Korosi 3:1-25
3 Aipotypot Iesui tokuꞌuro hawyi tuwẽtem guꞌuro pyi. Koitywy watomohey Iesui toineꞌen atipy pe Toꞌywot Tupana po sese kai hap watomohey. Miꞌi pote wẽtup miit piit ewy yn watopyhuꞌat. Karãpe Iesui tuwẽtem guꞌuro pyi hawyi aito imohey haria iꞌewyte watuwẽtem guꞌuro pyi hap ewy. Karãpe taꞌam atipy kape hawyi aito iꞌewyte wataꞌam atipy kape hap ewy. Miꞌi tote Aipotypot Iesui taꞌapyk Tupana po sese kai. Toꞌywot motypot hawe toineꞌen itote. Waku miꞌi kape aiwanetup hap.
2 Waku watuwanetup atipy kape aikope Aipotypot Iesui toineꞌen hap kape. Waku aiwanetup hap Aikaꞌiwat atipy piat wanetup hap ewy are. Yt naku i watuwanetup mesuwarotiaria yt imohey i haria ewy katupono mesuwarotiat kape yn teꞌeruwanetup.
3 Watimohey Iesui hawyi wẽtup piit ewy watoineꞌen. Ikuꞌuro hawyi aikotã watoineꞌen ipiit pe hap ewy ikuꞌuro hawyi aikuꞌuro hap topyhuꞌat hap ewy. Tuwẽtem miꞌi pote watuwẽtem aito guꞌuro pyi hap ewy. Koitywy Aikaꞌiwat Iesui toineꞌen atipy pe Toꞌywot wywo i raꞌyn. Miꞌi hawyi aito ipiit pe watoineꞌen. Miꞌi pote waku yt kat i mesuwarotiat saꞌag koꞌi kape watuwanetup.
4 Karãpe taꞌaipok i raꞌyn mesuwat yi kape hawyi aito wataꞌaipok iwywo te ipiit piat ieineꞌen haria aito hap ewy. Wẽtup miit ewy yn naꞌyn watoineꞌen mekewat eꞌat pe. Iwywuat iwemoherep mesuwe pote watuwemoherep e. Mekewat eꞌat pe Iesui motypot hap eꞌat kahato iꞌewyte aimotypot hap eꞌat katupono imohey haria aito ipuꞌi kawiat ewywuat aito pote. Miꞌi hap eꞌat pe -Pywo iꞌatuꞌe iraniaꞌin yt imohey i haria.
Waku Yt Watunug Aipiit Mikyꞌesat Ewy
5 Waku watiꞌakit yne aiwanetup saꞌag hap aiwanetup hawiat. Waku watiwaure yne saꞌawyꞌi wuat aiwary wary hap aheꞌaito aito hap. Miꞌi hap waku watoiat yne e. Waku watipun yne yt ahegyiꞌat i hap katupono yt ahegyiꞌat i hap saꞌag kahato topyhuꞌat Tupana wanetup hawe. Aikotã ariaꞌyp nu kawiat Tupana iãꞌãkap motypot hap yt naku i hap ewy te yt ahegyiꞌat i hap topyhuꞌat yt naku i Tupana wanetup hawe. Waku watimak aipiit mikyꞌesat saꞌag koꞌi aiwemoti hap koꞌi. Waku wahasep wẽtup ok aheharyꞌi wuat kyꞌesat i hap wẽtup ok aheꞌaito wuat kyꞌesat i hap. Waku waĩ watoꞌe aiwanetup hawe aipotmoti te moti te hap koꞌi are. Waku watiꞌauka aiꞌe hap aiwanetup hawe -Uiwatno yn atikyꞌesat ekat koꞌi e hap. Waku yt kat i ihainia wary wo hap aiwanetup hawe.
6 Katupono miꞌi hap koꞌi watunug mote yt Tupana mikyꞌesat ewy hin i watunug. Miꞌi tã yt imohey i haria raꞌyn inug aat kaꞌap. Yt naku i watuwat miꞌiria ehay upi. Miꞌi upi watuwat pote Tupana miꞌapiheg koꞌi wo watopyhuꞌat aru katupono Tupana taꞌatunug taꞌatuewanikap wo miꞌi tã nug haria.
