Karasia 5:1-26
5 Koitywy Aikaꞌiwat Iesui tum naꞌyn ahepe tesaika hap wakuap koꞌi nug yne hamuat. Miꞌi tupono yt kat hamo i raꞌyn wataꞌaipok Iuteuria eko koꞌi ewywuat nug yne ahehakyeraꞌat hap kyewi. Yt kat hamo i poꞌog watuwepotpap haꞌup nug howoity rakat kyiꞌat hamo hap ewy neꞌi paĩ. Ahesaika hap yt putꞌok e hin i waku nug hamo Iesui ewywuat hamo. Maꞌato Iesui Paꞌãu esaika hap aipiit pe pote yn waku nug hap koꞌi tuwẽtem aipytꞌat hap kaipyi.
2 Uito Pauru miꞌi tupono ewetum no ehewaure kaꞌa uhepe. Uruꞌywania Iuteuria mio tã iꞌatuꞌe -Aiweꞌahit ãpy sokpe tek hap kaipyi ahehakyeraꞌat iꞌatuꞌe saꞌag. Watimohey miꞌi pote Iesui atoiat haria wo watoineꞌen katupono Iesui yn ahehakyeraꞌat kuap. Iesui mohey hap kaipyi yn nyti Tupana aimoewaku. Kat hamo pyno Iuteuria eko nug hap aimowaku eweiꞌe.
3 -Toꞌiro ihainiaꞌin ahit sokpe ãpy tek hap watunug Iuteuria eko ewy watunug eweiꞌe. Miꞌi watunug mote waku pe watoineꞌen Tupana pe e haria wo neꞌi eipe are. Uiwyriaꞌin iꞌatu kahato Iuteuria eko miꞌi maꞌato yt ewetunug yne hin i te. Yt eiminug i koꞌi topyhuꞌat rẽ iꞌatu kahato te. Eiweꞌahit ãpy sokpe tek hap ewetunug iꞌewyte irania Iuteuria eko ewetunug neran. Maꞌato yt naku i wẽtup seko yn ewetunug are. Waku torannia ewetunug are. Maꞌato yt uwe i mesuwat yi tote inug kuap torannia. Miꞌi pote seko nug hap neꞌi yt aimohãpyk kuap hin i Tupana wanetup hawe.
4 Maꞌato eipe -Watunug yne meimuẽwat koꞌi potiat neꞌi Tupana ahehakyeraꞌat eweiꞌe wen miꞌi pote pya kahato eweikupteꞌen Aikaꞌiwat sese kai katupono saꞌawyꞌi Iesui yn ahehakyeraꞌat kuap e haria raꞌyn eipe. Imohey hap pun haria wo eweikupteꞌen mio. Miꞌi pote Tupana egyiꞌat hap pun haria wo eweikupteꞌen.
5 Maꞌato uruto yt eiperia ewy hin i katupono uruto ti Iesui mohey hap kaipyi ti ahehakyeraꞌat kuap e haria uruto. Miꞌi hap kaipyi yn uruimohey.
6 Maꞌato Aikaꞌiwat Iesui ahehakyeraꞌat teran haype Tupana yt tuwanetup hin i mekewat seko aiwemusin ãpy sokpe tek hap kape neꞌi. Maꞌato toiehakyeraꞌat kuap miitꞌin yne sio hemusin ãpy sokpe tek hap toĩ sio yt sio Iuteuria sio yt miꞌiria i waku yne. Toimohãpyk kuap wuatꞌi ywania katupono kat seko kat seko kape neꞌi yt ihaꞌat hin i maꞌato tehaꞌat tomohey hap sese kape yn. Tokyꞌe ahepiat hap aikawiat toineꞌen sio yt watikyꞌe i hap kape yn taꞌakasa.
7 Saꞌawyꞌi imohey kahato haria eipe. Uwe uwe itote eimaꞌat saꞌag wẽtup muap upi. Katupono koitywy eipe yt pywuat sehay upi hin i raꞌyn eweikupteꞌen saꞌawyꞌi waku pe eweikupteꞌen pykai.
