Maku 10:1-52
10 Miꞌi hawyi Iesui toto i raꞌyn yi Iuteu kape. Miꞌi hawyi toto Iutãu hy sakpo. Miꞌi hap tote teꞌeruwaꞌatunug typyꞌi kahato howa kape. Miꞌi hawyi tohenoi henoi iꞌatuepe tomikyꞌesat ewy Tupana ehay.
2 Miꞌi turan nagnia ehay enoi haria tõꞌẽ howa kape imaꞌat teran haype apo iꞌatuꞌe -Uhyt urunapin En sio waku apo urueharyꞌi wywo urutoꞌoꞌatoiat wẽtup ok wywuat i raꞌyn hamo iꞌatuꞌe Iesui pe.
3 Miꞌi hawyi Iesui tiꞌatuwesat -Kat eĩ pyno nimuat ahaꞌaseꞌi Muisei ainapin miꞌi hap yt eweikuap i apo e.
4 Miꞌi hawyi taꞌatuwesat -Nimo Muisei toꞌe -Eiwoꞌoꞌatoiat teran pote ewetunug miwan popera tote yt eiwoꞌowese i hap morekuat ehamo hawyi ti waku eiwoꞌoꞌatoiat e Muisei saꞌawyꞌi iꞌatuꞌe.
5 Maꞌato Iesui tiꞌatuwesat -Eweikuap kat pote Muisei einapin mio tã e. Pyno ahenoi ehepe. Taꞌi yt eiwoꞌokyꞌe kuap i ti eipyꞌa heg mote. Miꞌi pote ti Muisei mio tã e miwan me e.
6 Maꞌato saꞌawyꞌi sese ti yt miꞌi tã hin i katupono saꞌawyꞌi te ti Tupana tunug miit ipaiꞌat iwaryꞌi e.
7 Miꞌi tupono waku ihainia tiꞌatoiat toꞌywot toty hawyi teharyꞌi wywo toineꞌen e.
8 Miꞌi hawyi ihainia teharyꞌi wywo wẽtup piit ieineꞌen hap ewy raꞌyn topyhuꞌat e.
9 Miꞌi tupono yt eweitek teiꞌo Tupana mipoꞌi woꞌokyiꞌat hap e.
10 Getap wiat hawyi iwyriaꞌin apo iꞌatuꞌe Iesui pe -Kat toꞌe hawe som mio tã iꞌatuꞌe.
11 Miꞌi hawyi toiꞌatuwesat -Uwe uwe teharyꞌi atoiat miꞌi hawyi toineꞌen wẽtup ok wywo i raꞌyn miꞌi hat ti yt naku i inug teharyꞌi saꞌawyꞌi pe Tupana wanetup hawe e.
12 Iꞌewyte ti uwe teꞌaito atoiat miꞌi hawyi toineꞌen wẽtup ok wywo i raꞌyn miꞌi hat ti yt naku i inug teꞌaito saꞌawyꞌi pe Tupana wanetup hawe e.
Iesui Tiꞌatupoityro Hirokaria
13 Miꞌi hawyi miitꞌin terepoꞌok teran hirokaria Iesui ewowi iꞌatuewaku topo wuat hamo. Maꞌato ipotmuꞌeria tiꞌatupyhyp hirokaria howawi waĩꞌiꞌatuꞌe.
14 Miꞌi pote ipyꞌahak Iesui temiitꞌin ete hawyi toꞌe -Tero tõꞌẽ uhewowi hirokaria e. Yt eweipyhyp teiꞌo uhewowi hirokaria paĩ e. Katupono karãpe Tupana topyhuꞌat Wuatꞌi Ywania Miitꞌin Porekuat no miꞌi hap eꞌat pe hemiitꞌin imohey haria hirokaria ewy raꞌyn tukupteꞌen hetama pe.
15 Pywo pe ti eweiwat teran aikope Tupana toineꞌen Morekuat no hap kape pote aikotã hirokaria tikyꞌesat tuwehytꞌok taꞌatuty taꞌatuꞌywot kapiat hap ewy o eweikyꞌesat eiwehytꞌok hap maꞌato yt pote ti aru yt eiwehytꞌok hin i atipy pe e Iesui topotmuꞌeria pe.
