Karasia 3:1-29
3 Tawa Karasia piaria Iesui mohey haria worohoꞌonapin neran eipe. Kat pote eweiꞌe mesup eiwoꞌope -Toꞌiro watuwehakyeraꞌat aiminug wakuat nug hap upi eweiꞌe. Yt iweꞌeg hin i rakaria ewy apo eipe are. Uweĩ eimuꞌe miꞌi tã itote are. Uweĩ eimaꞌat miꞌi e hap upi. Haꞌawyte worohoꞌomuꞌe kahato kat hamo Iesui ikuꞌuro hap ete itote aat kaꞌap. Miꞌi uimimoherep uhehay saꞌawyꞌi heremo kahato ehewaure kaꞌa pe. Miꞌi hawyi Iesui mohey haria wo eweikupteꞌen itote. Waku kahato mekewat eꞌat pe are. Miꞌi hawyi Tupana tum naꞌyn ehepe Topaꞌãu wakuat eweimohey Haꞌyru hawyi.
2 Pyno worohoꞌoꞌapo mesup -Kat hap upi Tupana eipytꞌat nug Topaꞌãu wakuat no are sio toꞌywãꞌĩ pywiat rẽ wakuap nug haria eipe pote sio Tosaꞌyru mohey uimienoi kaipywiat pote are. Taꞌi eweikuap taꞌyn Tosaꞌyru mohey raꞌyn hawyi eipytꞌat nug Tupana Topaꞌãu wo hap eweikuap are.
3 Pyno kat pote mesup wẽtup sehay upi eweiwat are. Eiꞌakag heg kahato apo. Saꞌawyꞌi Tupana Paꞌãu kaipyi yn naꞌyn eweikyꞌesat eimoesaika hamuat. Pyno kat pote koitywy ehewaku hap moherep hap kaipyi eweikyꞌesat eimoesaika hamuat. Kat pote eweikyiꞌat teran Tupana miium ehewaku nug hap saꞌup hap upi are. Yt iweꞌeg i haria ewy kahato eipe are.
4 Saꞌawyꞌi Iesui mohey haria eipe turan miitꞌin mimoweukaꞌi koꞌi wo yn eweikupteꞌen Aparãu ewywuat koꞌi wo raꞌyn imohey hap kaipyi. Aikotã Aparãu mohãpyk hap ewy te raꞌyn are.
5 Pywo tig Tupana tum Topaꞌãu hawyi Topaꞌãu wo aimoesaika wakuap nug hamuat sio sehay wakuat Iesui etiat watimohey hawyi. Imohey hawuo watunug niatpo kahato hap koꞌi yt miitꞌin minug kuap i koꞌi.
Aparãu Aimuꞌe Hat Topyhuꞌat
6 Aikotã miwan me tohenoi Aparãu etiat -Toimohey ti pywuat sese e. Pywo ti imohey pywo piat hap kaipyi ti Tupana toꞌe -Hãpyk kahato en uhepe e Aparãu me.
7 Miꞌi hap ewy ti pywo eweikuap taꞌyn mekewat Aparãu Emiariruria imohey haria kahato wo sok taꞌyn hap.
8 Mio tã e saꞌawyꞌi wuat miwan me tomohey hap kaipywiaria pe yn -Uimohey kahato hap ti einug wakuaria wo e hap wẽtup ywaniaria pe. Mio tã e hap tohenoi yian mete Aparãu me. Mio tã e Aparãu -Pywuat sehay ahenoi epe. Ekaipyiwiat ti aru Wuatꞌi Ywania Ehakyeraꞌat hanuat tuwemoherep aru e Tupana Aparãu me.
9 Pyno koitywy aitoria yne ywania Tupana mimohãpyk koꞌi. Aikotã Aparãu mohãpyk hap ewy raꞌyn tomohey pywo piat potiat koꞌi.
