi hamo Tupana tum Tosaꞌyru aiꞌapiheg hap u hamo aiminug saꞌag koꞌi hep hamo.
5 Miꞌi tupono mesup -Waku kahato En Tupana watoꞌe aat kaꞌap mesup te mukiꞌite wuatꞌi eꞌat pe. Woromotypot kahato En Tupana waku watoꞌe mesup are.
Toikuap Teran Kat Hamo Taꞌatuꞌatoiat Tupana
6 Taꞌi arewanetup kahato eiminug saꞌag koꞌi kape. Kat hamo ten eweiꞌatoiat wakuap sehay Aikaꞌiwat Iesui kaipywiat hegyiꞌat kahato hap. Pywo apo eipohep taꞌyn Aipotypot aikyꞌe hat mohey hap ete wẽtup sehay saꞌag kyewi -Toꞌiro watuwehakyeraꞌat aiminug waku hap saꞌup upi eweiꞌe apo. Taꞌi miꞌi e hap yt naku i watoꞌe katupono Iesui upi yn ahehakyeraꞌat kuap are. Maꞌato eipe wẽtup sehay upi raꞌyn eweiwat yt sehay wakuat Iesui mienoi upi hin i sehay upi eweiwat are. Yt naku i paĩ are.
7 -Taꞌi poꞌog ipakup sehay aimimohey kahu eweiꞌe. Hẽ eweiꞌe neꞌi ti mesup eiwoꞌope maꞌato yt hin i. Iesui mimoherep yn ni sehay pakup sese toineꞌen are. Wẽtup yn ni toineꞌen sehay pakup sehay pywuat are mekewat saꞌawyꞌi wuat pywiat sese uimienoi ehowawiat hap yn sehay pakup Tupana wẽ pywiat. Miꞌi yn sehay pywuat sese ahehakyeraꞌat kuap hap sehay are. Ipakup sehay iꞌatuꞌe iraniaꞌin ehepe maꞌato heso rakaria sok miꞌiria are. Taꞌi Iesui ehay peroꞌok teran wẽtup sehay nem nakat kape teran neꞌi miꞌiria are. Yt Aipotypot Iesui ete hin i iꞌatumienoi maꞌato iꞌatueko koꞌi nug hap ete yn iꞌatuehay.
8 Haꞌawyte Iesui etiat yn mekewat pywuat sese sehay etiat yn uruhenoi ehepe. Ahenoi ehepe miꞌi ti sehay pakup wakuap sese rakat are. Yt naku i watoiat Iesui etiat aimuꞌe hap wẽtup sehay kapiat hamo are. Uito iꞌewyte maꞌato mesup ahenoi wẽtup sehay yt saꞌawyꞌi wuat uimienoi yt ewy i pote waku Tupana uipoꞌoro aria kape neꞌi are. Iꞌewyte sio Wẽtup Ok putꞌok e atipy kaipyi -Uito Tupana mipoꞌoro e hat pykai wẽtup sehay toimoherep yt Iesui mienoi yt saꞌawyꞌi wuat urumienoi ewywuat i pote -Tupana epoꞌoro aria kape waku eweiꞌe mekewat atipy piat uito e haria pe are. Katupono meiũran ti aru mesuwat yi tote tõꞌẽ atipy kaipywiat Tupana ehay moherep haria ewywuat koꞌi maꞌato yt Iesui e hap yt ewywuat i moherep haria. Miꞌi haria pe waku watoꞌe -Tupana yt mikyꞌesat ewy i eimiꞌenoi waku eweꞌeg wo katupono Tupana miꞌapiheg wo aru ereineꞌen yt Iesui e hap ewywuat etimoherep pote waku watoꞌe miꞌiria pe. Yt naku i Tupana eipoꞌoro aria kape waku watoꞌe wẽtup sehay wywuat õꞌẽ haria pe yt Iesui e hap ewywuat i haria pe. Pyno wyti waku Iesui ehay etiat aiwoꞌomuꞌe hap yn poꞌog waku uiwyriaꞌin iꞌatueso atueso hap koꞌi kai are.