16 Miꞌi hawyi hirokaria toiꞌatuꞌokhytsat hawyi topo wo toiꞌatuewaku. Toiꞌatupoityro yne raꞌyn.
Hekat Rakat Hẽtup Kat Som Waku Tutunug
17 Miꞌi hap tote pyi Iesui toto raꞌyn turan wẽtup ok miit hekat rakat punꞌe Iesui ewowi muap upi putꞌok toꞌe hawyi tuwepỹꞌãtutuk hewa kape hawyi toꞌe -Woꞌomuꞌe hat e Wakuat kahato En e. Miꞌi pote aikotã are som waku atunug uheineꞌen wuatꞌi piat puẽti hamo e.
18 Miꞌi hawyi Iesui toꞌe mekewat miit pe -Kat poteĩ uhepe en Wakuat ere. Taꞌi Tupana yn ri toineꞌen Wakuat.
19 -Etikuap apo Tupana woꞌonapin hap koꞌi yt erepotꞌauka teiꞌo e hap yt wẽtup ok wywo teiꞌo eharyꞌi eꞌaito e hap yt seroꞌok ere teiꞌo e hap yt eso teiꞌo e hap yt erepotmaꞌat teiꞌo e hap etimotypot eꞌywot ety e hap etikuap taꞌyn e.
20 Miꞌi hawyi kurum iwasu tiwesat -Woꞌomuꞌe hat uihire pyi te ti yt atiꞌaparap i mio tã e hap eꞌewy e.
21 Miꞌi hawyi Iesui tehaꞌat hewowi ikyꞌe kahato hap wywo hawyi toꞌe -Mehin wẽtup mo etunug hawyi waku ereineꞌen neꞌen Tupana wywo e. Pyno ereto o eꞌyat kape hawyi etimoꞌẽ yne ekareꞌen yt hekat i rakaria pe hawyi eraꞌaipok uhewowi ereto uhupi hamo e. Miꞌi pote ti aru ekareꞌen sese etipuẽti Tupana etama pe e.
22 Mio tã e Iesui pote paa e neꞌi raꞌyn hawyi toto Iesui kaipyi yt iwepiit i raꞌyn katupono iwat hekareꞌen iwato kahato pote yt toimoꞌẽ teran i.
23 Miꞌi hawyi Iesui tehaꞌat temiitꞌin kape hawyi toꞌe -Are paĩ niatpo kahato ti wekareꞌen kyꞌe haria tuwehytꞌok aikope Tupana toineꞌen Morekuatno hawe e.
24 Miꞌi hawyi hemiitꞌin teꞌeruwewanetup kahato ihay kape miꞌi hawyi Iesui toꞌe i -Taꞌi niatpo kahato ti wekareꞌen mohey hat teke aikope Tupana Morekuatno toineꞌen hawe e.
25 Poꞌog wyti yt niatpo i Kameru tokosap awi ehapo kaꞌa puo hekat rakaria wehytꞌok Tupana etama piat hap kai e.
26 Mio tã e pote hemiitꞌin gytꞌiꞌatuꞌe hawyi teꞌeroꞌe toꞌope -Aikotã haria som pyno toiꞌatuehakyeraꞌat hamuat iꞌatuꞌe.
27 Mio tã iꞌatuꞌe pote Iesui tehaꞌat iꞌatuewowi hawyi toꞌe -Pywo ti rat yt uwe i tuwehakyeraꞌat kuap tuwewi. Tupana yn tiꞌatuehakyeraꞌat kuap miitꞌin e. Pywo kahato tuwewi miitꞌin yt taꞌatupuẽti taꞌatuehakyeraꞌat hap maꞌato Tupana wywo yt niatpo hin i hekareꞌen koꞌi atipy piat toineꞌen mote.
28 Miꞌi hawyi Peteru toꞌe raꞌyn -Urumuꞌe hat saꞌawyꞌi ti uruꞌatoiat yne uruekareꞌen koꞌi urutuwat eupiat hamo e Peteru Iesui pe.
29 Miꞌi hawyi Iesui toꞌe -Atikuap eimiꞌatoiat yne hap e. Taꞌi pywo pe ti areꞌe ehepe uwe uwe uhehay moherep wẽtup ywania pe toto uikyꞌe haype hawyi iꞌatoiat toꞌyat towyriaꞌin toty toꞌywot tomepytꞌin tomikoi koꞌi miꞌi hat poꞌog toipuẽti saꞌawyꞌi wuat wakuat tomiꞌatoiat koꞌi kai e.