10 Maꞌato uwe uwe toꞌe topyꞌa pe -Taꞌi atunug yne kahato Tupana woꞌonapin hap koꞌi miꞌi pote Tupana miehakyeraꞌat wuat areineꞌen e hat Tupana miꞌapiheg wo topyhuꞌat. Katupono mio tã e Tupana saꞌawyꞌi -Yt torannia i ewetunug einapin uhepiat hap koꞌi pote uimiꞌapiheg wo eweikupteꞌen e.
11 Uimohey kahato haria yn uimimohãpyk wuaria tukupteꞌen. Miꞌiria yn ni uiꞌyatypiat gupteꞌen hanuaria e Tupana saꞌawyꞌi. Mio tã e hap kaipyi watikuap taꞌyn saꞌawyꞌi wuat Tupana woꞌonapin hap nug yne hap kaipyi yt aimohãpyk kuap i are.
12 Iraniaꞌin ti wẽtup woꞌonapin haria. Miꞌiria ti -Toꞌiro watuwat Tupana piat ainapin hap koꞌi nug yne aiwehakyeraꞌat hamo iꞌatuꞌe. Miꞌi nug hap upi watuwehakyeraꞌat aito iꞌatuꞌe. Maꞌato miꞌiria yt iꞌatuweꞌeg hin i katupono Tupana toꞌe miwan me -Uimohey haria yn uimimohãpyk wuaria tukupteꞌen e. Miꞌiria yn uiꞌyatypiat gupteꞌen hanuaria e Tupana saꞌawyꞌi ahepe. Miꞌi pote aiminug wakuap koꞌi ahehakyeraꞌat hamo watomohey pote yt watomohey i ahehakyeraꞌat hamuat Iesui ikuꞌuro hap. Miꞌi pote Tupana toꞌe saꞌawyꞌi -Eweiꞌaparap wẽtup woꞌonapin uhepiat hap ete pote aru uimiꞌapiheg wo eweikupteꞌen e. Ewetunug torannia sese wuatꞌi eꞌat pe pote yn waku kahato ereineꞌen uiwanetup hawe e Tupana saꞌawyꞌi. Maꞌato yt uwe i uimikyꞌesat ewy kahato inug haria eweikupteꞌen e Tupana ahepe.
13 Taꞌi Tupana tikuap kahato aipyꞌa piat iꞌaparap hap koꞌi. Miꞌi kaipyi ariaꞌyp posak kape Tupana tipoꞌoro Tosaꞌyru aiꞌapiheg hap u hamo. Tosaꞌyru suu wo toihep tokuasa hap pya raꞌyn aikai. -Uwe ariaꞌyp ete tomosatꞌe pe ikuꞌuro miꞌi uikuasa topyhuꞌat e Tupana saꞌawyꞌi miitꞌin me. Pyno koitywy Tupana pyꞌahok hap yt kat i ahete aikawiatnuat ikuꞌuro raꞌyn ariaꞌyp ete pote. Miꞌi hawyi ikai toineꞌen naꞌyn iwese hap.
14 Saꞌawyꞌi Aparãu Tupana timowaku kahato mekewat tomohey kahato hap kaipyi tegyiꞌat hap kaipyi toipoityro. Miꞌi hap ewy koitywy aito i raꞌyn watoineꞌen wuatꞌi ywania Tupana mipoityro koꞌi raꞌyn watukupteꞌen. Mekewat tomipoityro sese tomipoꞌoro Aipotypot Iesui piat aikyiꞌat hap watomohey hap kaipyi aimohãpyk kuap. Mio koitywy mio tã e Tupana -Koitywy atum Uhaꞌyru mohey haria pe Uipaꞌãu e. Yt kat saꞌup mo i atum iꞌatuepe kat pote Uhaꞌyru upiaria miꞌiria pote e.