7 Miꞌi minug saꞌag koꞌi ete haiwot kahato Tupana toineꞌen miꞌi tã watunug pote. Saꞌawyꞌi yt imohey i te turan miꞌi tã yn aheko saꞌag yn watunug kuap. Pyno yt atunug i uiminug saꞌag koꞌi watoꞌe saꞌawyꞌi maꞌato yt watoiat kuap i katupono saꞌag nug hap eropat haria wo watukupteꞌen saꞌawyꞌi.
8 Maꞌato koran waku watiꞌapun pya aikai yt aiwese i hap. Waku watimoperupꞌi ahaiwot neꞌi hap. Waku watiwaure aipyꞌahak potꞌi miitꞌin etiat hap. Waku yt uwe i watimohit ahehay wo. Yt naku i watipoepyk poepyk neꞌi iraniaꞌin e. Yt naku i wahuꞌat aiwoꞌomoti te hap sehay saꞌag nug hap etiat. Waku watiwaure yne yt naku i nug hap koꞌi.
9 Waku watiwaure aheso miitꞌin kapiat hap. Yt naku i ahehay aheso heso hamo katupono watunug saꞌawyꞌi yt watikuap i te Iesui turan aheko saꞌag upi yn watunug neran. Aikotã watihep ahesokpe potꞌi koꞌi hawyi watopag ahesokpe ipakup i koꞌi raꞌyn hap ewy waku watipugha saꞌawyꞌi wuat aheso hap. Miꞌi hawyi waku watopag aiwanetup hap pywuat hap ewy. Waku watuwepainug ahesokpe pakup hap ewy ahehay pywuat aiꞌe hap ewy.
10 Watimohey hawyi Tupana aimopakup i miit pakup mo watopyhuꞌat toiãꞌãkap sese ewy ainug. Miꞌi pote waku mekewat yt naku i nug hap aipiit piat aiwanetup hawiat ikuꞌuro rakat ewy topyhuꞌat. Yne eꞌat pe Tupana ainug kahu aiwanetup hawe poꞌog poꞌog saꞌawyꞌi wuat kai. Yne eꞌat pe Tupana kuap haria wo watopyhuꞌat poꞌog poꞌog. Koitywy Tupana tikyꞌesat tokuap hap kaipyi towy ok sese wo aito hap. Miꞌi hawyi toikyꞌesat aiwanetup hap towanetup hap ewy.
11 Karãpe watopyhuꞌat Iesui mohey haria Tupana ainug wẽtup ywania pakup wo ewywuat. Iuteu ywania aito pote sio yt Iuteu ywania i aito pote sio ahemurui sokpe yt kat i sio toineꞌen Tupana wanetup hawe wẽtup ywania pakup yn ewy watopyhuꞌat. Sio aito tapyiꞌaria sio yt sio gaꞌapy piaria sio yt miit akag sio miit emiit wẽtup ywania yn Tupana wanetup hawe aito. -Eipe Uimipoꞌoro Eiporekuat nuat mohey haria eipe e ahepe miꞌi pote wẽtup tapyiꞌa yn uiwanetup hawe eweikupteꞌen e Tupana ahepe. Eipe Uimipoꞌoro eiam eipe e. Uimipoꞌoro Eiporekuat nuat kyꞌe haria eipe e Tupana. Sio Tapaiunꞌã sio yt sio ipe kytsig sio yt wẽtup ywania yn eipe uiwanetup hawe Uhaꞌyru emiitꞌin eipe pote e Tupana ahepe.
Waku Aipainug Hap Tupana Mikyꞌesat Ewy Yn
12 Waku watuwepainug hap ewy waku ahesokpe pakup watopag maꞌato wẽtup ahesokpe pakup woꞌokyꞌe hap kawiat. Wẽtup aipainug hap woꞌowese hap. Wẽtup aipainug hap -En poꞌog waku uikai e hap aiwanetup hawe. Wẽtup aipainug hap paa e hap. Wẽtup hap aipainug hap aiperupꞌi hap. Wẽtup Iesui mohey motꞌi hap. Miꞌi koꞌi wo waku watuwepainug are.