30 Miꞌiria taꞌatupuẽti mesuwarotiat koꞌi kai poꞌog poꞌog naꞌyn saꞌawyꞌi wuat kai aikotã 100 hap ewy aru toipuẽti toꞌyat koꞌi towyriaꞌin totyꞌin tomepytꞌin tomikoi koꞌi saꞌawyꞌi wuat wẽtup takat tomiꞌatoiat kai e. Iꞌewyte ti aru toipuẽti miitꞌin mikyryꞌi hap uhehay upi uhupi eweiwat pote e. Maꞌato mesuwarotiat tokuꞌuro hap saipepiat toipuẽti hamuat toieineꞌen hap yt sakewuat ikahuro rakat i raꞌyn e.
31 Mekewat eꞌat pe ti aru ipoityꞌi kahato saꞌawyꞌi wuat mesuwarotiaria iwato rakaria teꞌeropyhuꞌat kurin rakaria wo yt miitꞌin mimotypot koꞌi i wo e. Maꞌato saꞌawyꞌi wuat kurin nakaria paa e haria ti aru teꞌeropyhuꞌat poꞌog iwato rakaria wo poꞌog mimotypot koꞌi wo wuatꞌi miitꞌin kai atipy pe e Iesui temiitꞌin me.
32 Miꞌi hawyi Iesui ipotꞌam towyriaꞌin eꞌyian me tawa wato Ierusarẽi kape. Miꞌi turan teꞌeruwanetup kahato ipotmuꞌeria maꞌato iraniaꞌin hewatꞌypmo haria iꞌatuwuwu kahato. Miꞌi hawyi Iesui tiꞌatukay kay tuwewowi temiitꞌin tohenoi iꞌatuepe aikotã aikotã tawa wato Ierusarẽi miaria tunug tuwetiat hamuat.
33 -Watuwat hamuat wyti tawa Ierusarẽi kape e. Putꞌok watoꞌe itote hawyi ti aru Miitꞌin Eꞌykeꞌet paꞌi kororia iꞌewyte miwan enoi haria topag naꞌyn suraraꞌin po pe raꞌyn e. Miꞌi hawyi miꞌiria ti aru ipoꞌoro raꞌyn iꞌauka hamuat kape e hawyi ti aru iraniaꞌin ywania po pe ipag iꞌauka hamo e.
34 Miꞌi hawyi Kereku ywania po pe hawyi iꞌatumikyryꞌi kahato toineꞌen Kuitu kuitu iꞌatuꞌe uhete e. Miꞌi hawyi ti aru taꞌatupok pok taꞌyn hawyi ti aru taꞌatuꞌauka raꞌyn wen maꞌato ti aru myẽꞌym eꞌat yn toineꞌen guꞌuro pe hawyi ti aru toineꞌen i raꞌyn Miitꞌin Ykeꞌet e Iesui muap upi tawa Ierusarẽi kapiat tuwat hap upi.
Tiaku Hawyi Iuwãu Iesui Kai Te Tukupteꞌen Teran
35 Miꞌi hawyi hemiitꞌin Iuwãu Tiaku Sepeteu saꞌyruꞌin tuwat Iesui kape hawyi taꞌatuhẽtup tope -Urumuꞌe hat etum uruepe kat urumikyꞌesat oktan iꞌatuꞌe.
36 Miꞌi hawyi toꞌe -Pyno kat som eweikyꞌesat atum ehepe e.
37 Miꞌi hawyi taꞌatuwesat -Pyno karãpe eropyhuꞌat Wuatꞌi Miitꞌin Porekuatno turan uruikyꞌesat urutaꞌapyk epo sese kai hawyi epo ran kai hap iꞌatuꞌe
38 Maꞌato Iesui tiꞌatuwesat -U yt eweikuap i kahato kat som ewehẽtup uhepe hap e. Pyno uhekuiꞌa pyi apo eiweꞌyꞌu kuap e. Miꞌi hawyi wẽtup setꞌok hap ewy iꞌewyte uhatek hap apo ewehãꞌãg kuap e.
39 Miꞌi hawyi taꞌatuwesat -Taꞌi uruhepap iꞌatuꞌe. Miꞌi hawyi Iesui toꞌe iꞌatuepe -Taꞌi eiweꞌyꞌu ti aru uhekuiꞌa pyi. Iꞌewyte ewehãꞌãg wyti aru uhatek hap e.