15 Uhytꞌiꞌin manaꞌin karapeĩ watoꞌe aiwoꞌope -Atunug aru uiꞌe hap epiat. Iꞌewyte waku en waku etunug kuap eꞌe hap uhepiat aiwoꞌoꞌewy ewy watoꞌe aiwoꞌopiat hawyi waku yne aiꞌe aiwoꞌopiat hap watunug. Yt naku i eipohep atunug aru aiꞌe aiwoꞌopiat hap ete watoꞌe. Iꞌewyte yt naku i watunug wẽtup sehay wo atunug aru aiꞌe rakirẽ hawyi watoꞌe.
16 Miꞌi hap ewy ti saꞌawyꞌi Tupana toꞌe Aparãu me -Meiũran ti aru Wẽtup Ok Emiariru kaipyi atipoitynug yi totiaria torannia. Yt uheso i aru atunug uiꞌe hap ewy e. Tepiat Tupana e hap Aparãu timohey kahato. Tupana yt toꞌe i -Emepytꞌin kaipyi aru atipoityro torannia yi totiaria yt e i maꞌato -Wẽtup Ok Emiariru kaipyi atipoityro wuatꞌi ywania e Iesui wuatnuat etiat pe tohenoi. Aparãu Emiariru Emiariru piat pe yian mete Aiporekuat nuat tomipoꞌoro tohenoi mio tã e.
17 Pywo yt ipohep hin i atunug aru toꞌe hap kai ete. Pyno atunug aru toꞌe hap Tupana tunug naꞌyn. Pyno yt uwe i Tupana ewaĩ kuap -Atunug aru e hap ete maꞌato tutunug iꞌewyte tomikyꞌesat ewy tuwekaipywiat aru toꞌe Aparãu miat hap tutunug naꞌyn. 430 anu hap ete tutum naꞌyn woꞌonapin hap aseꞌi Muisei pe. Maꞌato yt tutunug kuap i saꞌawyꞌi wuat Aparãu miat -Atipoityro aru Emiariru mohey haria iꞌatuehakyeraꞌat hamo e hap.
18 -Watunug Muisei pywiat torannia Tupana woꞌonapin hap pote aipoityro hap ahehakyeraꞌat hap topyhuꞌat maꞌato yt pywo pykai i eweiꞌe are katupono 430 anu turan aseꞌi Muisei eꞌyian mete toineꞌen kahu raꞌyn Tupana aipoityro hap. Saꞌawyꞌi pyi te Tupana toꞌe Aparãu me -Wẽtup esaꞌyru kaipyi aru wuatꞌi atipoityro e. Miꞌi hap tutunug mesup.
19 Kat hamo som pyno tutum ahepe ainapin hap koꞌi. Pyno worohoꞌowesat. Taꞌi aiminug saꞌag moherep hamuat tutum ahepe. Miꞌi hap ewy mesup tutum ahepe Aparãu Emiariru Iesui putꞌok e yian mete wuat hap -Atunug aru toꞌe hap. Yt tutunug i te turan Tupana ainapin atipy kaipywiat tomipoꞌoro wẽ pyi. Miꞌi e hap Muisei tiwan ainapin hamuat.
20 Maꞌato saꞌawyꞌi Aparãu me tuwewi sese tohenoi towẽ kaipyi sese -Meiũran aru atipoityro torannia ywania esaipepiat emepyt kaipywiat no e tope tehay pywo piat nug hamo. Yt tomipoꞌoro wẽtup ok atipy piat wẽ pyi i mio tã e Aparãu me maꞌato tuweran toto tehay moherep hamo Tupana sese.
21 Tupana tinapin kahato Muisei saꞌawyꞌi wẽtup ahaꞌaseꞌi tehay wo wen maꞌato yt Aparãu piat tehay moma hamo i maꞌato ahewaku hamo ihay Muisei pe maꞌato aipyhyp aiminug saꞌag nug pupiat hamo yn yt watomohey i te pykai. Miꞌi pote pyno atunug aru Muisei piat uinapin hap hawyi waku pe areineꞌen Tupana wanetup hawe watoꞌe pote yt aimohãpyk kuap i Tupana katupono yt watunug yne i pote. Katupono yt putꞌok watoꞌe i torannia nug hamo.