13 Iꞌatu kahato Tupana watnuat aimokahu hap. Wẽtup woꞌopowyro hap. Wẽtup yt aipotmopyꞌahak i hap. Wẽtup aiwoꞌoewaure aiwoꞌominug saꞌag etiat hap. Wẽtup aipainug hap aiwuꞌuka hap monik hap. Wẽtup aiwoꞌoehay aiwoꞌopiat hap -Waure wo areineꞌen uhyt mimi mana emiꞌaparap uhepiat hap kai aiꞌe hap. Miꞌi koꞌi yne waku ahesokpe pakup ewywuat aiwepainug hap ikahu rakat ewywuat. Miꞌi wo waku watuwepainug aikotã Iesui tiwaure ahepiat iꞌaparap tetiat hap ewy te waku watiwaure iraniaꞌin piat hap aiꞌaparap hap.
14 Wẽtup aipainug hap toineꞌen ikahu poꞌog torannia kai miꞌi ti aiwoꞌokyꞌe hap kawiat. Yt naku i watiwaure aiwoꞌokyꞌe hap katupono karãpe aiwoꞌokyꞌe hap toineꞌen hawyi aiwoꞌowese hap topyhuꞌat wẽtup miit ewywuat yn watopyhuꞌat.
15 Aikaꞌiwat Iesui ainug kahato aipyꞌa piat aiwoꞌowese haria wo. Miꞌi hawyi karãpe yt aiwoꞌowese i hap putꞌok e ahete miꞌi hawyi haty kahato aipyꞌa pe. Miꞌi hawyi meremo watikat aiwoꞌowese hap i raꞌyn katupono Tupana tikyꞌesat kahato aiwoꞌokyꞌe hap. Toikyꞌesat kahato watoineꞌen wẽtup woꞌokyꞌe haria sok ewy yn mesuwiat aheineꞌen turan. Miꞌi hap kape ti aikay kay mesup. Toikyꞌesat kahato watoꞌe aiwoꞌope -Arehum ewowi uhyt mehin mana mimi e hap ewy toikyꞌesat. Uimowepiit en waku watoꞌe. Toikyꞌesat -Arehum emiium ete mehin mana piꞌã kurum e hap ewy toikyꞌesat aiwoꞌope.
16 Sehay wakuat Aipotypot etiat Iesui etiat Tupana tikyꞌesat kahato aiwanetup hawe aipyꞌa pe. Toikyꞌesat yne Iesui mienoi aikai howapy sakpo hap ti raꞌyn toikyꞌesat. Toikyꞌesat yne Tosaꞌyru ehay aipyꞌa pyi tuwẽtem nakat aikotã hekat rakat hegyiꞌat rakat tum hap ewy. Toikyꞌesat ahegyiꞌat kahato hap tehay wywuat torannia pe. Toikyꞌesat watiꞌatumuꞌe kahato iraniaꞌin tehay wepy puat hap. Toikyꞌesat watiꞌatumuꞌe kahato tehay wo iraniaꞌin hap yne aiweꞌeg hap wywo waku aiwoꞌomuꞌe hamo. Toikyꞌesat morekuat Tawi wepy hawuo watuwepy hap. Toikyꞌesat tehay kaipywiat hap watuwehum kahato tewowiat wepy hamuat wuatꞌi ehamo hap. Toikyꞌesat watuwepy mekewat sehay ikahu rakatno tuetiat hamo. Toikyꞌesat watuwepy mekewat saꞌawyꞌi wuat wepy hap pyi. Toikyꞌesat towawiat wepy hap aipyꞌa pywiat hap Topaꞌãu wywo. Toikyꞌesat watuwehum tewowiat wepy hap mywo -Waku kahato En aiꞌe hap toikyꞌesat. -Emiium waku kahato Tupana aiꞌe hap toikyꞌesat.