40 Maꞌato eimiẽtup uhepiat ti yt atum kuap i ehepe katupono Tupana tiꞌairo yn naꞌyn uiꞌyatypiat apyk hanuaria e Iesui Tiaku Iuwãu pe.
41 Mio tã iꞌatuꞌe taꞌatuhẽtup Iesui piat pote iraniaꞌin hemiitꞌin iꞌatupyꞌahak Iuwãu Tiaku ete.
42 Miꞌi hawyi Iesui tiꞌatukay kay i raꞌyn tuwewowi hawyi toꞌe iꞌatuepe -Uhekatuwyria e eweikuap aikotã mesuwarotiat morekuaria teꞌeruwemowato kahato hap temiitꞌin poꞌoro hamuat e. Tuꞌisaria iꞌewyte iꞌatumipoꞌororia tuꞌisaria koꞌi iꞌewyte teꞌeruwemowato temiitꞌin poꞌoro hamuat sehay pirik wo e.
43 Maꞌato mesuwarotiaria eporekuaria ewy yt atikyꞌesat hin i eweikupteꞌen e. Maꞌato uwe wemowato teran hat wuatꞌi powyro hatno wuatꞌi eropat haria wo waku eweikupteꞌen e.
44 Uwe topyhuꞌat eiꞌakag wo teran miꞌi hat ehemiit no waku topyhuꞌat e.
45 Katupono Uito Eheykeꞌet ariot mesuwat yi kape miitꞌin eropat hamo e. Yt ariot i mesuwe miitꞌin miat uheropat hamo e. Taꞌi miitꞌin hep yt nakuap i pywiat hamo ariot ehewowi e. Taꞌi atum neran miitꞌin me iꞌatueieineꞌen hap sese areꞌe. Iꞌatuieineꞌen hap kyiꞌat hamo ariot e topotmuꞌeria pe.
Iha Pytig Rakat Moehãite Hap Tawa Ieriko Pe
46 Miꞌi hawyi Iesui putꞌok e i tawa Ieriko pe temiitꞌin wywo. Miꞌi hawyi tuwenoꞌẽ mekewat tawa pyi miitꞌin tok puo. Miꞌi hawyi tawa ekuekai muap tote toineꞌen mehin Patimeu apyk pe. Miꞌi ti yt iha pytig i. Wuatꞌi kaipywiat kat ẽtup hat toineꞌen. Miꞌi ti Timeu saꞌyru.
47 Miꞌi hawyi toikuap taꞌyn Iesui tawa Nasare piat uut hap hawyi tohẽtup haty wo Iesui pe -Morekuat Tawi Saꞌyru ekyꞌe hap upi uhehakyeraꞌat En e.
48 Maꞌato so iraniaꞌin -Waĩꞌiꞌatuꞌe ehay pirik kahato. Epoꞌinik to iꞌatuꞌe. Maꞌato poꞌog neꞌi haty wo iwẽpapꞌi tuwatka watka -Morekuat Tawi Saꞌyru uhehakyeraꞌat En e Iesui pe.
49 Miꞌi hawyi Iesui topyhuꞌat hawyi toꞌe -Eweikay kay ro meikowo yt iha pytig i rakat e iꞌatuepe. Miꞌi hawyi teꞌeroꞌe Patimeu pe -Pyno ewepiit ro uhyt katupono Iesui ekay kay raꞌyn koitywy uhyt iꞌatuꞌe. Pyno epoĩꞌam no ereto ro hewowi iꞌatuꞌe.
50 Toikuap hawyi topysop toipun hawyi ipoĩꞌam hawyi toto raꞌyn Iesui kape.
51 Miꞌi hawyi apo e Iesui tope -Pyno kat aru emikyꞌesat atunug epe e. Miꞌi hawyi toiwesat -Woꞌomuꞌe hat uheha pakup i nug hap atikyꞌesat e. Arehaꞌat teran e.
52 Miꞌi hawyi Iesui toꞌe tope -Pyno koitywy waku raꞌyn eha ete katupono uimohey hap emoehãite raꞌyn e. Miꞌi hawyi meremo waku raꞌyn tuete taꞌakasa i raꞌyn. Miꞌi hawyi Patimeu toto muap upi Iesui upi saꞌawyꞌi wuat yt iha pytig i rakat.