8 Tupana ti yt eimaꞌat hat hin i paĩ. Kat pote mesup eiwemorem hamo eweimohan kahato Iuteuria eko katupono miꞌi aipun hat neꞌi aiꞌahit ãpy sokpe hep hap. Mekewat Iuteuria eko yt aikay kay hãpyk hat eko ewy hin i yt imienoi koꞌi ewy hin i.
9 Pyno aimiꞌu toꞌoran me toineꞌen nem nakat ipyyp kurin kat. Miꞌi hawyi aimiꞌu wakuat nem naꞌyn topyhuꞌat toimonem tuwewawi. Miꞌi hap ewy kahato toineꞌen aipyꞌasetpe wẽtup aimimohey yt pywuat i rakat. Meiũran aimimohey wakuat monem hat wywo watopyhuꞌat are.
10 Miꞌi ewy wẽtup seko enoi hat toineꞌen eitoꞌoran me. Miꞌi ti eiwanetup hap moehamanaꞌi raꞌyn. Yt atikuap i miꞌi hat set Tupana ikuap. Miꞌi tupono toineꞌen imiꞌapiheg wo aru. Atikuap ti maꞌato meiũran eweiꞌaipok Iesui mohey hap mohan hamo. Meiũran uhepiat imohey hap ewy wẽtup sok yn aru aito Iesui wywo watoineꞌen.
11 Uiwyriaꞌin uito arepotmuꞌe kahato Iesui kuꞌuro ariaꞌyp posak etiat hap ete. Miꞌi eweimohey pote toineꞌen eheineꞌen pakup i hap are. Maꞌato miꞌi hap ete toꞌokyryꞌi kahato. Yt karãpe i arepotmuꞌe wen -Eremusin ãpy sokpe tek ehehakyeraꞌat hamo pote waku yt karãpe i areꞌe ehepe. Mio tã ahenoi pote yt toꞌokyryꞌi hin i katupono Iuteuria taꞌatumikyꞌesat ewywuat pote.
12 Ahemusin sokpe ãpy tek hawyi ahehakyeraꞌat iꞌatuꞌe eimoehamanaꞌi haria. Pyno waku miꞌi haria teꞌeruwesaꞌahep yne hawyi aikai tukupteꞌen pya miꞌiria tuwesaꞌahep taꞌatueko sese nug yne haria pote waku.
Yt Naku I Watunug Aimikyꞌesat Ewy
13 Uiwyriaꞌin Tupana tum ahepe tesaika hap wakuap nug hamo aimikyꞌesat oktan nuat hamuat nug hamo. Maꞌato yt naku i -Uimikyꞌesat ewywuat yn aru atunug watoꞌe neꞌi pote yt naku i paĩ are. Katupono uiꞌairo raꞌyn tomikyꞌesat nug hamuat tupono waku watoꞌe. Yt naku i aimikyꞌesat yn watunug. Katupono towat tomikyꞌesat nug hamo aiꞌairo aiwoꞌopowyro woꞌokyꞌe hamuat etiat hap.
14 Mio tã e ti Tupana Muisei miwan me -Eweiꞌatukyꞌe ro miitꞌin aikotã eweikyꞌe hap oktan e. Miꞌi tupono karãpe watoꞌopowyro aiwoꞌokyꞌe hap ete pote Tupana mikyꞌesat nug haria wo aito watopyhuꞌat.
15 Maꞌato karãpe watikuasa iraniaꞌin wahenoi aiwẽ pyi aheso hap yt iꞌe hap ewy i watomaꞌat neꞌi wẽtup ok pote aikotã miat haiwot rakaria ewywuat watopyhuꞌat. Miitꞌin u hat ewywuat watoineꞌen. Eiweꞌeg wo o miꞌi tã nug hap pupi are.