17 Toikyꞌesat yne aiminug koꞌi Tosaꞌyru Aipotypot Iesui motypot hap. Toikyꞌesat yne ahehay Tosaꞌyru Iesui set motypot hap. Toikyꞌesat kahato ahehay towawiat hap aiwepiit hap wywo. Toikyꞌesat ahehay towawi Tosaꞌyru set upi hap. Toikyꞌesat watoꞌe -Uruporekuat nuat urumowepiit kahato. En waku kahato Esaꞌyru waku kahato emiium e hap ewywuat aiꞌe hap Tupana tikyꞌesat.
18 Manaꞌin erepyhuꞌat ro eꞌaito ehay upi Iesui mohey hat en mote. Etunug no eꞌaito mikyꞌesat ewy Tupana mikyꞌesat ewy are.
19 Mehinꞌin waku watikyꞌe kahato aheharyꞌi aipyꞌa pyi. Yt naku i watimohit miꞌiria ahehay wo. Yt naku i watoineꞌen marakꞌa wo aheharyꞌi ete.
20 Hirokaria kurumꞌin piꞌãꞌin eweimohey Iesui pote erepyhuꞌat ro eꞌywot ety ehay upi. Eꞌywot ety motypot hatno ereineꞌen mote Tupana mowepiit hatno ereineꞌen are.
21 Papaiꞌin waku eweinapin ehaꞌyruꞌin ehakiꞌytꞌin iꞌatukyꞌe hawuo wen maꞌato yt etimopyꞌahak teiꞌo ehehay saꞌag wo. Etiꞌapiheg apiheg yn mote yi kape yn tehaꞌat aru hawyi iꞌarot rakaria wo tukupteꞌen aat kaꞌap.
22 Miitꞌin eropat haria mesuwe worohoꞌonapin neran ewetunug no Mesuwarotiaria eikaꞌiwaria piat mikyꞌesat ewy waku ewetunug. Ehetuꞌisaria eipoꞌoro hap ewy ewetunug no e. Yt eimikyꞌesat ewy pykai i maꞌato eiꞌakag mikyꞌesat ewy ewetunug are. Eikaꞌiwat okpe wuat neꞌi pykai o eweiwepotpap ihamo hap ewy e. Yt naku i aheha mesuwarotiat aikaꞌiwat kape sio tehaꞌat sio yt aipotpap nug hap kape aiꞌe hawe. Poꞌog waku watuwepotpap haty wo aipyꞌa pyi Tupana eropat haria aito pote.
23 Waku watuwepotpap kahato aikaꞌiwat mesuwarotiat mikyꞌesat nug hap ete maꞌato aiwanetup hap Aikaꞌiwat atipy piat potpap nug hap watunug mesuwat motpap nug hap kaipyi.
24 Waku watoꞌe aipyꞌa pe -Aipotpap saꞌup sese topyhuꞌat atipy pe waku nug haria aito mesuwe pote waku watoꞌe. Itote atipy pe tutum aru ahaꞌup watuwepotpap mesuwarotiat pykai katupono Aikaꞌiwat Iesui eropat haria sese aito waku watoꞌe.
25 Aiminug waku pote haꞌup toineꞌen Tupana miium muat. Maꞌato waku aiweꞌeg wo katupono aiminug saꞌag saꞌup iꞌewyte Tupana tum. Waku aiweꞌeg wo katupono Tupana tikyꞌe kahato torannia aitoria toꞌoewyꞌewy. Yt naku i watunug mote aiꞌapiheg sio aito miitꞌin akag sio aito miitꞌin mimotypot sio aito yt uwe mikuap i e. Miꞌi pote toꞌoewyꞌewy toiꞌatuꞌapiheg yt naku i nug tipyt. Wẽtup eꞌat pe ti aru toimoherep wuatꞌi pe aiminug saꞌag koꞌi yt heremo i rakat koꞌi -Waku kahato eipe torannia iraniaꞌin toꞌe ahepiat pykai toiꞌatuꞌapiheg yt naku i nug haria.