9 Pyno areꞌe i miꞌi hap ehepe uwe uwe wẽtup sehay neꞌi imoherep yt Iesui mienoi wakuat ewywuat i waku miꞌi hat Tupana tipoꞌoro aria wato kape sese watoꞌe. Waku miꞌi miit topyhuꞌat Tupana mikuasa wuatꞌi eꞌat piatnuat are.
10 Taꞌi yt taꞌatukyꞌesat i ahehay Iesui etiat pykai waku miꞌi etiat yn wahenoi poꞌog are. Waku ti Tupana mowepiit hap yn watunug are. Miꞌi hap yn uito poꞌog atikyꞌesat are. Yt miitꞌin mowepiit hap i ti atunug neran. Waku ti Tupana kaipywiat -En waku e hap poꞌog waku miitꞌin kaipywiat -Waku en e hap kai are. Maꞌato uito atunug miitꞌin wo mowepiit hap yn mote ti rẽ iraniaꞌin yt karamuo i uhatyꞌi hatyꞌi. Pyno iraniaꞌin uhatyꞌi hatyꞌi pykai uito ti Aipotypot sese mowepiit reran kahato hat uito are. Yt atimowepiit teran i miitꞌin Tupana e hap wywo. Poꞌog waku atimowepiit Tupana are. Maꞌato miitꞌin mikyꞌesat ewywuat neꞌi ahenoi pote Aikaꞌiwat mikyꞌesat ewy yt ahenoi kuap i are. -Urumuꞌe ro urumikyꞌesat ewy e haria mowepiit haria wo watukupteꞌen pote yt Iesui eropat haria wo hin i watukupteꞌen katupono yt wahenoi kuap i imikyꞌesat wy.
11 Pyno ti atimoheg neran uhehay eiwanetup hawe uiwyriaꞌin. Pywo ti mekewat sehay wakuat sese uimienoi saꞌawyꞌi wuat ehowawiat miꞌi sehay yt miitꞌin wanetup hap kaipywiat i uimimoherep ehepiat are.
12 Taꞌi yt miitꞌin miium uhepiat i ti yt miitꞌin mienoi uhepiat i iꞌewyte yt miitꞌin mimoherep uhepiat i maꞌato mekewat Aipotypot Iesui mimoherep uhepiat ahenoi are. Yt atikuap hin turan i Iesui tomoherep tehay wakuap sese uhepe towẽ pyi sese uimuꞌe are.
13 Taꞌi eweikuap aikotã saꞌawyꞌi yt atikuap hin i Iesui etiat. Eweikuap kahato uito aikotã wẽtup seko upiat myhuꞌat hat kahato areineꞌen saꞌawyꞌi mesuwarote. Miꞌi Iuteu ywania eko wo uhowapy raꞌyn nyti miꞌi turan. Saꞌawyꞌi te Iuteuria kaipyi atikuap Tupana ehay. Taꞌi saꞌawyꞌi uito Tupana emiitꞌin sese Iesui mohey haria moma teran hatno areineꞌen. Taꞌi eweikuap aikotã saꞌawyꞌi Iesui potmuꞌeria satyꞌi satyꞌi hat areineꞌen saꞌag poꞌog toranniaꞌin kai hap eweikuap taꞌyn. Yt nakuat i kahato uito. Saꞌawyꞌi Iesui mohey haria atuuka hat uito areineꞌen are. Atiꞌatuꞌuka saꞌag miꞌiria uito are.
14 Saꞌawyꞌi uiwemotag hamo te poꞌog iraniaꞌin uiꞌywania kai Iuteuria eko hit koꞌi yne yne atiꞌatukyꞌesat iꞌewyte atiꞌatunug yne uito. Uiwemotag tuwyria apyꞌi aremoehapap urueꞌaseꞌiꞌin eko ete yne eꞌat pe. Haty wo atiꞌatunug yne yne urueko koꞌi poꞌog poꞌog torannia kai.
15 Maꞌato wẽtup eꞌat pe Tupana tomikyꞌesat ewy uiꞌairo temiit no hawyi uikyꞌe kahato tuwekaipyi tuwewawi. Yt kat i atunug wakuat pykai i uiꞌairo maꞌato uikyꞌe haype. Uikyꞌe tewanikap muat uheineꞌen pykai uiꞌairo topotpoꞌoro wo. Miꞌi hawyi toꞌe uhepe -Taꞌi Pauru worokuap en haꞌawyte ety ymyẽ piat rẽ ereineꞌen turan worokuap. Miꞌi turan woroꞌairo uimipoꞌoro wo e Tupana uhepe. Uikyꞌe yt kan hamo i uikay kay tuwewawi tuwepyi hap ewy are. Miꞌi hap eweikuap.