22 Taꞌi saꞌawyꞌi Tupana toꞌe tomiwan me -Yt naku hin i miitꞌin e. Yt uwe i kahato uimienoi kuap teran haria meikope e. Yt uwe i uiwenapin hap uimiium nug yne haria itote e Tupana saꞌawyꞌi miitꞌin me. Miꞌi pote paa watoꞌe Tupana miꞌatuꞌapiheg wuaria aito watoꞌe haype. Miꞌi hawyi pyno wẽtup muap yn waku watoꞌe. Koitywy Aipotypot Iesui mohey hap yn waku ahehakyeraꞌat hamo watoꞌe. Aikotã Aparãu me toꞌe -Atipoityro aru wuatꞌi ywania mekewat ewatꞌypmuat esaipepiat mohey sese haria e ahepe. Koitywy toineꞌen watoꞌe meime. Koitywy imipoityro koꞌi raꞌyn watukupteꞌen. Katupono imipoꞌoro Aipotypot Iesui mohey haria raꞌyn aito pote watoꞌe.
23 Saꞌawyꞌi wuat yt watomohey kuap i wahekatup kahato karamuo tomohey hap wen. Wahãꞌãg hãꞌãg kahato waĩꞌe Tupana hap nug yne hamo maꞌato yt watunug kuap i. Miꞌi pote mipyhik koꞌi ewy watukupteꞌen Tupana miꞌapiheg koꞌi wo iheg miat koꞌi wo hap ewy.
24 Ahenoi hãꞌãkap wuo miꞌi e hap ete. Saꞌawyꞌi Tupana ehay ainapin hap koꞌi tukupteꞌen woꞌomuꞌe sese hat ewy waĩ waĩꞌe hamo. Miꞌi hap eꞌat pe wahekatup aimuꞌe pywuat sese hanuat Iesui eꞌyian mete wuat hamuat. Putꞌok e raꞌyn Ahehakyeraꞌat hat Iesui hawyi Tupana aimohãpyk Tosaꞌyru Iesui mohey hap upi.
25 Pyno mesup koitywy Tupana aimohãpyk Tosaꞌyru mohey sese hap upi yn naꞌyn. Yt saꞌawyꞌi te wuat ainapin hap upi i maꞌato watomohey sese Iesui hawyi pywo raꞌyn watoꞌe.
26 Tupana mepytꞌin no watukupteꞌen wẽtup miit pakup ewy Aikaꞌiwat Iesui mohey hap kaipyi watoꞌe.
27 Aito miitꞌin aiwoꞌoꞌewy wẽtup miit yn watoineꞌen. Wẽtup miit set wywo watopyhuꞌat Iesui mohey hat set wywo watoineꞌen mio. Aiwesetꞌok hawyi aikotã Iesui ewy raꞌyn watoineꞌen.
28 Aito miitꞌin yt aiwoꞌoꞌewy hin i watukupteꞌen iraniaꞌin Iuteu ywania e hap koꞌi iraniaꞌin yt Iuteu ywania i iraniaꞌin ihainiaꞌin haryporiaꞌin iraniaꞌin gaꞌiwaria iraniaꞌin miit emiitꞌin. Maꞌato miꞌi pykai watoineꞌen Iesui mohey hap kaipyi wẽtup piit ewywuaria yn imohey haria sok aito pote are.
29 -Atipoityro aru Wẽtup Takat Emiariru e Tupana saꞌawyꞌi yian mete Aparãu me. Koitywy Iesui topyhuꞌat Aiporekuat no raꞌyn. Miꞌi hap kaipyi koitywy Tupana wanetup turan Aparãu Emiariruꞌin wo raꞌyn watopyhuꞌat katupono Iesui toineꞌen aiwywo pote Tupana miꞌatupoityro koꞌi sok aito Tupana e Aparãu miat hap ewy topyhuꞌat ahepe koitywy.