16 Miꞌi tupono uiwyriaꞌin atikyꞌesat Tupana Paꞌãu mikyꞌesat nug haria wo eweikupteꞌen hap Tupana mikyꞌesat ewywuaria wo eweikupteꞌen. Yt atikyꞌesat i eiwanetup hap kaipywiat neꞌi nug haria wo eweikupteꞌen. Eimikyꞌesat sese neꞌi nug haria wo hap yt atikyꞌesat i.
17 Miꞌi turan aiwat aimikyꞌesat neꞌi yt Tupana mikyꞌesat ewy hin i. Aimikyꞌesat poꞌog neꞌi watunug mote yt watunug kuap i Tupana mikyꞌesat ewy.
18 Pyno Tupana Paꞌãu mikyꞌesat ewy raꞌyn watunug hawyi atunug neran Muisei mienoi uhehakyeraꞌat hamo yt watoꞌe kuap i.
19 Maꞌato mekewat aimikyꞌesat ewy watunug neran mote yne haryporiaꞌin wywo watoineꞌen neꞌi. Iꞌewyte watuwanetup saꞌag hap he neꞌi. Iꞌewyte aiminug saꞌag yn watunug kuap.
20 Tupana saꞌag watimotypot kahato pote watopotkuasa wanikap mo watoineꞌen. Sehay uuka uuka hatno watoineꞌen. Ihayꞌywyi rakatno watoineꞌen. Ipyꞌahak takatno watoineꞌen. Eikai poꞌog uruto urutukupteꞌen e haria wo woꞌopatꞌok patꞌok haria wo watoineꞌen.
21 Yt watopotꞌoksat i. Imopẽꞌã rakaria wo watoineꞌen pote woꞌoeroꞌok woꞌoeroꞌok haria ewywuat gupteꞌen haria ewy watoineꞌen. Miꞌi pote eiweꞌeg wo o katupono miꞌi tã neꞌi nug haria yt tuwehytꞌok kuap i Tupana Morekuatno topyhuꞌat hap eꞌat pe yt tuwehytꞌok kuap i hetama pe.
22 Maꞌato Tupana Paꞌãu mikyꞌesat ewywuat watunug hawyi woꞌokyꞌe haria wo watoineꞌen. Woꞌomowepiit haria wo watoineꞌen. Woꞌokuap haria kahato wo watoineꞌen. Miit perupꞌi wo watoineꞌen. Woꞌowese haria wo watoineꞌen. Aiwoꞌopiat aiꞌe hap nug haria wo watoineꞌen.
23 Yt wemowato haria wo i watoineꞌen. Wewaĩ kuap kahato haria wo watopyhuꞌat. Karãpe miꞌi tã e hap ewy watunug hawyi yt kat i ahewaĩ Muisei mienoi kaipywiat hap tuwẽtem aipiit pyi e. Miꞌi pote iperupꞌi rakatno watoineꞌen e. Watuwenapin kahu kahato pote miꞌi hap yn tuwẽtem Tupana Paꞌãu kaipyi aipiit pyi. Miꞌi tã e hap yne. Miꞌi waĩꞌe hap mopoꞌinik hap yt kat i toineꞌen e.
24 Pywo pe ti Aiporekuat Iesui po pe raꞌyn watopyhuꞌat pote mekewat aiwanetup hap aimikyꞌesat saꞌag koꞌi topap yne raꞌyn. Miꞌi hawyi yt iheg muo hin i aiminug saꞌag koꞌi tukupteꞌen. Katupono Iesui watno raꞌyn watopyhuꞌat pote.
25 Nimo yt imohey i te turan aimuꞌe kahato Tupana Paꞌãu Iesui mohey ahepiat hamo. Koitywy poꞌog naꞌyn Tupana Paꞌãu aimuꞌe Tupana mikyꞌesat ewywuat nug hamo.
26 Toꞌiro watipywo koitywy aimuꞌe hap imikyꞌesat nug hamo yt kat i aheha sio pywo sio yt aiꞌe hap pun neꞌi wywo aiwoꞌoehay sat hap koꞌi wywo.