16 Miꞌi hawyi sake wẽtup eꞌat pe Tupana tuwemoherep Tosaꞌyru sese Iesui uhowowi uipyꞌa pe. Atikuap Haꞌyru hawyi toꞌe uhepe -Pauru woroꞌairo en uhehay enoi miitꞌin yt Iuteu ywania piat hamo i e uhepe. Miꞌi hawyi yt uwe pe i -Uimuꞌe ro are. Katupono saꞌawyꞌi Tupana yn uimuꞌe hat toineꞌen. Yt wẽtup ok miit pe i are -Waku apo areineꞌen ehay sytpok hamo yt are hin i. Yt uwe pe i mio tã are.
17 Iꞌewyte Iesui eꞌyian note wuaria motpoꞌororia yt uimuꞌe hin i katupono yt areto i tawa Ierusarẽi kape. Maꞌato Iesui tuwemoherep uhowowi hawyi mekewat eꞌat pe ti areto pya kahato uiweran hap kape mekewat yi wato yahig Arapia e hap kape areto. Ikaipyi ti araꞌaipok tawa Tamaku kape i raꞌyn.
Pauru Toto Irane Ierusarẽi Kape Iꞌewyte Siria Kape Hawyi Sirisia Kape
18 Miꞌi tote ti areineꞌen motꞌi myẽꞌym iꞌaman motpe areineꞌen tawa Tamaku piaria pyꞌasetpe. Miꞌi hawyi areto tawa wato Ierusarẽi kape Iesui potmuꞌe Peteru kapiat uiꞌakasa hamo. Itote areineꞌen 15 eꞌat iwywo ikuap hamo.
19 Miꞌi tote ti Aikaꞌiwat Iesui ywyt sese wẽtup ok araꞌakasa Tiaku e hap het rakat. Maꞌato miꞌi hawyi yt uwe i atiꞌatukuap itote Iesui potpoꞌororia torannia. Peteru hawyi Tiaku atikuap hawyi miꞌiria yatype areineꞌen 15 eꞌat hawyi areto e tawa Ierusarẽi pyi.
20 Uiwyiaꞌin miꞌiria ti yt uimuꞌe haria i are. Yt uheso hin i maꞌato ahenoi ehepe Tupana ehamo areꞌe -Tupana yn uiꞌairo topotpoꞌoro wo. Yt Iesui potmuꞌeria miꞌairo i uito are. Yt uikuap hin i miꞌiria saꞌawyꞌi.
21 Areineꞌen tawa Ierusarẽi piat hawyi areto yi Siria kape hawyi yi Sirisia kape.
22 Miꞌi turan mekewat eꞌat pe yi Iuteu piaria tama Ierusarẽi piaria Iesui mohey haria yt uikuap hin i katupono yt karãpe i uhewyry iꞌatuewowi. Miꞌi pote uhowa ete yt uikuap hin i.
23 Maꞌato itotiaria uikuap uhehay ete yn. Miꞌi hawyi teꞌeroꞌe toꞌope itote -Taꞌi koitywy ti saꞌawyꞌi wuat aiꞌatusatyꞌi satyꞌi hat raꞌyn meiũ Aikaꞌiwat Iesui powyro hamo raꞌyn topyhuꞌat iꞌatuꞌe toꞌope uhepiat pe. Pyno ti koitywy yt aimoma teran hin i raꞌyn katupono topotmuꞌe kahato raꞌyn Iesui mohey hap ete iꞌatuꞌe toꞌope uhepiat pe.
24 Miꞌi hawyi ti miꞌiria teꞌeruwehum kahato raꞌyn Tupana ete -Waku kahato ti En Tupana iꞌatuꞌe itote uhepiat pe Tupana pe Iesui mohey haria yi Iuteu piaria mekewat tawa Ierusarẽi piaria teꞌeroꞌe.
